“Onlar Azərbaycanı sevə bilməzlər”
Şəxsi mənafeyini milli
maraqlardan üstün tutanlar işğalçı dövlətə simpatiya bəsləyir, düşmən ölkə ilə
eyni mövqedən çıxış edirlər
Azərbaycan Prezidentinin tutarlı
faktlara əsaslanaraq Ermənistan hakimiyyətini tənqid etməsi, bu dövlətin
işğalçılıq siyasətini beynəlxalq tədbirlərdə ən yüksək tribunalardan dilə
gətirməsi rəsmi İrəvanı, ümumdünya ermənilərini qıcıqlandırır, narahat edir.
Bu, təbii haldır. Çünki işğalçı, təcavüzkar dövlət və onun təmsilçiləri
beynəlxalq aləmdə ifşa olunur, siyasi-diplomatik zərbə alırlar. Təəssüf doğuran
məqam budur ki, Prezident İlham Əliyevin beynəlxalq hüquqa, tarixi reallığa,
ərazi bütövlüyü prinsipinə söykənən fikirləri sapı özümüzdən olan baltaların
kürkünə birə salıb.Bu məsələdə Ermənistan mediası,
erməni fəalları və AXCP sədri Əli Kərimlinin kurasiyasında olan Milli Şura, bu
antimilli təşkilatın Koordinasiya Mərkəzində yer alanlar, həmçinin xaricdə
yaşayan bəzi fəallar "əks-arqumentlə”, müəyyən iddialarla çıxış edirlər. Hətta
bir sıra hallarda iddia olunur ki, guya Ermənistan hakimiyyəti haqqında
Prezident İlham Əliyevin irəli sürdüyü fikirlər, əslində Azərbaycan
hakimiyyətinin özünə aiddir.
Ermənistan
iqtidarını mədh edənlər
Yalnız satqın və xəyanətkarlar,
öz şəxsi maraqlarını milli-dövlətçilik maraqlarından üstün tutanlar işğalçı
dövlətə bu qədər simpatiya bəsləyə, kin-küdurətini düşmən ölkə ilə eyni
mövqedən çıxış etməklə ortaya qoya bilərlər. Milli Şura təmsilçilərinin, eləcə
də onların xaricdəki dəstəkçilərinin simasında biz bu mənzərəni hər gün seyr
etməkdəyik. Antimilli təşkilatda yer alan şəxslər davamlı şəkildə Ermənistan
iqtidarını, onun həyata keçirdiyi siyasəti mədh edir, inqilab yolu ilə
hakimiyyəti zəbt edənləri "demokratiya fədailəri” sayıb, təbliğatını aparırlar.
Halbuki, Azərbaycan və Ermənistanın sosial-iqtisadi inkişafı, dünya, o cümlədən
regional siyasətdə rolu və yeri azacıq təhsili, savadı olan hər kəsə bəllidir.
Bu yöndə ortada olan kəskin fərqləri aydın görmək üçün siyasətçi, iqtisadçı
olmağa ehtiyac yoxdur. Pandemiya dövründə Azərbaycanda əhalinin sosial
durumunun yaxşılaşdırılması üçün müəyyən addımlar atıldığı, iqtisadiyyatın,
biznesin dayanıqlığının təmin edilməsi üçün mühüm işlər görüldüyü halda,
işğalçı Ermənistanda olduqca acınacaqlı durum hökm sürməkdədir. Acınacaqlı
durumda olan baş nazir Nikol Paşinyan ölkəsində pandemiyanın nəzarətdən
çıxmasını, yoluxma sayına görə Ermənistanın dünyada lider olmasını şəxsən
etiraf edib. Onun bu çıxışı "Youtube”da, xəbər saytlarında var.
