Molla Nəsrəddin və mollanəsrəddinçilik
Son dövrlərdə Azərbaycan
ədəbiyyatının "düşünə-düşünə güldürən” və "güldürə-güldürə düşündürən”
yaradıcılıq ustası Cəlil Məmmədquluzadənin haqqında geniş polemika – mübahisə
və müzakirə aparılması, əlbəttə, özünə görə müəyyən məntiqə malikdir. Yüz il də
bundan sonra bu müzakirələr gedəcək, "Şərqin qoca Molla Nəsrəddini”nə müxtəlif
tərəflərdən baxılacaq, haqq qazandıran da olacaq, haqsız çıxaran da. Bu,
əlbəttə, Molla Nəsrəddinin və mollanəsrəddinçiliyin özündən doğan və onun
taleyinə çevrilən məsələdir. Əgər bir an Molla Nəsrəddinə, onun XX əsrdəki
varisi və xələfi Cəlil Məmmədquluzadəyə mübahisə açan olmazsa, o zaman "mollanəsrəddinçilik
ölübdür” fikrinə qəti olaraq gəlmək olar. Çünki hər zaman gedişatın tərsinə
getmək, eşşəyinə tərs minmək, fərqi yoxdur, baba Molla Nəsrəddin olsun, ya nəvə
Molla Nəsrəddin, onun yaradıcılıq və ifadə tərzinin ortaya çıxardığı aqillik və
müdriklik simvoludur. Bu cəhətdən mollanəsrəddinçiliyin tarixiliyi, ənənəviliyi
və varisliyi məsələsi də
"Mollanəsrəddinçiliyə qayıtmaq zərurəti”ndən (akademik İ.Həbibbəyli) doğan
məsələdir.
Bir çox qənaətlərə söykənib
qətiyyətlə demək olar ki, Molla Nəsrəddin lətifələri xalq yaradıcılığında tənqidi
realist düşüncənin ən gözəl bədii nümunələrini təşkil edir. Dövrə, mühitə,
zamana, varlığa realist və tənqidi yanaşmanın ən sanballı və dəqiq nümunəsi
kimi Molla Nəsrəddin lətifələri özündə mühüm məqamlar daşıyır. Ümumiyyətlə, fikrimizcə,
bəzi məqamlarda böyük ustad Cəlil Məmmədquluzadənin rus ədəbiyyatının Qoqol
kimi görkəmli nümayəndəsini rəhmətlə xatırlamasını, epiqraflarını nəzərə alan
çoxsaylı tənqidçilər, Azərbaycan Molla Nəsrəddinini daha çox Rusiya ədəbi ənənələri
və yumoristik publisistikasının davamçısı görməkdə heç də haqlı deyillər.
Doğrudur, "Molla Nəsrəddin” kimi bir satirik jurnalın yaranmasının ilk
səbəbləri sırasında əcnəbi mətbuatından olan "Kukureku”, "Petuşok” kimi mətbuat
orqanlarının təsiri olduğu artıq qeyd edilmişdir. Lakin bu, heç də "Molla
Nəsrəddin” jurnalının həmin mətbuat orqanlarının davamçısı olması fikrini
doğurmaz. Belə ki, "Azərbaycan Molla Nəsrəddini” (istər ədib, istər jurnal)
adından tutmuş, məzmunu və yaradıcılıq ənənələrinə qədər xalq lətifələrinin adını daşıyan Molla Nəsrəddinin
varisi və xələfi idi. Fikrimizcə, Molla Nəsrəddin lətifələri milli tənqidi
realist düşüncə sistemi və rasional baxış-düşüncə-münasibət formasının
nüvəsini, əsasını təşkil edir. XX əsrdə meydana gələn "Molla Nəsrəddin” jurnalı
və tənqidi realist cərəyan məhz həmin düşüncə sisteminin məntiqi nəticəsi,
davamı və onun varisi-xələfi idi.
