Bakı 7°C
Bakının Qarabağ qətiyyəti
Azərbaycan ərazi
bütövlüyü məsələsində heç kimə güzəştə getməyəcək
Prezident İlham Əliyevin rəhbərliyi ilə Azərbaycan
Silahlı Qüvvələri 44 günlük Vətən Müharibəsində işğalçı Ermənistan ordusunu
darmadağın edib. Bununla da 30 ilə yaxındır işğal altında olan torpaqlarımızın
böyük əksəriyyəti döyüş yolu ilə azad olunub. 10 noyabr 2020-ci ildə Azərbaycan
və Rusiya prezidentləri, Ermənistan baş nazirinin imzaladığı Üçtərəfli Bəyanata
uyğun olaraq Ağdam, Kəlbəcər, Laçın rayonları bir güllə atılmadan erməni
yaraqlılarından təmizlənib.
Məqsədyönlü təxribatlar
Sözügedən bəyanata uyğun olaraq növbəti mərhələdə Ermənistan
silahlı qüvvələrinin qalıqları tam şəkildə Rusiya sülhməramlı qüvvələrinin müvəqqəti
yerləşdirildiyi Azərbaycan ərazilərindən çıxarılmalı idi. Lakin əfsuslar olsun
ki, Üçtərəfli Bəyanatın imzalandığı tarixdən indiyə qədər ötən 9 ay ərzində bu,
baş verməyib. Azərbaycanın Xankəndi, Xocalı və Ağdərə yaşayış məntəqələrini hələ
də tərk etməyən bir qrup erməni yaraqlısı rusiyalı sülhməramlıların başı üzərindən
müxtəlif təxribatlar törədib, Silahlı Qüvvələrimizin mövqelərini ara-sıra atıcı
silahlardan atəşə tutublar. Son günlər ərzində isə Ermənistan Üçtərəfli Bəyanatı
kobud şəkildə pozaraq öz silahlı qüvvələrinin şəxsi heyətini Rusiya sülhməramlı
qüvvələrinin müvəqqəti yerləşdirildiyi Azərbaycan ərazilərinə daşımağa
başlayıb. Muxtarkənd, Şuşakənd məntəqələri yaxınlığında, eləcə də Kəlbəcər və Laçın
rayonlarının inzibati hüdudlarının şərq istiqamətindəki ərazilərdə yeni erməni
postlarının qoyulması halları müşahidə olunub. Ermənistan tərəfi məqsədyönlü şəkildə
vəziyyətin gərginləşdirilməsi üçün bu kimi müxtəlif təxribatlara əl atıb.
Ermənistana sərt xəbərdarlıq
Azərbaycan Müdafiə Nazirliyi yaranmış vəziyyətlə
bağlı açıqlama yayaraq növbəti dəfə Ermənistana sərt xəbərdarlıq edib. Qeyd
olunub ki, bütün bu təxribatlar Ermənistanın yeni müdafiə naziri Vaqarşak
Arutyunyanın öz ordusuna mümkün vasitələrdən istifadə edərək güc tətbiq etmək
barədə verdiyi məsuliyyətsiz və təhrikçi əmrinin fonunda baş verib.
Xatırladılıb ki, Ermənistanın sabiq müdafiə naziri David Tonayan da vaxtilə
"yeni müharibələr, yeni ərazilər” adlandırdığı təxribatçı hərbi doktrina
ilə çıxış etmişdi və onun rüsvayçı aqibəti hər kəsə məlumdur. Azərbaycan Ordusu
tərəfindən bütün adekvat tədbirlərin görüləcəyi barədə xəbərdarlığın yer aldığı
açıqlamada hayların havadarlarına da xəbərdarlıq mesajı yollanıb. Açıq şəkildə
bildirilib ki, Rusiya sülhməramlı qüvvələri Üçtərəfli Bəyanatın müddəalarına
uyğun olaraq müvəqqəti dislokasiya olunduqları Azərbaycan ərazilərində Ermənistan
silahlı qüvvələrinin yerləşdirilməsi hallarına son qoymalıdır.
