Əttarın ətri
"Söz hicabdır” – çox doğru deyiblər.
Səs sözdən bir az irəlidədir. Fikir onlardan geridədir. Çünki, buradakı məqsəd
və məna elə nöqtələrə hədəflənmişdir ki, hər fikrin bu məqama yetişməyə nəfəsi
çatmaz.
Beləliklə, söz və səs. Daha doğrusu,
söz, yoxsa səs? Səsin sözdən irəli olduğunu dedik. Ancaq, bəsit və beləliklə də
yanlış anlaşılmasın (ya da necə anlaşılır, anlaşılsın. Anlayanları düşünsəydik,
çoxdan qələmi də səsi də fikri də buraxmışdıq). Səsdən söz yaranır deyə, bu fikri
ortaya atmadıq (əlbəttə, söhbət səsli sözdən gedir, fikirdən və ya qələmdən
yox). Bizim dediyimiz səs sözün bir üst halıdır, sözün çox zaman yaratdığı
hicabı yırtıb atandır. "Çox zaman” ifadəsini işlətsək də, hədəfdəki məqama
gedən yolda söz hər zaman hicabdır.
Ancaq sözün elə bir halı da var ki,
hicaba səbəb olmur. Əksinə, hicabı qaldıraraq, cəmali-mütləqi gözlər önünə
sərir. Bu, nəzmdir. Həmin nəzm ki, bizim fikrimizcə, söz yox, səsdir. Nəzmin
səs olduğu başqa bir halla da dəstəklənir. Bu hal isə, musiqidir. Nəzmlə musiqi
elə bir səs yaradır ki, onu sözlə ifadə etmək acizlikdən başqa bir şey deyil.
Beləliklə də səsdən ayrılan söz mərifətin, eşqin, sirrin yox, elmin,
təzahüratın, türrəhatın tərəfinə keçir. Nəzm və musiqi sözü küsdürür. Ona öz
yetərsizliyini sübut edir. Söz isə, acığa düşərək, qala çevrilir və halın
qarşısında dayanır. Nəzmlə musiqi heç bir zaman dünyəvi olmamışdır. Ancaq hansı
nəzmdən, hansı sözdən bəhs etdiyimizi incələyəcək qədər alçaqlara enməyə
ehtiyac duymuram. Ümumiyyətlə isə səsin hansı tərəfdə dayandığını söz müəyyən
edir. Səsin, yəni halın tərəfi olmaz ki,..
Məsələ burasındadır ki, hər sözün,
sözdən yaranan hər səsin, səsdən təşəkkül tapan hər nəzmin, nəzmi
məqami-vəhdətə qaldıran hər musiqinin arxasında məna və hədəf dayanır. Mənalara,
hədəflərə istinadən hər mənzərənin öz rəssamı, hər rəssamın da öz tamaşaçısı
vardır.
Qoca Əttar da rəssam idi. Onun
şeirini əzbər bilənlər, həyatını oxuyanlar, onu tarixi şəxsiyyət olaraq
tanıyanlar xoşbəxt insanlardır. Lakin eyni zamanda da bədbəxt insanlardır.
Çünki, bu dediyimiz şeylər Əttara bir hicabdır. Bəli, hətta onun əsərləri də
ona bir hicabdır – ta ki, onun özünü diri, canlı, həqiqi və rasional şəkildə
Həzrəti Xızr kimi görənə qədər. Xızr əfsanədir, Əttar gerçəkdir. Xızr dindir,
Əttar ürfandır. Xızr uzaqdır, Əttar yaxındır.
Mən belə həqiqi Xızrları çox
görmüşəm. Ancaq heç birisini Əttar kimi aydın və şəffaf görməmişəm. Biçarə
alimlər, ədəbiyyatşünaslar, elə bilirlər "Məntiqüt-teyri”,
"Təzkirətül-övliya”nı oxuyub əzbərləməklə, Əttarın ətrini ala biləcəklər.
Özləri də yaxşı bilirlər ki, elmlə, mütaliəylə, türəhat və qalla Əttar gəlməz.
