Gəncədə yaşadılan uşaq teatrı ənənəsi - Fotolar
Təsadüfi deyil ki,
respublikamızda fəaliyyət göstərən beş Kukla Teatrından biri də Gəncədə fəaliyyət
göstərir. Azərbaycan SSR Nazirlər Sovetinin 1 oktyabr 1986-cı il tarixli qərarı
ilə yaradılan Gəncə Dövlət Kukla Teatrı şəhərin ən gözəl memarlıq obyektlərindən
birində, XIX əsrin yadigarı olaraq 1885-ci ildə Gəncədə yaşayan almanlar tərəfindən
inşa edilən alman lüteran kilsəsində yerləşir. Bu gün mübaliğəsiz olaraq qeyd
etmək lazımdır ki, Gəncədə fəaliyyət göstərən Dövlət Kukla Teatrının kollektivi
Azərbaycan uşaq teatrı ənənəsinin yaşadılmasına xidmət edir. Yarandığı gündən
teatrın repertuarı hər zaman zənginləşdirilib, bir-birindən maraqlı, orijinal
150-yə yaxın səhnə əsəri tamaşaya hazırlanıb. Xalq nağılları əsasında hazırlanan
"Qız qalası”, "Məlikməmməd”, "Göyçək Fatma”, "Şəngülüm, Şüngülüm, Məngülüm”,
Nizami Gəncəvinin "Gül və zəhər”, "Xeyir və Şər”, Əli Səmədlinin "Artıq tamah
baş yarar”, "Meşə çaqqalsız olmaz”, "Əhmədin vəfalı xoruzu”, Cəlil Məmmədquluzadənin
"Poçt qutusu”, R. Həsənlinin "Ağca və sarıca”, M. Seyidzadənin "Büllur qəsr”,
Rafik Səməndərin "Çətin məsələ”, Rəhman Əlizadənin "Keçəlin toyu”, Məhəmməd
Alimin "Noxudu keçəlin nağılı” dünya ədəbiyyatı nümunələrindən N. Kassionun
"İki dəcəl şirciyəz”, A. S. Puşkinin
"Qızıl balıq” və digər əsərlərinin uğurlu səhnə taleyi məhz
yaradıcı kollektivin gərgin zəhmətinin bəhrəsi kimi bu gün də xüsusi əhəmiyyətə
malikdir.
Gəncə Dövlət Kukla
teatrının direktoru, respublikanın əməkdar artisti, Azərbaycan Respublikası
Prezidentinin mükafatçısı Fərmail
Paşayevlə söhbətimiz zamanı bir daha uşaq teatr ənənələrinin yaradıcı
kollektiv tərəfindən bu gün də böyük zəhmət və gərgin axtarışlar baxımından
qorunmasının şahidi oluruq: "2017-2018-ci
il teatrımız üçün olduqca yaradıcı bir mövsüm kimi yadda qalacaq. Bu mövsümdə
yaradıcı kollektiv yenə də dörd yeni tamaşa ilə azyaşlı teatrsevərlərin görüşünə
gəlib. Bununla yanaşı həmçinin Tovuz və Şəmkir rayonlarında qastrol səfərlərində
olduq. Bu qastrol səfərlərində məktəblilər qarşısında ən maraqlı
tamaşalarımızla çıxışlar etdik. Belə ki, dahi Üzeyir bəyin "Məşədi İbad”, Sahib
İbrahimlinin "Səlim və sehirbaz” və Aləmzər Əlizadənin "Toya gecikən tülkü”
tamaşalarını göstərdik. Göründüyü kimi, bu tamaşalar müxtəlif yaş təbəqələri nəzərə
alınmaqla - yəni "Toya gecikən tülkü” 3-5, "Səlim və sehirbaz” 6-10 və "Məşədi
İbad” isə 10 yaşdan yuxarı tamaşaçılarımız üçün nəzərdə tutulub. Həmçinin qeyd
etməliyəm ki, daha dörd yeni tamaşanın hazırlanmasını planlaşdırırıq. Bu
tamaşalardan biri - teatrımıza yeni
rejissor kimi gələn Azərbaycan Dövlət Mədəniyyət və İncəsənət Universitetinin məzunu
Şamil Məmmədlinin quruluşunda Əhməd Orucun "Zınqırovlu Pişik” tamaşası demək
olar ki, artıq hazırdır. Qeyd etməliyəm ki, bu tamaşa da olduqca maraqlı və
baxımlıdır. Tamaşada teatrımızın aparıcı aktyor və aktrisaları iştirak edir.
