Möhtəşəm təşkilatçılıq, uğurlu nəticə

MDB Oyunları bu mənada təkcə bir yarış yox, həm də Azərbaycan idmanının yeni nəslinin doğuluş mərhələsi kimi tarixə düşdü.

Azərbaycan daha bir multiidman yarışına uğurla ev sahibliyi etdi. Odlar Yurdu bu dəfə III MDB oyunlarının təşkilatçılığını ən yüksək səviyyədə həyata keçirdi. Əvvəllər Avropa Oyunları, İslam Həmrəyliyi Oyunları paytaxt Bakıda təşkil olunmuşdusa, indi də başda Gəncə olmaqla daha altı şəhərimiz idman mərkəzinə çevrildi.

13 ölkə arasında 2-ci yer

Sentyabrın 28-dən oktyabrın 8-dək keçirilən III MDB Oyunları bir çox göstəriciləri ilə əvvəlkilərdən fərqləndi. Yarışlarda 13 ölkədən 1 624 idmançı və 2 337 nümayəndə iştirak etdi. Azərbaycan bu yarışda 340 idmançı ilə ən böyük heyətlə təmsil olundu və bu, həm ölkənin idmana verdiyi önəmi, həm də gənc nəslin artan fəallığını nümayiş etdirdi. Rusiya 262, Özbəkistan 254, Belarus 240, Qazaxıstan 147, Tacikistan 144, Qırğızıstan 126, Türkmənistan 48, Türkiyə 38, Kuba 11, Küveyt 6, Pakistan və Oman isə hərəyə 4 idmançı ilə iştirak etdi.

Yarışlar Azərbaycan üçün olduqca uğurlu keçdi. Ümumi medal sıralamasında Rusiya 231 medalla birinci yeri tutdu. Azərbaycan isə 33 qızıl, 56 gümüş və 95 bürünc olmaqla, ümumilikdə 184 medalla ikinci pillədə qərarlaşdı. Bu nəticə ölkəmiz üçün mühüm nailiyyət sayılır. Çünki Rusiya hər zaman bu cür çoxnövlü idman yarışlarının təcrübəli favoriti kimi çıxış edir. Buna baxmayaraq, Azərbaycan gənc və potensiallı heyətlə bu güclü rəqiblə demək olar ki, bərabər səviyyədə mübarizə apardı.

III MDB Oyunlarında əldə olunan ikinci yer yalnız statistik göstərici deyil, həm də Azərbaycan idmanının yeni nəsil uğur fəlsəfəsinin göstəricisidir. Gənclərin beynəlxalq arenada göstərdiyi inamlı çıxış ölkənin idman siyasətinin səmərəliliyini, regionlarda yaradılmış infrastrukturun real nəticə verdiyini və milli idman məktəblərinin düzgün istiqamətdə inkişaf etdiyini təsdiqlədi.

Üzgüçülükdən güləşə qədər

Azərbaycanın III MDB Oyunlarındakı çıxışı yalnız medal sayına görə deyil, həm də idman növlərinin rəngarəngliyinə görə xüsusi önəm daşıyır. Ölkəmizin medal mənzərəsi bu dəfə olduqca geniş idi - ənənəvi güclü növlərlə yanaşı, əvvəl az diqqət çəkən sahələrdə də ciddi uğurlar əldə edildi.

Əgər güləş, boks və taekvondo kimi növlər artıq Azərbaycan idmanının imza sahələri hesab olunursa, bu dəfə stolüstü tennis və üzgüçülük kimi nisbətən yeni istiqamətlərdə də diqqətçəkən nəticələr qeydə alındı. Stolüstü tennisçilərimiz fərdi və cütlük yarışlarında uğurlu çıxış edərək, həm kişi, həm də qadın komandaları ilə finala yüksəlib gümüş medallar qazandılar. Bu nəticə Azərbaycan stolüstü tennisinin inkişafda olduğunu göstərdi. Üzgüçülərimiz isə ümumilikdə 13 medal əldə edərək idman ictimaiyyətinə xoş sürpriz etdilər. Bu, Azərbaycanın su idman növlərində irəliləyişinin bariz sübutudur.
Ənənəvi olaraq güclü olduğumuz taekvondo üzrə idmançılarımız turnir boyu 22 medal qazanaraq yüksək səviyyədə çıxış etdilər. Güləşdə isə həm sərbəst, həm yunan-Roma, həm də qadın güləşi üzrə təmsilçilərimiz çoxsaylı qızıl, gümüş və bürünc medallar əldə etdilər. 

