AZƏRBAYCANDA KORONAVIRUSLA BAĞLI XƏBƏRLƏR

Deputat: İslam Həmrəyliyi Oyunları islam dövlətlərində yüksək maraqla izlənildi

Deputat: İslam Həmrəyliyi Oyunları islam dövlətlərində yüksək maraqla izlənildi

Cəmiyyət
24 May 2017, 10:10 478
"Bakı-2017 IV İslam Həmrəyliyi Oyunları bütün islam dövlətləri tərəfindən yüksək maraqla izlənildi". Bu barədə Trend-ə açıqlamasında millət vəkili Elman Nəsirov deyib.

Millət vəkili bildirib ki, oyunlar demək olar ki, bütün dünyanın diqqət mərkəzində idi: "İslam oyunları ərəfəsində Qazaxıstanda səfərdə olarkən, oyunlara olan marağın və diqqətin şahidi oldum. Onlar təkcə IV İslam Həmrəyliyi Oyunlarını deyil, həm də Bakının tərəqqisini, eləcə də Azərbaycanda idmanın sürətlə inkişafını qeyd edirdilər. Bu oyunlar çərçivəsində Azərbaycanın bütün istiqamətlərdə yüksək sürətlə inkişaf etdiyinə bir daha əminlik ifadə olunurdu. Görüşlərdə qeyd olundu ki, Azərbaycan Prezidenti İlham Əliyevin səyi nəticəsində Azərbaycan sürətlə inkişaf edir və bir müsəlman ölkəsi olaraq Qazaxıstan bu inkişafla fəxr edir".

E.Nəsirov bildirib ki, IV İslam Həmrəyliyi Oyunları Azərbaycanda idmanın necə inkişaf etdiyini bir daha sübuta yetirdi: "Bu oyunlar Azərbaycan idmançılarının hansı gücə qadir olduğu, yarışlara necə hazırlaşdığını göstərdi. Oyunlar bir daha sübut etdi ki, ölkə prezidentinin idmana xüsusi diqqət və qayğısı nəticəsini verib. Əcnəbi tamaşaçılar bildirirlər ki, İslam Həmrəyliyi Oyunlarının keçirilməsi bir daha sübut etdi ki, Azərbaycanda stabillik, təhlükəsizlik və inkişaf yüksək səviyyədədir. Bu onu göstərir ki, Azərbaycan islam dünyasında özünü lider dövlət kimi aparır və ölkə İslam dünyasında həmrəyliyə yüksək töhfə verir".

Qeyd edək ki, mayın 8-dən 22-dək Bakıda IV İslam Həmrəyliyi Oyunları keçirilib. Azərbaycan milli komandası medalların sayına görə, İslamiadanın qalibi olub.