Azərbaycanın siyasi nüfuzunun növbəti təzahürü - Fotolar
Beynəlxalq Astronavtika Konqresinin Bakıda keçirilməsi barədə qərarın qəbul edilməsi böyük uğurdur
68 ölkəni təmsil edən 398
təşkilatın üzv olduğu Beynəlxalq Astronavtika Federasiyası (BAF) kosmik sahədə
fəaliyyət göstərən ən mötəbər beynəlxalq qurumdur. 1950-ci ildən bəri fərqli
ölkələrdə keçirilən Beynəlxalq Astronavtika Konqresi (BAK) təşkilatın əsas
tədbiridir. Bu konqres dünyanın kosmik sahədə aparıcı agentlikləri, elm
mərkəzləri və beynəlxalq təşkilatlarının rəhbərləri, eləcə də məşhur alimlər,
özəl sektordan olan yüksək səviyyəli peşəkarlar, gənc tədqiqatçılar və
tələbələr də daxil olmaqla, dünya kosmos ictimaiyyətinin altı mindən çox
nümayəndəsini bir araya gətirən qlobal platformadır. Konqres zamanı
iştirakçılar kosmos sahəsinə aid aktual trendləri və ən son innovasiyaları
izləmək fürsəti əldə edir.
Oktyabrın 25-də ABŞ-ın paytaxtı Vaşinqton şəhərində
BAF-ın növbəti konqresi keçirilib. Aya enişin 50-ci ildönümünə həsr olunan,
ABŞ-ın vitse-prezidenti Maykl Pensin iştirak etdiyi mötəbər tədbirdə BAK-a
2022-ci ildə ev sahibliyi edəcək ölkənin müəyyənləşməsi üçün seçkilər
keçirilib. Bakı ilə yanaşı, Sinqapur, Rio-de-Janeyro və Nyu Dehli Konqresə ev
sahibliyi etməyə namizəd şəhərlər arasında olub. BAF-ın Baş Assambleyasında
keçirilmiş seçkilərin nəticəsinə görə, Azərbaycanın paytaxtı Bakı şəhəri
2022-ci ildə keçiriləcək BAK-a ev sahibliyi etmək hüququnu qazanıb.
Bu münasibətlə oktyabrın
29-da Prezident İlham Əliyev "Azərkosmos” Açıq Səhmdar Cəmiyyətinin sədri Rəşad
Nəbiyevi qəbul edib. Dövlət başçısı qeyd edilən hadisəni Azərbaycanın böyük
qələbəsi kimi qiymətləndirib. Bildirib ki, növbəti Konqresin Bakıda keçirilməsi
haqqında qərarın dəstəklənməsi ölkəmizin siyasi nüfuzunun təzahürü, Azərbaycana
olan inamın nəticəsidir: "...Azərbaycanda son illər ərzində müasir
texnologiyalar, kosmik sənaye sahələrində əldə edilmiş uğurlar doğrudan da çox
təsirlidir. Gənc müstəqil ölkə üçün qısa müddət ərzində belə nailiyyətlərin
əldə edilməsi böyük hadisədir. İndi bizim 3 peykimiz var və Azərbaycanda kosmik
sənaye inkişaf edir. Azərbaycan dünyanın kosmik klubunun məhdud sayda olan
üzvlərindən biridir. ... Astronavtika Konqresinin 2022-ci ildə Bakıda
keçirilməsi növbəti böyük qələbəmizdir. Mən bu hadisəni çox önəmli siyasi qələbə
kimi qəbul edirəm”.
Mövzu ilə bağlı fikirlərini
"Kaspi” qəzetinə açıqlayan millət
vəkili, politoloq Elman Nəsirov deyib ki, 2022-ci ildə Astronavtika
Konqresinin Azərbaycanda keçirilməsi barədə qərarın qəbul edilməsi inkişaf
edən, beynəlxalq birliyin layiqli üzvünə çevrilən ölkəmizin növbəti diplomatik,
siyasi qələbəsidir. O, Prezident İlham Əliyev tərəfindən də məsələyə məhz bu
cür qiymət verildiyini xatırladıb: "Bütün dünya görür ki, Azərbaycan nəhəng
beynəlxalq tədbirlərə ən yüksək səviyyədə ev sahibliyi edir. Bu baxımdan şübhə
yoxdur ki, Beynəlxalq Astronavtika Federasiyasının Bakı konqresi də arzuolunan
şəkildə baş tutacaq. Maraqlı məqam burasıdır ki, Beynəlxalq Astronavtika
Konqresi ulu öndər Heydər Əliyevin təşəbbüsü ilə 7-13 oktyabr 1973-cü il tarixlərində
keçmiş Sovet İttifaqında yalnız bir dəfə və məhz Bakı şəhərində keçirilib.