Molla Nəsrəddin
lətifələrindəki lətifəçilik-yumor tərzi, bədii gülüş, əqli mühakimə üslubu,
mövzu və tənqid hədəfləri XX əsrin "Molla Nəsrəddin”i ilə keçmişin qoca müdriki
Molla Nəsrəddin arasında ənənəviliyi və varisliyi tam uğurla təzahür etdirir. Qısaca
demək olar ki, XALQ "Molla Nəsrəddin” üçün həm mübarizə qaynağı, həm də məqsəd
və ali ideya idi. Bu, həm də o dövr üçün hüquqi məsuliyyətdən yaxa qurtarmağın
bir yolu, gerçəkləri qadasız-bəlasız ifadə etmənin bir çarəsi idi. Məsələn; "Əncir
nübarı” adlı lətifə bizi həm "Molla Nəsrəddin” jurnalının, həm də Cəlil
Məmmədquluzadənin yaradıcılıq duzuna götürür. Xüsusilə "Əhvalatlar” əsərindəki
Məhəmmədhəsən əmi – Divanxana süjeti və ümumən "Poçt qutusu” əsəri ilə daha çox
yaxınlaşdırır. Belə ki, "Əncir nübarı” lətifəsində əsas məsələ budur ki, xana,
bar gətirən əncir ağacından sovqat aparmaq istəyən Mollanı, Teymur şahın
fərraşları zindana salırlar. Zindanda qalan Mollanı necə olursa, bir gün Teymur
görür və onu azad edir. Mollanın məqsədinin ona sovqat gətirmək olduğunu bilən Teymur,
buna görə də ona bəxşiş vermək istəyir və nə istədiyini soruşur. Molla balta
istəyir. Bu istəkdən heyrətlənən Teymur bunun səbəbini soruşur. Molla əncir
ağacını dibindən kəsəcəyini söyləyir ki, bundan sonra xana sovqat gətirmək kimi
fikrə düşüb də, daha zindanlarda qalmalı olmasın. Beləliklə, Mollanın Teymur
şaha sədaqətlə xidmət göstərməsi, onun əncir ağacından sovqat aparmaq niyyəti, buna
rəğmən fərraşlar tərəfindən zindana salınması hadisəsi, eynən İtqapan kəndinin
sakini Novruzəlinin xanına sovqat aparmağı, xanın tapşırığı ilə onun məktubunu
poçta salmaq istəməsi və poçtalyonun məktubu götürməsini görüb onunla dalaşması
nəticəsində zindana düşməsi hadisəsilə tam eynilik təşkil edir. Göründüyü kimi,
İtqapan kəndinin sakini Novruzəli də xanına təmənnasız xidmətin və qırılmaz
sədaqətin nümayişi olaraq olanından pay tutub xana sovqat aparır. Lakin xanın
məktubunu poçta salmaq tapşırığını alan Novruzəli, poçtun nə olduğunu
bilmədiyindən məktubu poçtalyonun götürməsini onu "oğurlaması” kimi başa düşür,
buna tab gətirməyərək onu kötəkləyir və üç ay həbsdə yatmalı olur. Göründüyü
kimi, eyni xarakter, süjet və hadisə bu iki bədii parçanı bir-birinə bağlayır.
Lakin lətifədə problem xalq müdrikliyi ilə həll olunur və özünün ideal, konkret
həll yolunu tapır: "Şahın ədaləti ilə” zindandan çıxan Molla, şahdan balta
xahiş edib əncir ağacını kəsməklə şaha bir daha sovqat gətirmək və bunun da
nəticəsində zindana düşmək dərdindən qurtulmaq istəyir. Lakin Cəlil
Məmmədquluzadə bu hadisədən can qurtarmağın yolunu novella tələblərinə (eləcə
də xalq müdrikliyi və Sokrat metodu adlanan bədii məntiq-əqli mühakimə
formuluna) uyğun olaraq oxucuların öz daxili məntiqinin, əqli mühakiməsinin
ixtiyarına buraxır. Hər iki bədii materialda diqqəti cəlb edən məqam, ağaya
sədaqətlə xidmət düşüncəsinin tənqidi və ifşasıdır. Özünü xanına xidmətçi
bilmək və ona sədaqətlə xidmət göstərmək psixologiyası Mollanın da,
Novruzəlinin də aqibəti ilə inkar olunur.
