Səmimilik, cəsarət və yaradıcılıq
"Qalina
Mikeladzenin yaradıcılığından qısaca danışsaq, onu cəmi iki sözlə xarakterizə
etmək olar: "Yüksək peşəkarlıq”. "Veteran jurnalistin Azərbaycan mədəniyyəti və
tanınmış şəxsiyyətləri haqqında esseləri, oçerkləri demək olar ki, ölkəmizin mədəni
həyatının əsl ensiklopediyasına çevrilib”.
Rus Dram Teatrında Ailə Qadın və Uşaq Problemləri üzrə Dövlət Komitəsinin
təşəbbüsü ilə keçirilən "Şöhrət” ordenli jurnalist Qalina Mikeladzenin 85 illik
yubileyi və "Qadınların missiyası” kitabının təqdimatında səslənən bu fikirlər
dəvətlilərə jurnalistlə yenidən görüşmək və onun ömür-gün yoluna yaxından bələd
olmaq imkanı verdi.
Ləyaqətin sirri
"Çətinliklər,
məşəqqətlər, əzablar və zəhmətdən doğan sevinc var bu ömür yolunda. Yaşadığı əzablar onu sevərək seçdiyi peşədən - jurnalistikadan
heç vaxt usandırmayıb”- deyə gecənin aparıcısı, yazıçı-publisist, millət vəkili Elmira Axundova veteran jurnalistin
həyat yolundan söhbət açdı: "Ailə həyatı qurmamışdan əvvəl Qalinanın çox sadə və məşhur familiyası var idi: Əliyeva. Atası Ələkbər
Əliyev partiya işçisi, rayon komitəsinin katibi, daha sonra kənd təsərrüfatı
üzrə xalq komissarının müavini idi. 1937-ci ildə Stalin repressiyaları dövründə
həbs olunmuşdu. 23 ay sürən istintaqdan sonra 8 il həbs cəzası aldı. 1939-cu
ildə Ələkbər Əliyev Maqadana sürgün edildi və 1941-ci ilin mayında ailəsi ondan
sonuncu teleqramı aldı. 4 il sonra isə uzaq Sibirdən onun ölüm xəbəri gəldi.
Balaca Qalina anası ilə tək qaldı. Onlar "Xalq düşməni” damğası ilə uzun illər
yaşadılar. Əziyyətlər, sarsıntılar gördülər, ancaq sınmadılar”. Qalina Əliyeva
orta məktəbi uğurla bitirdikdən sonra Moskva Poliqrafiya İnstitutuna daxil olub.
Üçüncü kursda onun oxuduğu fakültə başqa bir fakültə ilə birləşərək, Moskva
Dövlət Universitetinin jurnalistika fakültəsinə çevrilib. 1954-cü ildə
Q.Mikeladze universiteti müvəffəqiyyətlə bitirib və onun mətbuatda uzun və məhsuldar
fəaliyyəti başlayıb: "Qalina xanım əvvəlcə Bakıda çalışdı, ailə qurduqdan sonra
Tbilisidə müxtəlif nəşriyyat orqanlarında işlədi. 1959-cu ildən isə ömrünü həmişəlik
jurnalistikaya həsr etdi. O, bir müddət Azərbaycanın qocaman mətbu orqanı olan "Bakinskiy
raboçiy” qəzetində çalışıb. Onun analitik yazıları Mərkəzi Komitənin diqqətini
cəlb edib və Qalina xanımı «Sovetskaya torqovlya» qəzetinə Zaqafqaziya üzrə
müxbir vəzifəsinə tövsiyə ediblər. 13 il ərzində o bu qəzetin bütün Zaqafqaziya
üzrə müxbir məntəqəsinin rəhbəri işləyib. Qalina xanım bu müddətdə respublikanı
qarış-qarış gəzərək, reportajlar, portret yazılar hazırlayıb”. 1985-ci ildə
Q.Mikeladzeyə Gürcüstanın Əməkdar jurnalisti fəxri adı verilib. 1987-ci ildə
Qalina xanım təqaüdə çıxsa da, onun jurnalistik fəaliyyətinin daha parlaq dövrü
başlayıb. 1994-2006-cı illərdə Qalina xanım müstəqil «Günay» qəzetinin baş
redaktor müavini vəzifəsində çalışıb. Bu dövrdə mədəniyyət və incəsənət sahəsi
ilə bağlı yüzlərlə məqalə çap etdirib. 2003-cü ildən başlayaraq hər il
Q.Mikeladzenin publisistik kitabları işıq üzü görür. "Azərbaycanın panoraması”,
"Bakılıların sevimli teatrı”, «”Mənim zamanım” və s. əsərlərdən ibarət 15
kitabı jurnalistin adını ölkənin yazıçıları ilə bir sıraya qoyub. "Qadınların
missiyası” kitabı isə Q.Mikeladzenin sonuncu əsəridir. "Qalina xanım çox mərd və
ləyaqətli qadındır. O, ən yaxın insanlarını vaxtsız itirib, lakin sınmayıb,
özündə yaşamağa güc tapıb. Düşünürəm ki, bu ləyaqətin ən böyük sirri onun
jurnalistikaya olan sonsuz məhəbbətidir. Qalina xanım peşəsinə olan ülvi hissləri
hər gün bizə nümayiş etdirir”- deyən E.Axundova onun Azərbaycan jurnalistikası
qarşısında xidmətlərinin ölkə başçısı İlham Əliyev tərəfindən yüksək qiymətləndirildiyini
qeyd etdi: " 2015-ci ildə Qalina Mikeladze Prezident təqaüdünə layiq görülüb.
