Uğurlarında internat təhsilinin rolu olan gənclər
Raqif Teymurov: "Geriyə qayıtsam, yenə də həmin
internat məktəbini seçərdim”
Aytac İsrayılova:
"Yüksək bilik almağımız üçün hər cür şərait yaradılmışdı”
Artıq
bir neçə gündür ki, yeni təhsil ili başlayıb. Bu il də minlərlə gəncimiz tələbə
adını qazandı, tələbəlik həyatına qədəm qoydu, bir çox valideyn övladının
müvəffəqiyyət sevincini yaşadı. Son dövrlər təhsil sahəsində aparılan
məqsədyönlü işlər bu sahədə uğur qazanan gənclərimizin sayını günü-gündən
artırır. Hətta regionlarımızda fəaliyyət göstərən internat tipli məktəblərdən
də yüksək balla universitetə qəbul olunanlar var. Həmin tələbələrdən ikisi ilə
söhbət etdik, yaxından tanış olduq.
İlk
müsahibimiz Raqif Teymurov K.Ağayev
adına Biləsuvar şəhər internat tipli texniki fənlər təmayüllü liseyin məzunudur.
Raqif 2002-ci il fevralın 2-də Biləsuvar şəhərində anadan olub. 2008-ci ildə
internat tipli texniki fənlər təmayüllü məktəbin I sinfinə qəbul olunub.
2018-2019-cu tədris ilində ali məktəblərə keçirilən qəbul imtahanlarında rayon
üzrə ən yüksək - 626 bal toplayaraq Azərbaycan Respublikasının Prezidenti
yanında Dövlət İdarəçilik Akademiyasının Kompüter elmləri ixtisası üzrə tələbəsi
adını qazanıb. Raqifdən məktəb illərini necə xatırladığını soruşuruq:
"Ailəmizin vəziyyəti elə də yaxşı olmayıb. Bir neçə ev dəyişmişik, sonuncu
evimiz internat tipli məktəbin yanında idi. İnternat məktəbində təhsilin yaxşı
olduğunu, uşaqları həm qalmaq yeri, həm qida ilə təmin etdiyini deyirdilər.
Atam gedib danışdı və birinci sinifdən on birinci sinfə qədər həmin məktəbdə
oxudum. Ailədə iki qardaşıq və qardaşım da hazırda həmin internat məktəbində
altıncı sinifdə oxuyur. Valideynlərimizin təhsili olmasa da, bizim təhsilimiz
üçün hər cür şəraiti yaradırlar. Xüsusilə də atamın bu işdə rolu böyükdür”.
Qarşıma məqsəd qoydum ki, oxumalı, təhsil almalıyam
"Məndə
oxumaq həvəsi məktəbə getdiyim ilk gündən yaranıb” deyən gənc bildirir ki,
bunun səbəbi atasının müəlliminə dediyi sözlərdir: "Atamın "oğlumu mənim üçün
deyil, cəmiyyətə yararlı bir insan kimi böyüdün” sözlərini heç vaxt unutmaram.
O vaxtdan da qarşıma məqsəd qoydum ki, oxumalı, təhsil almalıyam. Çalışdım,
əziyyət çəkdim və istədiyimə nail oldum. Yüksək nəticə ilə ali məktəbə qəbul
olmağımda internat məktəbin kollektivi, xüsusən müəllimlərim İlkin Rüstəmov və
Mehman Əliyevin böyük əməyi olub. Onlar bizə təhsilimizdə, dərin biliklər
almağımızda dəstək göstəriblər. Bizim sinfin ali məktəblərə hazırlaşan bütün
şagirdləri universitetlərə daxil olublar”.
