“İnsan vətənpərvər doğulmur, yetişdirilir” - Mənim balam
Deyir ki, oğul atanın yanında, onun dəstəyini
görərək böyüyər. Məhz oğullarımızı belə böyüdəndə, onlar daha ürəkli və sözün əsil
mənasında kişi kimi böyüyəcək. "Mənim balam” rubrikamızın qonağı Qarabağ qazisi
Kamil Musəvidir. Kamil Musəvi iki oğul atasıdır. Böyük oğlu Nümanın 3, balaca
oğlu Həsənin isə 2 yaşı var. Müsahibimiz gündəlik iş qrafiki nə olur-olsun, ilk
növbədə övladları ilə maraqlanır, onların gündəlik qayğılarını çəkir. Vətənpərvər
ruhda övlad yetişdirmək üçün onlara sevginin nə demək olduğunu izah etməyi
vacib hesab edir.
- Kamil bəy, övladlarınızı
tərbiyə edərkən nəyə daha çox diqqət yetirirsiniz?
- Oğlanlarımı yetişdirərkən ən çox onların vətənpərvər
ruhda böyüməsinə çalışıram. Çünki bir insan vətənpərvər olmasa, nə qədər savadı
olursa-olsun, bu cəmiyyətə xeyir verə bilməz. Uşaqlarda vətənpərvərlik hissini ilk olaraq yaşadığı ərazidə,
çevrəsindəki insanları sevməyi öyrətməklə başlamaq lazımdır. Daha sonra xalqına,
millətinə vicdanla xidmət etmək üçün uşaq böyüdükcə yetişdirilməlidir. Əgər bir
insan vətənpərvər olmazsa, o, alim də olsa, savadını başqa istiqamətdə, zərərli
şəkildə sərf edəcək. Övladlarım hələ çox kiçikdirlər. Ancaq mən indidən onlara
ananın, vətənin, torpağın, bayrağın nə demək olduğunu öyrətmişəm. Təbliğat elə
burdan başlayır.
- Gününüzün neçə saatını
uşaqlarla keçirirsiniz?
- İştirak etdiyim tədbirlər çox olanda, onlarla zaman
keçirməyə vaxtım az qalır. Çalışıram ki, ən azı gündə 2-3 saatımı övladlarıma sərf
edim. Onlarla zaman keçirməkdən böyük zövq alıram. Övladlarımı bağçaya özüm aparıb-gətirirəm,
yol boyu mənə suallar verirlər, bacardığım qədər suallarını cavablandırmağa
çalışıram.
- Onları
bağçaya aparıb-gətirmək sizə çətin olmurmu?
- Əslində heç bir çətinlik çəkmirəm. Onlarla zaman keçirmək
mənə xoşdur. Bağçadan gətirməyə gedəndə, məni görən kimi üstümə qaçır, boynuma sarılırlar.
- O an hansı hissləri
keçirirsiniz?
- O hissi izah etmək üçün kəlmələr acizdir. Bir ata
olaraq bu mənə çox xoş təsir bağışlayır.
- Bəzən
vətənpərvərlik hissinin insanın genindən, qanından gəldiyini deyirlər. Bu
fikirlərlə razısınız?
- Mən heç də belə düşünmürəm. Bu çox yanlış düşüncədir.
İnsan vətənpərvər doğulmur, yetişdirilir. Körpə dünyaya gələndən sonra onu aparıb
Amerikada, Avropada böyütsək və xəbəri olmasa ki azərbaycanlıdır, sabah Azərbaycanda
müharibə olsa, o gələrmi? Bəs onda necə olur ki, vətənpərvərlik insanın qanında
olur? Ona görə vətənpərvərlik qan işi deyil. Vətənpərvərlik ailə, məktəb, cəmiyyət
işidir. Bu gün sənin torpağın işğal altındadır və onu qorumaq sənin borcundur. Biz
övladlarımıza bunun izahını verməliyik. Onları bu ruhda böyütməliyik. Düzdür, mənim
oğlanlarım çox kiçikdir, ancaq uşağa elə uşaq yaşından izah etmək lazımdır. Hər
şey uşaqlıqdan başlayır.