Bu yaxınlarda isə yubileyi münasibətilə "Şöhrət” ordeni ilə təltif olunub. Bu,
dövlət başçısının jurnalistə göstərdiyi böyük diqqət və qayğının təzahürüdür”.
Yüksək peşəkarlıq və intellektuallıq
Ailə Qadın və Uşaq Problemləri üzrə Dövlət Komitəsinin
sədri Hicran Hüseynova tanınmış
qadınların haqqında danışmağın, onların fəaliyyətini həmişə işıqlandırmağın
vacibliyini vurğuladı: "Azərbaycanın tarixində iz qoyan qadınlar olub, bu gün də
var, sabah da olacaq. Bu gün Azərbaycanda çox tanınmış qadınlar var. Böyük xoşbəxtlikdir
ki, Qalina xanım həmin qadınların taleyindən bəhs edib, onları daha da tanıdıb.
Gənc nəsil bu cür insanları tanımalı, onlardan nümunə götürməlidir. Çünki Azərbaycan
qadını həmişə öz gücü, öz fəaliyyəti və ləyaqəti ilə seçilən xanımlar olublar.
Millətindən, dinindən asılı olmayaraq biz "Azərbaycan xanımı” deyəndə bütövlükdə
onların böyük qüvvə olduğunu düşünürük. Qalina Mikeladze də öz fəaliyyəti ilə
bu gücü nümayiş etdirir”.
İnsan haqqları üzrə müvəkkil Elmira Süleymanova isə
Qalina
Mikeladzeyə dövlətimiz tərəfindən göstərilən diqqətin bütün qadınlara olan
qayğı kimi dəyərləndirdi: "Qalina xanım qazandığı fəxri adlara, mükafatlara, nəhayət
insanların sevgisinə öz əməyi ilə nail olub. Çünki onun bütün yaradıcılığında
insanlara məhəbbət var. Qalina xanım özünün yüksək peşəkarlığı və
intellektuallığı ilə fərqlənir. Bu xüsusiyyətlərə onun qəlbinin səmimiyyəti də
qarışır. Veteran jurnalistin 15 kitabının hər birində bu izlərə rast gəlmək
mümkündür. Biz onun əsərlərində Azərbaycan insanının, görkəmli şəxsiyyətlərin,
tanınmış qadınların portretlərini, Azərbaycan incəsənətinin bütün sahələrinin təzahürünü
görürük. Bu əsərlər böyüyən nəslin yaddaşı üçün çox lazımdır. Onlar həmin əsərlərdən
öz ölkələrinin incəsənəti, mədəniyyəti, görkəmli insanları haqqında öyrənəcəklər.
Qalina xanımın həyat yolundan gənclərin öyrənə və nümunə götürə biləcəyi çox şeylər
var”.
