Gənclər 2018-dən 2019-a nə aparırlar?
Köhnə ili yola salıb, yeni ili qarşılayanda, adətən hər kəs ötən ildə
etdiklərinə nəzər yetirir, növbəti illə bağlı planlar qurur. Artıq 2018-ci ilin
son günlərini yaşayırıq. Maraqlıdır, gənclərimiz 2018-ci il üçün
hansı planlar qurmuşdular, arzuları nə dərəcədə reallaşdı, 2018-dən 2019-a
hansı ideyalarla keçirlər? Bu suallar ətrafında fərqli sektorlarda çalışan gənclərlə
həmsöhbət olduq.
Şimali Kiprdə yaşayan azərbaycanlı,
PR menecer Cəfər Mənsimi üçün ötən 2018-ci il məhsuldar keçib: "Elmi müdafiəni
uğurla keçmək 2018-ci ildəki ən böyük məqsədim idi. Yeni və olduqca çətin mövzu
seçmişdim. Hətta başlanğıcda "çətinlik çəkəcəksən, başqa mövzu seç” deyənlərlə
birlikdə "sadəcə irəli” deyənlər də var idi. Mən də "irəli”ni seçdim.
İnadkarlıq və böyük sevginin birləşməsindən "Azərbaycandakı dövlət məktəblərinin
brendləşdirmə ehtiyacının dəyərləndirilməsi” başlıqlı dissertasiya işi ortaya
çıxdı. Nəhayət, 15 iyun 2018-ci ildə Şimali Kiprin Doğu Akdeniz Universitetində
uğurlu elmi müdafiə etdiyim üçün təhsilin idarə olunması ixtisası üzrə
magisraturadan məzun oldum. Təhsilin idarə olunması ölkəmizdə yeni ixtisasdır.
Bu ixtisas üzrə ilk məzunlardan olmaq və yeni bir elmi işlə ölkəmizin adını
xaricdə təmsil etmək mənə nəsib olduğu üçün başqa bir sevincə sahibəm.
Cəfərin 2019-cu il üçün də planları var: "Bu ilə də ictimai fikrə
faydalı olacaq xeyli ideyalarla daxil olacağım üçün sevincliyəm. Bunun üçün məni
yetişdirən valideynlərimə, müəllimlərimə, Allaha, eləcə də özümə çox təşəkkür
edirəm. 2019 hər kəs üçün ilklərin ili olsun!”
"İslahatçı Gənclər” İctimai Birliyinin sədriFərid Şahbazlı deyir ki, 2018-ə böyük ümidlərlə, planlarla qədəm qoymuşdu: "Müxtəlif istiqamətli planlarım, məqsədlərim var idi. Hamısına çatdığımı deyə bilmərəm, amma ötən ili özüm üçün faydalı il kimi qiymətləndirə bilərəm. Əsas hədəflərimdən biri Türkiyədə aldığım magistr təhsilini bitirib diplomumu almaq idi. Artıq dissertasiya işi müdafiə mərhələsindədir. 2018-ci ildə ilin gənci mükafatına layiq görüldüm. Bu da mənim üçün bu ildə yaddaqalan hadisələrdən oldu. Ümumilikdə isə bütün illərdə ən böyük hədəfimiz sağlam yaşamağımız olmalıdır. Şükürlər olsun ki, bu cəhətdən də yaxşı keçdi”.
Fəridin 2019-cu il üçün də hədəfləri az deyil: "Təhsilimi
doktorantura pilləsində davam etdirmək fikrim var. İctimai fəaliyyətimlə bağlı
bir sıra hədəflərim var ki, onlar üçün çalışacam. Dil biliklərimi təkmilləşdirmək
də hədəflərimdəndir. Dünyanı səyahət əsas planlarım arasındadır”.
Sosial media meneceri
Mehdi Şən ötən ildə qurduğu planları həm də yazılı olaraq qeyd edibmiş:
"2018-ci il üçün əslində, çox plan qurmuşdum, onları yazmışdım da. Marketinq cəmiyyətində
tanınmaq kimi istəyim var idi, buna nail oldum. Marketinqlə bağlı tədbirlərə
qatıldım. İş cəhətdən danışsaq, 2-3 iş yeri dəyişdim. Sağlamlığıma vaxt ayırmaq
planım var idi, bunu da etdim. Qurduğum planların 40 faizi reallaşdı.
