Vətənin, xalqın, dövlətin xilas günü - FOTOLAR
Müasir
Azərbaycanın hər bir uğurunun kökündə milli qurtuluşumuzdan başlanan müdrik
Heydər Əliyev siyasəti dayanır
Azərbaycan müstəqilliyini yenidən bərpa etdiyi ilk
illərdə ölkədə xaos, anarxiya hökm sürüb. Mövcud hakimiyyətinin təcrübəsizliyi,
dövlət idarəçiliyi sisteminin olmamağı səbəbindən idarəetmədə ciddi səhvlərə
yol verilib. Ermənistanın Azərbaycan ərazilərini işğal etdiyi həmin dönəmdə
ölkə daxilində vəzifə kürsüsü uğrunda mübarizə kəskin xarakter alıb. Bununla
yanaşı, ayrı-ayrı silahlı dəstələrin yol verdikləri başıpozuq fəaliyyət, ölkə
daxilində qardaş qırğını və vətəndaş müharibəsinə zəmin yaranması, bölgələrdə
separatçılıq və parçalanma meyllərinin baş qaldırması Azərbaycanı, bir dövlət
kimi varlığına son qoyulması ilə üzləşdirib. Belə bir gərgin və böhranlı
vəziyyətdə xalq ümidini böyük oğlu Heydər Əliyevə bağlayıb. 1992-ci ilin
oktyabrında bir qrup Azərbaycan ziyalısı ona müraciət edərək Yeni Azərbaycan
Partiyasının (YAP) yaradılmasını təklif ediblər. 1993-cü ilin 4 iyun tarixində
Gəncədə qardaş qanı axıdılandan sonra o dövrdəki hakimiyyət də Heydər Əliyevi
Bakıya dəvət etməyə məcbur olub. İyunun 9-da Bakıya gələn Heydər Əliyev ölkənin
xaos, vətəndaş qarşıdurması, dövlət müstəqilliyinin itirilməsi təhlükəsindən
xilas edilməsi istiqamətində tədbirlərə əl atıb, tarixi missiyasını həyata
keçirib. 1993-cü il iyunun 15-də ulu öndər Heydər Əliyev Milli Məclisin sədri
seçilib və bu gün Azərbaycan xalqının tarixinə Milli Qurtuluş Günü kimi düşüb.
Xalqın
səsinə səs verən lider
Milli
Məclisin deputatı, YAP Gəncə şəhər təşkilatının sədri Naqif Həmzəyev bu tarixi günün əhəmiyyətini "Kaspi” qəzetinə şərh
edərkən bildirib ki, ağır və mürəkkəb 1991-93-cü illərdə, müstəqilliyimizin
hələ kövrək olduğu dövrlərdə yenicə müstəqillik əldə etmiş Azərbaycanı
coğrafi-siyasi mövqeyinə görə bir çox dövlətlər öz təsir dairəsinə salmaq
istəyiblər. Millət vəkilinin sözlərinə görə, həmin illərdə ölkə daxilində
siyasi gərginlik səngimək bilməyib, vəziyyət gündən-günə mürəkkəbləşib:
"Gəncəbasar əraziləri SurətHüseynovun nəzarətində idi. Əlikram Hümbətov
Füzuli bölgəsindəki hərbi hissəni geri çəkərək cənub bölgəsinə aparmışdı.
Şimalda sadvalçılar fəallaşaraq, siyasi tələblər irəli sürürdülər. Ön cəbhə isə
siyasi çəkişmələr ucbatından ermənilərin üzünə açıq qalmışdı. Bütün bunlar,
eyni zamanda, ölkəni bu hala salan AXC-Müsavat iqtidarının səriştəsizliyi az
qala o illərdə müstəqilliyimizin əldən getməsinə və Azərbaycan dövlətçiliyinin
süqutuna gətirib çıxaracaqdı. Vəziyyətdən çıxış yolu arayan Azərbaycan xalqı
haqlı olaraq, nicatı yalnız Heydər Əliyevin siyasi hakimiyyətə qayıtmasında
görürdü. Xalqın səsinə səs verən ulu öndər Heydər Əliyevin Naxçıvandan Bakıya
gəlişi insanların qəlbində böyük inam yaratdı, dövlətçilik və müstəqillik
arzularını yenidən alovlandırdı. Azərbaycanı uçurumun astanasına gətirib
çıxaran AXC-Müsavat nümayəndələri də kömək üçün Heydər Əliyevə müraciətlər
edirdilər. Onlar da dəqiq bilirdilər ki, Azərbaycanı bu ağır vəziyyətdən yalnız
Heydər Əliyev dühası xilas edə bilər”.