Gəlsəydi, onlar bir daha nəinki Əttardan sonrakıları oxuyar, hətta ümumiyyətlə
oxumağı, yəni sözü, elmi, türrəhatı tərk edərdilər. Hətta və hətta Əttardan sonra
dünya həyatı onlar üçün bitərdi. Dediyim kimi, onlar özləri bunu yaxşı
bilirlər. Yaxşı bilirlər ki, dəf çalıb, zikr edən savadsız bir Kirmanşah
dərvişinin yanında onlar gərək Əttarın, Şəmsin, Mövlananın, Hafizin adını
çəkməsinlər. Ancaq nə etmək olar, söz sözdür və nə etmək olar ki, elm Tanrıdan
möhlət istəyib.
Alimlərlə pirlərin fərqi ondadır ki,
alimləri insanlar özləri axtarıb tapır. Ancaq pirlər özləri insanları axtarıb
tapırlar. Əksər zamanlarda isə, onların varlığından bixəbər olanlar onların
toruna düşür. Zatən, xəbəri olsaydı, düşməzdi bu tora. Çünki, elm ovdur, eşq
isə ovçu. Ovlanmaq istəyənlərdən başqa heç kim öz ayağı ilə, bilə-bilə gəlib o
tələyə düşməz. Ovçu isə, qafil ovu sevər. Tələdə hazır gözləyəni heç kim
ovlamaq istəməz. Zira, bu iş ağıl-məntiq işi deyil. Mövlananın Şəmsdən xəbəri
olsaydı, Şəmsin toruna düşə bilməzdi. Mövlana Şəmsə hazır olsaydı, o zaman Şəms
gəlməzdi, çünki, ona ehtiyac qalmazdı.
Əttar da mahir ovçudur. Onun fitnəli
gözlərindəki əbədi sirrin cazibəsinə heç bir aşiq dayana bilməz. Ancaq bir şey
var ki, Əttarın ovlağı elə-belə güllü-çiçəkli çəmənlər, düzlər, asfaltın
üstü-filan deyil. Əttar Qaf dağında ov edir. Deməli, həmin aşiqin, yəni həmin
ovun bu dağa qalxması gərəkdir ki, Əttarın toruna düşsün. O tora isə, ancaq qartallar
düşər, bülbüllərin Qafın zirvəsində nə işi var? Çünki qartala ancaq Simurğun
gücü çatar. Ovlanan ovun özü həmin ovçunun bir cüzvünə çevrilir. Ona görə ki,
bütün quşların cəmi Simurğdur. Yəni, otuz quş. Qiyamət gününə qədər bu ov davam
edəcək. Elə ki, həmin otuz quş bir yerə cəm oldu, o zaman Simurğ özünü bəyan
edəcək. Qiyamət isə oyanmaq olduğu üçün Simurqun sədası oyanışın, qiyamətin
əlaməti olacaq.
Əttarın dükanı heç bağlanmadı. Digər
dərvişlər zahirdə tərki-dünya oldular, Əttar isə batində. Yenə ətir satmağa
davam etdi. Ancaq oradakı "t” hərfini "s” hərfi ilə əvəz etsək, məna yerinə
oturacaq. Əttar ətir satmır, ətir saçır. Ancaq saçdığı ətirlərin də bir bədəli
var. Can vermək gərəkdir ki, o ətirdən sənə də sıçrasın. Bu mənada Əttar həm də
dükan açıb, ətir satır. O elə bir ətirdir ki, qoxusu əbədiyyətə qədər uzanacaq,
heç bitməyəcək. Çünki bu ətir Tanrının ətridir. İllər öncə bir qəzəl yazmışdım.
Onu burada təqdim etməyn tam yeridir:
Can içində can verən hər canə canan
ətridir,
Vəsli-canan canə canandan gələn can ətridir.
Canımı
cananə verdi ətri-Rəhmanir-Rəhim,
Kim ki, arifdir, bilər bu ətr Rəhman ətridir.
Bir
sabah bağın içində durdu canan qəsdimə,
Əsdi bir badi-səba, zənn eylədim qan ətridir.
Dinimi,
imanımı məstur edib zülfi-nigar,
Küfr zülfündən gələn ol ətr iman ətridir.
Mübtəlayi-hicri-yarəm,
rişteyi-canımdakı,
Ruzi-əvvəldən qalan bir baği-Rizvan ətridir.
Kakili-yarın
gəlir ətri nəmazımdan mənim,
Zikri-Mövladən gələn zülfi-pərişan ətridir.
Eşq
dövran eylədi bir fanidən bir faniyə,
Məst edən dünyadə hər mehmanı mehman ətridir.
Haqqı,
ey insan olan, axtarma insandan kənar,
Haqqa gəl, Allahın ətri çünki insan ətridir.
