"Regionun ən böyük turizmi məhz Qarabağda olacaq" - Deputat
Cəmiyyət
10 Yanvar 2021, 20:30
314
"Son zamanlar sosial mediada qaçqın və məcburi köçkünlərin doğma torpaqlarına geri dönməsi məsələsi gündəmə gəlib. Ümumiyyətlə müəyyən bir qism var ki, sanki torpaqların azad olunmasına sevinmirlər, əksinə bundan narahat olurlar. İnsanların da fikirlərində çaşqınlıq yaradırlar".
Kaspi.az xəbər verir ki, bu barədə millət vəkili Müşfiq Cəfərov bildirib.
O qeyd edib ki, dövlətimiz hər hansı bir vətəndaşını infrastuktur və yaşayış üçün şəraiti olmayan torpaqlara geri qaytarmayacaq: "Əvvəlcə güclü infrastuktur qurulacaq, iş yerləri açılacaq sonra vətəndaşların köçürülməsi baş tutacaq. Birmənalı olaraq bilinməlidir ki, azad olunan torpaqlar infrastruktur səviyyəsinə görə heç də Bakıdan geri qalmayacaq. Biz həmin yerlərdə turizm, kənd təsərrüfatı sahələrini inkişaf etdirəcəyik. Regionun ən böyük turizmi məhz Qarabağda olacaq. Müasir dövrün əsas inkişaf etmiş sahəsi olan turizmə böyük investisiyalar qoyulacaq, iş yerləri açılacaq".
Millət vəkili hesab edir ki, öz yurdlarına qayıtmaqdan imtina edən qaçqın və məcburi köçkünlər o torpaqların uğrunda şəhid olanlara hörmətsizlik etmiş olar: "Ən azı ilk beş ildə hər kəs qayıtmalıdır. O torpaqlardan ötrü insanlar canından keçibsə, məcburi köçkünlər də həmin şəhidlərin ruhuna hörmət əlaməti olaraq o torpaqlara insanlar həyat bəxş etməlidir. Bu da bir növ döyüşdür, hər kəs şəhidlərimizin qisasını həmin əraziləri dirçəltməklə alacaq".
Digər xəbərlər
