• cümə, 29 Mart, 14:48
  • Baku Bakı 14°C

Zəlzələ qorxusu yuxusuzluq problemi yaradır

20.03.23 14:15 545
Zəlzələ qorxusu yuxusuzluq problemi yaradır

Türkiyə Yuxu Təbabəti Dərnəyinin İdarə Heyətinin üzvü, professor Hikmət Fırat təkcə zəlzələdən zərər çəkən şəxslərin deyil, eyni zamanda yaşanan hadisələrin psixoloji təsirinə məruz qalanların da yuxu problemindən əziyyət çəkdiyini deyib.

AZƏRTAC Anadolu Agentliyinə istinadla bildirir ki, professor sosial mediadakı görüntülərin bu vəziyyətə səbəb olduğunu qeyd edib: “Fevralın 6-da Kahramanmaraş bölgəsində yaranan zəlzələlərdən sonra narahatlıq səbəbindən yuxu problemləri şikayətləri artıb. Gecələr zəlzələ qorxusu ilə yatmaq yuxuya getmədə çətinlik yaradır. Gecə tez-tez oyanmaq, yuxu vaxtının azalması, kabuslar görmək son vaxtlar tez-tez qarşılaşılan problemlərdir”.

Müxtəlif bölgələrdə zəlzələlərin davam etməsinin yuxu xəstəliklərinin göstəricilərini artırdığını qeyd edən professor, "Yalnız zəlzələdən zərər çəkənlərin deyil, hadisələrin psixoloji təsirinə məruz qalanların da yuxu problemləri var. Sosial mediada yayılan görüntülər vəziyyəti ağırlaşdırır. Sağlam yuxu insanın fiziki, zehni və emosional rifahı üçün vacibdir. Yatmaq bədən sistemimizin dirijorudur”, - deyə vurğulayıb.

Professor keyfiyyətli yuxu üçün yataq otağında telefon, televiziya, vizual xəbər və media vasitələrinin olmamalı olduğunu bildirib: “Axşam saatlarında ağır idmandan uzaq durmaq və yatmazdan 3-4 saat əvvəl axşam yeməyi yemək lazımdır. Yuxu vaxtına yaxın maye istehlakını azaldın, süd, qatıq, banan kimi qidaları istehlak edin. Bu qidalar axşam yuxuya keçidi təmin edən melatonin hormonunun ifrazına kömək edir. Yuxusuzluq yüksək təzyiq, ateroskleroz kimi ürək-damar xəstəlikləri, diabet və guatr kimi endokrin və metabolik problemlərə rastgəlmə tezliyini artırır. Bunlar infarkt, insult, ürək çatışmazlığı, yaddaşsızlıq və depressiyaya səbəb ola bilər. Eyni zamanda orqanizmin immun sistemini zəiflədir və xərçəngə səbəb olur”.

banner

Oxşar Xəbərlər