Arif
ol Salim, ki, on səkkiz min aləmdən gələn,
Zati-Sübhan, nuri-Yəzdan, Şahi-Mərdan ətridir.
İndi
deyəcəklər ki, Əttardan yazıb, öz qəzəlini necə təqdim edir? Məsələ burasındadır
ki, mən Əttardan yazmıram. Çünki onun haqqında çox yazıblar. Mən də elə bütün
yazanlar kimi özümdən yox, özümü yazıram.
Yazılanlar,
deyilənlər bütünlüklə həqiqətin təsviridir. Ancaq necə təsviri? Bəlkə, həqiqət
hər kəsin öz ölçüsündədir? Yəqin ki, belədir. Belə olmasaydı, hər kəs özünü
haqlı sanmazdı. İnsanın haqlı və ya haqsız olduğunu necə sübut eləmək olar? Ən
əsası da kimə sübut eləmək olar? Dünyada insanı haqlı olduğu fikrindən
döndərəcək elə bir güc qaynağı varmı? Ona görə də bizim yazdıqlarımız da, bizim
əleyhimizə yazılanlar da haqdır, həqiqətdir. Həqiqətin mütləq olduğu fikrini
iddia edənlər həqiqətdən bixəbər adamlardır. Onun nisbi olduğunu düşünənlər də
qafillərdir. Həqiqət nisbiliklə, mütləqliklə ölçülən bir anlayış deyil. O,
varoluşdur. Varlığı isə, inkar etmək mümkün deyil, təsdiq etmək isə lazım
deyil. Elə buna görə də sözün başında dedik ki, bunlar bizim yaşadıqlarımızdır.
Onları zorla kimsəyə yaşatmaq fikrimiz yoxdur. Əgər Əttar Qaf dağına ova
çıxırsa, onun ovunun da məkanı həmin zirvədir. O zirvəyə qalxmayana,
ümumiyyətlə, Qafın varlığından bixəbər olana Əttarın oxu neylər, ətri neylər?
Mövlana
deyirdi:
Həft şəhr eşq ra Əttar gəşt,
Ma hənuz andər xəmi yek kuçeyim.
"Eşqin yeddi şəhərini Əttar gəzdi, bitirdi. Biz hələ onun
əyri bir dalanında qalmışıq”. Təsəvvür etmək çətindir ki, o boyda Mövlana bu
həqiqəti necə dilinə gətirir. Çünki, bu sözlər gerçəkdən də mübaliğə,
təvazö-filan deyil, məhz həqiqətdir. Eşq aləmində təvazö olmaz və buna ehtiyac
da yoxdur. Çünki, Mövlananı da Əttarın ətri vurmuşdu. Elə onu Şəmsin ayağına
gətirən də bu ətir oldu. Bu qoxunun izini sürərək, Həzrəti Mövlana Həzrəti
Şəmsin tələsinə düşdü. İntəhası, Şəmsin ovlağı Qaf dağı yox, dərin dəryalar,
sonsuz ümmanlar idi. Mövlana isə, dürrü mirvari axtaran qəvvas idi. Hər aşiqin
ovlandığı məkan ayrı olsa da, ovçusu birdir. Birdir, yəni pirdir! Pirlər eşq
məqamının gözətçiləri, eşq karvanının sarbanlarıdır. Onlar Haqqın da
pirləridir. Bəlkə bir gün Haqqın sirri açılacaq, ancaq pirlər hər zaman sirr
olaraq qalacaqlar. Pirlik məqamının özülü də bunun üzərindədir. Sirrin özü
pirin özüdür. Pir sirr deməkdir. Sirri açılan pir olmaz. Pir sirlə yaşar, sirr
pirlə.
