Şuşanın təməlini qoyan nəslin varisinin həyat hekayəsi - MÜSAHİBƏ
Rəşid Cavanşir: "İndi o qədər bəxtiyaram ki, bundan
artığını istəməyə, bəlkə də, haqqım çatmaz”
"Kaspi” qəzetinin qonağı Cavanşirlər
nəslinin davamçısı, Azərbaycan elmində, neft sənayesində çoxsaylı xidmətləri
olan Rəşid Cavanşirdir. Rəşid bəy 1951-ci il iyul ayının 17-də Bakıda anadan
olub. 1973-cü ildə Azərbaycan Neft və Kimya İnstitutunun geoloji-kəşfiyyat
fakültəsini bitirib. Bundan sonra Azərbaycanda və ayrı-ayrı ölkələrdə müxtəlif
vəzifələri uğurla icra edib. O, həm də Azərbaycan EA-nın Dərin Neft və Qaz
Yataqları Problemləri İnstitutunda şöbə müdiri (1984-1997), elmi işlər üzrə
direktor müavini (1988-1995) vəzifələrində çalışıb. 1995-2009-cu illərdə bir
neçə nüfuzlu beynəlxalq neft şirkətlərində rəhbər vəzifələr tutub, 2009-cu ilin
sentyabr ayında BP-Azərbaycan şirkətinin prezidenti təyin olunub. HəmçininAzərbaycan Elmlər Akademiyasıvə Neft Akademiyasında
elmi-tədqiqat və müəllimlik fəaliyyəti ilə məşğul olub. Rəşid bəy dünyanın bir çox dövlətlərində çap
olunmuş çoxsaylı elmi-texniki işlərin müəllifidir, AMEA-nın müxbir üzvüdür.Rəşid bəy olduqca dərin bilikli, amma son
dərəcədə təvazökar insandır. Bir insan ömrünə sığmayacaq qədər elmi və ictimai
uğurları olan bu şəxsiyyət, müsahibə ərzində bəy nəslinə yaraşan kübarlıqla
danışır və özünün bütün əzəmətini özünəməxsus sadəliyi ilə ifadə edir. Rəşid
bəyin elm sahəsi ilə bağlı fəaliyyəti o qədər çoxdur ki, sanki bir ömür içində
bir neçə ömür yaşayıb və öz tərcümeyi-halına neçə-neçə insanın yaşantılarını
sığışdırıb. Rəşid bəyin bu günlərdə yetmiş yaşı tamam olur. Onu bu münasibətlə
səmimi-qəlbdən təbrik edir, sağlam, firavan, elmi yeniliklərlə dolu ömür
arzulayırıq:
– Rəşid müəllim, Şuşa şəhərinin əsasını qoyan bəy
nəslinin nümayəndəsi, məşhur Cavanşirlər soyunun davamçısı kimi 2020-ci ili – Zəfər
ilimizi necə xarakterizə edərdiniz?
– 2020-ci il
həm dünya, həm də xalqımız üçün çox ağır keçdi, amma mən bu ili həyatımdakı ən
xoşbəxt il sayıram. Səbəbi 44 günlük müharibə nəticəsində torpaqlarımızın azad
olunmasıdır. Açığı, inanmırdım ki, bu günü görmək mənə nəsib olacaq. İndi o
qədər bəxtiyaram ki, bundan artığını istəməyə, bəlkə də, haqqım çatmaz.
