“Frida illüstrasiyası”nı işləyən qız
Al-əlvan bir dünyası var. Çünki özünü rənglərin
olmadığı yerdə təsəvvür edə bilmir. İncəsənətin bütün sahələri diqqətini çəksə
də, öz işində peşəkar olmaq üçün digər maraqlarını minimuma endirib. Müsahibim florist Sofi Əlidir.
Qeyd edim ki, Sofinin 27 yaşı var və Bakı Slavyan Universitetinin
alman dili filologiyası fakültəsinin məzunudur. Amma ixtisas aldığı sahədə qısa
müddət fəaliyyət göstərib. Deyir ki, öz ixtisasındakı işlər ona həyəcan
vermədiyindən bu sahəyə yönəlib: " İncəsənət sahəsi hər zaman məni özünə daha
çox cəlb edib. Hətta universitetdə oxuduğum vaxtlarda da dərsdən qaçıb musiqi
akademiyasına gedirdim. Özümü al-əlvan rənglərin, çiçəklərin içində tapdığım
üçün də bu sahəyə yönəlməyə qərar verdim. Və özümə dedim ki, başlamaq üçün
mükəmməl olmağı gözləmək lazım deyil. Mükəmməl olmaq üçün başlamaq lazımdır.
Beləcə çox kiçik büdcə ilə öz işimi qurdum. Hələ o vaxtlar professional biri deyildim.
Amma ailəm, dostlarım və yaxınlarım mənə mənəvi dəstək oldular, onların
sayəsində cəsarətləndim. Mənim anam dərzidir. Onun çox geniş təxəyyülü var. Qardaşımın
rəsmə, incəsənətə böyük marağı var. Əslində, bu işə başlamağım onları da
sevindirdi. Əgər onların dəstəyi olmasaydı, mən heç bir addım ata bilməz, standart
işlərlə kifayətlənərdim. Bir müddət floristika və əl işləri üzrə dizayner
olaraq çalışdım. Daha sonra isə tərzimə uyğun olaraq, özü işimi yaratmaq qərarına
gəldim”.
Sofi deyir ki, otaq güllərinə böyük sevgisi var:
"Güllərə diqqət ayırmağı, qulluq etməyi çox sevirəm. Bu, mənim enerjimi və
həyata olan sevgimi daha da artırır. Canlı hədiyyələr insanları daha da xoşbəxt
edir. Çünki bu həm də qarşı tərəfə olan diqqətin, sevginin və məsuliyyətin
göstəricisi kimi qəbul edilir. Bitkilərlə yanaşı, rəsmə də həvəsim olduğu üçün
belə bir qərara gəldim ki, hər iki sahəni birləşdirmək mənim üçün daha faydalı
ola bilər. Artıq bir ilə yaxındır ki, bu işlə məşğulam. Başladığım gündən
marağım və motivasiyam həmişə yüksək olub. Əslində, bu bir qədər yeni bir sahə
olduğundan, əvvəlcədən diqqət çəkəcəyini gözləyirdim. Həqiqətən də belə oldu.
İndi sifarişlərim daim olur. Bu, mənim üçün böyük motivasiyadır. Əhval-ruhiyyə
ilə işləyən biri olduğum üçün bəzən olur ki, işimə qısa fasilələr verirəm. Artıq
müştərilərim və izləyicilərim də buna öyrəşiblər. Hətta, bəzən elə olur ki,
sifarişi bir ay öncədən verirlər ki, fasilə müddəti ilə üst-üstə düşməsin. Həyatda
olduğu kimi, işlərimdə də planlı biriyəm. İş limitimi bilirəm və hər zaman
planlı şəkildə hərəkət edirəm. Çalışıram ki, günlük, həftəlik, hətta illik
planlar tərtib edib, hər dəqiqəmi dəyərləndirim. Ona görə də, bu günə qədər heç
bir sifarişim gecikməyib. Amma bir dəfə hazırladığım dibçək sındığı üçün təhvil
məsələsi bir gün ertələnməli oldu. Amma bunu elə etdim ki, müştərinin heç
xəbəri də olmadı”.