Yenə də həmin internat məktəbini seçərdim
Raqif
məktəb vaxtı yaxşı oxuyan şagird olduğunu, hətta bəzən müəllimin əvəzinə dərsi
özünün keçdiyini deyir: "Müəllimlərlə aram yaxşı idi. Məni yaxşı oxuyan şagird
kimi çox sevirdilər. Hətta elə vaxtlar olurdu ki, riyaziyyat dərsini izah
etməyi mənə tapşırırdılar. Çətin olmasına baxmayaraq, riyaziyyat və kimya
fənnini çox sevirdim. Kimya fənnini müəllimim sevdirmişdi. Qəbul imtahanında kimyadan
30 sualdan 30-u, riyaziyyatdan isə 30 sualdan 29-u düz idi. Bəlkə də sənədlərimi
birinci qrup üzrə verməyimə bu fənlərə olan sevgim səbəb olub. Məktəbimizi də
çox sevirəm. İndi də fəxr edirəm ki, elə bir məktəbin məzunuyam. Məktəb
illərinə qayıtsam, yenə də həmin internat məktəbini seçərdim. Orada
müəllimlərin təhsilə, şagirdlərə verdiyi dəyər tamam başqadır. Müəllimlər
oxuyan uşaqların daha da inkişaf etməsi üçün əllərindən gələni edirdilər. Məni
də oxumağa, təhsil həyatımda uğur qazanmağa onlar həvəsləndiriblər. Müəllimin
şagirdinin fikrini dəyərləndirməsi, onunla fikir mübadiləsi etməsi çox
gözəldir”.
Ailəmizin ümumi gəliri aylıq 300 manat idi
Müsahibim
universitetə hazırlıq dönəmində yaşadığı çətinliklərdən də danışdı: "Qrupda 5
fənn idi, mən isə 4 fəndən hazırlığa getmişəm. Rus dilini özüm evdə oxuyurdum.
Həmin dövrdə ailəmizin əsas xərci mənim məşğələlərimə sərf olunurdu. Ailəmizin
ümumi gəliri aylıq 300 manat idi, onun 150 manatını mənim təhsilimə
xərcləyirdilər. Ona görə qarşıma məqsəd qoydum ki, universitetə qəbul olacağam.
Kompüter elmləri ixtisası uşaqlıqdan arzum idi. Elə kodlaşdırma zamanı da
birinci onu yazmışdım. Bu gün çox sevinirəm ki, ürəyim istəyən fakültədə,
ödənişsiz oxumaq nəsib oldu. Ailəmin məni ödənişli əsaslarla oxutmaq üçün maddi
gücü yox idi”.
Həm ixtisas, həm də təhsil müəssisəsi uşaqlıq arzum
idi
Raqif
bu ixtisasa olan həvəsinin haradan qaynaqlanmasından da danışdı: "Bibim və
xalam oğlu da bu ixtisas üzrə təhsil alıblar. Mən də uşaq vaxtı kompüterlə
işləməyi çox sevirdim. Ona görə düşündüm ki, mən də bu sahəyə yönəlim. Həm də
Dövlət İdarəçilik Akademiyasında 1-ci qrup üzrə yalnız kompüter elmləri
ixtisası. Həm ixtisas, həm də təhsil müəssisəsi uşaqlıq arzum idi. Bu sahədə
seçilən mütəxəssislərdən olmaq istəyirəm. Hətta, təhsilimi xaricdə davam
etdirməyi düşünürəm”.
Raqif
universitetə hazırlaşan abituriyentlərin seçiminə valideynlərin müdaxilə
etməsindən də söz açdı: "Bütün abituriyentlər tələbə olanda universiteti tamam
başqa cür görürlər. Bəziləri tələbəliklərinin ilk günündə peşman olur,
ürəklərində "kaş, bu universiteti, bu ixtisası seçməzdim” deyə düşünürlər. Elə
məndə də bu fikir var idi. İlk iki gün sanki istədiyim yerdə deyildim. Bu
məqamda seçimi valideynlərim etmiş olsa idi, dərhal onları günahlandıracaqdım.
