“Həyatını dəyişmək üçün 28 yaş gec deyil”
Türkiyəli ulduzlar "Fərdi inkişaf zirvəsi” seminarında maraqlı təcrübələrini
bölüşdülər
Bir neçə gün öncə karyera, təşəbbüskarlıq, uğur hekayəsi, özünü
inkişaf, sahibkarlıq, bədən dili, diksiya və s. mövzuları özündə birləşdirən "Fərdi
inkişaf zirvəsi” seminarı baş tutdu. "Baku Business School”un təşkilatçılığı ilə
baş tutan seminarda Türkiyədən dəvət olunmuş 4 spiker çıxış etdi.
Hələ seminar başlamamış "Baku
Business School”un direktoru Əyyub Hüseynzadə ilə söhbətləşdik. Ə.Hüseynzadə
bildirdi ki, seminarda çıxış edəcək spikerlər öz sahələrində bilik və
bacarıqları, gücləri ilə gələn önə çıxmış şəxslərdir: "Spiker seçiminə diqqətlə
yanaşırıq. Danışılacaq gözəl təcrübələri olmalıdır ki, dinləyənə nə isə aşılamış
olsunlar. Məsələn, Nihat Kahveçi öz karyerasında pik həddi yaşamış bir
insandır. Digər spikerlər də həmçinin. Spikerlər maraqlı olanda, proqrama rəng
qatırlar, insanların marağını cəlb etmiş olur”.
Ə.Hüseynzadə bildirdi ki, bu cür seminarların hədəf auditoriyası
yalnız gənclər deyil: "Fərdi inkişaf deyəndə, çox adam düşünür ki tələbələr
üçündür, amma burda bədən dili, diksiya və s. kimi mövzularla bağlı da
danışılır və bu, hər bir sahədə olan şəxsə lazımdır. Aparıcı, təlimçi, sahibkar
və s. üçün də maraqlı ola bilər. Bu mövzuların hədəf kütləsi genişdir”.
Bu gün peşəkar da çoxdur, amma...
İlk olaraq Türkiyə millisinin
sabiq üzvü Nihat Kahveciçıxdı. çıxış etdi. Futboldan, bu işə
yanaşmasından, tranfserlərindən, məşqçilərindən və s. danışdı. Auditoriyadan gələn
"İndi illər öncə ilə müqayisə edəndə, imkanlar çox yaxşıdır, bəs niyə
futbolçular əvvəlki qədər uğurlu olmurlar?” sualına cavabı isə daha maraqlı
oldu: "Bunu çox
deyirlər ki, əvvəllər indiki qədər imkanlar yox idi, yığma komandalar üçün
yaxşı şərait var, bəs niyə indi əvvəlkilər qədər uğur qazanılmır? Bununla bağlı
bir fikrim var. Bu gün peşəkar da çoxdur, texnologiyadan da yaxşı istifadə
edilir. Məlumata əlçatanlığımız saniyələr alır. Seçimlər, simalar, zehinlər hamısı gözəldir.
Ancaq düşünürəm ki, bu, robot kimi mexanizm yaradır. Bunlar öz yerində, ancaq
bir işdə uğurlu olmaq üçün insanda ona qoyacaq ürək olmalıdır. İşə ürək qoymursansa, nəticə əldə edə
bilmirsən. Bu, tək futbola aid deyil, hər işdə belədir”.
19 yaşlı biri üçün 3 il uzun zaman deyil
"TRT Spor" kanalının şərhçisi Ərdoğan
Arıkançıxışının
əvvəlində auditoriyadakı tələbələrə belə bir sual ünvanladı: "Hazırda öz istədiyi
ixtisas üzrə təhsil almayan tələbə var?”. Bir xeyli tələbə əl qaldırdı.
Onlardan biri: ”Mən tibb üzrə təhsil almaq istəyirdim, ancaq qəbul imtahanında
balım çatmadı deyə, kimya müəllimliyi üzrə oxuyası oldum. 3-cü kursdayam, 19
yaşım var. Düşünürəm ki, bu sahə mənim üçün uyğun deyil. Artıq 3 il sərf etmişəm,
geri dönmək də çətindir. Bitirdikdən sonra incəsənət yönümlü sahədə yenidən təhsil
almaq fikrim var. Rəssamlığa marağım böyükdür”.
