Ədəbiyyat və yalan
Alman filosofu, ömrünü faciəli şəkildə başa vurmuş F. Nitşe "səhra
böyüyür” deyəndə nəyi nəzərdə tuturdu? Cahilliyi. Dini mənada yox, qlobal
mənadakı cahillik nəzərdə tutulur. Din islamaqədərki dövrü "cahiliyyə” dövrü
adlandırırdı. Bu günün kontekstində yanaşdıqda cahillik kitabsızlığın,
elmsizliyin sinonimi kimi anlaşılmalıdır. Cahilliyin sahəsi böyüdükcə dünya
təhlükəli sonluğa gəlib çatmaqdadır. Allahı "öldürüb” ruhani müvazinətini
itirmiş Qərb insanı tənhalıq girdabında boğulmağa başladı, ekzistensial xaos
insan ruhunu idarəolunmaz hala gətirib çıxartdı. Herman Hessenin "Yalquzaq”
romanının qəhrəmanı kimi insanlar ikiləşməyə başladı və bu iki mən arasındakı
ziddiyyətlər bütövlükdə toplumların parçalanmasına, ideya, irqi, dini və sair
qütbləşmələrə gətirib çıxartdı. Nitşenin formulu insanları birləşdirməyə deyil,
ayırmağa xidmət etdi. Qərbə Tanrının ruhu deyil, kapitalizmin ruhu hakim
kəsilmişdi. Alman sosioloqu və filosofu Maks Veber (1864-1920) Avropanın
kapitalizmə yenilik düşməsinin köklü səbəbləri haqda uzun illər araşdırma
aparmışdı. O, sekulyarlığın tərəfdarı idi, bununla belə dinin mədəni təsirinin
vacibliyini dönə-dönə vurğulayırdı. M. Veberin qənaətinə görə Tanrıda dinclik
axtarışı, ruhani düşüncə, əslində, rasional həyat tərzinin möhkəmlənməsinə
xidmət edir. Belə demək mümkünsə, rasionallıq irrasionallıqdan qidalanır. Bu
baxımdan Qərb filosofları XX əsrin əvvəllərində mənəvi dayaqların itirildiyini
anlayıb üzünü yenidən Şərqə, Şərq ruhaniyyətinə tutdu.
Dzen buddizm fəlsəfəsinin görkəmli nümayəndələrindən olan yapon
alimi Suzuki Şərqin xarakterini
simvolizə etmək üçün qədim Çinin görkəmli düşüncə adamı Lao Tzıya (e.ə. VI-V)
üz tutur və Şərq ezoterikasının sirlərini onun daosizm təlimində axtarır. O,
Şərqlə Qərb arasındakı düşüncə paradiqmasının fərqlərini əyani surətdə
göstərmək üçün iki şeir nümunə gətirir. Birinci şeir haykuları ilə məşhur olan
dahi yapon şairi Basyoya məxsusdur, digər şeirin müəllifi isə ingilis şairi
Alfred Tennisondur. Basyonun haykusunda birinci şəxsin dilindən deyilir ki, mən
yoldan keçərkən çəpərin dibində bir bitki gördüm və diqqətlə ona baxdım. Şərq
sükutunun bəlağəti, spesifik Şərq ruhaniyyəti. Amma Tennisonun şeiri bizə başqa
variasiyanı təklif edir. Müəllif çat vermiş divarda bir çiçək görür və onu
kökündən qoparır. Duyğusallıqdan məhrum, soyuqqanlı və tipik Qərb mentallığı.
Suzuki bu iki fərqli yanaşma tərzinə dünyanın ikiyə bölünməsi və iki fərqli
qitənin kontrastı müstəvisində təfsir edir. İstiqanlı güney və soyuqqanlı
quzey. Onların hər biri öz ənənəvi keçmişini ifadə edir. Qərb müdrikliyi daim
təhlükə impulsları ötürür, bu proses dünyanı nüvə silahlarıyla hədələmək həddinə
gəlib çatır (dünyanın bugünkü siyasi mənzərəsinə nəzər salmaq kifayətdir), Şərq
müdrikliyi isə qoruyucu instinktləri inkişaf etdirir, Nitşenin dediyi "səhra”nı
böyüməyə qoymur, öldürmək deyil, yaşatmaq idealına xidmət edir. Şərqin bütün
fəlsəfi təlimləri (panteizm, sufilik, hürufilik və sair) insanlığın mənəvi
cəhətdən kamilləşməsinə səsləyir.
