“Ey millət təəssübü çəkən qardaşlar, vaxt keçməmiş, məktəbxanalar bina edin...”
Həsən bəy Zərdabi «Əkinçi»nin səhifələrində yazırdı
Zərdabişünas alim Esmira Cavadova
öz həyatını jurnalistikaya, araşdırmaya, elmi tədqiqatlara həsr edib. O,
1920-ci ilə qədər olan Azərbaycan jurnalistikasının zəngin kartotekasını
hazırlayıb. 1980-ci ildən etibarən araşdırma ilə məşğul olmağa başlayıb. Onun
yaradıcılığının əsas hissəsini Azərbaycan milli mətbuatının banisi Həsən bəy Zərdabinin
həyat və yaradıcılığı ilə bağlı araşdırmalar təşkil edir.
Bununla yanaşı, Esmira xanım Həsən
bəy Zərdabinin 1897-1907-ci illərdə Bakı Dumasındakı fəaliyyəti ilə əlaqədar də
fundamental araşdırma aparıb. Həmin əsərdə Zərdabinin Dumada qaldırılan məsələlərə
münasibəti öz əksini tapıb. Həmin dövrdə Zərdabi xalqımızın taleyüklü məsələlərini,
o cümlədən elm və təhsillə bağlı qayğılarını, müxtəlif problemlərdən dolayı
narahatlıqlarını dilə gətirib.
Esmira
Cavadova Həsən bəy Zərdabinin "Əkinçi” qəzetində dərc olunmuş məqalələrini təqdim
edir:"Altı ay yoxdur ki, bizim «Əkinçi» qəzeti çap olunur, amma ingilisin
paytaxtı London qəzetində onun çap olunduğu məlumdur. Oradan bir kitabın bir fəslin
türk dilində olan tərcüməsini bizə göndəriblər ki, onun qəzetini düzəldək. Əlhəd,
bu çox ziyadə gözüaçıqlığın istər. London şəhərində bir neçə yüz qəzet çap
olunur. Onunla belə kişilər dünyanın içində bizim qəzet kimi bir kiçik qəzet
olmağını eşidib istəyirlər ondan da xəbərdar olsunlar, amma bizim adamın çoxu nə
ki, buçağadək bizim qəzeti oxumayıblar, bəlkə bəzi kəslər onun bina olunmağının
xəbərini də eşitməyiblər. Hətta elə adam var ki, qəzet pulu verib onu almaq istəmir.
Bizim xalq dünya işlərini belə soyuq tutmağı bilirkən biz «Əkinçi» qəzetini
çap etdirməyi başlamışıq və bizim təkcə yuxudan oyananlarımıza ümid olmuşuq ki,
xalq oxuyub ondan mənfəətbərdar olmağa və dünya işlərindən xəbərdar olmağa səy
edəcəklər.
…Biz müsəlmanlar dünya işini soyuq tutmağa bizim məzhəbimiz səbəb
deyil ki, onu xaricilər bizlərə böhtan deyirlər. Cənab şeyxülislamın bu nömrədə
çap olunan məktubunu oxuyana məlum olur ki, bizim peyğəmbərimiz öz ümmətini irəli
salmaqdan ötrü onlara hökm edibdi ki, hər bir elini təhsil etsinlər”.
«Əkinçi» 1876, 1 yanvar,
1875-ci ilin axırıncı nömrəsi – yəni 12-ci nömrə; «Daxiliyyə».
"Peterburqda bir padşahlıq kitabxanası var ki, onun hər ildə 800000
manat xərci olur. Ol kitabxanada 900000 basma, 30000 yazma kitab və 75000 kitab
surəti var. Qiymətli kitabları şüşə altında saxlayırlar ki, onlara dəyməsinlər.
O cümlədən bir qızıl cildli Quran var ki, qiyməti 33000 manatdır”.
Əsgər Gorani.
«Əkinçi» 1876, N1, 16
yanvar, «Təzə xəbərlər».
"Bizim Bakubə şəhərində çiçək naxoşluğu olduğuna (görə - red.) indi
ancaq çiçəkdən danışacağıq.
Çiçək iki qism naxoşluğa deyirlər ki, birisi əsl çiçəkdir və birisi səpgidir.
