Bakı 13°C
Hansı dövlət orqanlarının qəzetləri nəşr olunur?
Bu yaxınlarda Vergilər Nazirliyinin orqanı olan "Vergilər” qəzeti
oxuculara müraciətində bildirib ki, 2019-cu ildən "vergilər.az” oxucuların
görüşünə onlayn qəzet formasında gələcək: "Bu, "Vergilər” qəzetinin çap
variantının sizinlə yolayrıcında görüşüdür. Lakin heç də yolun və sözün sonu
deyil. Sizinlə yol yoldaşlığımız, ünsiyyətimiz bundan sonra da davam edəcək.
Çünki bu ünsiyyətin başlıca missiyası biznes adamının biznes maraqlarına, vergi
orqanı işçilərinin peşəkar fəaliyyətinə, adi oxucunun informasiya almaq
istəklərinə, ümumiyyətlə, daim dəyişməkdə olan, dinamik həyat yaşayan
cəmiyyətimizin mənafeyinə xidmət etməkdir. İndi biz yeni bir yolun
başlanğıcındayıq: 2019-cu ildə "vergilər.az” oxucuların görüşünə onlayn qəzet
formasında gələcək. Hər yolayrıcında irəliyə baxmaq, gələcəyi göz önünə
gətirmək istəyi olduğu kimi, keçmişə baxmaq, görülən işləri təhlil etmək, ən
azından özünə hesabat vermək istəyi də yaranır. "Vergilər”
qəzetinin çap variantının dizaynı da yəqin ki, mətbuat tariximizin yaddaşında
fərqli bir hadisə kimi qalacaq. Biz indi yolayrıcındayıq. Qəzetimizin çap
variantında sizinlə vidalaşırıq. Ancaq biz sizdən ayrılmırıq. İlin əvvəlindən
görüşünüzə «vergilər.az» onlayn qəzeti ilə gələcəyik. Qarşıda bizi daha
operativ, daha hərəkətli ünsiyyət gözləyir”.
Beləcə, Vergilər Nazirliyinin qəzeti öz fəaliyyətini dayandırdı.
Maraqlıdır, hazırda hansı dövlət orqanlarının qəzeti nəşr olunur,
informasiyalar hansı formada verilir?
Daxili
İşlər Nazirliyinin mətbuat xidmətinin əməkdaşı İlham Babayev nazirliyin 3 qəzetinin adını çəkdi: "Həftədə
bir dəfə "Mübariz keşikdə” qəzeti dərc edilir. Bu qəzet 1933-cü ildə təsis
edilib. "Mübariz keşikdə" qəzeti cinayətlərin qarşısının alınması və
açılması, ictimai qaydanın və ictimai təhlükəsizliyin, habelə insan hüquq və
azadlıqlarının təmin edilməsi sahəsində Azərbaycan Respublikası daxili işlər
orqanlarının fəaliyyətini ictimaiyyətə çatdırır, nöqsan və çatışmazlıqlarla
bağlı materiallar verir.Bundan başqa, Bakı
Şəhər Baş Polis İdarəsi tərəfindən 1993-cü ildə təsis edilmiş "Polis"
qəzeti 5 minə yaxın nüsxə ilə həftədə bir dəfə, cümə günü Azərbaycan dilində,
A2 formatında, iki rəngdə nəşr edilir. "Polis” qəzetinin redaksiyası polisin
fəaliyyət prinsiplərini və istiqamətlərini əsas götürərək polislə vətəndaşlar
arasında şəffaf əlaqələrin yaradılmasına xidmət edir. Respublikamızın ərazi
bütövlüyü uğrunda döyüşlərin getdiyi dövrdə yaradılan «Əsgər» qəzeti ölkəmizdə
çap olunan ilk hərbi qəzetlərdən biridir. Daxili Qoşunların mətbu orqanı olan
«Əsgər» qəzetinin ilk sayı 1992-ci il dekabr ayının 15-də dərc olunmuşdur.
Qəzet səngərlərdə yayılan ilk mətbu orqanlardan biri kimi, döyüşçülərimizin
hərbi vətənpərvərlik ruhunda tərbiyəsində mühüm rol oynamışdır”.
İ. Babayev bildirdi ki, nazirliyin informasiyalarının yayıldığı saytları
da var. Amma hələ ki qəzetlərin nəşrini dayandırıb, yalnız onlayn formaya
keçməyi düşünmürlər.
Dövlət
Gömrük Komitəsinin mətbuat xidmətinin rəhbəri Natiq Axundov qeyd edir ki, komitənin "Gömrük xəbərləri”
adlı qəzeti nəşr olunur: "Hazırda nəşrimizi dayandırmaq kimi bir planımız
yoxdur. Qəzetimiz həftədə bir dəfə çıxır, gömrük orqanlarında baş verənlərlə
bağlı insanları məlumatlandırırıq. Bundan başqa, bəzi ciddi əhəmiyyət kəsb edən
materiallar ingilis və rus dillərinə tərcümə olunaraq dərc edilir. Xəbərlərimiz
əsasən gömrükdə baş verən innovasiyaları, həyata keçirilən layihələri əks
etdirir. İstəyən hər kəs köşklərdən qəzetimizi əldə edib xəbərlərimizi oxuya
bilər”.
Ailə, qadın və uşaq problemləri
üzrə dövlət komitəsinin mətbuat xidmətinin rəhbəri Elgün Səfərov təəssüf hissi ilə qeyd edir ki, komitənin qəzeti yoxdur: "Çox
təəssüf ki, hazırda bizim komitənin qəzeti dərc edilmir, amma "Ailə, qadın,
uşaq” adında hər 3 aydan bir nəşr olunan jurnalımız var. Komitə ilə bağlı
informasiyalar çap şəklində olmasa da, saytımızda onlayn şəkildə mövcuddur.
Qəzetimizin olmamağı isə daha çox büdcə ilə əlaqəlidir. Yəni komitənin
büdcəsində qəzetlə bağlı məsələ əks olunmayıb. Amma çox istərdik ki, komitəmizin
heç olmasa həftədə bir dəfə çap edilən qəzeti olardı”.
Əmlak Məsələləri Dövlət
Komitəsinin mətbuat xidmətinin rəhbəri Qulu Xəlilov bildirir ki, komitənin "Mülkiyyət” adında qəzeti və "Daşınmaz əmlak”
jurnalı nəşr edilir: "Özəlləşmə haqqında qanuna əsasən, özəlləşməyə çıxarılan
müəssisələr mətbuatda dərc olunmalıdır. Bizim "Mülkiyyət” qəzeti də hər
həftənin 5-ci günü çap edilir və orada həmin müəssisələr, hərraca çıxarılanlar,
hərracların nəticələri haqqında məlumat olur. Onu da qeyd edim ki, bizim komitənin
saytı da fəaliyyət göstərir və hələ ki qəzetimizin nəşrini dayandırıb, yalnız elektron
versiyaya keçmək kimi bir planımız yoxdur”.
Qeyd edək ki, Səhiyyə Nazirliyinin "Tibb”, Təhsil Nazirliyinin
"Azərbaycan müəllimi”, Müdafiə Nazirliyinin "Azərbaycan Ordusu”, Fövqəladə
Hallar Nazirliyinin isə eyniadlı qəzeti nəşr olunur. İqtisadiyyat Nazirliyinin
çap mətbuat orqanı yoxdur. Əmək və Əhalinin Sosial Müdafiəsi Nazirliyinin
"Pensiyaçı” qəzeti isə öz fəaliyyətini 2016-cı ildən dayandırıb.
Günel Azadə
