Xudafərindən verilən mesaj - Fotolar
Sülh, sabitlik,
quruculuq, inkişaf
Azərbaycan Prezidenti, Silahlı Qüvvələrin Ali Baş
Komandanı İlham Əliyev və birinci xanım Mehriban Əliyeva noyabrın 16-da Füzuli
və Cəbrayıl rayonlarında, o cümlədən Füzuli və Cəbrayıl şəhərlərində olublar.
İşğaldan azad edilmiş bu yaşayış məntəqələrində Azərbaycan bayrağını ucaldan
dövlət başçısı Qarabağın tacı sayılan Şuşa şəhərinə çəkiləcək yeni avtomobil
yolunun layihəsi ilə tanış olub, müvafiq göstərişlər verib. Beləliklə,
Ermənistanın kapitulyasiyasından 6 gün keçəndən sonra artıq Azərbaycan
quruculuq işlərinə başlayıb, Alxanlı qəsəbəsindən Füzuli-Şuşa avtomobil yolunun
çəkilişinə başlanılıb. Füzuli, Cəbrayıl şəhərləri ilə yanaşı, Azərbaycan-İran
sərhədində - dostluq sərhədində olan, tarixi Xudafərin körpüsünə baş çəkən ölkə
rəhbəri Ermənistanın dağıdıcı mahiyyətini bir daha bütün dünyaya çatdırıb. Qeyd
olunub ki, işğaldan azad olunan ərazilərdə bütün infrastruktur, o cümlədən
evlər, obyektlər vəhşi düşmən tərəfindən dağıdılıb. Hazırda Kəlbəcər, Laçın və
Ağdamdan çıxarılanlar isə evləri, mağazaları, inzibati binaları yandıraraq,
apara bilmədikləri mal-heyvanı məhv edərək ərazidən gedirlər. Bu, vəhşiliyin,
vandallığın, barbarlığın bariz nümunəsidir.
"Bundan
sonra bu torpaqda biz yaşayacağıq”
Prezident İlham Əliyev İkinci Qarabağ Müharibəsinin
Azərbaycanın şanlı Qələbəsi olduğunu diqqətə çatdıraraq, işğal edilmiş
torpaqların düşmən tapdağından azad edildiyini vurğulayıb. Bildirib ki, düşmən
tərəfindən vurulmuş ziyan hazırda dəqiq hesablanır və zərərçəkmiş bütün
insanlar dövlət dəstəyi hesabına öz dədə-baba torpaqlarına qayıdacaqlar. Ali
Baş Komandan hazırda münaqişənin siyasi həll mərhələsində olduğunu söyləyib.
Deyib ki, bu mərhələdə də Azərbaycan istədiyinə nail olur və olacaq: "Bu işləri
biz planlı şəkildə aparacağıq - ilk növbədə, ziyanın hesablanması, dəqiq uçotun
aparılması, ondan sonra bərpa-yenidənqurma işləri. ...İşğaldan azad olunmuş
torpaqlarda düşmən bütün infrastrukturu dağıdıb. Bizim şəhərlərimiz, demək olar
ki, yerlə-yeksan edilib və bu, düşmənin vəhşiliyini bir daha göstərir. İndi
bütün dünya bunu görəcək. Bütün dünya görəcək ki, biz hansı vəhşi düşmənlə
üz-üzə qalmışdıq. ...Yol boyunca dağıdılmış kəndləri və Füzuli şəhərini
dağılmış vəziyyətdə görəndə adamın ürəyi ağrıyır. Vəhşilər bizim şəhərimizi nə
günə salıblar?! Dağıdıblar, evləri dağıdıblar, bütün infrastrukturu dağıdıblar,
bir dənə də salamat bina yoxdur. Bütün dünya görməlidir erməni vəhşiliyi nə
deməkdir və bütün dünyaya biz bunu göstərəcəyik. Təkcə Füzuli yox, Ağdam şəhəri
nə gündədir, başqa şəhərlər. Sanki bu torpaqlardan bir vəhşi qəbilə keçib. Hər
şeyi dağıdıb, talan edib, bizim mədəni, tarixi, dini irsimizi silmək istəyib,
ancaq istədiyinə nail ola bilməyib. Çünki biz gəlməli idik, qayıtmalı idik. Gəlmişik
və qayıtmışıq. Düşməni qovmuşuq torpaqlarımızdan, Azərbaycanın Dövlət Bayrağını
ucaltmışıq. Bundan sonra bu torpaqda biz yaşayacağıq, necə ki, əsrlər boyu biz
yaşamışıq, bizim xalqımız yaşayıb”.