Allahın dərgahı pirin qapısıdır. Bu qapı açılan zaman
dərgah öz aşiqini qəbul edər. Yoxsa, Allah da əfsanədir, onun dərgahı da. Ancaq
pirlərin qapısı olmaz, nəfəsi olar, ətri olar. Pirlər vasitə və ya vasitəçi
deyil. Pirlik eşq məqamı olduğu üçün, eşqin ikiliyi, ayrılığı, qovuşması-filanı
olmaz. Vəhdət yalnız kəsrətdən qurtulan zaman mümkün olur. Bu qurtuluş isə
yalnız və yalnız eşqlə gerçəkləşə bilər. Başqa cür olan şeylərin heç birisi eşq
deyil – birisi ibadətdir, o birisi cənnətdir, digəri rəhmətdir, bir başqası
isə, ticarətdir. Ancaq bunların hamısı kəsrətdir. Deməli, bunlara sahib
olanların heç birisi aşiq deyil. Aşiq olmayan isə özünə əziyyət verib Qaf
dağına qalxmaz. Qəribədir ki, Qurani-Kərimin məhz "Qaf” adlı surəsində "Mən
sizə şah damarınızdan yaxınam” deyir. Sanki adam özünü Qafın zirvəsində, yəni
vəhdətə ən yaxın yerdə hiss edir. "Qaf” həm də bir hərfdir. Yazılışı da
qəribədir, sanki başı qarlı zirvəyə bənzəyir. Əlbəttə, bunların elmi və qrammatik
əsası-filanı yoxdur. Bunlar eşqin və ürfanın təxəyyülüdür. Belə xəyallar
gerçəklərin, reallıqların çox-çox üzərindədir. Bunlar şairanəlik-filan da
deyil. Aşiqər romantiklər deyil, eşq özü ümumiyyətlə romantika deyil. Ürfan
bunların, yəni elmin söykəndiyi rasionallığın, dinin söykəndiyi irrsionallığın
xaricində bir şeydir. Eşq və ürfan yaşantıdır, özdür, qəlbin içidir, ağılın və
məntiqin təslim olduğu bir məqamdır.
Əvvəldə dediyimiz kimi, sözün səsə çevrilməsi, səsin
məqama – musiqiyə çevrilməsi də məhz elə bu ehtiyacdan baş verir. Keçmiş
zamanda yox, indi, bu an baş verir. Baş verənlər gerçəkdir, dəmdir, haldır və mütləq
şəkildə bir nöqtəyə, bir dərgaha, bir pirə bağlıdır.
Müqəddəs Əttarın pak və rindanə ruhlardan heç çəkilməyən
ətri insanlığın həmin səviyyədə olan qisminin qurtuluşu deməkdir. Həmin səviyyə
isə, elə Əttarın bəhs etdiyi Simurq olma yolundakı qələbədir. Simurq yoxdur. Nə
üçün? Çünki, vəhdət görünməz. Görünən kəsrət və onun qırıntılarıdır. Bütöv isə,
gözə görünməz, yəni gözlə görünməz. Daha doğrusu, gözə görünməmək üçün bütövləşər.
Daha da doğrusu, onu görməyə bir göz və bu gözə ehtiyac yoxdur. Sadəcə, eşq
var, aşiqlər var, Qaf dağı var və ovçular var. Elə ki, ov səhnəsi mükəmməl
oldu, o zaman Qaf da yox olur, eşq də, aşiqlər də, Haqqın özü də. Təkcə qalan
pirlər olur. Çünki, pirlər sirr sahibidir və bu sirr heç zaman açılmayacaq.
"Əgər özünü bilsən və içindəki məluna sahib olsan, bütün
bütləri yandırıb, sındırarsan”
"Bülbülün sirrini güldən başqa kim bilər, kim anlar?”
"Həyatında çətin şərtlərə, möhnətə, bəlaya düşməyin,
zəlil və həqir olduğun üçün deyil, qiymətli olduğun üçündür”
"Sevgili yoxdursa, can nəyə yarar?”
"İnsanlarda bir vəfa görmədim. Ona görə də Allahın
vəfasını seçdim”
Dırnaq içində verilən bu kəlamlar isə, böyük pirə, şahlar
şahına, vəlilər sultanı Fəridəddin Əttar Nişaburiyə məxsusdur. Əlbəttə, elə onu
demək istəyirdim ki, bu sözlər də hicabdır. Bəli, onun öz sözləri belə onun
özünə, onun üzünə, onun ətrinə hicabdır. Piri oxumazlar, onu görərlər. Piri
oxumaq ona aşiq olmaqdır. Eşq olmasa, pirlər bağlı kitabdır, çaşdırıcı və zəif
kəlamdır, heç kimdən seçilməyən, hətta baxıldığında belə görülməyən sıradan
insanlardır.
Eşqi heç kimə tövsiyə etmirik. İnsanlığın bu halı onun
özünə gözəldir. Eşq insanın halını qatar, mövcudiyyətini əlindən alar, onun
sevimli və əziz dünyasını, çox istədiyi həyat adlı oyuncağını param-parça edər.
Fəxrəddin Salim