Bilirsiniz, ən yaxınlarım müharibə iştirakçısı olublar, hətta, atam İkinci
Dünya müharibəsindən sonra elə psixoloji zərbə almışdı ki, bir neçə il
lal-dinməz gəzib heç kimlə münasibət qurmamışdı. Deyilənə görə, həmin nəsildən,
yəni 1923-cü ildə anadan olmuş oğlanlardan 2-3 faizi sağ qaldı, qalanları isə
həlak oldular. Sözüm ondadır ki, dünya tarixində belə hallar nadirən olur:
Vətən müharibəsində qələbə qazanmaq, öz torpaqlarını geri qaytarmaq. Xalq
olaraq biz bu tarixi hadisənin şahidi olduq və bu haqlı qürur daima qəlbimizdə
yaşayacaq. Mütaliəmə əsasən deyə bilərəm ki, başımız çox bəlalar çəkib: millət
kimi, xalq kimi böyük dövlətlər, imperiyalar sayəsində şansımızın olmadığı və ya
çox az olduğu tarixi hadisələr yaşamışıq. Mən bu qələbədə Ali Baş Komandan
İlham Əliyevə, müzəffər ordumuza səmimi-qəlbdən təşəkkür etmək istəyirəm. Allah
şəhidlərimizə rəhmət eləsin, qazilərimizə şəfa versin! Belə qəhrəmanları
böyüdən anaların əllərindən öpürəm. Əlbəttə, qardaş Türkiyəyə də öz
minnətdarlığımızı bildirməliyik. Düşünürəm ki, hazırda daha da inkişaf etmək,
dünyaya öz sözümüzü daha yaxşı demək üçün əlimizdə çox böyük şanslarımız var.
– Londonda yaşayırsınız. Həmin tarixi günü, qələbə
anlarını necə xatırlayırsınız?
– Şuşanın
ermənilər tərəfindən işğal olunduğu gün anam xəstəxanada idi, mən də həyat
yoldaşımla baş çəkməyə getmişdim. Xəstəxanaya daxil olub anamı soruşdum, həkim
dedi ki, bir neçə dəqiqə sonra onu yanınıza gətirəcəyik. Biz oturub palatada
gözlədik, amma nədənsə, gəlib-gedən yox idi. Dözməyib bunun səbəbini soruşanda,
dedilər ki, anan televizorda Şuşanın ermənilər tərəfindən işğalı xəbərini
eşidəndən sonra iflic olub. Heç bir il keçmədi ki, anamın ürəyi dözmədi, vəfat
etdi. Bu hadisədən də yola çıxaraq demək mümkündür ki, 2020-ci ilin 8 Noyabrı
təkcə qarabağlılar üçün yox, bütün Azərbaycan xalqı üçün misli görünməmiş
xoşbəxtlik günü idi. Yerlibazlığı xoşlamıram, səhv etmirəmsə, Çingiz Hüseynov
yazır ki, Mustafa Kamal Atatürk Məmməd Əmin Rəsulzadəyə deyib ki, Azərbaycanı
bölgələrə ayırmaqdan imtina etməsəniz, sizə qələbə qazanmaq çətin olacaq. Mən
bu tendensiyanın olmamağını arzu edirəm və bəlkə də, bu birlik qələbəmiz
sayəsində mümkün olacaq.
– Bir az da mənsub olduğunuz Cavanşirlər nəsli
barədə danışaq...
– Biz Pənah
xanın nəslindənik. Pənah xanın iki oğlu olub: İbrahimxəlil xan və Mehralı xan.
Mən Bakı məktəbində, rus bölməsində oxumuşam, harasa gedəndə soyadımın Cavanşir
olduğunu deyəndə inanmır, "belə soyad olmaz” deyib, bəzən gülürdülər.