Ə.Arıkan
bildirdi ki, nəinki 19, heç 24-25 də yenidən başlamaq üçün gec deyil: "Həyatımızla
bağlı ən vacib qərarları 15-30 yaş arasında veririk. Fəqət, bunu 50 yaşına
çatınca hiss edirik. Bu müddətdə nə qədər doğru qərarlar verə, nə qədər doğru
addımlar ata biliriksə, həyatımızın sonrakı dönəmi ona uyğun keçir. 19 yaşlı
biri üçün 3 il uzun zaman deyil. 30-35-də insan sevmədiyi bir sahənin arxasınca
getdiyini anlayanda, onun üçün bir az gec olur. 3 ili o vaxtlar sərf etmək heç
də həmişə alınmır. Lap 23 yaşında ol, həyatını dəyişdirəcəksə, 3-4-5 ili bu dəyişikliyə
qurban vermək olar. 23 yaşında qərar verib başqa təhsil alsan, 28 yaşında yeni
bir yola başlaya bilirsən. Həyatını dəyişmək üçün 28 yaş gec yaş deyil. 35 yaşa
gəlib bu qərarı verib başqa təhsil alanda, yaş 40 olur və üstünlük verilən biri
olmursan. Həm üstünlük verilən, həm də
işini doğru görən biri olmaq üçün özünü vaxtında tapmaq lazımdır”.
Ə.Arıkan
deyir ki, həyatla bağlı heç bir işi axarına buraxmaq olmaz: "Adətən axarına
buraxırıq. Universitetə qəbul olum, bitirim, sonra yaxşı-pis iş taparam, işləməyə
başlayaram və öz axarı ilə gedər. Bir də baxırsan ki, 20 il keçdi, sonra
pensiya yaşı gəlir və belə davam edir. Bəlkə də siz çox yaxşı idmançı, sənətçi
və s. olacaqdınız. Mütəxəssislər deyirlər ki, hər insanın beynində daha yaxşı
edə biləcəyi bir bacarıq bölməsi olur. Mütləq hamımızın bir-birimizdən
üstünlükləri var. Amma çox adam öz bacarığını kəşf etmədən ölür. Ona görə
axarına buraxmayın”.
Auditoriya qarşısında çıxış etməyi gözümüzdə
böyüdürük
Auditoriyaya
növbəti sual: Kim televiziyada aparıcı olmaq istəyər? Əlini qaldıran çox oldu,
ancaq onların bir çoxu başqa sahələrdə çalışdıqlarını bildirdilər. Ə.Arıkan
deyir ki, televiziyada çalışmaq istəyən, ancaq buna risk etməyən həddindən
artıq şəxs var: "TV-də işləmək istəyənlərin çoxu "Bizi kimdir ora götürən?”,
"Biz edə bilərikmi?” və s. düşünürlər. İstəyir, amma onda alınmayacağını
düşünür. Başqa biriləri bunu edirsə, siz də bacararsınız. Əsas olan o işin səndən
tələb etdiyi istiqamət üzrə üzərində işləməkdir. Mən bununla bağlı öz təcrübəmi
bölüşəcəm. 24-25 yaşım var idi, satış işində çalışırdım. TRT-nin aparıcılıq
elanını gördük. Dostlar dedilər ki, səsin pis deyil, bəlkə sınayasan. O vaxt özəl
televiziyalar fəaliyyət göstərmirdi, bircə TRT idi, orda çalışmaq xəyal idi.
Dedim ki, çox çətindir, alınmaz və s. Amma sonra fikirləşdim ki, bir sınayım.
Bir yazılı, bir şifahi sınaq oldu. Şifahi sınaqda hər dəfə oxuyanda bir az da həyəcanlandığımı,
çətinə düşdüyümü hiss edirdim. Səsim titrəməyə başladı, oxuya bilmədim. Spiker
dedi ki, dayan, çox həyəcanlandın, nəfəs al, sonra davam edərsən. Belə durumla
qarşılaşdığımda "alınmadı” deyə düşündüm. Arxaya rahat oturub "Bu qədər həyəcanlanacağımı
təsəvvür etmirdim. İstər-istəməz adam həyəcanlanır” dedim. Bu zaman spikerin
arxadan səsi gəldi. Dedi ki, bu səslə oxu. İndi daha da həyəcanlandım. Oxudum, amma o səslə yox (Gülür).
Deyiblər ki, səsi pis deyil, şans verək. Bir neçə mərhələni keçdik, sonra 5
aylıq kurs keçdilər. 5 ay davamlı olaraq orda öyrənsəm də, sınaqdan keçmədim.10
nəfəri ehtiyata saxladılar, biri də mən idim. Sonra işə dəvət etdilər.
Onu da
deyim ki, bu işə başlayana qədər çox utancaq, danışmağı sevməyən, auditoriya
qarşısında danışmaqdan əziyyət çəkən biri idim. Amma bir işi işiniz olaraq
gördüyünüz zaman həyatın başqa dəyişiklər gətirdiyinin şahidi olursunuz.
Zamanla auditoriya qarşısında danışmaq qorxusunun nə qədər uşaqca bir həyəcan
olduğunu düşünürsünüz. Gözümüzdə çox böyüdürük, belə etmək olmaz. Amma bunun
üçün də öyrənməli, bir şeyləri bilməliyik ki, həyəcan olmadan danışaq”.