Yeni ərsəyə gələn bu tamaşada rejissor traktofkasında kuklalar və eləcə də
canlı aktyor ifasının sintezi həmahənglik təşkil edir. Həmçinin tamaşa boyu rəngarəng
dekorasiya da kiçik teatrsevərlərin ürəyincə olacaq. Bunun ardınca Kəmalə
Ağayevanın "Tənbəl Əhməd” pyesi üzərində yaradıcılıq işini bitirəcəyik. Artıq
bu pyes üzərində də son tamamlama işləri gedir. Bu tamaşanın isə quruluşçu
rejissoru, respublikanın əməkdar artisti Xudayət Əsgərovdur. Daha sonra Astrit
Linqrindin "Uşaq və Karlson” pyesi üzərində üçüncü rüb ərzində yaradıcılıq işinə
başlanacaq. Artıq ilin sonunda isə Əli Səmədlinin "Meşə çaqqalsız olmaz” pyesi
üzərində yaradıcılıq işi aparılacaq. Düzdür, bu pyesə teatrımız 25 il bundan əvvəl
müraciət edərək ilk dəfə hazırlayıb. Bildiyiniz kimi, artıq dövr və zamanla
yeni teatr baxışları mövcuddur. Bu günün müasir tamaşaçısı tam fərqli bir
düşüncə ilə tamaşalara baxmaq istəyir. Biz də belə qərara gəldik ki, tamaşanı
tam yeni bir formatda hazırlayıb kiçik teatrsevərlərin ixtiyarına verək”.
Danılmaz faktdır ki,
Gəncədə kiçik aktyor heyəti ilə körpələrin estetik zövqünün formalaşmasında,
onların dünyagörüşünün zənginləşməsində Kukla
Teatrının rolu böyükdür. Hər il bir-birindən maraqlı və rəngarəng
tamaşaların nümayiş etdirilməsi xüsusi ənənə halına çevrilib. Bu gün Gəncə Dövlət
Kukla Teatrının uğurlu fəaliyyətini şərtləndirən əsas amillərdən biri də
iştirak etdiyi festivallar, əldə etdiyi nailiyyətləridir. Demək olar ki, teatr
rəhbərliyi və kollektiv hər zaman yaradıcılıq axtarışındadır. Elə bunun nəticəsi
idi ki, bir-birinin ardınca bir sıra teatr festivallarına dəvətlər alır və
maraqlı çıxışları ilə diqqət mərkəzində olmağı hər zaman bacarırlar. 2005-ci
ildə Bolqarıstanda keçirilən "Sehrli pərdə” uşaq tamaşaları festivalının və
Ukraynada təşkil edilən "Milli klassiklər kukla teatrlarının səhnəsində” teatr
tədbirinin fəal iştirakçısı olub, 2008-ci ildə "Keçəlin toyu” tamaşası ilə
Ukrayna, 2009-cu ildə isə "Artıq tamah baş yarar” əsəri ilə Bolqarıstanda
qastrol səfərlərində uğurla çıxışlar ediblər. Təsadüfi deyil ki, Ukraynada
keçirilən festivalda məhz "Milli adət-ənənələrin qorunub saxlanılması”
nominasiyasında Gəncə Dövlət Kukla teatrı diploma layiq görülüb. Yaradıcı
kollektiv hər zaman bu kimi festivallarda iştirak etməklə, dünya mədəniyyətinə
inteqrasiya olmağın yollarını dərindən mənimsəyir, nəzəri, praktiki bilik və
bacarıqları Gəncə Dövlət Kukla Teatrında tətbiq edirlər. Xarici ölkə teatrları
ilə tanışlıq teatr kollektivinin inkişafına müsbət təsir göstərməklə yanaşı, həm
də teatrın yaradıcılıq potensialını artırır. Bu mənada hər zaman təşkil olunan
beynəlxalq kukla teatrları festivallarında iştirak etməyə xüsusi əhəmiyyət
verilir.
Bu nailiyyətlərdən bəhrələnən
teatr hər zaman yeni, gənc nəslin sənət yollarında yetişməsində də fərqlənir.
Belə ki, gənc kadr potensialının teatra cəlb edilməsi başlıca vəzifə olaraq həyata
keçirilir. Xüsusi olaraq Kukla Teatrı üçün gənc nəslin yetişdirilməsi, onların
bu sahəyə cəlb olunması işinin nə qədər ağır və məsuliyyətli olduğunu anlayan
teatr rəhbərliyi də, məsələni hər zaman diqqət mərkəzində saxlayır. Elə Azərbaycan
Dövlət Mədəniyyət və İncəsənət Universitetinin məzunu olan, gənc, istedadlı
rejissor Şamil Məmmədlinin də Gəncə
Dövlət Kukla Teatrına cəlb olunması bu diqqətdən xəbər verir: "Hal-hazırda Əhməd
Orucun "Zınqırovlu Pişik” pyesinin üzərində son tamamlama işlərini aparırıq.