Silahlı
dəstələrin Bakıya yürüşünün qarşısı alındı
Deputat vurğulayıb ki, dahi Heydər Əliyev
Azərbaycanı dünya xəritəsindən silinmək təhlükəsindən xilas edib, əldən getmək
üzrə olan müstəqilliyimizi gücləndirib, onu əbədi və dönməz edib, dövlət qurub
və inkişaf etdirib: "Bu gün inkişaf edən, regionun lider dövlətinə çevrilən
Azərbaycanın hər bir uğurunun kökündə milli qurtuluşumuzdan başlanan müdrik
Heydər Əliyev siyasəti dayanır. Məlum həqiqətdir ki, Gəncə,
hər dəfə xalqımızın çox çətin sınaqlara çəkildiyi bir məqamda azadlıq
mübarizəsinin beşiyi olub. Müsəlman Şərqində ilk Demokratik Cümhuriyyət olan,
"İstiqlal bəyannaməsi” ilə həyata vəsiqə alan, cəmi 23 ay yaşayan Azərbaycan
Xalq Cümhuriyyəti müəyyən dövrdə Gəncədə fəaliyyət göstərib və dövlətçilik tariximizdə
mühüm əhəmiyyət kəsb edib. 1993-cü ildə Azərbaycan dağılmaq və parçalanmaq
təhlükəsi ilə üzləşdiyi vaxtda xalqımızın, özünün böyük oğlu Heydər Əliyevə üz
tutması və onun Gəncəyə gəlməsi, ölkəyə rəhbərliyə buradakı vəziyyəti
öyrəndikdən sonra qərar verməsi də təsadüfi deyildi. Ulu öndər ölkədəki
hərc-mərcliyin, itaətsizliyin, Gəncədə başlanmış qardaş qırğınının, hərbi
xəyanətin, qanunsuz silahlı dəstələrin Bakıya yürüşünün qarşısını aldı”.
Xilaskarlıq
missiyası
N.Həmzəyev söyləyib ki, 1993-cü ilin 4 iyun
hadisələri ərəfəsində və ondan sonra respublikada hər hansı dövlət vəzifəsinin
məsuliyyətini öz üzərinə götürmək hər kəsdən böyük risk, qətiyyət və hünər
tələb edib: "Heydər Əliyev Naxçıvandan özü ilə heç nə gətirməmişdi. Nə ordusu
var idi, nə silahı. Ulu öndər bütün məsələlərdə görkəmli dövlət xadimi kimi
özünün siyasi və idarəçilik təcrübəsinə, xalqın ona olan dərin sevgisinə
arxalanırdı. Elə bu amal da Heydər Əliyevin 1993-cü il iyunun 15-də Azərbaycan
Ali Sovetinin Sədri seçilməsində əsas rol oynadı. Həmin gün parlamentin tarixi
iclasında Heydər Əliyev çıxış edərək, Ali Sovetin Sədri kimi Azərbaycan
xalqının tarixi nailiyyəti olan dövlət müstəqilliyini qorumağı,
möhkəmləndirməyi özünün əsas vəzifələrindən biri hesab etdiyini bildirdi.
Heydər Əliyevin 1993-cü il iyunun 15-də ölkənin ali qanunvericilik orqanına
Sədr seçilməsi, sözün əsl mənasında, siyasi qayıdış idi. Onun xilaskar
missiyası ilə gəlişi dövlətçilik tariximizin şanlı səhifəsinə daha bir
əlamətdar gün yazdı. 15 iyun tarixə Milli Qurtuluş Günü kimi daxil oldu.
Azərbaycan Respublikasının Milli Məclisi Heydər Əliyevin ölkə rəhbərliyinə
qayıdışı gününü 1997-ci il 27 iyun tarixli qərarı ilə rəsmi olaraq, Azərbaycan
xalqının Milli Qurtuluş Günü elan etdi”.