Həmin tədbirdə dünyanın 17 ölkəsindən gəlmiş 1500-dən çox nümayəndə, eləcə də
kosmonavtlar iştirak edib. "Kosmik tədqiqatlar – elm və texnikaya nüfuz” devizi
altında Bakıda keçirilən bu konqres Azərbaycanın kosmonavtika tarixinin
təməlini qoyub. Belə ki, növbəti ilin avqustunda Bakıda kosmik texnika
vasitələrindən istifadə etməklə təbii ehtiyatların tədqiqi üzrə "Kaspi” Elmi
Mərkəzi yaradılıb, həmin ilin dekabrında isə Azərbaycan Elmlər Akademiyasının
nəzdində "Kosmik cihazqayırma xüsusi konstruktor bürosu”nun fəaliyyəti ilə
kosmik tədqiqatların aparılmasına əsaslı start verilib. Növbəti illər ərzində
3000-ə yaxın azərbaycanlı alim və mühəndisin əməyi nəticəsində ərsəyə gələn
avadanlıqlar Sovet Kosmik Proqramına xidmət edib, Salyut 7 və Soyuz T-11
orbital komplekslərində istifadə olunub”.
E.Nəsirov qeyd edib ki,
Prezident İlham Əliyevin rəhbərliyi altında Azərbaycanın müasir kosmik sənayesi
inkişafının keyfiyyətcə yeni mərhələsinə qədəm qoyub: "Prezident İlham Əliyevin
2008-ci ildə imzaladığı sərəncamla Azərbaycanda kosmik sənayenin yaradılması və
telekommunikasiya peyklərinin orbitə çıxarılması prosesinə start verilib.
2010-cu ildə "Azərkosmos” Açıq Səhmdar Cəmiyyətinin təsis edilməsi haqqında
daha bir sərəncam imzalanıb. 2013-cü ildə "Azerspace-1” telekommunikasiya peyki, 2014-ci
ildə "Azersky” Yerin məsafədən müşahidəsi peyki, 2018-ci ildə "Azerspace-2” telekommunikasiya peyki
orbitə çıxarılıb. Bu kimi tədbirlər sayəsində hazırda Azərbaycan peyk
layihələri ilə kosmik klubun aktiv üzvüdür”.
Politoloq vurğulayıb ki,
neft gəlirlərini böyük məharətlə insan kapitalına çevirən Azərbaycan artıq peyk
telekommunikasiya xidmətləri və optik peyk xidmətləri göstərir, bunun
qarşılığında iqtisadi divident əldə edir: "Son statistikaya görə, təkcə cari
ilin yanvar-sentyabr aylarında "Azərkosmos” ASC tərəfindən 24 ölkəyə, o
cümlədən ABŞ, Fransa, Birləşmiş Krallıq, Malayziya və Birləşmiş Ərəb
Əmirliklərinə 30,2 milyon ABŞ dolları dəyərində xidmət ixrac olunub.
"Azərkosmos”un xidmət ixracından əldə etdiyi gəlir onun ümumi gəlirlərinin 88
faizini təşkil edib. Bu ilin sentyabr ayında isə ASC 20 ölkəyə 2,2 milyon
dollarlıq xidmət ixrac edib. Bütün bu sadalanan faktları nəzərə alaraq, təxminən
50 ildən sonra yenidən Azərbaycanın Beynəlxalq Astronavtika Konqresinə ev
sahibliyi edə biləcəyini müsbət hadisə kimi dəyərləndirir, ölkəmizin haqqı sayıram. Belə bir
mötəbər tədbirin paytaxt Bakıda keçirilməsi dünya birliyinin diqqətini növbəti
dəfə Azərbaycana yönəldəcək. Əgər bizi neft-qaz ölkəsi, multikulturalizm və
tolerantlıq məkanı, sabitlik, əmin-amanlıq, təhlükəsizlik adası kimi
tanıyırdılarsa, bu hadisə ilə Azərbaycan dünyanın yeni elmi tendensiyalarına,
innovasiyaya, elmi-texniki tərəqqiyə diqqət ayıran ölkə kimi də tanınacaq”.
Siyasi
şərhçi Elçin Mirzəbəyli də qəzetimizə açıqlamasında bildirib ki, Cənubi
Qafqazın lider dövlətinə çevrilən Azərbaycan beynəlxalq əhəmiyyətli tədbirlərin
keçirildiyi, dünyəvi məsələlərin müzakirə olunduğu məkan kimi tanınır. Onun
sözlərinə görə, paytaxt Bakı indiyə qədər fərqli qütbləri təmsil edən güc
mərkəzlərinin, böyük dövlətlərin dialoquna da dəfələrlə ev sahibliyi edib:
"Ölkəmizdə indiyə qədər mədəni, siyasi, iqtisadi, idman sahələrini əhatə edən
çoxsaylı beynəlxalq tədbirlər keçirilib. Bütün bu tədbirlər Azərbaycanı
dünyanın diqqət mərkəzinə çevirib. 2022-ci ildə Bakıda keçirilməsi planlaşdırılan
Beynəlxalq Astronavtika Konqresi də bu baxımdan mühüm əhəmiyyət kəsb edir.
Azərbaycan artıq kosmos ölkələri sırasına daxil olub. Yeni texnologiyaların
mənimsənilməsi Azərbaycanın timsalında dünyaya yeni mesajların verilməsi
deməkdir. Ümid edirəm ki, Beynəlxalq Astronavtika Konqresinin Bakıda
keçirilməsi də bu istiqamətdə qarşıya qoyulan hədəflərə çatmaq üçün mühüm
vasitə olacaq”.
Rufik
İSMAYILOV