Həyəcanı
dəf edib, gözəl danışığa nail olmaq üçün isə bəzi məsələləri diqqətdə saxlamaq
lazımdır. Ə.Arıkan onlardan ən önəmlilərini qeyd etdi: "Auditoriya qarşısında
çıxış edərkən dərindən nəfəs alıb danışmağa başlamaq lazımdır. Nəfəs almağı
unutmayın. Hərflər, kəlmələr ağızdan çıxarkən onların haqqını vermək, gözəl şəkildə
ağızdan çıxmasına diqqət etmək lazımdır. Bunun üçün dodaqlarımızı yaxşıca hərəkət
etdirəcək, dilimizi ağızda yaxşı döndürəcəyik. Dediklərimizin daha yaxşı
anlaşılması üçün ağzımızı yaxşı şəkildə açmalıyıq. Danışıq sürətini diqqətdə
saxlamaq lazımdır. Çox sürətli danışırsansa, bir az yavaşlat, ya da əksinə.
Eyni zamanda, müəyyənləşdirmək lazımdır ki, sənə aid olan səslə danışırsan,
yoxsa səsini dəyişirsən. Öz səsinlə danışmaq da önəmlidir. Bunları tətbiq edərək,
gözəl danışığa nail olmaq mümkündür”.
O qadın məni 2-3 ay əzdi, amma...
Sahibkar, yazıçı Mustafa
Açıqgöz isə tələbə vaxtı işlədiyi dönəmdə müdirinin işçilərdən iş tələb etmə
prinsipi ilə razılaşmasa da, özü rəhbər olunca, onu gözəl anladığını etiraf
etdi: "Work and travel” proqramı ilə tələbə vaxtı Amerikada bir xidmət sektorunda
işləyirdim. Həftənin 4 günü orda işləyirdik, 3 günüm boş qalırdı. Onu da bir
dondurma hazırlanan yerdə çalışmaq qərarı vermişdim. Qadının 40 dənə dondurma
mağazası var idi, hamısında da ən azı 20 nəfər işləyirdi. İşçi çox olduğu üçün gəlib
hamının işinə baxa bilmirdi, iş prosesinə, işçilərə kamera ilə nəzarət edirdi.
Bir gün kameradan baxanda, görüb ki, mən oturmuşam, işləmirəm. Öz-özümə
düşünürdüm ki, müştəri yoxdur, nə iş görəcəm? Biznesin sahibi olan xanım
mağazanın menecerinə zəng vurub deyir ki, Mustafa niyə işləmir? Dedim ki, iş
yoxdur, nə edim? Deyib ki, mən ona saata görə pul verirəm, işi yoxdursa, çıxıb
getsin. Ətrafı təmizləsin, ərzaqları səliqəyə salsın və s. Bu, mənə o vaxt bir
az pis gəlmişdi. Amma sonra öz işimi quranda, onun yanaşmasını dərk etdim. 50 nəfər
işçim var idi. Əgər onlar işlərini yola versəydilər, mən sabahı gün batıra bilərdim.
O qadın məni 2-3 ay əzdi, amma işə sahiblənmənin nə olduğunu da öyrətmiş oldu”.
Həyatınızın fürsəti sizə təqdim olunduğunda
Türkiyənin TRT telekanalının
aparıcısıTijenKaraş isə fürsətlərə hazır olmaq
mövzusunu öz təcrübəsi ilə əsaslandırdı: "Əgər yoxlamasanız, bilməzsiniz. Xəbərçiliyə yeni
başladığım vaxtlar idi. Uğur Dündar idarəçiliyi altında olan xəbərlərdə
çalışırdım. Həmin ərəfədə Ərzincanda zəlzələ oldu. Mən də təcrübəsiz idim.
Dedilər ki, studiyaya gir, xəbərini oxu, yaz və bağlantı et. İndi bu, mənim
üçün çox bəsitdir. Lakin o zaman o qədər təcrübəsiz və özünə yetərincə güvənən
biri deyildim. Ona görə, "edə bilmərəm” dedim. Dedilər edərsən, studiyaya
girdim oxudum, çıxdım. Ölkə xaricindən bir izləyici zəng vurub dedi ki, az əvvəl
sizi izlədim. Studiyada küləkmi var idi, yoxsa siz titrəyirdiniz? Dedim mən titrəyirdim
(Gülür). O qədər həyəcanlanmışdım. 1 həftə sonra Uğur Dündar məni yanına
çağırdı. Fikirləşdim ki, yəqin uğursuz gördülər, işdən çıxaracaqlar. Amma əksinə,
dedilər ki, yaxşı gedirsən, öyrəşəcəksən, səni həftə sonu üçün ana xəbərə
keçirməyi düşünürük. Mən nə cavab verdim? "Hazır deyiləm” dedim. Mənim
yaşadığımı yaşamayın deyə, gənc vaxtı özünüzü nə qədər yetişdirsəniz, nə qədər
hazır olsanız, o qədər yaxşı olacaq. Günün birində həyatınızın fürsəti sizə təqdim
olunduğunda, mənim kimi etməzsiniz, daha hazır olursunuz. Boş özgüvəndən bəhs
etmirəm”.
Aygün
Asimqızı