Əsl çiçəkdən çox adam tələf olur, amma səpgidən yüzdə biri vəfat edir. Keçən
zaman ki, çiçək döymək məlum deyilmiş, çiçək qarayara kimi hər vilayətə düşsə
onu tamam edirmiş. Amma indi onun səbəbi və əlacı məlum olduğuna ol qədər şiddət
etmir.
Çiçəyi döyülən kəs çiçəkdən xəstə olmur, əgər olsa da az olur. Bəzi
vaxtda çiçəyi döyülən kəs demə sonra çiçəkdən naxoşlayır. Ona binaən təbiblər məsləhət
edirlər ki, hər kəs on ildə bir dəfə çiçəyini döydürsün və belə deyirlər ki, ol
vaxtda ona heç çiçək dəyməz.
Əgər çiçək düşən yerdə təbib olsa, onu xəstənin üstə gətirdib onun məsləhətlərinə
görə əməl etmək gərək, amma təbib olmasa lazımdır xəstəni soyuqdan və istidən
mühafizə edib ona isti və təmiz xörəyi az-az verib, paltarını və bədənini pak saxlamaq və əgər işlətmə lazım olsa gərçək
yağı vermək. Belə saxlanan xəstənin çoxu təbibsiz də şəfa tapır. Xəstəni ayrı
otaqda saxlamalı ki, orada qeyri kəs sakin olmaya. Xəstəni elə saxlamaq gərək
ki, onun yaralarının üstə milçək düşməsin, yoxsa onun ayaqlarına və qanadlarına
ol yarada olan ələfiyyatın toxumları yapışar və sonra ol milçək sağ adamın
üstünə oturanda ona da çiçək salar”.
«Əkinçi» 1876, N2, 30
yanvar, «Daxiliyyə».
"Əkin yerini şuxm etməkdən ötrü əkinçinin ən başlıca aləti kotandır.
Kotan yaxşı olduqcan yeri yaxşı nazik edər, onu işlətməyin zəhməti az və yerin
bəhrəsi çox olur. Yaxşı kotan gərək şuxmu bir qalınlıqda kəsib qalxızıb,
çökürüb əzsin.
Kotan üç qism olur: diyircəksiz, dayaqlı və diyircəkli. Diyircəksiz
kotan yüngül olduğuna ona daş ya kəsək rast gələndə onu düzəltmək asandır. Ona
binaən onunla daşlı yeri şuxm etməkdən ötrü işlədirlər ki, yüngül olduğuna az
mal ilə də işlətmək olur. Ona bir ya iki cüt öküz qoşurlar. Onun cırıqları düz
olmadığına şüxumu təmiz olmaz.
* *
Dayaqlı kotanın altında bir ucu yastıq, dayaq ya bir diyircək olur.
Ona binaən onu düz saxlamaq çətin deyil, onun cırıqları düz və şuxmu təmiz olur
və əgər lazım olsa, onun dayağını çıxarıb diyircəksiz kotan yerinə işlətmək
olur. Ona 2 ya 3 cüt öküz bəsdir.
* *
Diyircəkli kotanın iki diyircəyi olur ki, onların üstə qırın başı
dayanıb, onların üstünü basıb kotanı ağır edir. Ona 3 ya 4 cüt öküz qoşurlar,
amma o ağır olduğuna onu düz saxlamaq asandır, hətta əkinçi əldən qoyanda da
çökürülməz. Ona binaən onun cırıqları düz və şuxmu təmiz olur...
Məzkur kotanları hər vilayətdə bir qeyri cürə qayırırlar. Xülasə,
dünyada kotan çoxdur, amma bizimkindən yamanı heç olmaz. Onun hər bir hissəsi
yaman olduğuna 8 cüt öküz ilə işlədirik və onilə belə yeri narın edib çökürə
(çevirə – E.S.) bilmirik. Ona binaən bizim tavanası olan əkinçilər yaxşı elərdilər
ki, Moskva karxanalarından əla kotanlardan gətirdib işlədəydilər. Çünki indi su
buğu ilə işləyən kotan-maşın ixtira ediblər ki, bir tağar yeri bir saatda şuxm
edir”.
«Əkinçi» 1876, N2, 30
yanvar, «Əkin və riaət xəbərləri».