Yazının bu yerində filologiya elmləri doktoru, professor Məmməd
Qocayevin Nizami yaradıcılığı ilə bağlı mühazirəsi zamanı dediyi fikirləri
xatırladım. Məmməd müəllim həmin mühazirəsində çox mühüm məqama toxunur. O,
deyir ki, Nizami Gəncəvi dünya ədəbiyyatında ilk dəfə olaraq insan ruhunu kəşf
etmiş bir şairdir. Tanrının insana bəxş etdiyi ruhu dünya ədəbiyyatında ilk
dəfə Nizami özünün poetik dühası ilə yaratdığı obrazlarda ön plana çıxartdı.
Ruh tədqiqat obyekti kimi Nizami yaradıcılığında təcəlla etdi. Nizaminin
fəlsəfi ideyaları əsrlər sonra Qərb alimlərinin, filosoflarının, şairlərinin
əsərlərindən, traktatlarından boy göstərməyə başladı. Dünya filoloji
rakursundan yanaşdıqda Nizamidə feminizmin də, (Şirin, Məhinbanu, Nüşabə
obrazları), ekzistensializmin də (Məcnun) və digər izmlərin də köklərini
axtarıb tapmaq olar.
Şirin Xosrovla ilk görüşündə ona ərə getməyə razı olmur, taxtının
geri qaytarılmasını tələb edir. Süjet boyu Şirin öz üstünlüyünü əldən vermir.
Nizaminin digər qadın obrazları da qürurludur, əyilməzdir, mübarizdir, indiki
terminologiya ilə desək, feminist qadınlardır.
Məcnun öz həqiqəti uğrunda savaşır, heç bir şərtləri qəbul etmir, öz
daxilindəki səsə tabe olur. Aşiq olaraq öz identifikasiyasını təsdiqləyir.
Dünyanın qeyri-mükəmməlliyi, disharmoniyası qarşısında bu nizamsızlığa eşq
ekstazı ilə üsyan edir. Təfəkkürün eqosentrik məqamında Məcnun ekzistensialist
düşüncəyə yaxındır. Məcnun özünü bu aşiqlik məqamında dərk edir və maddi
dünyadan qopur, ayrılır. Şərq paradiqması bu məqamda Məcnunun timsalında zühur
edir.
İnsan təbiətinə xas olan xüsusiyyətlərin fəlsəfi kateqoriyalara
bölünməsi üçün bir neçə əsr lazım gəldi. Biz indi qədim yazılı mətnlərə baxanda
görürük ki, insanın yaradılışında heç bir şey dəyişiklik baş verməyib, qorxu
hissi, kədər hissi, sevinc hissi və insana xas olan apriori xüsusiyyətlər bu gün də mövcuddur. İnsanların materialist
və idealist meyli son əsrlərə məxsus fenomen deyil, əksinə, qədim düşüncələrdən
biridir. Yuxarıda da qeyd etdiyimiz kimi, əslində, fəlsəfə materializmlə
idealizm arasında gedən mübarizələrin nəticəsi kimi meydana çıxıb. Ədəbiyyat
isə həmişə olduğu kimi idealizmin və metafizikanın tərəfində olub. Yazının
əvvəlində gətirdiyimiz iki şeir nümunəsi də buna əyani sübutdur. Ruh ağacı
ezoterika çayından abi-həyat bulur. İnsan bu dünyadan başqa ayrı aləmlərin də
varlığına inanır və o aləmlərə isə yalnız və yalnız ruhun vasitəsilə gedib
çıxmaq mümkündür. Şərq fəlsəfəsi, ədəbi düşüncəsi də əsrlərdir ki, bu
istiqamətdə irəliləyir. Bu, metaelmi və ya antielmi yol olsa da ruhani
düşüncənin təməl prinsiplərindən biridir.
Nitsşe həm də deyirdi ki, "ideal adlanan yalan indiyədək reallığın üstünə hopmuş lənət idi”. Amma Nitsşenin
ölümündən sonra Avropa dərin və qorxunc bir boşluqla üzləşdi. Və bu zaman məhz
ideal adlanan yalana sığındı. Çünki insanın rahat yaşaması üçün mütləq bir
yalana ehtiyacı var. Bu yalan bizim düşündüyümüz zərərli yalanlardan deyil,
yaradıcı ruhun insana bəxş etdiyi yaşam mənbəyidir. Bu yalan olmasaydı,
ədəbiyyat da olmazdı. Ədəbiyyatın yalanı da müqəddəsdir.
Kənan Hacı