Boksçularımızın çıxışı da xüsusilə vurğulanmalıdır. Azərbaycan təmsilçiləri yarışları 24 medalla tamamladılar ki, bu da ümumi komanda nəticəsində ciddi paya malik oldu. Atıcılıq, qılıncoynatma, sambo, karate, badminton, avarçəkmə, batut və bədii gimnastika kimi fərqli sahələrdə də komandalarımızın qazandığı medallar ölkə idmanının çoxşaxəli inkişafından xəbər verir.
Komanda yarışlarında da Azərbaycan idmançıları yüksək səviyyədə çıxış etdilər. U-16 futbol yığmamız finalda Rusiyaya bəxtsizlik nəticəsində məğlub olaraq, gümüş medalla kifayətləndi. Qadın basketbolçularımız (3x3) isə turniri ikinci pillədə başa vuraraq MDB məkanında ən güclülər sırasında yer aldılar.

Azərbaycanın qədim milli oyunu olan çövkən isə Oyunların ən parlaq səhifələrindən birinə çevrildi. Komandamız bütün görüşlərdə üstün olaraq finalda Özbəkistanı məğlub etdi və MDB Oyunlarının qızıl medalını qazandı.

Bu yarışların ən dəyərli tərəfi isə odur ki, bütün bu nəticələri qazanan idmançıların əksəriyyəti gənclərdir. Onlar gələcək illərdə Avropa, dünya və Olimpiya yarışlarında Azərbaycan adını daha yüksək zirvələrdə təmsil etməyə hazır olduqlarını göstərdilər. MDB Oyunları bu mənada təkcə bir yarış yox, həm də Azərbaycan idmanının yeni nəslinin doğuluş mərhələsi kimi tarixə düşdü.

Hər şey ideal idi...

Azərbaycanın III MDB Oyunlarını keçirməsi ölkəmizin təşkilatçılıq gücünü bir daha sübut etdi. Yarışlar mükəmməl səviyyədə təşkil olundu – idman obyektləri, təhlükəsizlik tədbirləri, qonaq qəbulu və logistika baxımından hər şey nümunəvi idi.
Açılış mərasimi milli musiqi və rəqslərin, işıq şoularının harmoniyası ilə əsl bayram ab-havası yaratdı. Bağlanış mərasimi isə həm emosionallığı, həm də vizual gözəlliyi ilə MDB Oyunlarının zirvəsinə çevrildi.
Təhlükəsizlik yüksək səviyyədə təmin olundu, iştirakçılar və qonaqlar rahat, qayğı ilə əhatə olunmuş mühitdə oldular. Könüllülərimizin fədakar fəaliyyəti isə yarışların ruhunu tamamladı – onların səmimiyyəti və dəqiqliyi hər kəsin rəğbətini qazandı.

Bu oyunlar yalnız paytaxt üçün deyil, həm də regionlar üçün böyük əhəmiyyət daşıdı. Regionlarda yaradılan infrastruktur həmin şəhərlərin gələcək idman və turizm inkişafına ciddi töhfə verəcək.

Nəticə etibarilə, III MDB Oyunları Azərbaycanın beynəlxalq səviyyədə etibarlı, güclü və qonaqpərvər ev sahibi olduğunu bir daha göstərdi. Yarışlar həm ölkəmiz üçün qürur mənbəyinə, həm də region idmanının inkişafı üçün mühüm mərhələyə çevrildi.