- Valideynləriniz
sizi uşaqlıqdan bu ruhda böyüdüb?
- Hər şey ilk olaraq ailədən, məktəbdən, sonra cəmiyyətdən
başlayır, bunların hamısı bir-birini tamamlamalıdır. Mən uşaq yaşlarımdan belə idim.
Uşaq ikən oyunlar oynayırdıq. Bu oyunlarda bir vardı düşmən, bir də vardı onları
axtaran qrup. Mən həmişə düşməni axtaran qrupun tərkibində idim. Düşmənlərə necə
yaxınlaşıb, onları necə yaxalaya biləcəyim haqqında düşünürdüm. Uşaq ikən ən böyük
arzum hərbçi və kəşfiyyatçı olmaq idi. Mən uşaqlıq arzuma çatdım və peşman da deyiləm.
- Onda da düşmənləri
tuta bilirdinizmi?
- Gizli yollarla alternativlər axtarmağa başlayırdım.
Düşmən hesab etdiyim dostlarım heç vaxt əlimdən qurtula bilmirdilər.
- Deyəsən, nadinc uşaq
olmusunuz.
- Elədir. Hətta anam deyirdi ki, səni yerə qoyurduq,
10 saniyədən sonra gözdən itirdin. Ancaq uşaq yaşlarımdan nizam-intizamlı olmuşam.
Böyüklərə hörmət və sevgi ilə yanaşmışam.
- Hansı övladınız sizin
uşaqlığınıza daha çox bənzəyir?
- Görünüşcə böyük oğlum mənə daha çox bənzəyir. Əslində
ikisində də oxşarlıq var. Uşaqlarım hər hansı tərslik edəndə, həyat yoldaşım deyir
ki, eynən atasıdır.
- Adətən bizdə uşağın
qayğıları ilə xanımlar məşğul olur – həm də bağçaya aparıb-gətirməklə.
- Əslində bağça çox uzaqdır. Maşınla uzun yol qət etməli
bir məsafədir. Həyat yoldaşım özü çalışır deyə, onların hamısını birlikdə
aparıb-gətirirəm. Ata övladı ilə təmasda olanda, övlad kişi kimi böyüyür. Atanın
zəhmini hiss edir. Ana ilə atanın zəhmi heç vaxt bir ola bilməz. Kişi güclü olur
deyə, uşaqlar hər zaman qadını zəif görürlər. Ata zəhmi tamam başqa bir şeydir.
Bunu elm də, həyat da sübut edir. Ona görə çalışıram, uşaqlarla maksimum dərəcədə
ünsiyyətdə olum.
- Sizcə, böyüyən gənclik
vətənpərvər ruhda yetişirmi? Onların böyüdüyü mühit sizi qane edirmi?
- Təbii ki, cəmiyyətimizdə vətənpərvər ruhda olan gənclər
də var, olmayanlar da. Ancaq sözün əsl mənasında biz çox gözəl millətik. Vətəni
üçün canını fəda etməyə, qurban verməyə hazır olan millətik. Aprel hadisələrində
biz bunun bir daha şahidi olduq. Bütün bölgələrdən orduya dəstək vermək üçün
gənclərimiz axın etdi. Vətənpərvər gənclərimiz çoxdur, sadəcə onlara yol göstərib,
düzgün yolu izah etmək lazımdır.
- Vətəni sevmək üçün
ilk növbədə nədən başlamalıyıq?
- İlk növbədə bayrağımızı, ailəmizi sevməliyik.
- Ailə də bir vətəndirmi?
- Əlbəttə ki... Biz hər zaman vətənimizi ana adlandırırıq,
ona ana vətən deyirik. Ailə sevgisi mütləqdir. Biz bu gün düşmənlə təmasdayıq. Vətənimizi
təbii ki, qorumalıyıq. Evimizi qorumaq üçün onu hasara alırıq, ancaq torpağımızı
qorumaq üçün hərbi xidmətə gedib onu düşməndən qorumaq üçün çəkinirik. Niyə? Vətəni
qorumasaq, heç ailəmiz də olmaz. Vətəni olmayanın heç bir şeyi olmaz.