Cavanşirlər nəslinin əksəriyyəti ya güllələnib, ya olduqları yeri tərk ediblər,
ya da soyadlarını dəyişiblər. Keçmiş Cavanşirlərin bir qismi indi Pənahxanov,
Qalabəyov, İranda isə Pənahpur adlanır. Özüm də başa düşə bilmirəm ki, nə əcəb,
babam, atam SSRİ dövründə soyadımızdan imtina etməyiblər. Düzdür, Azərbaycan
müstəqillik qazanandan sonra Cavanşir soyadlı çoxları meydana çıxdılar, amma
reallıq budur ki, bizim sayımız çox azdır. Babam Abbas bəy Cavanşirin həyat
yoldaşı Qumru xanımın atası Cavad bəy Səfərəlibəyov Şuşanın ən parlaq illərində
– 1904-1907-ci illərdə oranın meri olub. Deməli, mən bir tərəfdən Cavanşir, o
biri tərəfdən Səfərəlibəyovlardanam. Ata tərəfdən babamın anası Bəhmən Mirzə
Qacarın qızı olub. Bəhmən Mirzənin 16 həyat yoldaşından biri də mənim böyük
nənəm idi. Bunların heç birini biz bilməmişik, çünki ailəmizdə belə söhbətlər
olmurdu. Kaş olardı, gedib həmin insanlardan – birinci şəxslərin dilindən
tariximizi öyrənərdik. Baxmayaraq ki, mən Bakıda anadan olmuşam, rusdilliyəm,
amma qarabağlı olmaq qanımda var. Yadımdadır ki, uşaq vaxtı Ağdama – ana
tərəfdən qohumlarımın yanına gedəndə, bəzən gündə iki dəfə Şuşaya qalxırdıq.
Ora bizim ata-babadan qalma evimiz idi. Orda elə günlərimiz olub ki, Şuşanın
əldən getməsi bizim üçün böyük ağrı, faciə oldu...
– Belə bir nəslin tarixi çox maraqlıdır. Bu xüsusda
başqa nələr söyləyə bilərsiniz?
– Deyilənə
görə, İranda da bu nəslin davamçıları yaşayır, amma bu barədə bir o qədər dəqiq
məlumatım yoxdur. Mehralı xanın nəslindən olan Əhməd bəy Cavanşir Şuşanın
Kəhrizli kəndində yaşayırdı, Sovet dövründə isə bu kənd Ağcabədi rayonunun
tabeliyinə keçdi. Maraqlananlar üçün deyə bilərəm ki, Qarabağ tarixi barədə üç
məşhur əsər yazılıb. Birincisini Pənah xanın vəziri Mirzə Camal Cavanşir,
ikincisini Mirzə Adıgözəl bəy, üçüncüsünü isə Əhməd bəy Cavanşir qələmə alıb.
Onun ən məşhur törəməsi Cəlil Məmmədquluzadənin həyat yoldaşı Həmidə xanım
Cavanşir olub. C.Məmmədquluzadənin mətbuatda təmsil olunmasının əsas maliyyə
yardımçısı da elə Həmidə xanım idi. Həmidə xanımın ən yaxın qohumlarından olan
əmisi oğlu Əliş bəyin 5 övladı olub, onların bəzilərini mən yaxşı tanıdığım
üçün əksər məlumatları bilavasitə özlərindən eşitmək şansım olub.
– C.Məmmədquluzadə və Həmidə xanımla bağlı
bildiklərinizi bizimlə də bölüşsəniz, xoş olar...
– C.Məmmədquluzadə
Həmidə xanımın əmisi qızı Qəmər xanıma birbaşa kömək edib, daha sonra
Naxçıvanda öz bacısı oğlu ilə evləndirib. Qəmər xanımın böyük oğlu Məmməd
Vəzirəliyev bizim ailə üçün ən əziz bir şəxs idi, o, məşhur uşaq cərrahı olub.
