Diqqət Brüsselədir - TƏHLİL
Paşinyan
yekun sülh sazişini imzalamaqdan yayına bilməyəcək. Ona görə də, hakimiyyəti
üçün həm Rusiyadan, həm də Avropadan təminat almaq istəyir”.
Ermənistanın
baş naziri Nikol Paşinyan üçtərəfli razılaşmadan irəli gələn öhdəliklərdən
qaçmaq üçün sərhəddə genişmiqyaslı təxribatlar törətdi. Bu təxribatlardan sonra
Avropa İttifaqı təşəbbüslə çıxış edib. Belə ki, Prezident İlham Əliyev və Ermənistan
baş naziri Nikol Paşinyan dekabrın 15-də Brüsseldə Avropa İttifaqı və Şərq Tərəfdaşlığı Sammiti çərçivəsində görüşməyə razılıq veriblər. Bu görüşdə nələr müzakirə ediləcək?
Gözləntilər nədir?
"Ermənistan
Rusiya görüşündən yayındı”
Mövzu ilə
bağlı "Kaspi” qəzetinə açıqlamasında Milli Məclisin deputatı, siyasi elmlər
doktoru Elşad Mirbəşir bildirdi ki, artıq Brüssel görüşündə müzakirə olunacaq məsələlərin
anonsu verilib: "Son dövrlər sərhəddə baş verən gərginlik müzakirə olacaq. Bu
görüşün bizim üçün nəticəsi ondan ibarət olacaq ki, bu dəfə Avropa İttifaqı və Şərq
Tərəfdaşlığı sammiti çərçivəsində Azərbaycan özünün haqlı mövqeyini ortaya qoyacaq.
Ermənistanın onsuz da məqsədi o idi ki, bu cür təxribatlar törətsin, münaqişənin
mövcudluğu təəssüratını yaratsın. Bununla da, yaranmış gərginlik yenidən
müzakirə olunsun. Azərbaycan tərəfi isə Ermənistanın bu təxribatlarının nəyə
xidmət etdiyini məhz Avropa məkanından bir daha səsləndirilmiş olacaq. Bilirik
ki, bundan öncə Rusiyada görüşün keçiriləcəyi haqqında xəbərlər yayılmışdı. Noyabrın
əvvəlində Azərbaycan-Ermənistan sərhədindəki vəziyyət noyabrın 14-ü və 16-dan xeyli
fərqlənirdi. Yəni Ermənistan bu dərəcədə geniş miqyaslı təxribatlar törətmirdi.
Amma noyabrın 14-dən başlayaraq Ermənistan həm Kəlbəcər, Laçın, həm də Tovuz
istiqamətində sərhəd boyunca genişmiqyaslı təxribatlar törətdi və həmişə olduğu
kimi layiqli cavabını aldı. Bununla da Ermənistan Rusiya görüşündən yayındı. Çünki
Rusiya görüşündə müzakirə olunacaq məsələlər fərqli idi. Fikrimcə, postmünaqişə
mərhələsinin gerçəkliyinə uyğun olaraq sərhədlərin delimitasiyası və
demarkasiyasının aparılması və yekun sülh sazişinin əsaslarının yaradılması
istiqamətində addımların atılması gözlənilirdi. Amma Ermənistan ağır məğlubiyyətə
uğramış dövlət olaraq bu müzakirələrə hazır deyildi”.
"Paşinyan
Avropanın təhdidi altındadır”
Deputat
vurğuladı ki, təcavüzkar Ermənistan özünün yaratmış olduğu vəziyyətin
girovluğunda çıxa bilmir: "Paşinyan çox gözəl anlayır ki, Ermənistanın hazırkı
məğlub durumunda veriləcək istənilən qərar ölkənin və birbaşa özünün zərərinə olacaq.
Dünya təcrübəsi göstərir ki, məğlub tərəf ağır şərtlərlə yekun sənədi imzalamalı
olur və bu da çox normaldır. Məğlubiyyəti qəbul etməmək, təbii ki, xəstə erməni
məntiqinin nəticəsidir. Ermənistan cəmiyyəti də məhz bu hisslər üzərində köklənib.