"Azərbaycan
quruculuq, sülh mücəssəməsidir”
Milli Məclisin
deputatı, Azərbaycan Həmkarlar İttifaqları Konfederasiyasının sədri Səttar
Möhbalıyev Azərbaycan
Prezidentinin və birinci xanımın işğaldan azad edilmiş Füzuli və Cəbrayıl
rayonlarında, o cümlədən Füzuli və Cəbrayıl şəhərlərində olmasını, orada səsləndirilən
fikirləri şərh edərək deyib ki, dövlət başçısının bu səfəri Müzəffər Ali Baş
Komandanın ürəyində yaşatdığı sonsuz Vətən sevgisinin və xalqa olan
bağlılığının daha bir təcəssümüdür. Onun sözlərinə görə, düşmən qoşunlarının
Azərbaycan ərazisindən hələ tam çıxarılmadığı, erməni irticaçılarından hər cür
təxribatın gözlənildiyi bir vaxtda Ali Baş Komandan bütün riskləri gözə alaraq,
birinci xanımla birlikdə möhtəşəm Qələbəmizin sevincini bir daha azad olunmuş
ərazilərdə öz xalqı ilə paylaşmaq üçün bu addımı atıb. Millət vəkili söyləyib
ki, bu, əsl iqtidar-xalq birliyinin, Azərbaycan xalqının öz Prezidentinə, öz
dövlətinə sonsuz sevgisinin nümayişidir: "Füzuliyə səfəri zamanı Prezident
İlham Əliyev Şuşa şəhərinə yolun çəkilişi ilə bağlı göstəriş verib. Artıq
Füzuli rayonundan Şuşaya gedən bu yolun inşasına start verilib. Çox qürurlu haldır
ki, işğaldan azad edilmiş torpaqlarımızda icrasına başlanmış ilk layihə məhz
Füzuli-Şuşa yolunun tikintisi olacaq. Əlbəttə ki, bu yolun müstəsna əhəmiyyəti
var. Çünki Şuşa bizim göz bəbəyimiz, qürur mənbəyimizdir. Füzuli-Şuşa yolunun
inşasına başlanması həm də Azərbaycan xalqının və Azərbaycan Prezidentinin
yaradıcı ruhunun parlaq təzahürüdür. Otuz il ərzində bu torpaqları işğal
altında saxlayan ermənilər həmin ərazilərdə bir quruculuq işinə də imza
atmamış, yalnız dağıtmaq, viran qoymaq və talan etməklə məşğul olmuşlar.
Həmçinin Füzuli rayonuna gedən yolun ətrafında yerləşən kəndlərdə, bir vaxtlar
həyat qaynayan bu ərazilərdə də öz dədə-baba torpaqlarından qovulan azərbaycanlıların
ev-eşikləri erməni vandalları tərəfindən yerlə-yeksan edilib. Onlar daşı-daş
üstündə qoymayıblar. Budur, erməni xislətinin mahiyyəti! Lakin Azərbaycan
xalqına bu xüsusiyyətlər yaddır. Azərbaycan yalnız quruculuq, sülh və
əmin-amanlıq mücəssəməsidir”.
S.Möhbalıyev vurğulayıb ki, Prezident İlham
Əliyevin və birinci xanım Mehriban Əliyevanın işğaldan azad edilmiş Füzuli və
Cəbrayıl rayonlarına səfərləri zamanı baş vermiş ən önəmli hadisələrdən biri də
dövlətimizin başçısının Füzuli şəhərində, Xudafərin körpüsündə və Cəbrayıl
şəhərində şanlı Azərbaycan bayrağını qaldırması olub: "Heç şübhəsiz, bu
görüntülər Azərbaycanın müasir tarixinin ən şanlı səhifələrindəndir. Müzəffər
Ali Baş Komandan qəhrəman Azərbaycan Ordusunun işğaldan azad etdiyi tarixi torpağımızda
üçrəngli bayrağımızı qaldırdı. Bəli, Vətən torpaqlarının 30 ildən artıq davam
edən işğalına son qoyuldu, Azərbaycan tarixi ədaləti bərpa etdi. Eşq olsun
şanlı Azərbaycan Ordusuna! Yaşasın Müzəffər Ali Baş Komandanımız! Eşq olsun
Azərbaycan xalqına!”