Məqalədən aydın olur ki, Həsən bəy Zərdabi Azərbaycan kəndinə yeni təkmilləşdirilmiş
fabrik kotanlarının gətirilməsini tövsiyə edir, əkinçiliyi yeni əsaslar üzərində
inkişaf etdirməyi məsləhət bilirdi. Lakin Azərbaycan kəndlisinin iqtisadi
yoxsulluğu Həsən bəy Zərdabinin bu arzularının onun yaşadığı dövranda yerinə
yetirilməsinə hələ imkan vermirdi. Odur ki, inqilaba qədər bəzi mülkədar təsərrüfatları
istisna olmaqla Azərbaycanın hər yerində əhalinin əsas şum aləti ənənəvi xış və
ağac kotanlar olaraq qalmaqda idi.
Bu nömrədə:"Tiflisdə dövlət tərəfindən bir məclis bina olunub ki, Qafqazda olan əkin
sulamaq adətlərini cəm bir qərardad qoysun ki, su xalq arasında doğruluq ilə
paylansın”.
«Əkinçi» 1876, N2, 30
yanvar, «Təzə xəbərlər».
"Keçən yanvarın 19-da Şuşa şəhərində, yəni Qarabağın Şuşa qalasında
teleqrafxana açılıb”.
«Əkinçi» 1876, N3, 15
fevral, «Təzə xəbərlər».
"Rusiyada torpaq kənd camaatına təəlüq olduğuna bəzi kəndlərdə camaat
əkin-biçini bir yerdə edib, sonra məhsulatı bölürlər. Camaatın belə birləşməsinin
bir xeyri də odur ki, elm yolu ilə təmir olunmuş əsbabları gətirib işlətmək
asan olur.
* *
Berlin şəhərində qulluqçular üçün məktəbxana açılıb ki, onlar paltar
tikməyi, yumağı, biçməyi və xörək bişirməyi öyrənirlər”.
«Əkinçi» 1876, N4, 29
fevral, «Təzə xəbərlər».
"3 il bundan əqdəm İngilisdə bir icma bina olub ki, hər bir şəhərdə
qızlardan ötrü məktəbxana açsın. İndiyəcən 9 məktəbxana bina edib. Ol camaatın
hər ildə öz calislərindən 90 min manat cəm olur”.
«Əkinçi» 1876, N7, 14
aprel, «Təzə xəbərlər».
"Əhəng adamın gözünə düşəndə onu su ilə yumaq yaxşı deyil, ona binaən
ki, sudan əhəng bərkiyib ziyadə azar edər. Yaxşıdır ki, onu qənd suyu ilə
yuyasan”.
«Əkinçi» 1876, N8, 28
aprel, «Elm xəbərləri».
"Rusiya zakonuna binaən küçələrdə dilənçilik etmək qadağandır. İndiyəcən
Peterburqda 24 icma bina olub ki, dilənçilərdən ötrü əlahiddə mənzillər bina
edib onlara kömək etsinlər. Ol icmaların calislərində hər ildə 118 min manat cəm
olur.
* *
450 il bundan sabiq Osmanlı türkləri Avropaya daxil olub Rim dövlətinin
Qəstəntiniyyə şəhərini zəbt edib ona İstanbul, yəni islam şəhəri ad qoyub, ətrafda
vaqe olan xaçpərəst vilayətlərini həm zəbt ediblər. Bir neçə il bundan sabiq
zikr olan vilayətlərin biri ki, olsunlar Serb və Qaradağ, yəni Əşqüdrə, Əflan və
Bağdan əyalətləri Osmanlı dövləti ilə cəng edib onun rizdəstindən çıxıb, indi
ancaq dövləti – Osmaniyyə müəyyən olan xərc verirlər, amma ümrati – daxiliyyələri
özləri ilədir.
Bosnə və Qerdseqovinə əhli Osmanlı dövləti ilə cəng edirlər, onların
həm muradi oldur ki, zikr olan əyalətlər kimi olsunlar... Osmanlıya heç xərc
verməsinlər”.
«Əkinçi» 1876, N8, 28
aprel, «Təzə xəbərlər».