Hakimiyyət
böhranının aradan qaldırılması
Milli
Məclisin deputatı Şahin Seyidzadə qəzetimizə açıqlamasında bildirib ki, XX əsr dünya
xalqlarına çox görkəmli şəxsiyyətlər, müdrik və qətiyyətli rəhbərlər, son
dərəcədə bacarıqlı dövlət xadimləri bəxş edib. Onun sözlərinə görə, hər bir
xalqın milli azadlıq və istiqlaliyyət tarixində xilaskar rolunu oynayan dahi
insanlar var və bu gün biz qürur hissi ilə deyə bilərik ki, Azərbaycan
tarixində bu ad məhz Heydər Əliyevlə bağlıdır: "Azərbaycanın son yarım əsirlik
tarixinin elə bir mərhələsi yoxdur ki, orada bu fenomenal şəxsiyyətin izləri
olmasın. Heydər Əliyev hələ 1969-cu ildə birinci dəfə Sovet Azərbaycanında
hakimiyyətə gəldiyi ilk gündən respublikanın yüksələn xətli inkişafının
təməlini qoydu. Ulu öndərin müdrik rəhbərliyi və uzaqgörən siyasəti sayəsində
ölkənin ictimai-siyasi, iqtisadi və mədəni həyatının bütün istiqamətində böyük
uğurlar qazanaraq təkcə keçmiş SSRİ-də deyil, bütün dünyada tanınmağa başladı.
1991-ci ildə yenidən müstəqillik əldə etdikdən sonra müxtəlif sosial-iqtisadi,
siyasi problemlərlə üzləşən, vətəndaş qarşıdurmasının astanasında olan
Azərbaycan, hətta öz müstəqilliyini itirmək təhlükəsi ilə qarşılaşmışdı. Ölkə
idarəetməsinin bütün sahələrində hökm sürən xaos, hakimiyyət uğrunda mübarizə
1993-cü ildə artıq öz kulminasiya nöqtəsinə çatmışdı. Ölkənin bu taleyüklü
sınaq anında xalqın çağırışına səs verən, dövlətin gələcək taleyinə biganə qala
bilməyən və xalqı parçalanmaqdan xilas edən böyük dövlət xadimi Heydər Əliyev
1993-cü il iyun ayının 15-də xalqın təkidi ilə Naxçıvandan Bakıya dönərək
Respublikada yaranmış hakimiyyət böhranının aradan qaldırılması istiqamətində
fəaliyyətə başladı”.
Gələcəyə
hesablanan strateji inkişaf xətti
Millət vəkili qeyd edib ki, ölkə daxilində atılan
bu addımlarla yanaşı, ulu öndər Heydər Əliyevin məqsədyönlü və uzaqgörən xarici
siyasət strategiyası sayəsində Azərbaycan beynəlxalq hüququn tamhüquqlu
subyektinə və beynəlxalq münasibətlər sisteminin inamlı tərəfdaşına çevrilib:
"Ulu öndərimizin siyasi kursunun əsas istiqamətlərindən biri Ermənistanın
ölkəmizə və xalqımıza qarşı təcavüzünün qarşısının alınması, eləcə də
münaqişənin dinc yolla nizamlanması və ərazi bütövlüyümüzün bərpası idi.
Cəbhədə atəşkəsin əldə olunması Azərbaycanda milli ordu quruculuğu prosesini
sürətləndirməyə, ölkəmizin iqtisadi və hərbi potensialını gücləndirməyə imkan
verdi. Bütün bunlarla yanaşı, ümummilli liderin ölkəyə ikinci dəfə rəhbərlik
etməyə başlamasından sonra stabillik indeksi yarandı və bununla da Azərbaycan
tarixində yeni səhifənin açılmasının şahidi olduq. 15 İyun təkcə
dövlətçiliyimizin xilası deyildi, bu, həm də 44 günlük müharibədə ölkə rəhbəri,
Ali Baş Komandanın rəhbərliyi ilə qazanılan möhtəşəm qələbənin təməli idi.
Təbii ki, bu gün qazanılan uğurların əsasında ümummilli liderin müəyyənləşdirdiyi
və miras qoyduğu siyasi kurs və bu kursun Prezident İlham Əliyev tərəfindən
layiqincə davam etdirilməsi faktoru dayanır. Prezident İlham Əliyev ümummilli
lider Heydər Əliyevin Azərbaycan xalqının milli-mənəvi dəyərlərinin qorunub
saxlanılması və daha da inkişaf etdirilməsi yolunu uğurla davam etdirir. Keçən
hər bir gün bir daha təsdiq edir ki, böyük həyat yaşamış ümummilli lider Heydər
Əliyevin təməlini qoyduğu strateji inkişaf xəttinin ömrü çox uzaq gələcəyə
hesablanıb”.
Rufik
İSMAYILOV