Həmsöhbətim qeyd etdi ki, işlərin hazırlanması onun
formasından və dizaynından asılıdır: "Bu, bəzən iki saat, bəzən isə iki iş günü
davam edə bilir. İşə təzə başladığım vaxtlarda tez-tez Frida Kahlonun illüstrasiyasını
sifariş edirdilər. Bəzən mənə zarafatla "Frida illüstrasiyasını işləyən qız”
deyə müraciət edirlər. Mən isə hər zaman yenilik və dəyişiklik axtarışında olan
və sevən biriyəm. Məncə, eyni işlərdən insanların
da gözü tez yorulur. Getdikcə müştərilər də seçimi mənə buraxmağa başladılar və
işi görənə güvənməyi üstün tutdular. Bu zaman daha fərqli, rəngli və individual
işlər ortaya çıxdı. Müştərilərin güvəni məni işimə daha da həvəsləndirir və
diqqətlə çalışıram. Yalnız bu halda öz təxəyyülümdə canlandırdığımı illüstrasiyaya
çevirə bilirəm”.
Müsahibim deyir ki, bu, onun hobbisi yox, işidir: "Sifarişləri
hazırlayarkən öz sevgimi və əməyimi ortaya qoyuram. Hər zaman dəyişkənliyə və
rəngarəngliyə üstünlük verirəm. Çalışıram ki, nə özüm, nə də başqaları bezsin.
Fərqliliklər hər zaman insanları cəlb edir. Fərqlilik həm də inkişaf deməkdir.
İnkişaf isə mənim üçün çox önəmlidir. Bu baxımdan, hələlik qarşıda böyük
planlarım var. Adətən, incəsənət sahəsində çalışanların öz işindən əlavə başqa
bir sahəyə də mütləq marağı olur. Bu həm iş, həm də hobbi kimi qəbul edilə
bilər. Eynilə məndə də belədir. Rəsmdən əlavə, floristika ilə bağlı biliklərimi
daha da artırmağa çalışıram. Əslində, diqqətimi çəkən incəsənət sahəsi çoxdur. Lakin
indi floristika və rəsm kurslarına gedirəm. Düzü, hazırda planımda universitet
təhsili almaq yoxdur. Heç vaxt universitet qaydalarına, hər hansı limitlərə
dözümlü insan olmamışam. Qayda-qanunların, limitlərin və məcburiyyətlərin
olduğu yerlərdə özümü narahat hiss edirəm. Həmçinin, bir şeyin uzun davam
etməsi məni tez yorur. Ona görə də
universitet təhsili almaq mənim ən son düşünəcəyim bir şeydir. Amma təlimlər,
seminarlar və kurslara qatılıb özümü inkişaf etdirməyi daha üstün tuturam. Daha
yaxşı, daha mükəmməl öyrənməyin və öyrəndiyin sahənin peşəkarı olmağının mən
də tərəfdarıyam”.
Hələlik bu sahədən əldə etdiyi gəlirin onu qane
etdiyini deyən həmsöhbətim, qazancının yarısını
öz işinə sərf edir: "Hələlik sifarişlərimi onlayn şəkildə, "instaqram” və bir
sayt vasitəsilə qəbul edirəm. Bu elə bir sahədir ki, kiçik detallara xüsusi
diqqət yetirmək lazımdır. Çalışıram ki, daha keyfiyyətli və səliqəli saxsılar
sifariş edim və daha yaxşı boyalardan yararlanım. Bəzən kiçik toxunuşlar kiçik
məbləğ tələb edə bilir. Amma insanlar tərəfindən bu, daha böyük diqqətlə
qarşılanır. Öyrənməyin insana daha çox zövq verdiyini düşünürəm. Ona görə də vaxtımı
fotoqrafiya, çiçəkçilik, dil öyrənməyə sərf edirəm. Vaxt tapdıqca səyahət etməyə
də çalışıram”.
Şəbnəm
Mehdizadə