Digər çoxsaylı faktlar
vardır ki, XX əsrin "Molla Nəsrəddin”i ilə xalq müdrikliyinin daşıyıcısı olan
Molla Nəsrəddin arasında ədəbi bağlılığı bütün təfərrüatı və tamlığı ilə təqdim
edəsən. Xüsusilə, bir az əvvəl deyilən kimi, obrazlar sistemi və xarakterlər
aləmi, süjet, hadisə və kompozisiya, dil və bədii konfiqurasiyalar hər iki
Molla Nəsrəddini və mollanəsrəddinçiliyi – şifahi və yazılı bədii realist
tənqidi varisləşdirir və bir-birilə qırılmaz bağlılıqda olduğunu, biri digərinin
davamçısı olduğunu açıq şəkildə göstərir, həm də ideya-problem cəhətdən tam bir
məntiqlə birləşdirir. "Gör bədsuyum kimdi?” xalq lətifəsindəki hadisə və
əhvalat bizi dərhal görkəmli ədibin məşhur "Xatiratım” əsərindəki xanın
ziyarətə gedərkən tək səbir eşidib geri dönməsi əhvalatına götürür. Mövhumata
və avamlığa düşmən kəsilən hər iki aqil, ağıl və məntiqdə birləşirlər. "Molla
Nəsrəddin” lətifələri tam aydınlığı ilə göstərir ki, avamlıq və mənəvi əsarətin
mənbəyi olan mövhumatçılıq və fanatizm hələ orta əsrlər dövründən üzü bəri xalq
müdrikləri tərəfindən həmişə ciddi tənqid və ifşa edilmişdir. Nəsimi bütün
qəzəliyyatı, şairlik məharəti və şeriyyət pafosu ilə avamlığı, cahilliyi tənqid
edir, insanı kamilliyə, əqlə, elmə, biliyə çağırırdı. Böyük təfsirçi alim
Nemətullah Naxçıvani kimi elm adamları isə "Hidayətül-ixvan” kimi əsərləri ilə yalançı və fürsətgir din xadimlərini,
hakimiyyət və sərvət düşkünü olan din və elm oğrularını lənətləyərək insanları
belə cahillərdən uzaq olmağa səsləyirdi. Bu mənada lətifə qəhrəmanı kimi xalqın
aqili və müdriki Molla Nəsrəddin belə klassik söz və elm ustadları ilə birləşərək,
elmin, idrakın vəhdətini təzahür etdirirdilər (Əslində şüurda, idrak və
düşüncədə bu birlik və bütövlük orta əsrlər milli intibahının təzahürü idi –
R.Q.). Dua və səna ilə xoşbəxtliyə nail oluna bilməyəcəyini açıb göstərmək
istəyən və bununla da mövhumatçılığı ciddi tənbeh və təshih edən Şərqin böyük
aqili qoca Molla Nəsrəddin və onun lətifələri özünün XX əsrdəki xələfi olan
"Molla Nəsrəddin”lə yaxından birləşir və uzun tarixi bir mərhələyə malik olan
bədii realist düşüncəni və tənqidi yaradıcılıq metodunu əks etdirmiş olur. "Duanın
gücü” adlı xalq lətifəsində Mollanın evinə gəlmiş oğrunun kal ağlını oğurlayan
Molla Nəsrəddin yalan-dolan söhbətilə onu inandırır ki, ayın işığından yapışıb
içəri düşmək olar və axmaq oğru bunu edərkən damdan yıxılıb xurd-xəşil olur.
