“İnsani hisslərin ədalət qazanması xüsusi motivasiya bəxş edir” - Onun film seçimi
Bəzən insanlardan boş vaxtlarında
nə ilə məşğul olduğunu soruşanda, filmə baxdığını deyir. Film artıq insanlar
üçün estetik zövq verən, onların dünyagörüşünü inkişaf etdirən ən gözəl vasitədir.
Boş vaxtı olan şəxslər dostlardan baxmağa, zamanı xərcləməyə dəyən yaxşı film
soruşurlar. Bu zaman çoxlu film adları məsləhət verənlər olur. Bu dəfə isə film
məsləhəti üçünAzərbaycan
Mədəniyyət və İncəsənət Universitetinin müəllimi, təlimçi Fəxri Məmmədliyə
müraciət etdik. O bir
kinoman kimi izlədiyi, xoşuna gələn filmlərin daha çox olduğunu dedi, bildirdi
ki, buna görə 5 film seçmək onun üçün olduqca çətindir.
İlk film yəhudi əsilli fransız rəssamının acı həyat
hekayəsini təsvir edən "Amedeo Modelyani”
kinosudur: "Bu film mənə azad ruhun, sevginin, bütün maddi sərvətlərin
fövqündə durduğunu hiss etdirir. Baş qəhrəman dəlisov Modinin sənət və
sevgisini bütün məhrumiyyətlərə baxmayaraq, qorumağa çalışan həyat yoldaşı
Jannanın obrazı, qadın gücünün ən gözəl təzahürlərindəndir. Bu film əsl sevgini
duyanlara, kənardan dəlisov hesab edilə biləcək fikirlərə baxmayaraq, yağış
altda rəqsin həyatda ən gözəl duyğu olduğunu bəyan edəcək”.
Azərbaycan filmi olan "Gümüşgöl əfsanəsi” 2-ci yerdədir: "Film şəhərdən ucqar rayon
kəndinə gedən gənc sənətşünas-tədqiqatçı oğlanın sadə kənd qızı ilə məhəbbətini
əks etdirir. Ruhu saf olan qız, məşhur əfsanənin sevgi, saflıq sirrini oğlana
açaraq gölün üzərində gəzə bildiyini göstərir”.
3-cü
isə "Ulduzlararası” (Interstellar) kinosudur: "Hesab edirəm ki, elmi fantastikanın ən unikal nümunələrindən biri məhz bu filmdir.
İnsanın başqa planetlərdə həyat axtarması, nəslinin gələcəkdə baş verəcək
fəlakətlərdən qorumaq cəhdi təkcə elmdə deyil, həmçinin, kinematoqrafiyada da
əsas mövzulardan biridir. Bu mənada film elmlə bədiiliyin təmasını olduqca
mühüm mesajlarla əks etdirə bilib. Filmdə bioloji varlıq kimi insanın gücü və
qələbəsi nikbin olmağa əsas verir. Filmdə diqqətimi çəkən əsas məqamlardan biri
isə baş qəhrəmanlardan olan Mörfinin ömrünün son anlarında atasının yolunu
gözləyərkən ifadə etdiyi fikirdir: Atam mütləq gələcək, çünki o, mənə söz
verib”.
4-cü seçimi isə demək olar ki, bütün uşaqların
sevərək izlədiyi "Evdə tək” filmidir:
"Hər il milad bayramı ərəfəsində göstərilən bu uşaq filmi ən sevdiyim
kinolardandır. Filmin bütün ssenarisini əzbər bilsəm də, hər il baxıram. Filmin
mənə verdiyi ən önəmli mesajlardan biri, insanın öz sevdiklərini, düzgün
bildiyi dəyərləri qorumaq uğrunda olan mübarizəsidir. Ən əsası filmdə önyarğılı
davranmamaq, görünüş baxımından vahiməli görünə bilənlərin, əslində gözəlliyə
malik ola biləcəyi fikrindən qorxmamaq mesajı verilir. Filmdə ailə sevgisi,
dəyərlərin ön plana çəkilməsi isə bu kinoda hər birimizin öyrənə biləcəyi
zəngin çalarları əks etdirir”.
"Gələcəyə
qayıdış” (Back to the Future) filmi isə sonuncudur: "Düşünərəm ki, elmi fantastikanın ən maraqlı nümunələrindən biri də məhz
"Gələcəyə qayıdış” tripdixidir. Bildiyim qədəri ilə hazırda 4-cü seriyası
çəkilir. 1980-ci illərdə çəkilən bu filmdə gələcəklə bağlı göstərilən bir sıra
yeniliklərin artıq günümüzdə həyata keçməsi çox məşhur bir ifadəni
xatırlamağımıza kömək edir: Məşhur xəyalpərəstlərin arzuları öz sağlıqlarında
olmasa da, mütləq yerinə yetir. Digər sevdiyim kinolarda olduğu kimi, burada da
nəcib insani hisslərin sonda ədalət qazanması, mənə xüsusi motivasiya bəxş
edir”.
Günel Azadə