Maraqlananlar Bayram Bayramovun "Karvan yolu” kitabını oxuya bilərlər. Həmidə
xanımın əmisi oğlunun ailəsindən Allahyar Cavanşir çox məşhur ovçu olub, hətta
Səməd Vurğunla ova gedirmiş. S.Vurğunun "Mən tələsmirəm” şeirindəki "ovçu dost”
obrazı Allahyarın özüdür. Allahyarın bacısı oğlu İsa Məmmədxanov xalq
tərəfindən çox tanınmasa da, yaxşı heykəltəraşlardan olub. Bildiyiniz kimi,
Azərbaycanda bu sahənin banisi Fuad Əbdürrəhmanovdur. Onun son işini – İbn
Sinanın heykəlini İsa Məmmədxanov tamamlayıb və hazırda həmin heykəl
Özbəkistandadır. Cavanşir nəslindən çox məşhur şəxsin adını çəkmək olar,
məsələn İstanbulda ermənilər tərəfindən güllənən Azərbaycan Xalq
Cümhuriyyətinin Daxili işlər naziri Behbud xan Cavanşir. Çox maraqlıdır ki,
ingilis hərbi məhkəməsi qatil Torlakyanı sərbəst buraxıb. Bu nəslin
davamçılarından Xan Şuşinskini də misal göstərmək olar. Əsl adı isə İsfəndiyar
Cavanşir olub. Dediyim kimi, Sovet dövründə onların çoxları soyadını
dəyişmişdi.
– Həmin tarixi şəraitdə siz də yaşasaydınız,
soyadınızdan imtina edərdinizmi?
– Heç vaxt.
Sovet dövrünün xofu valideynlərimin qəlbində elə möhkəm kök salmışdı ki, biz öz
nəslimiz haqqında belə çox şeyləri öyrənə bilməmişik. Bayaq dediyim kimi, kaş
onlardan nəslimin tarixi barədə daha çox məlumat əldə edəydim. Təəssüf ki, insan
yaşa dolduqca belə məsələlərə daha çox maraq göstərir.
– Valideynlərinizdən konkret olaraq nələri soruşmaq
istəyərdiniz?
– Çox şeyi.
Necə tanış oldular, tanış olanda hansı nəsildən olduqlarını bilirdilərmi...
Özlüyümdə indi də bir şeyi aydınlaşdıra bilmirəm: evdən bir foto tapmışdıq,
təxminən 1905-1906-cı illərə aid həmin fotoda iki nənəm də var idi. Belə çıxır
ki, anamla atam yaxın qohum olublar, amma əslində, aralarında qan əlaqəsi
yoxdur. Bax, bunu aydınlaşdırmaq istərdim. Belə bir soyadı necə saxladıqları da mənim üçün sirli
məqamlardandır. Özüm bəzi məlumatlar toplaya bilmişəm. Qızım mənə Pənahpurun
bir kitabını bağışlayıb ki, orda da bəzi məlumatlar əks olunub, amma, təbii ki,
bunlar bəs etmir.
– Bu nəsildən, bildiyim qədəri ilə, xeyli ədib də
çıxıb...
– Həqiqətən də,
Şuşa Azərbaycan mədəniyyətinin gözüdür. İncəsənətin müxtəlif sahələri niyə məhz
Şuşada bu miqyasda inkişaf edib, bax, bu çox maraqlıdır. Yaşadıqları yerin
havasından, suyundandırmı? İnsan zəkası bu sirri izah etməkdə acizdir. Suala
qayıtsam, Şuşa torpağının yetirməsi olan Üzeyir Hacıbəyovun adını çəkə bilərəm
ki, mənim üçün onun əvəzi yoxdur. Şuşa mədəniyyətinin ən gözəl incisi məhz
Hacıbəyovdur. Bir müddət konservatoriyadan Ü.Hacıbəyovun adını götürmüşdülər,
açığı, səbəbini bilmirəm, amma sonradan
İlham Əliyev bu adı geri qaytaranda mənim üçün toy-bayram oldu. Çox düzgün və
yerində verilmiş qərar idi. Çünki konservatoriyanı bu adsız, bu həqiqətsiz
təsəvvür edə bilmirəm. Mən həm yazıçı, həm də dövlət xadimi olan Yusif Vəzir
