“Birlik, həmrəylik və məsuliyyət hissi ilə bu virusa qalib gələcəyik”

Azərbaycan pandemiya ilə uğurla mübarizə apara bilən ölkələr siyahısındadır

Ölkəmizdə, bütün dünyada olduğu kimi, pandemiya ilə mübarizə davam edir. Ölkə vətəndaşlarının səbir və təmkinli davranışı, karantin qaydalarına riayət etmələri, fərdi məsuliyyət və dövlət tərəfindən görülən irimiqyaslı tədbirlərin nəticəsində artıq müsbət dinamikanı görürük. Belə ki, son vaxtlar virusa yoluxan insanların sayı gündən-günə azalmaqda, sağalan insanların sayı isə sürətlə artmaqdadır. Elə bu səbəbdən də karantində yumşalma xarakterli addımlar atılır.

"İnsanlar yeni reallıqla yaşamağı öyrənsələr...”
Hacəttəpə Universitet xəstəxanasında çalışan azərbaycanlı həkim Turanə Rəsulova deyir ki, insanlar yeni reallıqla yaşamağı öyrənsələr, müsbət nəticələr əldə olunacaq: "Bu virusa yoluxmanın qarşısının alınmasında sosial məsafə həddindən artıq önəmli faktordur. Hər şeyi dövlətin qadağasına bağlamaq olmaz. Öz üzərimizə düşən məsuliyyəti başa düşməliyik ki, bu mübarizədən qalib çıxa bilək. Qarşıdan payız fəsli gəlir, bizi naməlum qış gözləyir. Bu payız COVİD-19-un ikinci dalğasının olma ehtimalı var. Bunun üçün güclü olmalı, özümüzü qorumalıyıq. Açıq havada yalnız insanların toplu şəkildə olmadığı yerlərdə sosial məsafə gözləyərək vaxt keçirməliyik”.
Həkimin sözlərinə görə, ciddi karantin rejiminin tətbiqi ilə səhiyyənin çökməsi mərhələsinin qarşısı alındı: "Həmçinin insan sosial varlıqdır. Bu həm sosial, həm iqtisadi, həm də psixoloji problemlərə yol aça bilər. Odur ki, şərtlər bir az yumşaldılaraq, nəzarət olunur. Yəni virusun yayılmasında artım müşahidə olunmasa, növbəti mərhələyə keçid olunacaq. Əksi baş verərsə, yenidən sərtləşdiriləcək. İkinci, üçüncü dalğa gələ bilər. Hər nə olursa-olsun, insanlar sağlamlıqlarına biganə yanaşmamalıdırlar. Az da olsa simptomları hiss edirlərsə, mütləq şəkildə həkimə müraciət etməlidirlər. Virusun dünyanı cənginə almağındansa, uğurlu təcrübi nümunələrdən istifadə edib, vəziyyəti ələ almaq daha məqsədəuyğundur. Önəmli olan, deyilənlərə qulaq asmaq, dövlətin tapşırıqlarına əməl etməkdir. Əslində biz milli həmrəylik dövrünü yaşayırıq. Dövlətin gördüyü bütün tədbirlər sağlamlığımız naminədir”.

Birlik, həmrəylik və məsuliyyət


"Əldə etdiyimiz nəticəni qoruyub saxlamalıyıq”

Deputatın sözlərinə görə, nəticələrimiz ürəkaçan olsa da, arxayın olmamalıyıq: "Hələ də xəstəliyə inanmayan insanlar var. Bu davranış çox anlaşılmazdır və qətiyyətlə pislənilməlidir. Çünki həmin insan yaxşı immunitetə malik ola və xəstəliyi simptomsuz keçirə bilər. Amma o, yaşlı ata-anasını, qohumunu, qonşusunu və cəmiyyətin ayrı-ayrı üzvlərini xəstələndirə bilər ki, bu da çox təhlükəlidir. Ona görə də ilk növbədə məsuliyyət hissi olmalıdır. Burada 3 prinsip əsas yer tutur: maskalardan istifadə, sosial məsafənin saxlanması və gigiyenik qaydalara əməl edilməsi. Sevindirici haldır ki, Azərbaycanda yoluxma faizi kəskin şəkildə düşməyə başlayıb. Bu virusa yalnız dövlətin apardığı siyasətlə qalib gəlmək mümkün deyil. Burada, hesab edirəm ki, birlik, həmrəylik və məsuliyyət olmalıdır. Şükürlər olsun ki, bu istiqamətdə nəticələrimiz ürəkaçandır. Amma bütövlükdə bu, arxayınçılığa əsas verməməlidir. Çünki bəzi ölkələrdə ikinci, hətta üçüncü dalğanın başlaması haqqında məlumatlar var. Heç bir halda arxayınlaşmaq olmaz. İndi əldə etdiyimiz nəticəni qoruyub saxlamalıyıq və məsuliyyətli olmalıyıq”.

"Böyük dövlətlər bu xəstəliyin qarşısında aciz qalıblar”

Həmsöhbətimiz deyir ki, insanlar bu virusa dırnaqarası baxsa da, sonradan anladılar ki, həyata keçirilən bütün tədbirlər əhalinin sağlamlığı üçündür: "Sevindirici haldır ki, artıq maskasız adamlara hamı irad tutur, tələb edir ki, mağazaya maskasız girmək olmaz. Bu mənada insanlarda da düzgün yanaşma formalaşır. Mənim ümidim böyükdür. Düşünürəm ki, biz bu bəla ilə mübarizədən qalib çıxacağıq. Sadəcə olaraq, bu yumşalma dövründə gərək əhalimiz diqqətli olsun. Yumşalma tədbirləri o demək deyil ki, virus bitib. Biz bundan sonra da "başımızın ağrımaması” üçün mübarizə aparmalıyıq. Diqqətli, səliqəli olmalı, gigiyenik qaydalara əməl etməliyik ki, bu virusa qalib gələ bilək. Demokratik cəmiyyətin ən vacib şərtlərindən biri odur ki, hər kəs öz üzərinə düşən məsuliyyəti dərk etsin. Bir insan kimi hər kəs öz ailəsinə, qonşularına, cəmiyyətə münasibətdə öz məsuliyyətini hiss etməlidir. Bu çox vacib şərtdir”.

Aygün ƏZİZ