Rayonlarımızı gəzmək istəyirdim, amma hədəfimə çox da nail ola bilmədim.
Telefonsuz bir gün keçirməyi düşünmüşdüm, alınmadı. Amma sahəmlə bağlı hədəflərimə
nail oldum”.
Mehdi bu il reallaşdıra bilmədiyi işləri yerinə yetirmək üçün gələn
il daha səylə çalışacağını qeyd etdi: "Vaxtımı idarə etmək cəhətdən bəzi problemlər
yaşayıram, bunu qaydasına salmağı planlaşdırıram. Sağlam qidalanmağa keçməyi,
idmana başlamağı düşünürəm. Arıq insanların kökəlməsi ilə bağlı bir super layihəm
var. Martın sonu, aprelin əvvəllərində ölkə gündəminə bir forumla gələcəm.
Hazırda onun üzərində işləyirəm. Məktəblər, region gəncləri üçün bir layihəm
olacaq”.
"New ERA Travel” turizm agentliyinin rəhbəri Elçin Rüstəmov bu il planlaşdırdığı bir çox işlərini
reallaşdırıb, amma növbəti ilə qalan işləri də var: "2018-ci
ildə bütün hədəflərimə nail olduğumu desəm, yalan olar. Düşünürəm ki, hədəfləri
elə qoymaq lazımdır ki, ona çatmaq üçün daim can atasan. Hədəfə yaxınlaşdıqca,
hədəfimi uzaqlaşdırmağa çalışıram. Tam olaraq planlaşdırdıqlarımı, düşündüyüm
ideyalarımı reallaşdıra bilməsəm də, böyük layihələrimiz oldu. Uğurlu il kimi
qiymətləndirmək olar, hər şey qaydasındadır. Yarımçıq qalanları isə gələn ilə
saxladıq. Modelyer Fəxriyyə Xələfova ilə kəlağayının təbliğatı sahəsində bir
layihəmiz olacaqdı. Son vaxtlar səfərlərimin çox olmağı bir az bunu ləngitdi,
amma növbəti ilin aprel-may ayları üçün bunu etməyi planlaşdırırıq”.
Jurnalist Səidə Nürəmmədliplanla
yaşamadığını bildirdi: "Plan qurmuşam deməzdim. Nə vaxtsa plan qurub nəsə
etdiyimi xatırlamıram. İstəklərim olub, hansı ki, indi hamısı gerçəkləşib.
2018-də yaxşı şeylər çox oldu. Universiteti bitirdim, iş tapdım, bundan sonra həyatımı
birgə keçirəcəyim insan qarşıma çıxdı. Məncə, həyatımızı plan qurmaqla keçirməməliyik.
Bu boşuna vaxt itkisidir”.
"Astara” qəzetinin baş
redaktoru Fəridə Ağazadə deyir ki, 2018-ci ildə qarşısına böyük hədəflər
qoyub və onlara doğru addım-addım yol alıb. Əsas hədəfləri isə işi ilə bağlı
olub: "2017-ci ilin sonunda qarşımıza böyük hədəflər qoyduq. Belə ki, "Astara”
qəzetini ölkə səviyyəsində tanıtmaq, inkişaf etdirmək, saytımız vasitəsi ilə
insanlara, oxucularımıza dolğun, geniş məlumat çatdırmaq istəyirdik. Məhz
2018-ci ildə cənub bölgəsində ilk sayt olan "Astarainfo.az” fəaliyyət göstərdi.
2018-ci il üçün qarşımıza qoyduğumuz hədəflərimizə çatdıq, planlarım uğurla
reallaşdı. Mən bunu tək bacarmadım, komandamızla həyata keçirdik”.
F.Ağazadə bildirdi ki, ötən il kitab yazmaq və özünü bu sahədə
sınamaq istəyi olsa da, işlərinin çoxluğundan bu hədəfinə nail ola bilməyib:
"Kitab yazmağa başlamışam, amma hələ tamamlaya bilməmişəm. Bu arzum 2019-cu ilə
qaldı. Gələn ildən gözləntilərim çoxdur. Ən azı, daha çox çalışmağı və daha
böyük məqsədlərimizə nail olmağı düşünürəm”.
"FAN
travel”in direktoru Fariz Hacıyev üçün
2018-ci ilin ilk yarısı istədiyi kimi olmasa da, 2-ci hissəsi uğurla başlayıb və
elə də yekunlaşmaq üzrədir: "Bir turizmçi olaraq hər zaman yenilikləri sevirəm.