Həsən bəy Zərdabi dövlət tərəfindən məktəbxanalar barəsində qoyulmuş
yeni qaydalardan danışaraq yazır ki, "ol qaydaya görə hər bir məktəbxana dövlət
tərəfindən açılmalıdır, istər dövlət tərəfindən ya məxsusi olsun, bu məktəblərdə
qeyri elmlərdən savayı rus dili oxunmalı və hər kəs məktəbxanaya baxmaqdan ötrü
dövlət tərəfindən ayrıca çinovniklər təyin olunmalıdır. Bu qaydadan xəbərdar
olan ermənilərin ruhaniləri cənab sərdara ərizə verib bəyan ediblər ki, onların
kilsələrinin yanında olan məktəbxanalarda ancaq ruhanilər öyrədilir və erməni
ruhanisi üçün rus dili bilmək lazım deyil. Ol səbəbə cənab sərdar zikr olan
qaydanı belə dəyişdiriblər: Erməni kilsələrinin və müsəlmanların məscidlərinin
yanında açılan məktəbxanalardan savayı hər bir məktəbxana olsa, orada gərək rus
dili oxunsun və bu məktəbxanalara baxmaqdan ötrü əlahiddə çinovniklər təyin
olunub; bir də hökm olunub ki, əvvəl zaman Gəncə və Bakubə quberniyalarının hər
birində kənd əhli üçün dövlət tərəfindən 3 məktəbxana açılsın. Onların üçü bu
il Gəncə quberniyasında açılacaq, amma Bakubə quberniyasında hələ açılmayacaq.
Çünki ol məktəbxanalarda dərs deməyə müəllimlər yoxdur ki, rus dilindən savayı
xalqın dilini həm bilsinlər, ona binaən Qori şəhərində bir məktəbxana açılıb
ki, orada oxuyan şagirdləri sonra müəllim eləsinlər. Ol məktəbxanalarda 20 nəfər
erməni və gürcü padşahlıq xərcilə oxuyacaq. İndi «Kavkaz» adlı qəzet yazır ki,
doğrudur, müsəlmanların məktəbxanaları üçün müəllimləri oxutmaqdan ötrü sonra əlahiddə
məktəbxana açılacaq, amma indi müsəlmanlardan hər kəs xahiş etsə, zikr olan
Qoridə açılan məktəbxanaya öz uşaqların öz xərcilə qoya bilər. Oraya oxumağa
girən kəs gərək uyezdni şkolada oxumuş ola və özu 16-19 yaşında ola. Orada 3 il
dərs deyiləcək”.
«Əkinçi» 1876, N10, 27
may, «Daxiliyyə».
Həsən bəy Zərdabi Bakı qubernatoru olmuş cənab Staroselskinin
«Əkinçi» qəzetinin SA olunmasındakı böyük rolundan, yaxşılıqlarından özünün
dediyi kimi bir neçə kəlmə danışmağı özünə borc, vacib bilmişdi. O yazırdı: "3
il idi ki, bizə qəzeti SA etməyə izn vermirdilər. Buna səbəb o idi ki, Bakubədə
dövlət tərəfindən qəzetlərə mülahizə edən adam yox idi. Amma ol cənab bizə
zamin olub ol izni bizim üçün aldı. Çapxanamız da yox idi. Hürufati İstanbuldan
gətirəndən sonra cənab Staroselski həmin hürufatı qubernski pravleniyanın
çapxanası üçün aldı ki, indiyəcən orada bizim qəzet çap olunur. Daha sonra o
uyezdin naçalniklərinə tapşırıq verdi ki, kəndlərə poçt işləmədiyinə görə
onlara qəzeti çaparlar vasitəsilə göndərsinlər. Cənab Staroselski həmişə
«Əkinçi» qəzetinə maddi və mənəvi köməklik göstərirdi. Millət işlərinə elədiyi
yaxşılıqlarına görə onun barədə bir neçə kəlmə yazıb bizim qəzetin dostlarına bəyan
edirik, qoy onun ismi tarixlərə düşüb baqqi olsun”.
«Əkinçi» 1876, N12, 25
iyun, «Daxiliyyə».
"Ey millət təəssübü çəkən qardaşlar, pəs vaxt keçməmiş elm kitabları
gətirib, məktəbxanalar bina edib, öz dilimizdə təhsili-üluma məşğul olun ki,
müsəlmanlıqda daim olasınız. Ey elm təhsil edən cavanlarımız! Doğrudur, bizim vətən
qardaşlarımız ilə yüz tutmaq çətindir, siz danışdığınızı onlar başa düşməyib, əfalinizi
şəriətə namüvafiq hesab edib, sizə kafir deyib incidəcəklər. Doğrudur, qeyri
millətlər sizin kamalınızı görüb sizə artıq rütbə verəcəklər, amma insaf deyil
ki, beş gün ömrün ləzzətindən ötrü milləti, qardaşlarımızı atıb, onları kor və
sərgərdan qoyasınız. Sizi nə qədər incitsələr, həcv etsələr, mollalar lənət
oxusalar, siz millət üçün zəhmət çəkirsiniz və bişəkk gələcəkdə millətin gözü
açılanda sizi şəhid hesab edib, sizə rəhmət oxuyacaq”.