Azərbaycanın qələbəsinin öz ifadəsini tapacağı istənilən sənədə Paşinyanın imza
atması onun siyasi karyerasının sonunu gətirəcək. Amma Paşinyan yekun sülh
sazişini imzalamaqdan da yayına bilməyəcək. Ona görə də, hakimiyyəti üçün həm
Rusiyadan, həm də Avropadan təminat almaq istəyir. Təbii ki, Paşinyan həm də Avropanın
təhdidi altındadır. Çünki Avropa da münaqişənin gündəmdən çıxmasının tərəfdarı
deyil və bununla da bəlli siyasi dairələr regionda özlərinin mövcudluqlarını təmin
etməyə çalışırlar”.
Paşinyanın
qarşısında ağır vəzifələr qoyulub
Politoloq
deyir ki, məhz Rusiyanın həlledici rolu çərçivəsində bu münaqişənin gündəmdən
çıxması Avropanın geosiyasi maraqlarına ziddir: "Ona görə də, Paşinyanın
qarşısında ağır vəzifələr qoyulub. Birincisi, münaqişənin hələ də mövcudluğu təəssüratını
yaratsın, ikincisi, Rusiyanın rolunu arxa plana keçirsin. Təbii ki, Paşinyan qərb
təfəkkürü ilə bütün bunları etmək iqtidarında deyil. Hesab edirəm ki, təxribatlar
da Qərbin təlimatları əsasında törədilir ki, məhz müzakirə predmeti postmünaqişə
mərhələsinin deyil, münaqişə vəziyyətinin reallıqlarına uyğun olsun. Fikrimcə, Brüsseldən
sonra daha ciddi görüşlər olacaq və Ermənistan Azərbaycanın diktəsi altında
lazım olan addımları atmaq məcburiyyətində qalacaq. Buna da dünya təcrübəsində
sülhə məcburetmə deyilir. Yəni Azərbaycan Ermənistanı sülhə məcbur edəcək.
"Ən azı
ona görə ki...”
Politoloq
İlqar Vəlizadə bildirdi ki, iki dövlət başçısının Brüssel görüşü ilə bağlı müxtəlif
fikirlər səsləndirilir: "Fikirlər var ki, bu görüşdən heç nə gözləmək olmaz. Kimlərsə
də deyir ki, orada ciddi qərar qəbul olunacaq. Açığını desəm, hər iki fikirdən kənaram.
Belə deyək, əgər dövlət başçıları görüşürlərsə, bunu əhəmiyyətsiz görüş kimi qəbul
etmək düzgün olmazdı. Əlbəttə ki, bu, əhəmiyyətli görüşdü. Ən azı ona görə ki,
tərəflər öz mövqelərini vasitəçilər olmadan, açıq şəkildə müzakirə edə bilərlər
və gələcək addımların müəyyənləşdirilməsi üçün bu, çox vacibdir. Hesab edirəm ki,
bu görüşdə cari məsələlər müzakirə ediləcək. Misal üçün, sərhəddə olan gərginlik,
kommunikasiyaların açılmasının rolu kimi məsələlər diqqətdə saxlanılacaq. Yəni
sənəd imzalanmasına gedən yolda qeyd edilən məsələlərin reallaşması üçün bu
görüş çox əhəmiyyətli ola bilər”.
"Bunlar
praktiki məsələlərdir”
İ.Vəlizadə
vurğuladı ki, sərhədlərin delmitasiya və demarkasiyası, eləcə də
kommunikasiyaların açılması ilə bağlı tərəflərin prinsipləri var: "Məsələn, erməni
tərəfi Zəngəzur dəhlizində nəzarət- keçid məntəqələrini tətbiq etmək niyyətindədir.
Azərbaycan bununla bağlı bir qədər fərqli fikir səsləndirir. Biz qeyd edirik
ki, üçtərəfli razılaşmada belə bir müddəa yoxdur. Buna görə də, Azərbaycan da
başqa istiqamətdə nəzarət-keçid məntəqələri yaratmaq məcburiyyətində qaldı.
Əslində, göründüyü kimi, bunlar praktiki məsələlərdir və hər halda, görüşdə
müzakirə olunacaq”.
Bəxtiyar Məmmədli