Könlü
balıq istəyən suya baş vura bilər
Deyilənlərə şübhə ilə yanaşan
istənilən şəxs internet resurslara baş vurub axtarış edə, bu barədə istənilən
qədər materialla tanış ola bilər. O da heç kimə sirr deyil ki, müstəqil xarici
və daxili siyasət aparan Azərbaycandan fərqli olaraq işğalçı Ermənistan
Rusiyanın forpostudur, müstəqil siyasət həyata keçirə bilmir, daim xarici
ölkələrdən asılıdır. Ermənistanın forpost dövlət olduğunu Rusiya
siyasətçilərinin dilindən dəfələrlə səsləndirilib. Eyni zamanda bu ölkədə
siyasi opponentlərə, müstəqil media, vətəndaş cəmiyyəti institutları və
fəallarına qarşı ciddi təzyiqlər, həbslər var. Digər tərəfdən, Ermənistanda
hakim ailəyə qarşı irəli sürülən korrupsiya və sair qanun pozuntuları ilə bağlı
ittihamlar da səsləndirilməkdədir. Könlü balıq istəyən suya baş vura bilər.
Yəni həqiqətləri bilmək arzusunda olan internet üzərindən axtarış edib, bütün
bu sadalananlara dair faktlarla, çoxsaylı materiallarla tanış ola bilər.
Radikalların
əsl siması və xisləti
Amma həyata qara eynək arxasından
baxmağı, ağa qara deməyi özlərinə həyat tərzi seçənlər, vətənpərvərlik və
reallıq hissini itirənlər üçün bütün bu deyilənlərin heç bir faydası yoxdur.
Misal üçün, Milli Şuranın sədri Cəmil Həsənli, bu qurumda təmsil olunmuş digər
fəallar, habelə keçmiş səfir Arif Məmmədov kimi xaricdə yaşayan bəzi şəxslər
milli hisslərini tam itirərək hakimiyyətə qarşı deyil, artıq dövlətə qarşı
mübarizə aparmağa başlayıblar. Onlar "Azərbaycana nə qədər pisdirsə, bizə o
qədər yaxşıdır” prinsipindən çıxış edir, öz iddialarını gerçəkləşdirmək üçün hətta
işğalçı Ermənistanın təbliğatçısına çevrilir, vətənlərini ləkələməkdən belə
çəkinmirlər.Məhz bunun nəticəsidir ki, Milli
Şura, AXCP, xarici ölkələrdə yaşayan bəzi fəalların iddiaları Ermənistan
mediasının irəli sürdüyü tezislərlə sinxron təşkil edir. Bu isə heç də
təsadüfən baş vermir. Bir qədər dərinə gedəndə aydın olur ki, antimilli şura
üzvlərinin və onların xaricdəki dəstəkçilərinin əməllərinin arxasında Qərbin
bəzi ermənipərəst dairələrinin maliyyə qaynaqları dayanır. Necə deyərlər, pulu
kim verirsə, sifarişi də o edir. Vətənpərvərlikdən uzaq qaragüruh yığını da bu
musiqi sədaları altında rəqs edir. Bunu aydın dərk etmək üçün Milli Şuranın son
videokonfransından yayılan görüntülərlə tanış olmaq da kifayətdir. Həmin
toplantıda Milli Şura üzvləri özləri etiraf edirlər ki, bu qurumun əsas
vəzifəsi Azərbaycan hakimiyyətini şərləməkdir. Sözügedən fakt onların əsl
simasını və xislətini növbəti dəfə aydın şəkildə nümayiş etdirir.