«Əkinçi» 1876, N11, 11
iyun, «Daxiliyyə».
Qəzetin həmin sayında «Məktubat» başlığı altında Hacı Seyid Əzim Məliküşşüəranın
öz oğlu Mirsəfərə yazdığı «Nəsihətnamə»si çap olunub. «Nəsihətnamə”dən məlum
olur ki, Seyid Əzim oğlunu Şamaxıda yenicə açılmış uşkola (rus məktəbi – E.S.)
qoyur və xalqın məzəmmətini görüb elm təhsil etməyin vacibliyini oğluna başa
salaraq belə məsləhət edir: (ixtisarla)
Cəfər, ey qönçeyi-gülüstanım!
Ey mənim bülbüli-xoşəlhanım!
Demirəm rus, ya müsəlman ol,
Hər nə olsan, get əhli-ürfan ol.
* *
Xassə kim, padşahi-kişvəri – Rus,
Eyləyir tərbiyət kəmal əhlin,
Gətirir halə hər məhal əhlin,
Hər vilayətdə açdı məktəblər,
Çatdılar feyzə əhli-mənsəblər.
Oxunur onda müxtəlif dillər,
Həll olur onda cümlə müşküllər,
Ey oğul, bu dəlili-bişəkdir,
Edəmi-bisəvad eşşəkdir.
* *
Kim ki, bəs bir dil eyləsə hasil,
Oldu bir nemətə o kəs vasil.
Cəhd elə isməti-təmamə yetiş,
Elm təhsil gil, məqamə yetiş.
«Əkinçi» 1876, N11, 11 iyun.
"Nə qədər ki, cənab Staroselski bizim Bakubədə qubernator idi, bizim qəzet
haqqında elədiyi yaxşılıqlardan danışmırdıq, amma indi o cənab Bakubədən çıxıb
gedib, ona binaən onun yaxşılıqlarından bir neçə kəlmə danışmağı biz özümüzə
vacib bilirik. Cənab Staroselski bizim qəzetin bina olunmağına bais olub. 3 il bizə
izn vermirdilər ki, qəzeti çap etdirək. Buna ümdə səbəb bu idi ki, Bakubədə
dövlət tərəfindən qəzetlərə mülahizə edən adam yoxdur. Amma ol cənab bizə zamin
olub o izni bizim üçün aldı. Bir neçə müsəlman birləşib zor vermişdik ki,
hürufat gətirdib qəzeti çap etməkdən ötrü əlahiddə çapxana açdıraq. Amma biz
hürufatı İstanbuldan gətirəndən sonra ol icma bərhəm oldu və biz özümüz çapxana
açdırmağa məqdur olmadıq. Ol zaman cənab Staroselski zikr olan hürüfatı
qubernski pravleniyanın çapxanası üçün aldı ki, indiyəcən orada bizim qəzet çap
olunur. Sonra uyezdni naçalniklərə hökm verdi ki, kəndlərə poçt işləmədiyinə
onlardan qəzet istəyən olsa, çaparlar ilə onlara qəzet göndərsinlər. Xülasə, cənab
Staroselski həmişə «Əkinçi» qəzetinin xeyirxahı var idi. Ona binaən biz özümüzə
vacib bilib bu neçə kəlməni onun yaxşılıqları barədə yazıb, bizim qəzetin
dostlarına bəyan edirik. Qoy onun ismi tarixlərə düşüb baqqi olsun”.
«Əkinçi» 1876, N12, 25 iyun,
«Daxiliyyə».
"Sörçil adlı ingilis təbibi sinə naxoşluğu olan kəslərin bədəninin əcralarını
imtahan edib deyir ki, ol naxoşluğa düşən şəxsin bədənində fosfor adlı şey
azalır. Çünki fosfor ki, ondan kibritlərin başı olur, bərk zəhərdir, ona binaən
onu çox az naxoşa vermək olur. Bu təcrübəni edənlər deyir ki, sinə naxoşluğuna
fosfor vermək qeyri müalicələrdən yaxşıdır”.
«Əkinçi» 1876, N12, 25 iyun,
«Elm xəbərləri».