Cəlil Məmmədquluzadənin də belə bir fikirləri vardır: "Həqiqətdə bir böyük xoşbəxtlikdir,
əgər bir uca damın üstünə çıxıb təzə aya baxmaqla və bir neçə kəlmə dua
oxumaqla sən zalimlərin zülmündən eymən olacaqsan. Ta bundan yaxşı şey nə ola
bilər? Xalq xalqların zülmünün qabağını almaq üçün dəstə tutub mübarizəyə
çıxır, zalım hakimlərin üzünə biədəblik edib ağ olur, hiyləgər ruhanilərin
fəsad torlarını yırtıb o tordan çıxmaq üçün zəhmət çəkib dünya elmlərini təhsil
eləyir, övladını məktəblərə göndərib fənni və ictimai biliklərə sahib olur,
zalımların zülmündən xilas olmaq üçün çox-çox fədakarlıqları özlərinə rəva
görür, amma sən bunların cümləsinin əvəzində təsbehi al əlinə, çıx damın üstünə
və hilali-ramazanül-mübarəki görməyə cidd-cəhd elə və elə ki gördün, dəxi
sahirlərin sehrindən bilmərrə xilas olacaqsan”. Və bu fikirlə də insanlardakı
mövhumi yalanlara inamı ciddi tənbeh edirdi. Göründüyü kimi, bu kimi motivlər hər
iki aqili bir-birinə doğmalaşdırır və varisləşdirir.
XX əsr tənqidi realizmi
üçün səciyyəvi olan və onu fərqləndirən və xüsusiləşdirən varlığın, xüsusilə
insan surətlərinin xarakterini yaratmaq, təsvirini çəkmək və portretini cızmaq
şifahi ədəbiyyatın müdrik nümunəsi olan xalq lətifələrindən və onun baş
qəhrəmanı Molla Nəsrəddindən qalıb desək, yanılmarıq. Bu bədii yaradıcılıq
tərzi hər iki Molla Nəsrəddini səciyyələndirir və sərhədləndirir. Xalq
lətifələrində hadisə və ya obraz, xarakter çox yığcam, eləcə də dəqiq, səlis və
təsirli şəkildə öz əksini tapır. Ümumiyyətlə, Azərbaycan tənqidi realizminin
portret yaratmaq, tənqid və ifşa etmək üsulunun mənbəyində şifahi söz
sənətindən gələn ənənələrin, xüsusilə Molla Nəsrəddin lətifələrindən gələn ənənələrin
xüsusi rol oynadığını qətiyyətlə deyə bilərik. Molla Nəsrəddin lətifələri
içərisində "Fərzəli bəy” lətifəsi bunun ən yaxşı nümunəsi və deyilənlər üçün
sanballı nişanəsidir. Eləcə də, "Deyəsən padşahı istəyir” lətifəsi və görkəmli
tənqidi realist ədib C.Məmmədquluzadənin "Xudayar bəy” obrazının portreti yaradılış
etibarilə bir-birini tamamlayır. Lətifədə Molla Nəsrəddinin Teymur Ləngi
cəsarətlə "buynuzlu danaya” bənzətməsi Cəlil Məmmədquluzadənin Xudayar bəyi
heyvani sifətə, hətta "Xudayar bəyin anqırtısı” ifadəsi daxilində onu
uzunqulağa tay tutması bədii qəsdi ilə bərabərləşir. Yuxarıda adları çəkilən
lətifələrin hər birində, eləcə də "Bir də bir ağıllı padşah”, "Qorxulu
dilənçi”, "Teymur Ləngsən ki, varsan” və b. lətifələrdə ağaları və ağalığı ciddi
tənbeh edən Molla Nəsrəddin müdrikliyi özünü açıq göstərir. Eləcə də "Kəndxuda”
lətifəsində kəndxudaların qanmazlığı tənqid olunduğu kimi, qanmazlıqlarla özünə
el arasında xüsusi bir təəssürat yaradan kəndxudalıq da ifşa edilmişdir. Eşşəyi