Özlərinin
öz üzərlərində istehzası
Mövzu ilə bağlı fikirlərini "Kaspi”
qəzetinə açıqlayan siyasi şərhçi Azər
Həsrət bildirib ki, AXCP sədri Əli Kərimli, onun kimi adamların toplaşdığı,
özünə "milli” deyən antimilli şura illərdir Azərbaycan dövlətinin erməni
təcavüzünə qarşı siyasətini baltalamaqla məşğuldur. Onun sözlərinə görə,
antimilli şəxslərin belə davranması əsla təəccüblü deyil: "Məhz belə
davrandıqları – Azərbaycan dövlətinin milli maraqlarına balta çaldıqları üçün
başında ağlı olan, normal siyasi müxalifətçiliklə məşğul olan heç kim onların
yanında uzun müddət qalmır. Yəni bu adamların antimilli mahiyyəti dərhal özünü
büruzə verir. Bu baxımdan Prezident İlham Əliyevin Ermənistan və onun küçədən
gəlmiş baş naziri ilə bağlı səsləndirdiyi fikirlər, ümumiyyətlə ermənilərin
təcavüzkar mahiyyəti haqqında dedikləri Milli Şura adlı qurumdakıları daim
narahat edir. Ona görə Azərbaycan Prezidenti milli maraqları ifadə edir,
bunlarsa antimilli mövqedədirlər. Belə olan halda, ermənilərlə səs-səsə
vermələri şəxsən mənim üçün heç təəccüblü deyil. Digər tərəfdən, antimilli şura
üzvlərinin bu günlərdə internetdə yayılan videokonfrans görüntülərindən də belə
məlum olur ki, onların işinin adı hökuməti şərləməkdir. Bu etiraf onların əsl
simasını və xislətini aydın nümayiş etdirir. Bu, sadəcə olaraq özlərinin öz
üzərlərində istehzasıdır. Yəni adamlar özlərinin mahiyyətini öz dilləri ilə
ifadə edirlər”.
Xaricdəki
"dayılarının” sifarişlərini yerinə yetirənlər
Demokratiya
və İnsan Hüquqları Komitəsinin sədri Çingiz Qənizadə isə hesab edir
ki, əslində müxalifət hakimiyyətdə olanların çatışmazlığını üzə çıxarıb, əsaslı
şəkildə ortaya alternativ bir variant, layihə qoymaqla bu səhvlərin
düzəldilməsinə çalışmalı, əgər düzəlməzsə, özləri gələrlərsə, hansı yollarla
bunu edəcəklərini göstərməlidir. O təəssüflə qeyd edib ki, hazırda Azərbaycandakı
radikal müxalifət, həmçinin Milli Şura adlı qurumda toplaşanlar tamamilə fərqli
yanaşma ortaya qoyurlar: "Həm xaricdə, həm də daxildə müxalifət partiyalarının
üzvü olaraq, "beşinci kolon” yaradıb, ölkənin siyasi rəhbərliyinə, ölkədəki
müvafiq qurumlara, vəzifəli şəxslərə böhtan atmaqla məşğul olurlar. Belə hesab
edirlər ki, bununla hansısa bir siyasi mübarizə aparırlar. Hətta düşmən mövqedə
dayananda belə, onu kişi kimi aparmaq lazımdır. Lakin Milli Şuradakı qruplar bu
məsələdə tamamilə fərqlidirlər və nəinki dövlətin, hakimiyyətin, həm də xalqın
düşməni olaraq davranırlar. Bu adamlar hətta söyüşdən, təhqirdən belə
çəkinmirlər, vəzifəli şəxslərə qarşı çox iyrənc formada fikirlərini
çatdırırlar. Milli Şura üzvü Qənimət Zahidin Fransada oturub açıq-aşkar hakimiyyəti
şərlədiyini etiraf etməsi, həmçinin təmsil olunduğu qurumun bütövlükdə işinin
bundan ibarət olmasını deməsi, özü-özlüyündə oradakıların simalarını, daha
dəqiqi desək, simasızlıqlarını ortaya qoyur. İnsanlar görsünlər ki, bunlar
xaricdə oturub, oradan maliyyələşirlər, müəyyən dairələrin dedikləri ilə
hərəkət edirlər. Bunlar Azərbaycanı sevə bilməzlər. Onlar hakimiyyətə, vəzifəli
şəxslərə şər-böhtan atmaqla xaricdəki "dayılarının” sifarişlərini yerinə
yetirirlər. Bu isə Milli Şuranın yararsız, xalqa, dövlətə düşmən qurum olduğunu
nümayiş etdirir”.
Rufik
İSMAYILOV