«Əkinçi» qəzeti bina oluncan bizim heç bir qəzetimiz ya jurnalımız
olmayıb.
«Əkinçi»nin adını qəzet qoymaqdan muradımız ancaq qövmiyyə xəbərlər
yazmaq idi. Amma bizim eldə jurnal olmadığına naəlac qalıb həmi təzə xəbərlərdən,
həm elm və qeyri xəbərlərdən danışırıq”.
«Əkinçi» 1876, N14, 25 iyul,
«Daxiliyyə».
"Osmanlı dövlətinin Suriya vilayəti ki, ona xristianlar Palestinya
deyirlər və orada Şam, Şərifi-Qüds, Şərifi-Beyrut və qeyri şəhərlər var,
keçmişdə yəhudilərin vətəni olub. amma həzrəti-İsa əleyhüssəlam vəfat edəndən
sonra bir Rum şahı məmləkəti-yəhudini payimal edib ki, indiyəcən yəhudilər yer
üzünə dağılıb hər bir tərəfdə dadistəd edirlər. Məsələn, bizim Rusiya dövlətində
4 milyon yəhudi var ki, onlardan heç bir əkinçi yoxdur, hamı sənətkarlıq ya
tacirlik edirlər.
Avropada ol qədər elm olmayıb, yəhudilərə çox zülm ediblər, amma onilə
belə onlar öz dillərində və məzhəblərində daim olduqlarına yəhudi milləti indiyəcən
tələf olmayıb. Avropada olan yəhudilər bir ictimai-milləti bina ediblər ki, ol
icma özlərinin qədim dillərində 5 qəzet çıxardıb, hər məmləkətin yəhudilərinə
göndərir ki, onları öz dillərində və məzhəblərində saxlasın. Ondan masəva ol
icma bu xəyala düşüb ki, Osmanlı dünləbindən zikr olan Suriya vilayətini satın
alıb qayırsın. İndi ol icma çıxardan «Həmqeyd» qəzeti yazır ki, bundan ötrü
icma 56 milyon manat cəm edib və onun valisi Qəvaddali bu halda İstanbula deyb
ki, dövləti-Osman ilə Suriya vilayətinin barəsində danışsın.
* *
Rusiyanın Voloqod quberniyasında qədim zaman Zizyan adlı bir tayfa sakin
olurmuş. Yazırlar ki, ol tayfa indi elə azalıb ki, onlardan bir neçə kənd qalıb
və onlar həm qeyri tayfalara elə qarışıllar ki, bu yavuq zamanda bilmərrə tələf
olacaqlar”.
«Əkinçi» 1876, N16, 23 avqust,
«Təzə xəbərlər».
"Zəlzələ 3 qism olur: ləpə kimi, tullama, dolandırma. Ləpə kimi olanda
yer su ləpələnən kimi tərpənir, yəni onun bir tərəfi qalxanda, o biri tərəfə
düşür. Tullanma olanda yer tullanıb düşür. Dolandırma olanda yer fırlanır”.
«Əkinçi» 1876, N18, 22
sentyabr, «Elm xəbərləri».
"Qəzetin həmişəlik çap olunması üçün gərək Tiflisdə çapxana nur olsun, yoxsa
1-2 ilə bizim qəzet bərhəm olacaq. Belədə lazımdır ki, bizim tavana kəslər qəzet
fikrində olub bir icma bina etsinlər ki, onlardan vüsal olan məbləğ ilə çapxana
açılsın, qəzet basılsın. Haşa bu iş bir tək adam işi deyil. Bizə məlumdur ki,
heç kəs özünə tavana deməz. Pul ver sözü heç kəsə xoş gəlməz.
Ey müsəlmanlar, vaxt keçməmiş fikrinizi birləşməyə verin ki, dağınıq
millət çox tez puç olar.
Dağısdandan Mehdi xan İsmiyev Qeytağı yazır ki, qəzetin qiymətini
artırmayıb onu həftədə bir çıxardaq ki, tavana kəslərimiz onun artıq xərcini
versinlər və özü mədyun olur ki, ayda 10-15 manat göndərsin… Belədə 1-2 adamın
cüzi köməyindən karsazlıq olmaz, yaxşıdır ki, cəm olub 5-20 min manat yığaq,
onun sələmi ilə həmişəlik və qiyməti az qəzet çıxarmaq olsun.