oğurlanmış Mollaya "lotular” deyəndə ki, eşşəyin filan kənddə kəndxuda olub,
Şərqin qocaman və müdrik siması Molla Nəsrəddin böyük ustalıqla əslində
kəndxudanın heç də onun eşşəyindən geri qalmadığına işarə vuraraq cavab verir:
"İnanıram, qardaş! Çünki mən həmişə kəndxuda adı çəkəndə çər dəymiş qulaqlarını
şəkləyirdi. Görünür ki, elə o vaxtdan kəndxudalıqda gözü var imiş”. Ümumiyyətlə,
Şərq xalqlarının ictimai-mənəvi düşüncəsində "Eşşək” surəti daha çox iki mənada
və məqsədlə bağlı ümumiləşmişdir: Qanmazlıq mənasında, və müdriklik simvolu
kimi. Molla Nəsrəddin lətifələrində də "Eşşək” məhz bu iki məqsədlə bağlı
olaraq geniş istifadə olunur. Şərq aqili Molla Nəsrəddinin köməkçisi kimi Eşşək
müdriklik simvolu olaraq çıxış edir. Hətta bəzi yerlərdə Molla Nəsrəddinə də
qahmar çıxıb ona kömək də edə bilir və bununla da özünü bəzi qanmaz insanlardan
fərqləndirməklə onlara qarşı bədii surət kimi dayanmış olur. İkinci isə,
qanmazlıq, biveclik mənasında lətifələrdə işlənməklə, ümumiyyətlə qanmazlığı, mənəviyyatsızlığı,
bivecliyi, heysiyyətsizliyi ümumiləşdirmiş və ifşa etmişdir. Bütün bu
deyilənlər isə bizi eyni zamanda XX əsrin Molla Nəsrəddini kimi məşhurlaşmış görkəmli
ədib Cəlil Məmmədquluzadənin əsərlərinə, xüsusilə "Danabaş kəndinin
əhvalatları”na, başqa adla isə "Eşşəyin itməkliyi”nə götürür. Belə ki, əvvəldə
də bəhs etdiyimiz kimi, "Kəndxuda” lətifəsində olduğu kimi, C.Məmmədquluzadə də
bu əsərində Xudayarın timsalında Azərbaycan kəndlərində kəndxuda olmaq üçün heç
də hansısa mənəviyyata, savada, insan simasına malik olmaq lazım olduğunu
diqqətə çatdırmır. Əksinə, bütün insani keyfiyyətlərdən məhrum olub, tək bircə
hansısa "böyük məmura” yaxın olmağın yetərli olmağından bəhs edir. Necə ki, adama
oxşamayan, əsli-kökündən, atasından danışmağı sevməyən Xudayarın bəy olması,
müəllifin özü də dediyi kimi, başqalarına bənzəmir, "özgə tövrlə olubdu”.
"Molla Nəsrəddin” jurnalı
ilə Molla Nəsrəddin lətifələrində xalqın arzu və istəklərinin başlıca ideya
seçilməsi, hər ikisini xalqın dostu kimi təqdim etməyə yetərlidir. Bu, həmçinin
jurnalın ideya-məfkurə platformasında xalq ideallarının tutduğu əhəmiyyətli
mövqe ilə bağlıdır. "Molla Nəsrəddin” jurnalındakı xalqa sədaqət və məhəbbət
ideyası azərbaycançılıq olan məfkurənin mahiyyətindən doğur. Hər zaman xalqın
yanında olmaq və onu, ölçüsünün meyarı götürmək mollanəsrəddinçiliyin tarixən
amalı və məqsədi olmuşdur. Bu mənada xalqçılıq nə yerdən, nə göydən gələndir,
bu, elə tarixən mövcud olan xalqa məhəbbət motivlərinin ənənəyə çevrilməsinin
nəticəsidir.
Ramiz QASIMOV
AMEA Naxçıvan bölməsinin
əməkdaşı,
filologiya üzrə fəlsəfə
doktoru, dosent