Necə tələb olunan qalmaq olar?

Əmək bazarı sürətlə dəyişir və buna paralel olaraq işin mahiyyəti də dəyişir. Artıq bu prosesləri dayandırmaq da mümkün deyil. 

Bakıda keçirilən "Gələcək karyeralar: necə aktual, hazır və tələb olunan qalmaq olar" mövzusunda panel müzakirə təşkil olunub. 

Panel müzakirədə çıxış edən Azərbaycanın İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev bildirib ki, emosional intellekt müasir peşələrdə uğurun əsas amillərindən birinə çevrilir. Onun sözlərinə görə, emosiyaları idarə etmək bacarığı təkcə peşəkar fəaliyyətdə deyil, həm də gündəlik və ailə həyatında da vacibdir. Məhz bu bacarıq həqiqətən də böyük nəticələr əldə etməyə kömək edir. 

"Soft skills" bacarıqları

O, həmçinin "soft skills" adlanan bacarıqların vacibliyinə diqqət çəkib: "İnsan mükəmməl təhsil alsa və bir neçə dilə yiyələnsə belə, bu, kifayət etməyə bilər. Ünsiyyət qurmağı və danışıqlar aparmağı bacarmaq lazımdır. Öz təcrübəmə əsaslanaraq deyə bilərəm ki, emosiyalar hər şeyi həll edir. Əgər siz öz emosiyalarınızı idarə edə bilirsinizsə, qalan hər şeyi də idarə edə bilərsiniz".

Beynəlxalq İnvestisiya Forumu keçiriləcək

Y.Abdullayev bildirib ki, Azərbaycanın ilk Beynəlxalq İnvestisiya Forumu sentyabrın 22-23-də Bakıda keçiriləcək. "Biz forumu Formula 1 Azərbaycan Qran-Prisindən dərhal sonra keçirməyi qərara aldıq, çünki tamamilə unikal mövqedəyik. Tədbir İtaliyadakı tərəfdaşımız "The European House - Ambrosetti" ilə birgə "Euronews"un dəstəyi və "Bloomberg"dən dəvət olunmuş qonaqların iştirakı ilə təşkil olunacaq", - o qeyd edib.

“Bu dillər tələb olunur”

Y.Abdullayev əlavə edib ki, rus dili regionda əsas biznes ünsiyyət vasitələrindən biri olaraq qalır, lakin ingilis dili ilə yanaşı, çin, fransız və alman dilləri də getdikcə populyarlıq qazanır: "Bu dillər tələb olunur. Çünki Çin investisiya sahəsində böyük ümidlər bəslədiyimiz əsas tərəfdaşlardan biridir. Eyni zamanda, logistika ingilis dilli dünya üçün, o cümlədən "Tramp yolu" adlanan istiqamət üzrə yeni imkanlar açır. Biz Avropa və ABŞ tərəfindən artan marağı müşahidə edirik. ABŞ, şübhəsiz ki, gələcəkdə əsas tərəfdaşlarımızdan birinə çevrilə bilər".

Əmək bazarı sürətlə dəyişir

BP-nin Xəzər regionu üzrə vitse-prezidenti Bəxtiyar Aslanbəyli qeyd edib ki, əmək bazarı sürətlə dəyişir və işin mahiyyəti də dəyişir. Bu prosesləri artıq dayandırmaq da mümkün deyil. Onun sözlərinə görə, dəyişikliklər həmişə cəmiyyəti müşayiət edib, lakin bu gün onların tempi misli görünməmiş olub. "İndi dəyişikliklər keçmiş dövrlərlə müqayisədə daha sürətlə baş verir. Bundan əlavə, bir nəslin həyatı ərzində biz oyun qaydalarını dəyişən iki-üç böyük transformasiyanın şahidi ola bilərik. Bu, şübhəsiz ki, əmək bazarına təsir edir. Bu təhlükədirmi? Kimsə diplomatik şəkildə deyəcək: yox. Mən isə birbaşa deyəcəm: bəli, bu təhlükədir", - BP-nin vitse-prezidenti bildirib.

B.Aslanbəyli baş verən proseslərin yeni perspektivlər açdığını da vurğulayıb: "Hər şey dəyişiklikləri necə qəbul etməyinizdən asılıdır - təhlükə kimi, yoxsa imkan kimi. Əgər onlara şans kimi baxsanız, əhəmiyyətli fayda əldə edə bilərsiniz. Müsbət tərəfi odur ki, transformasiya olunan əmək bazarı həmişə ilhamlandıra biləcək yeni bir şey təklif edir". O, xüsusi diqqəti növbəti 30-40 il əmək bazarında olacaq gənclərə yönəldib. B. Aslanbəyli, gələcəyin əsas bacarığı kimi adaptasiya qabiliyyətini qeyd edib. "Nə qədər dəyişikliklərə çevik olsanız, yeni bacarıqları və öyrənmə vərdişlərini nə qədər asanlıqla mənimsəsəniz, bir o qədər uğurlu olacaqsınız. Bu gün dünyanın hər yerində universitetlər tələbələrə təkcə konkret biliklər deyil, həm də öyrənmək bacarığı verməyə çalışırlar. Uğurlu insan öz biliyini artırma və yeni sahələri mənimsəmə vərdişi formalaşdıran şəxsdir", - BP-nin vitse-prezidenti vurğulayıb.