Xalqın
rəğbəti, məhəbbəti və dəstəyini qazanmaq
Milli Məclisin üzvü
Tamam Cəfərovabildirib ki, Prezident İlham Əliyev və birinci xanım Mehriban Əliyevanın Füzuli
və Cəbrayıl rayonlarına, eyniadlı şəhərlərə səfəri qalib sərkərdənin işğaldan
azad olunmuş torpaqlarda Azərbaycan xalqı ilə birlikdə qeyd etdiyi zəfər
bayramıdır. Onun sözlərinə görə, bu səfərin Milli Dirçəliş Günü ərəfəsində baş
tutması həm siyasi, həm də tarixi aspektdən mühüm əhəmiyyət kəsb edir. Deputat
qeyd edib ki, Prezident İlham Əliyev işğaldan yenicə azad olmuş, tam
təhlükəsizliyi təmin olunmamış, minalardan tam təmizlənməmiş, rayonlara səfər
etməklə, bir daha xüsusi cəsarət və liderlik nümayiş etdirib: "O, bütün dünyaya
göstərdi ki, bu torpaqlar vahid Azərbaycan dövlətinin ərazisidir. "Qarabağ
Azərbaycandır və nida” sözlərini deyən Prezident İlham Əliyev Füzuli və
Cəbrayıl rayonlarına səfəri ilə həmin nidanı qoymuş oldu. Siyasətdə və cəbhədə,
diplomatiyada və hərbi strategiyada üstünlük qazanmış Prezident İlham Əliyev bu
zəfərin müəllifidir. Prezidentin bu səfəri qalib xalqın qəhrəman Ali Baş
Komandanının səfəridir. Bu, tarixi bir səfərdir. Bölgələrdə Prezidentin
izdihamla qarşılanması Azərbaycan cəmiyyətindəki həmrəylikdən xəbər verir. Xalqın
dəstəyi dövlətin tükənməz gücünün mənbəyidir. Hamını birləşdirən Vətən
müharibəsi milli birliyin səbəbidir. İşğaldan azad olunmuş bölgələrdə qəhrəman
Prezidentini qarşılayan qalib xalq öz sevgi və etimadını nümayiş etdirdi.
Azərbaycan Xalqı, Müzəffər Ali Baş Komandanını alqışlarla, tükənməz bir sevgi
ilə qarşıladı. Qələbədən sonra bölgələrə ilk səfərini edən Prezident, əslində
sevinc hislərini öz xalqı ilə bölüşmüş oldu. Xalqın rəğbəti, məhəbbəti və
dəstəyini qazanmaq hər bir ölkə başçısı üçün ən böyük mükafatdır”.
Siyasi
iradə, qətiyyət və böyük liderlik
Millət vəkili söyləyib ki, Prezidentin cəbhə
bölgəsinə səfəri zamanı Xudafərin körpüsünü ziyarət etməsi xüsusi rəmzi məna
daşıyır: "Azərbaycan vətəndaşları ötən illər ərzində qonşu İran dövlətinə səfər
edərkən, tarixi Xudafərin körpüsünə uzaqdan, həsrətlə baxırdılar. Ali Baş
Komandanın rəhbərliyi ilə qazanılmış böyük Qələbə nəticəsində bu həsrət sona
çatdı. Azərbaycan Xalqı üçün Xudafərin körpüsü hər zaman birlik, həmrəylik
rəmzi olmuşdur. Məhz buna görə də Cənab Prezidentin Xudafərin körpüsünü ziyarət
etməsinin böyük rəmzi mənası var. Cənab Prezidentin "Biz birlikdə güclüyük”
şüarı Azərbaycan xalqının güzgüsünə çevrilib. Xalqın orduya inamı və dəstəyi,
həmçinin ölkədə yaşanan milli və siyasi həmrəylik, yaşadığımız qələbənin
ideoloji əsasıdır. Bu ideoloji əsası formalaşdıran isə Cənab Prezident, Ali Baş
Komandan İlham Əlyevin siyasi iradəsi, qətiyyəti və böyük liderliyidir”.
Təcavüzkar,
məkrli planlar alt-üst olub
Milli Məclisin
deputatı Naqif Həmzəyev hesab
edir ki, 44 günlük İkinci Vətən müharibəsi doğma Qarabağımızı, işğal altında
qalan əzəli-əbədi torpaqlarımızı düşmən caynağından azad edib, ölkə
Prezidentimizin "Qarabağ Azərbaycandır və nida” fikrini birdəfəlik təsdiqləyib.
