2 mindən çox silahın nümayiş olunduğu sərgi

“ADEX-2022” sərgisində təyyarə və aviasiya sistemləri, dəniz gəmiləri və hərbi dəniz sistemləri, zirehli döyüş nəqliyyat vasitələri, radioelektron sistemlər, optik-elektron avadanlıq və sistemlər, pilotsuz sistemlər, hərbi geyim və ləvazimatlar, silah və sursat, simulyatorlar və təlim sistemləri, radiasiya, kimyəvi və bioloji müdafiə, ixracın təşviqi ilə məşğul olan müəssisələr və sair sektorlar təmsil olunub.

Bu həftə Bakı Ekspo Mərkəzində 4-cü Azərbaycan Beynəlxalq Müdafiə “ADEX” və 13-cü Beynəlxalq Daxili Təhlükəsizlik, Mühafizə və Xilasetmə “Securex Caspian” sərgiləri təşkil olunub. Müdafiə Sənayesi Nazirliyinin təşəbbüsü və təşkilatçılığı, həmçinin Müdafiə Nazirliyinin dəstəyi ilə keçirilən “ADEX” müasir silah və texnika sərgisində Azərbaycan Ordusunun qələbəsində müstəsna rol oynamış ölkənin hərbi-sənaye kompleksinin gücü, qüdrəti, müasir silahlar nümayiş etdirilib.

Kompleks mühafizə sistemlərinin nümayişi

“ADEX-2022” sərgisində təyyarə və aviasiya sistemləri, dəniz gəmiləri və hərbi dəniz sistemləri, zirehli döyüş nəqliyyat vasitələri, radioelektron sistemlər, C4ISR, optik-elektron avadanlıq və sistemlər, pilotsuz sistemlər, hərbi geyim və ləvazimatlar, silah və sursat, simulyatorlar və təlim sistemləri, radiasiya, kimyəvi və bioloji müdafiə (RKB), hərbi təşkilatlar, ixracın təşviqi ilə məşğul olan müəssisələr və sair sektorlar təmsil olunub. “ADEX”lə paralel olaraq keçirilən 13-cü Beynəlxalq Daxili Təhlükəsizlik, Mühafizə və Xilasetmə “Securex Caspian” sərgisində isə hüquq-mühafizə, sərhəd, xilasetmə, yanğınsöndürmə və xüsusi xidmət orqanları üçün ləvazimatların, kompleks mühafizə sistemlərinin, silahların perspektivli modelləri nümayiş etdirilib.

Dünyanın 30-a yaxın ölkəsindən 200-dən çox şirkət

Prezident İlham Əliyevin, Müdafiə Sənayesi və Müdafiə nazirlərinin, xarici ölkə səfirlərinin, Türkiyənin Baş Qərargah rəisi, ordu generalı Yaşar Gülerin, həmçinin Azərbaycanda səfərdə olan yüksəkrütbəli hərbçilərin də tanış olduğu sərgilər ölkə ictimaiyyəti tərəfindən böyük maraqla qarşılanıb. Bu sərgilərin Azərbaycan üçün əhəmiyyətini “Kaspi” qəzetinə şərh edən Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Arzu Nağıyev deyib ki, müasir silah və texnika sərgisi olan “ADEX” Azərbaycanın və dünya şirkətlərinin hərbi-sənaye kompleksinin gücünü, qüdrətini nümayiş etdirib. Millət vəkilinin sözlərinə görə, dünyanın 30-a yaxın ölkəsindən 200-dən çox şirkəti bir araya gətirən “ADEX” sərgisində 2 mindən çox silah-sursat və hərbi texnika sərgilənib: “Sərgidə bu sayda şirkətin iştirak etməsi xarici ölkələrlə hərbi əməkdaşlıq əlaqələrinin daha da genişlənməsi nöqteyi-nəzərindən xüsusi əhəmiyyət kəsb edir. Burada ümumilikdə 1000-dən artıq silah-sursat istehsal edən Müdafiə Sənayesi Nazirliyinin birlik və müəssisələrinin 179 adda məhsulu sərgilənib. Qürurverici haldır ki, ADEX sərgisində müxtəlif hərbi təyinatlı məhsul istehsal edən şirkətlərlə yanaşı, daha bir yerli şirkətimiz - Azərbaycanın “Improtex Industries” şirkəti özünün istehsal etdiyi və artıq Qarabağda sınaqdan keçirilmiş çox mühüm əhəmiyyətli minatəmizləyən texnikalarını təqdim etdi. İşğaldan azad olunmuş ərazilərin minə və partlamamış susrsatlarından təmizlənməsində, nəticə etibarilə həmin ərazilərə tezliklə həyatın qayıtmasında bu cür yerli şirkətlərin, onların istehsal etdiyi texnikaların mühüm rolu var. Ümumilikdə bu sərginin əhəmiyyətini yüksək qiymətləndirirəm”.

Ölkənin müdafiə qabiliyyətinin gücləndirilməsi

Müharibə, Əmək və Silahlı Qüvvələr Veteranları Təşkilatının sədr müavini, hərbi-siyasi ekspert, polkovnik Cəlil Xəlilov isə qeyd edib ki, bu sərgilər hər şeydən əvvəl Azərbaycanın hərbi sənayesinin gücünü, onun sürətli inkişafını göstərir. Ekspertin fikrincə, sərgilərdə Azərbaycan istehsalı olan çox sayda silah-sursat, hərbi avadanlıqlar, müxtəlif texnikalar nümayiş etdirilib ki, bu da ölkəmizin hərbi qüdrətindən, onun milli hərbi sənayesinin perspektivindən xəbər verir: “Bütün bu inkişaf prosesləri Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi və bilavasitə qayğısı ilə baş verir. Prezident İlham Əliyevin sərgidə iştirakı, orada nümayiş olunan silahlarla ətraflı tanış olması bu qayğının göstəricisidir. Bakı Ekspo Mərkəzində keçirilən tədbirin daha bir önəmi dünyanın qabaqcıl dövlətlərinin, iri şirkətlərinin bu sərgilərə böyük maraq göstərməsi ilə bağlıdır. Onlar bu sərgidə istehsal etdikləri ən müasir hərbi texnikalarını, silah-sursatlarını, hərbi avadanlıqlarını nümayiş etdiriblər. Sərgidə Türkiyə, Pakistan kimi qardaş dövlətlərlə yanaşı, Rusiya, Çin, Fransa, İtaliya və sair dövlətlər də iştirak edib. Sərgiyə olan bu maraq, həm də dövlətimizin nüfuzundan, beynəlxalq müstəvidə ona olan diqqətdən xəbər verir. Bu da təbii olaraq hər bir azərbaycanlı üçün qürurvericidir. Hesab edirəm ki, Azərbaycan Ordusunun daha da inkişaf etdirilməsi və ölkənin müdafiə qabiliyyətinin gücləndirilməsi üçün biz bu sərginin imkanlarından maksimal dərəcədə səmərəli istifadə etməliyik”.

Rufik İSMAYILOV