“Terrorçular otelə basqın edərək...” - Onun film seçimi
Filmlərlə
bağlı hər kəsin öz maraq dairəsi var. Kimi dram sevir, kimi fantastika, kimi də
komediya və s. Amma janrından asılı olmayaraq, çoxumuz başqalarının məsləhət
gördüyü filmlərə nəzər salırıq. Məsləhət görülürsə, deməli, baxmağa dəyər. Bu dəfəNizami Kino Mərkəzinin direktoru Leyli
Mirzəyevanın məsləhət gördüyü filmləri təqdim edirik.
Onun ilk
seçimi "Ford Ferrariyə qarşı” ekran əsəri oldu: "Ümumiyyətlə, bioqrafik və ya
real hadisələr əsasında çəkilmiş filmlərə hər zaman böyük marağım var idi. Bu
filmdə isə iki nəhəng avtomobil şirkəti arasında olan rəqabət və tarixi
avtomobil yarışlarında baş verənlər əks olunub. Bununla yanaşı, filmi bioqrafik
adlandırmaq olar, çünki avtomobil industriyasında iz qoymuş bir sıra mühəndislər
haqqında bəhs edir. Düşünürəm ki, bu film bütün avto sevənlər üçün maraqlı
olar”.
"Müttəfiqlər”filmi isə onun ikinci seçimi oldu: "Çox sevdiyim rejissor Robert Zemekisin əsəri
olan bu film, ikinci dünya müharibəsi zamanı baş verən hadisədən bəhs edir. Öz
ölkələrinə xidmət edən amerikalı Maks ilə fransız kəşfiyyatçı Marian xüsusi
tapşırıq üçün yollanırlar. İkisinə də Kasablankadakı nasist alman səfirini
öldürmək tapşırılır. Tapşırıq əsnasında bir-birlərinə aşiq olurlar və evlənirlər.
Lakin, evləndikdən sonra Marianın alman cəsusu olduğu iddia edilir”.
"Mumbay
oteli” də onun bəyəndiyi filmlər sırasındadır: "Real hadisə əsasında çəkilmiş
daha bir filmi vurğulamaq istəyərdim. Film 2008-ci ildə Hindistanın Mumbay şəhərində
baş vermiş terrordan bəhs edir. Terrorçular otelə basqın edərək otelin əməkdaşlarını
və qonaqlarını girov götürürlər. Hadisə zamanı çəkilmiş real görüntülər də mütəmadi
olaraq nümayiş olunur. Filmdə əsas sujet xəttlərindən biri isə qonaqları xilas
etmək üçün öz canlarından keçmiş otel əməkdaşlarına həsr olunub”.
Onun dördüncü
seçimi yerli film oldu: "Son illər ərzində Azərbaycanda bir sıra uğurlu filmlər
istehsal olunub, onların arasında
2019-cu ildə Mədəniyyət Nazirliyinin sifarişi ilə "Mozalan” studiyasında
istehsal olunmuş "Əlvida, Şmidt!” filmini vurğulamaq istəyərdim. Tragikomediya
janrında çəkilən bu film etnik alman olan, Azərbaycanda böyüyən Emil Şmitd
haqqındadır. Film boyu tamaşaçını güldürən və düşündürən bir çox səhnələr var”.
"Parazitlər”isə onun sonuncu seçimi oldu: "Komediya, dram və triller janrlarını özündə birləşdirən
bu film, bir sıra festivalların qalibi oldu, o cümlədən ilin ən yaxşı filmi
nominasiyasında Oskar mükafatını aldı. Film Cənubi Koreyada yaşayan kasıb ailənin,
varlanmaq üçün əl atdığı fırıldağın faciyəyə çevrilməsindən bəhs edir”.