Məndə hər il bilmədiyim bir sahəni öyrənmək marağı var. 2018-ci il daxil olarkən
qarşıma qoyduğum əsas hədəflərdən biri dizayn-qrafika sahəsini öyrənmək, yeni
turizm istiqamətləri tapmaq, topluma daha faydalı olmaq və s idi. İlin sonunda
isə qarşıma qoyduğum məqsədlərə çatdığımı deyə bilərəm. Gərgin iş qrafiki
olmasına baxmayaraq, əksər elmi-kütləvi tədbirlərdən, turizm və iqtisadi
forumlarda iştirak etməkdən də geri qalmadım.
Bir turizmçi olaraq bu il daha fərqli işlər görməyi
qarşıma məqsəd qoymuşdum. Elə bir iş görmək istəyirdim ki, mənimlə bərabər yüzlərlə
insan faydalansın. Az da olsa vətənimizə, millətimizə yararlı olaq. 2018-ci
ilin payızında Astara-Lənkəran bölgəsinə - mandarin bağlarına ekskursiyalara başladıq,
tez bir zamanda kütləvi hal aldı və mənimlə bərabər onlarla turizm firması
Astara-Lənkəran bölgəsinə payız ayları boyunca Bakıdan hər həftəsonu yüzlərlə
yerli turist apardı. Və nəticədə bölgə turizminə faydalı olduq, kəndlilərin
satışı yüksəldi, həmin ərazilərdə 2 ay boyunca otel, restoran sahəsində
aktivlik müşahidə edildi. Çoxlu insanlar sırf mənim layihəmdən faydalandığı
üçün özümü xoşbəxt hiss edirəm. İl sonunda ölkədə ilk dəfə olaraq qrup halında
qatarla "Qış nağılı” turu hazırladım, gözləmədiyim böyük maraq gördüm. İli
uğurlu, müsbət enerji ilə bitirmək üzrəyəm. Yeni ildə hədəflərimdən biri Azərbaycanı
daha az tanınan ölkələrdə populyarlaşdırmaq, ölkəyə turist axınını sürətləndirməkdir”.
ATV telekanalında
yayımlanan "Təhminə və Zaur” serialının "Təhminə”si Natavan Gümet bildirdi
ki, 2018-ci il üçün böyük planlar qurmayıbmış: "2018-ci ildə gözləmədiyim hadisələr
oldu. 2018-ci ildə ana olmağa hazırlaşırdım və bu reallaşdı. Bu ildən xüsusi
planım və istəklərim yox idi. Uğursuzluqlar olmadı, düşərli keçdi”.
Natavan deyir ki, sənəti ilə bağlı bəzi ideyaları var və bunların
növbəti ildə reallaşması üçün çalışacaq: "2019-cu ildən gözləntilərim çoxdur. Yəqin
ki, həyata keçər. Bizim sənət elədir ki, biz asılı insanlarıq. Sənətimiz heç də
bizim planlaşdırdığımız kimi getmir. Görək bu 2019-cu ildə hansı təkliflər gələcək
və ona uyğun da həyatımız davam edəcək?”
Tanınmış aktrisa Səbinə Məmmədovabildirdi ki, Moskvada yay məktəbində təhsil alması onun çoxdankı arzusu olub:
"2018-ci ildə Rusiyada yay məktəbi planını qurdum, bu, həyata keçdi.
"Çeburaşka” tamaşasında rolumun olmasını istəyirdim. Bu istəyim də həyata keçdi
və mən "Çeburaşka” oldum. Bu il bədii filmə çəkilmək istəyirdim, alınmadı.
Serialda rol aldım. Gözəl işlər düşünmüşdüm. İki dəfə Moskvada diploma layiq
görüldüm. Magistratura istəyirdim, çatdıra bilmədim. 2019-cu ildən gözləntilərim
böyükdür. Özümə yeni maraqlı obrazlar arzu edirəm. İstəyirəm ki, sevim, aşiq
olum. Məncə, sevib-sevilməyin yeni ildə əsil zamandır. Yeni ildə qarşıma istedadlı,
ağıllı bir insanın çıxmasını istəyirəm. Sənət gözəldir, gözləntilərim var. Amma
heç zaman ailə haqqında düşünməmişəm. Artıq bu barədə fikirləşirəm”.