Ümumiyyətlə, bu, mənim Gəncə Dövlət Kukla Teatrında ilk debütümdür. Sözsüz ki,
bu yaradıcılıq işi zamanı teatr rəhbərliyi və kollektiv tərəfindən göstərilən
diqqət məni daha da məsuliyyətli olmağa sövq edir. Daha maraqlı bir səhnə əsərinin
ərsəyə gəlməsinə çalışıram. Teatrımızda çalışan peşəkar aktyor və aktrisa heyəti
də bu işdə mənə çox kömək edir. Bu peşəkarların da bilik və bacarıqlarından bəhrələnməklə,
inanıram ki, maraqlı bir tamaşa alınacaq. Artıq körpə tamaşaçılarımızın da
teatra baxışı müasirləşir. Müasir dövrdə uşaqlar o qədər cizgi filmləri və digər
kompüter oyunları ilə zehinlərini yeniləyirlər ki, teatr tamaşasında onları təsirləndirmək,
cəlb etmək üçün daha maraqlı detallardan canlı formada istifadə etmək zərurəti
yaranır. Bu, istər səhnədə işıq və səs effektlərindən ibarət olur, istərsə də
ki, aktyor ifası ilə bağlı həmahənglik təşkil edir. Çalışmışıq ki, bütün bu
sadalananları körpə fidanlara təqdim edə bilək. İnanıram ki, bununla da biz
yeni tamaşamızla körpə fidanlarımızın qəlbini oxşamağı bacaracağıq”.
Sözsüz ki, bu gün
teatrın uğurlu fəaliyyətini şərtləndirən əsas faktorlardan biri, onun tamaşaçı
auditoriyasıdır. Bu da öz növbəsində hazırlanan tamaşalardan, repertuar siyasətindən
asılıdır. Elə bu səbəbdən də teatrın bədii şurası repertuar siyasətini daim
diqqət mərkəzində saxlamağı bacarır. Bu diqqətin nəticəsi olaraq da, hər zaman
teatrın repertuar planı əsasən yerli, klassik və xarici ölkə müəlliflərinin əsərlərinə
əsaslanır.
Hər bir əsərin səhnədə
hazırlanması prosesi zamanı quruluşçu rejissorlar məhz bu kimi amilləri əsas
götürərək, uğurlu səhnə həyatı bəxş etdikləri pyeslərin ərsəyə gəlməsində
tamaşaçı duyumunun əsas şərt olduğunu deyirlər. Elə söhbətimiz zamanı teatrın
aparıcı aktyorlarından biri olan, eləcə də quruluşçu rejissor kimi fəaliyyət
göstərən, Azərbaycanın Əməkdar artisti Xudayət
Əsgərov da bu şərtlərin əsas amil olduğunu deyir: "Gəncə Dövlət Kukla
teatrında 1987-ci ilin yanvar ayından fəaliyyət göstərirəm. Hər zaman olduğu
kimi, bu gün də teatrımızda maraqlı, yeni tamaşalar hazırlanır. Çalışırıq ki,
öncə körpə tamaşaçılarımızın zövqünə uyğun yeni səhnə əsərlərinə müraciət edək.
Bu yaxınlarda mənim quruluşumda Kəmalə Ağayevanın "Tənbəl Əhməd” pyesi maraqla
qarşılanan tamaşalarımızdan biri oldu. Bundan əlavə, Yeni il şənlikləri ilə
bağlı "Qış nağılı” yeni bir quruluşda maraqla qarşılandı. Eləcə də, Novruz şənlikləri
ilə bağlı tamaşalarımız da körpə fidanlarımızın zövqünü oxşadı. Bu quruluşlarda
səhnə tərtibatından başlayaraq, musiqi, eləcə də rejissor traktofkası yeni idi.
Çalışacağıq ki, gələcəkdə də yeni hazırlanan tamaşalarda körpələrimizin estetik
zövqlərini oxşamaq üçün səhnəyə yeniliklər gətirək. Sözsüz ki, yerli müəlliflərin
əsərlərinə müraciət etməklə yanaşı, klassik dramaturqların da körpələr üçün nəzərdə
tutulan pyeslərini hazırlamağı planlaşdırırıq. Bu kimi pyeslərin hazırlanması
ilə körpələrimizin müasirləşən dünyagörüşlərinə uyğun səhnə əsərlərinin hazırlanması
başlıca hədəfimizdir. Əsasən isə xalq nağılları əsasında hazırlanan tamaşalarda
körpə fidanlarımızı cərəyan edən hadisələrin reallıqlarına inandırmaqla yanaşı,
hər zaman xeyirin şər üzərində qələbəsinin aydınlığına çalışırıq. Sözsüz ki, səhnədə
canlı aktyor ifası da yaradıcılığımızın əsas şərtlərindəndir. Belə bir sintezin
edilməsi körpələrimizi tamaşalarımıza daha çox cəlb edir. Canlı ünsiyyətin
tamaşa zamanı estetik zövqü balaca fidanlarımız tərəfindən fərqli qarşılanır.
Bu ünsiyyəti duymaq istəyənlər gəlib teatrımızda görsünlər ki, canlı nəfəs nə
deməkdir”.
Artıq Gəncə Dövlət
Kukla Teatrı özünün 32-ci teatr mövsümünü uğurla başa vurur. Bu zaman kəsiyində
yaradıcı kollektiv böyük uğurlara imza atıb. Amma yaradıcılıq axtarışları hələ
davam edəcək. Davam etdikcə də, yeni-yeni maraqlı səhnə quruluşları yaranacaq,
teatr öz körpə fidanlarının - tamaşaçılarının maraq dairəsini təmin edəcək.
Anar Bürcəliyev
Teatrşünas