Ey millət təəssübü çəkən qardaşlar, əgər qəzetin xeyrini başa düşüb onun
baqqi olmağını istəyirsiniz, indi vaxtdır. Dəmir qızmış ikən onu döymək gərək,
yoxsa sonra onu qızdırmaq düşvar olur”.
«Əkinçi» 1876, N19, 8
oktyabr, «Daxiliyyə».
"20 il bundan sabiq Firəng, İngilis Osmanlı ilə birləşib Rusiya ilə elədiyi
cəngin barışığı Firəngistanın Paris şəhərində olduğuna ona Paris Sülhü deyirlər
ki, ol sülhnaməyə Rus, Firəng, İngilis, Osmanlı, Avrasiya, Russiya, İtaliya qol
çəkib. Ol sülhnamənin bir şərti budur ki, Osmanlı dövləti Avropa dövləti hesab
olunsun və zikr olan dövlətlərdən iznsiz heç bir dövlət Osmanlı ilə cəng eləməsin.
Həmçinin zikr olan sülhnaməyə görə Serb Qaradağ və qeyri əyalətlərə ki,
Osmanlıya xərac verillər, bəzi ixtiyarlar verilib. Bəzi Avropa dövlətləri
yazılan şərtlərlə razı olmadılar”.
«Əkinçi» 1876, N19, 8
oktyabr, «Təzə xəbərlər».
"Bakubədə oktyabrın 10 və 11-də bərk xəzri əsib (buna tufan da demək
olar), çox yelkən gəmisi tələf edib, iki atəş gəmisini – birisi «Baryatinski» və
birisi «İran» şikəst edib. Bakubənin Corat qəzyəsinin əhlinin qoyun sürüsünü
ki, 950 qoyunu olub, aparıb dənizə qərq edib. Sürünün çobanı bu zaman vəfat edib.
Oktyabrın 11-də olan tufan günü Dərbənd, Petrovski, Poti, Suxum, Amerika
şəhərlərində də olub.
* *
Peterburqda akademiyanın əcayibxanası var ki, altı hissədir: birinci
hissədə 7000 çap olunan qədim kitab var. 2-ci yazma kitabxanasıdır ki, orada
1200 müsəlman kitabı ərəb, fars, türk dillərində, 1200 Xəta, Mancur, Yapon, 100
Tibeti – Monqol 200 gürcü, erməni 200 sanskrit, yəni qədim Hindistan dillərində,
3-cü hissədə üstü yazılı daşlar və qeyri-qədim şeylər, o cümlədən perqament üstə
yazılan Quran saxlanır. 4-cüdə 20000 pul ki, çoxu qədim müsəlman dövlətlərinin
sikkəsidir. 5 və 6-cı hissələrdə müsəlmanların və yəhudilərin çox qədim qeyləri
saxlanır”.
«Əkinçi» 1876, N20, 22
oktyabr, «Təzə xəbərlər».
"Bizim müsəlman tayfası ingilis tayfalarından nə qədər geri qaldığını
«Əkinçi» qəzetinə və London şəhərində çap olunan «Tayms» qəzetinə baxmaq ilə
bilmək olur:
«Tayms» hər gündə iki dəfə, «Əkinçi» iki həftədə bir çıxır. «Tayms» hər
dəfə iki vərəq üstə, «Əkinçi» yarı vərəq üstə çap olunur. «Tayms»ın hər vilayətində
müxbiri var ki, təzə xəbərləri yazıb məlum edir, onun hər fəslini bir neçə adam
yazır. Amma «Əkinçi»ni yazan bir adam olduğuna bəzi vaxtda, hətta Bakubədə vaqe
olan işlərdən bixəbər olur. «Tayms» qəzetini ingilisin qeyri şəhərlərində
oxuyurlar. Qəzetin dəmiryol ilə onlara bir gündə yetişməyi çox bilib xahiş
edirlər ki, qəzet onlara dəxi tez yetişsin. Ona binaən onu çap edən teleqraf
kimi maşın ixtira edib ki, onların hər dişini basanda hər şəhərdə bir hüruf
düzülür. Sonra hamı şəhərlərdə bir saatda, bir dəqiqədə qəzet çap olunub tamam
olur.
«Əkinçi» qəzetini hər həftəyə güc ilə düzüb çap edəndən sonra palçıqlı
yollar ilə öküz əzzadəsində kəndə çatdırır. «Tayms» elannamə çap etməkdən hər
gündə 200 manatdan ziyadə alır, amma «Əkinçi» iki illik müddətində bir manat da
almayıb.