Onun fikrincə, işğalçı Ermənistan hakimiyyətinin həyata keçirdiyi işğalçılıq
planlarına Ali Baş Komandanın əmri ilə Azərbaycan Silahlı Qüvvələri tərəfindən
sentyabrın 27-də başladılan əks-hücum əməliyyatları sayəsində tarixi
zəfərimizlə birdəfəlik son qoyulub. Millət vəkili qeyd edib ki, Prezident İlham
Əliyevin 17 illik hakimiyyəti dövründə həyata keçirdiyi son dərəcədə müdrik,
uzaqgörən, balanslaşdırılmış siyasət nəticəsində işğalçı Ermənistanın, mənfur
düşmənin bu illər ərzində həyata keçirdiyi təcavüzkar, məkrli planlar alt-üst olub:
"Düşmən bu illər ərzində insanlığa sığmayan hərəkətləri, vəhşilikləri ilə
Şuşanı, Laçını, Kəlbəcəri, Ağdamı, Qubadlını, Cəbrayılı, ümumiyyətlə, Qarabağı
xalqımızın qəlbindən söküb ata bilmək üçün dayanmadan çalışdı, işğal etdiyi
bütün yurdlarımızı viran elədi, daşı daş üstündə qoymadı, təbiətimizə qənim
kəsildi, yeraltı-yerüstü sərvətlərimizi taladı, tarixi, maddi-mədəni
abidələrimizə, musiqimizə göz dikdi. Azərbaycanın tarixi torpaqlarından əsl
sahibindən heç bir nişanə qalmaması üçün min cür fırıldaqlara əl atdı. Elə
bildilər ki, Azərbaycan xalqı bir daha öz ata-baba yurdlarına dönməyəcək.
Düşmən anlaya bilmədi ki, 30 illik uzun bir ayrılıq belə, Azərbaycan xalqının
qəlbindən, könlündən Qarabağ sevdasını çıxarıb, ata bilməz. Çünki, Qarabağ
Azərbaycandır!”
Azərbaycan xalqının
humanizminə şahidlik
Millət vəkili deyib ki, Qalib Sərkərdənin və
Birinci vitse-prezidentin düşmən tapdağından azad edilən torpaqlara səfəri,
orada aparılan çəkilişlər, söylənən nitqlər bu ərazilərdə mənfur ermənilərin
yurdumuza qarşı törətdiyi vəhşilikləri, vandallıqları bir daha bütün dünyaya
nümayiş etdirib: "Çəkilən videomateriallar bir daha bütün dünyaya Azərbaycan
xalqının azğın, qana susamış düşmənlə üz-üzə olduğunu təsdiq etdi. Ali Baş
Komandanımız işğalçı, faşist ideologiyasından bəhrələnən ermənilərin bu
vəhşiliklərin, Kəlbəcərdə törətdikləri yanğınların cavabının veriləcəyini dedi.
Bununla yanaşı, bütün dünya bir daha Azərbaycan xalqının humanizminin şahidi
oldu. İllər boyu erməni vandallarının xalqımıza qarşı törətdikləri vəhşiliklərə
baxmayaraq, biz yenə öz humanist mövqeyimizdən əl çəkmədik. Kəlbəcəri
boşaltmaları üçün azğın düşmənə daha 10 gün möhlət verilməsi də
insanpərvərliyimizin, humanizminin təsdiqidir. Hər zaman olduğu kimi, erməni
vandalları çirkin niyyətlərindən əl çəkmədilər, Kəlbəcərdə meşələr yandırıldı,
ağaclar kəsilib Ermənistana daşındı, evlərə od vuruldu. Erməni vandalları kim
olduqlarını yenidən nümayiş etdirdilər. Bütün bunların fonunda Müzəffər
Sərkərdəmiz işğaldan azad edilən doğma torpaqlarımıza, Cəbrayıla, Füzuliyə
Qalibiyyət səfəri edərək, Füzuli-Şuşa avtomobil yolunun çəkilişinə göstəriş
verərək bu haqq nidasının rəsmiləşdirilməsinin xoş müjdəsini verdi, bir daha
qorxaq düşmənə bəyan etdi ki, Qarabağ Azərbaycandır!”
Rufik
İSMAYILOV