Ayrıca məktəb
Dövlət İmtahan Mərkəzinin direktorlar şurasının sədri
Məleykə Abbaszadə
Qalina Mikeladzenin hər bir yazısını ürəklə qələmə almasından bəhs etdi: "Mən öncə Qalina xanımı bir jurnalist
kimi tanıyırdım və onun məqalələrini oxuyurdum. Onu yaxından tanıyandan sonra
hazırlıqlı, məlumatlı, səmimi bir insanla tanış oldum. Çətin həyat yolu keçsə də,
insanlara olan sevgisini qoruyub saxlamaq, yaradıcılığa səylə davam etmək və
yeni əsərlər yazmaq hər adama nəsib olmur. Bunun arxasında istedaddan başqa,
böyük bir insanın geniş ürəyi durur. O, bizim hamımızı sevir, ona görə biz də
onu sevirik. Qalina xanımn hər bir qadın haqqında yazdığını oxuyanda elə bil o
qadınla tanış olursan və o sənin rəfiqənə çevrilir. Səmimilik, cəsarət və
yaradıcılıq - onun bütün fəaliyyətini xarakterizə edir”.
Memarlıq və İnşaat Universitetinin rektoru Gülçöhrə
Məmmədova: "Qalina
xanımın yazılarını oxumuşdum. Ancaq özü ilə iki il bundan əvvəl "Qadınların
missiyası” kitabı yazılanda tanış oldum. Bu, mənim üçün bir tapıntı idi. Çünki
bu qədər enerjisi, humanistliyi, insanlara isti münasibəti olan, gənclik
marağına və enerjisinə malik bir qadınla ilk dəfə rastlaşırdım. Qalina xanımla
etdiyimiz müzakirələr, söhbətlər çox zaman fikir mübadiləsinə çevrilirdi. Mən hər
dəfə onunla görüşəndən sonra uzun müddət bu görüşün təəssüratı altında
qalırdım. Qalina xanım gözəl jurnalist, eyni zamanda maraqlı insandır. Onunla ünsiyyətdə olmaq çox xoşdur,
çünki ondan çox şey öyrənirsən. Məni Qalina xanımla tanışlıqdan məmnun edən
onun içərisindəki həyat eşqi, insanlara qarşı məhəbbət və gözəl münasibətdir.
Ümid edirəm ki, Qalina xanım fəaliyyətini davam etdirəcək. Çünki Azərbaycanda hələ
haqqında yazılmalı olan qadınlarımız çoxdur”».
Qalina
Mikeladzeni Azərbaycan jurnalistikasında ayrıca məktəb adlandıran yazıçı Natiq Rəsulzadə yubilyarın təkcə
jurnalistlik peşəsindən deyil, həm də yazıçılıq fəaliyyətindən söhbət açdı: "Qalina
xanımın 15-dən çox kitabı nəşr olunub. O
əsərlərin hər biri ilə yaşayıb, qəlbinin bütün odunu həmin kitablara
verib”.
Doğma üzlər
İnsanlarla
dolu salona göz gəzdirən Qalina
Mikeladze: "Bu qədər insanın yubileyimdə iştirak etməsi mənim üçün böyük şərəfdir.
Mən salonda doğma simaları görürəm. Ona görə özümü xoşbəxt hiss edirəm. Mən
insanları sevdiyim kimi onlar da məni sevirlər. Çünki mən həmişə öz qəhrəmanlarımla
dost olmuşam, onları sevmişəm. Prezident təqaüdünə layiq görülmüşdüm. Buna görə
çox sevinirdim. Ancaq "Şöhrət” ordeni ilə təltif olunmağım sevincimin ən yüksək
zirvəsi oldu. Zəhmətimə, əməyimə qiymət verdiyinə görə ölkə başçısına minnətdaram.
Həyatımı boş yerə yaşamadığıma bir daha əmin oldum”.
Gecədə
Qalina Mikeladzenin hazırda əməkdaşlıq etdiyi mətbu orqanların rəhbərləri
adından da təbriklər səsləndi. "Kaspi” qəzetindən daim Qalina xanıma zəng edir,
onun yazılarını gözləyirlər. Bu, jurnalistə çox lazımdır. Kimsə onun yazılarını
gözləyir, kimsə onun haqqında düşünürsə, telefon açıb onun səhhəti ilə
maraqlanır və ya hal-əhval tutursa, demək o insanlara gərəkdir”.
Yubilyara
imzasının mətbuatda bundan sonra da tez-tez görünməsini arzuladılar. Təbii ki,
jurnalistlik fəaliyyətini həyatının mənasına çevirən bir insan üçün bundan gözəl
arzu ola bilməzdi...
Gecədə
iştirak etdi
Təranə Məhərrəmova