«Tayms»ın 100 mindən ziyadə müştərisi var, «Əkinçi» 300 müştəriyə həsrət
çəkir... Bizim bir «Əkinçi» qəzetimiz var və əgər onu çap etmək ixtiyarını
satmağa dursaq, nə ki, ona bir qəpik verən olmaz, hətta onu cəbrən də boynuna
götürən olmaz, tapılmaz... Buna səbəb odur ki, ingilis əhli dünya işində mahir
və hər elmdən xəbərdar olduğuna ...onlar kamallı və xeyirli sözün qədrini bilir
ki, onlardan ol qədər qəzet oxuyan var.
Bəli doğru deyillər ki, zərin qədrini zərgər bilər... Ay qardaşlar, vaxt
keçməmiş səy edin ki, elm təhsil edib zindəganlıq cəngində faiq olasınız, yoxsa
bir qərinədən sonra iş tamam olur... hadisənin əlacını gərək o baş verməzdən əvvəl
edəsən”.
«Əkinçi» 1876, N23, 6
dekabr, «Daxiliyyə».
Həmin sayın «Təzə xəbərlər» bölməsində məlumat verilir ki, "Rusiyada bəzi
kəndin əhli icma ilə əkin və ziraət edir. İndi «Zemledelçeski qəzeti» yazır ki,
Finlandiya vilayətində 3 il bundan sabiq bir qəryədən 15 külfət birləşib yerlərini
bir ediblər ki, onu birgə əksinlər. Hasilatdan gələn məhsulu öz aralarında
bölüblər. Ol icma bina edənlər elə tavanalı olublar ki, əkin üçün maşınlar gətirdib,
öz uşaqları üçün məktəbxana açıb onun müəlliminə ildə 300 manat verillər. Belə
camaat ilə iş görməyin bir xeyri də budur ki, tənbəl olan kəslər həm gərək işləsin,
yoxsa onlara hissə verməməkdən başqa, calislikdən də xaric edirlər. Nəhayət,
bir kəs həqiqət naxoş olsa, ona hissə verillər”.
«Əkinçi» 1876, N23, 6
dekabr, «Təzə xəbərlər».
"...Bizim Qurban bayramından murad bu deyil ki, xalq qurban kəsib onun ətini
yeyib kef-damağa məşğul olsun, onun bir əsli, muradı həm var ki, Qurban
bayramını qeyri bayramlardan artıcaq şərafətli edir. Qurban günü tavanalı müsəlmanlar
Məkkəyə cəm olub, bir yerdə ziyarət edib, bir-birinə öz dərd-qəmlərindən xəbər verillər.
Yəni Qurban bayramını artıcaq şərafətli olmağına səbəb oldur ki, bu bayramda
olan ziyarət ittihadi-islama vaisdir. Pəs Məkkəyə getməkdən maraq bir bu deyil
ki, gedib ziyarət edib qayıdasan. Lazımdır ki, oraya cəm olan müsəlmanları
görüb əhvalpürsan olub öz qardaşlarını tanıyıb biləsən. Biz elə avam olmuşuq
ki, nə ki, qeyri tayfaları, hətta öz qardaşlarımızı tanıyıb bilməyə qadir
deyilik. Pəs qardaşlar, məktəbxanalar bina edib oxuyun ki, heç olmasa öz qardaşlarınızın
dilini (burada ərəb-fars dilinə işardir) öyrənib, müsəlmanların ittihadına əməl
edə biləsiniz, yoxsa bizim gözəl Qurban bayramı və Məkkə səfəri ölünün əyninə
geyilən faxır libasa oxşayır. Qurban bayramı və Məkkə ziyarətinin hikməti böyük
olur”.
«Əkinçi» 1876, N24, 22
dekabr, «Daxiliyyə».
Qeyd: Həsən bəy Zərdabinin «Əkinçi» qəzetində çap olunmuş məqalələri,
yazdığı və ya topladığı xəbərləri «Əkinçi» 1875-1877. Tam mətni transliterasiya
və tərtib edəni: Turan Həsənzadə; Ön sözün müəllifi və redaktoru: Əziz Mirəhmədov,
Bakı, «Avrasiya press», 2005, 496 s. kitabından seçilmişdir.
Topladı: Esmira Cavadova, Zərdabişünas