- Övladlarınızı böyüdərkən
hansı üsuldan istifadə edirsiniz? Dədə-baba üsulu köməyinizə çatırmı?
- Keçmiş, dədə-baba üsullarına daha çox üstünlük verirəm.
Uşaqlarımı valideynlərimdən gördüyüm kimi böyüdürəm. Misal üçün, indi uşaqların
saçını kəsdirəndə, başda "z” hərfi kimi və ya başqa cizgilər çəkdirirlər. Mən bu
kimi şeyləri uşaqlarıma tətbiq etmirəm. Onları cırıq və dar şalvarlar geyinməyə
qoymuram.
- Hesab edirsiniz ki,
həmin geyimlər uşağın tərbiyəsində rol oynayır?
- Elə hesab etmirəm. Amma zamanla bu, uşağın xarakterinə
az da olsa yansıyır. Bu gün o cırıq şalvarı geyinən uşaqlar sabah ona normal baxacaq
və başqa tələbatları yaranacaq. Əgər insan uşaqlıqdan elə böyüyürsə, sonradan o
tip geyinəndə narahat olmağa başlayır. Bu mənim öz düşüncəmdir.
- Bəs övladlarınızı
necə cəzalandırırsınız?
- Maksimum dərəcədə az cəza verməyə çalışıram. Mən
cəzalandıranda bir dəfə sərt baxıram, bəs edir. Uşaq bir səhv edəndə ona
"olmaz” deməyi düzgün qiymətləndirmirəm. Uşağa hər şeyi başa salmaq lazımdır. Uşağa
"eləmə” deməyin tərəfdarı deyiləm.
- Bəs uşaq onu başa
düşmürsə?
- Başa düşmürsə, hər dəfə ona izah etməlisən. Biz sözü
bir dəfə deyirik, əgər uşaq anlamırsa, onu "qanmaz” adlandırırıq. Əlbəttə ki, o qanmır, çünki uşaqdır. Əgər qansaydı,
bizim ona tərbiyə verməyimizə ehtiyac olmazdı.
- Sizcə, döymək tərbiyə
üsuludurmu?
- Əsla. Döyülmək uşağa psixoloji təsir göstərir. Onu
qorxaq yetişdirir. Atalar var ki, övladlarına ömrü boyu əl qaldırmayıb. Ancaq
15 ildən sonra ona əl qaldıranda düşünür ki, atam 15 ildir mənə əl qaldırmır, gör
onu hansı həddə çatdırmışam ki, o artıq mənə əl qaldırır. Bunun özü tərbiyə metodu
deyilmi? Uşaq fikirləşir ki, atam pis olsaydı, bu günə kimi döyərdi. Əgər bu günə
kimi əl qaldırmayıbsa, demək ki, səhvi mən etmişəm.
- Övlad böyüdən gənc
valideynlərə nələri məsləhət görürsünüz?
- İlk növbədə vətənpərvər böyütmələrini tövsiyə
edirəm. Hər bir valideyn öz övladına yanında olmağı öyrətməlidir. Dostunu, ata-anasını,
çevrəsindəki insanları sevməyi öyrətmək lazımdır, uşaqlar hörmət göstərməyi bilməlidirlər.
Uşaqları sevgi ilə böyütsünlər. Belə olan halda, cəmiyyətdə bütün insanlar bir-birinə
inanacaq və sevgi ilə yanaşacaqlar. Hər bir ata övladı üçün çalışmalıdır.
İnsanlar olur ki, özlərini nələrinsə müqabilində satırlar. Hər bir insan gərək
tək özümü düşünməsin. Bir atanın övladına qoyub getdiyi ən gözəl mirası onun
təmiz adıdır. Ləkə götürməyəcək adı.
Xəyalə Rəis