“Yeni Üfüq” 20 Yanvar şəhidlərini anıb
"Yeni
Üfüq” Mənəvi İrsin Təbliği İctimai Birliyi 20 Yanvar- Ümumxalq Hüzn Günü ilə
bağlı tədbir keçirib. Tədbirdə çıxış edən birliyin sədri Sevinc Əzimbəyli
bildirdi ki, şəhid bacı və qardaşlarımızın tökülən qanlarının nəticəsi olaraq
Azərbaycan əbədi olaraq müstəqilliyinə qovuşub.
Onun sözlərinə görə, həm 20
Yanvarda, həm Qarabağ uğrunda gedən döyüşlərdə şəhidlik zirvəsinə ucalanların həyatı
hər bir azərbaycanlı üçün örnəkdir: "30 il əvvəl baş verən bu faciə hüzn günü
olmaqla bərabər, həm də Azərbaycan tarixinin şərəfli səhifələrdən biridir. Buna
görə də Azərbaycanın müstəqilliyi var olduqca adını öz qanı ilə tarixin səhifələrinə
yazan şəhidlərimiz hər zaman yaşayacaq və dualarla anılacaqdır”.
Tədbirdə
20 Yanvar və Qarabağ şəhidlərinin ruhuna Qurani-Kərimdən dualar oxunub və ehsan
süfrəsi açılıb. Təşkilatın sədri S.Əzimbəyli "Yeni Üfüq” Mənəvi İrsin Təbliği
İctimai Birliyinin həyata keçirdiyi silsilə tədbirlərin keçirilməsində verdiyi
dəstəyə görə "Cənnət” MMC-ə təşəkkür edib.