Amma bu ixtisası özüm seçdiyim üçün zamanla işlər qaydasına düşdü. İndi
universitetimi, fakültəmi çox sevirəm, artıq tələbəlik həyatına alışmışam. Ona
görə yaxşı olar ki, valideynlər övladlarının seçiminə qarışmasınlar”.
Həmsöhbətim
universitetə hazırlaşanlara məsləhətini də bölüşdü: "Mən həmişə bunu demişəm
ki, uğur qazanmaq üçün səbirli, məqsədli və planlı hərəkət etmək lazımdır. Bu
üç qızıl qaydaya uyan hər kəs qarşısına qoyduğu məqsədə mütləq çatacaq”.
Kənddə oxuduğum məktəbdə istənilən
şərait yox idi
Növbəti
müsahibimiz isə Ağdaş rayonu M.Şeyxzadə adına internat tipli Texniki, humanitar və təbiət
fənləri təmayüllü gimnaziyanın məzunu Aytac İsrayılovadır. Aytac 2002-ci
il martın 12-də anadan olub. Yeddinci sinfə qədər təhsilini doğma kəndlərindəki
məktəbdə alıb. Daha sonra internat tipli gimnaziyaya daxil olub və 11-ci sinfi
bu gimnaziyada bitirib. Bu il ali məktəblərə keçirilən qəbul imtahanlarında 637
bal toplayaraq Azərbaycan Dillər Universitetinin "Tərcümə” ixtisasına qəbul olunub.
Aytacın sözlərinə görə, uşaq vaxtı məktəbə getməkdən qorxurmuş, hətta
getməmək üçün ağlayırmış: "Uşaqlıq dövrünə aid elə də çox xatirəm yoxdur, amma
bilirəm ki, məktəbə getmək istəmirdim. Ağlayırdım ki, məni məktəbə aparmayın.
İlk olaraq təhsilimi kənd məktəbində alsam da, sonradan internat məktəbinə
keçdim. Bunun səbəbi isə həmin məktəblərdə təhsilin yüksək səviyyədə olmasıdır.
Burada müəllimlərin dərsə yanaşması fərqli idi. Uşaqlar da dərslərdə aktiv
iştirak edirdilər. Yəni kənddə oxuduğum məktəbdə istənilən şərait yox idi. İnternat
məktəbi bizi həm yemək, həm də gecə qalmaq üçün yerlə təmin edirdi. Buna
baxmayaraq, evimiz yaxın idi deyə mən gecələr evə gəlirdim”.
Bugünkü təhsilim mənim üçün xaricə açılan bir
qapıdır
Aytac hazırda oxuduğu fakültənin uşaqlıq arzusu olduğunu deyir:
"İxtisas seçimi zamanı valideynlərim başqa fakültələri təklif edirdilər, ilk
olaraq "həkim ol”, sonra "ya hüquqşünaslığa, ya da müəllimlik sahəsinə yönəl”
dedilər. Amma uşaqlıqdan bəri arzum olan tərcümə sahəsini seçdim. Elə
kodlaşdırmada da bu ixtisası birinci yazmışdım”.
Həmsöhbətim bugünkü uğurunda internatda aldığı təhsilin böyük rolu
olduğunu qeyd edir: "Müəllimlərimiz hamımıza eyni tələbkarlıqla yanaşırdılar. Burada təkcə bilik deyil, həm də gözəl
tərbiyə verirlər.Təhsil
müəssisəsinin direktoru Şəhla xanımın bizim təhsilimizdə əməyi böyükdür. Yüksək
bilik almağımız üçün hər cür şərait yaradılıb”.
Aytac
təhsilini xaricdə davam etdirməyi düşünür: "Mən hazırda xarici dil üzrə təhsil
alıram, amma bu, kifayət etmir. Dil biliklərimi daha da təkmilləşdirmək üçün
buradakı təhsilimi başa vurduqdan sonra xaricə getməyi planlayıram. Bu gün
öyrəndiklərim mənim üçün xaricə açılan bir qapıdır”.
Günel
Azadə