Dostluq və tərəfdaşlıq münasibətlərinin ruhuna zidd
addım
Müdafiə Nazirliyimizin Ermənistan və Rusiyaya xəbərdarlıq
etməsinin ardınca İranın Azərbaycandakı səfiri Xarici İşlər Nazirliyinə dəvət
olunub. Görüşdə səfirin diqqəti İrana məxsus yük avtomobillərinin Qarabağa
qanunsuz səfər etməsi ilə bağlı aşkar edilmiş arzuolunmaz faktlara cəlb edilib
və bununla bağlı qarşı tərəfə nota təqdim edilib. Notada son dövrlər dost İrana
məxsus müxtəlif təyinatlı avtomobillərin davamlı olaraq rəsmi Bakının icazəsi
olmadan Azərbaycanın Qarabağ bölgəsinə giriş-çıxış etməsi ilə bağlı narazılıq ifadə
olunub. Bununla da bir müddət öncə İran tərəfinə şifahi şəkildə çatdırılmış
narazılıq bu dəfə sərt formada İran səfirinin qarşısında qaldırılıb. Bildirilib
ki, bu kimi narahatlıq doğuran və iki ölkə arasında mövcud yaxın dostluq və tərəfdaşlıq
münasibətlərinin ruhuna uyğun gəlməyən hallara son qoyulması istiqamətində əməli
addımlar atılmalıdır.
Davranışlarda anti-Azərbaycan cizgiləri
Göründüyü kimi, Azərbaycan ərazi bütövlüyü məsələsində
heç kimə güzəşt edilməyəcəyini növbəti dəfə nümayiş etdirib. Daim ermənilərə dəstək
verən Rusiya və İrana sərt xəbərdarlıq edilib, Qarabağ məsələsində rəsmi
Bakının qətiyyətli mövqeyi ortaya qoyulub. Hər iki ölkədən tələb olunub ki, Azərbaycanın
ərazi bütövlüyünə, suverenliyinə hörmətlə yanaşsınlar. Mövzu ilə bağlı
fikirlərini "Kaspi” qəzetinə bölüşən politoloq Qabil Hüseynli bildirib ki,
son dövrlər Rusiya və İranın davranışlarında anti-Azərbaycan cizgiləri açıq şəkildə
özünü göstərir. Onun sözlərinə görə, Ermənistandan rusiyalı sülhməramlıların nəzarət
etdiyi Laçın dəhlizi vasitəsilə Qarabağa əlavə hərbi qüvvələr daşınır, İran
avtomobil karvanları rəsmi Bakının icazəsi olmadan bölgəyə daxil olur.
Qələbəmiz həzm edilmir
Politoloq deyib ki, bütün bunlar Azərbaycanın ərazi
bütövlüyünə hörmətsizlik, Üçtərəfli Bəyanatın ruhuna zidd addımlardır: "İran bu
addımları ilə nümayiş etdirir ki, Azərbaycanın müstəqilliyini dəstəkləmir, ərazi
bütövlüyünün bərpa olunmasını istəmir. Rəsmi Tehran nə qədər Azərbaycanın ərazi
bütövlüyünü dəstəklədiyinə dair bəyanatlar səsləndirsə də, sonrakı addımları ilə
Ermənistan üzərində qələbəmizi həzm edə bilmədiyini büruzə verir. Rusiya da o
cümlədən. Görünür, həm Rusiyanın, həm də İranın ötürməsi və dəstəyi ilə
Qarabağda hansısa separatçı addımların atılmasına hazırlıq gedir. Bu, Azərbaycana
böyük zərər vura bilər. Bütün bu hadisələr erməni müdafiə naziri Vaqarşak
Arutyunyanın Moskvaya səfəri, rusiyalı həmkarı Sergey Şoyqunun ona qılınc hədiyyə
etməsi, Ermənistan ordusunun yenidən qurulmasına köməklik göstərəcəkləri barədə
bəyanatı fonunda baş verir. Bununla rusiyalı nazir erməni həmkarına və bütün
dünyaya mesaj verir ki, Rusiya Ermənistanı yenidən silahlandırmağa başlayacaq.
Ümumən regionda çox mürəkkəb proseslər baş verir. Bu proseslərin təhrikçiləri də
məlumdur. Ona görə də, Azərbaycan Müdafiə və Xarici İşlər nazirlikləri vasitəsilə
İrana, Rusiyaya ciddi xəbərdarlıq edib. İndiki situasiyada siyasi-diplomatik
yolla müəyyən məsələlərin nizama salınmasına çalışılır”.
Rufik İSMAYILOV