Çəmənzəminlini də bu siyahıda qeyd edə bilərəm. "Azerbaijan İnternational”
jurnalında Azərbaycanın ən məşhur əsərlərindən biri olan "Əli və Nino” əsərinin
müəllifi barədə maraqlı bir ədəbi mübahisə yaranmışdı. Betti Bleyer iddia
edirdi ki, Azərbaycandan çıxanda 12 yaşı olan Qurban Səid bu əsəri yaza
bilməzdi. Bleyer 300 səhifəlik bir elmi işlə əsərin müəllifinin, əslində
Y.Çəmənzəminli olduğunu sübut edir. Bleyer işini bitirəndən sonra bizə oxumaq
üçün vermişdi, o istəyirdi ki, əsəri Azərbaycan dilində də çap etdirsin. Biz - BP,
bu işdə ona dəstək olduq və əsər iki dildə nəşr olundu. Daha sonra həmin nəşrin
AYB-də təqdimatı keçirildi. Anar özü də açıq mövqe bildirdi ki, bu əsərin
Qurban Səidə aid olduğuna inanmır. Amma nədənsə bu iş bir o qədər də reaksiya
doğurmadı. Bundan başqa Əbdürrəhim bəy Haqverdiyev, Seyid Şuşinski, Əfrasiyab
Bədəlbəyli, Sadıqcan, Cabbar Qaryağdıoğlu, Xurşudbanu Natəvan və digərlərinin
də adını çəkmək olar.
– Pənahəli xan, Mehralı xan, İbrahimxəlil xan və
Mehdiqulu xan Qarabağa 80 ilə yaxın rəhbərlik ediblər. Belə bir liderlik
qabiliyyəti sizin ailənizə də miras qalıbmı?
– Mənim də
liderlik fəaliyyətlərim olub, düzdür, bəlkə də, bunun genetik irslə hər hansı
dərəcədə əlaqəsi var, amma mən birbaşa səbəb kimi bunu göstərə bilmirəm.
– Elmi fəaliyyətinizin özünəməxsusluğu barədə
danışaq...
– 1973-cü ildə
indiki Azərbaycan Neft və Sənaye Universitetinin Geofizika fakültəsini bitirmişəm. Əslində,
istəyim Moskvanın ən qabaqcıl universitetlərindən birində təhsil almaq idi,
məktəbi qızıl medalla bitirmişdim, buna potensialım da çatırdı. Fikrimdə iki
yer var idi, ya Moskva Dövlət Universitetinin Mexanika-riyaziyyat fakültəsi, ya
da Fizika Texniki Universiteti. Səylə hazırlaşır və güman edirdim ki, qəbul
olunmağa gücüm çatar. Təəssüf ki, alınmadı. Açığı, anam oğlunun Moskvaya
getməyini istəmirdi. Məni aldatmaq çətin idi, ona görə də, belə desək, elə
əməliyyat keçirdi ki, gedə bilmədim. Bir gün evə gəldim ki, evdə bir nəfər kişi
var, salamlaşdım, sən demə, bu şəxs
SSRİ-də Qaz Nazirliyini ilk dəfə yaradan Sabit Orucov imiş. Çox məşhur insan
idi, valideynlərimlə də məktublaşırdılar. Başladıq söhbət etməyə, məndən
gələcək planlarımı soruşdu, iki seçimim barədə danışanda, dedi ki, mən
neftçiyəm, amma sənə başqa bir məsləhətim var. Məsləhəti də bu idi ki,
geofizika sahəsində təhsil alım. Düzü, əmin deyiləm, amma hələ də düşünürəm ki,
bu, anamın məni yolumdan döndərmək üçün planı idi. Nəhayət, razılıq verdim və
Moskvaya gedəsi olmadım. Burda oxumaq mənim üçün çox asan idi, hətta, Lenin
təqaüdü də alırdım. Sovet dövründə yaxşı oxuyanları komsomol sıralarına rəhbər
işlərə çəkirdilər, mənə təkliflər olsa da, özümə söz vermişdim ki, kənar işlərə
yayınmayacaq, universiteti bitirən kimi elmi fəaliyyətlə məşğul olacağam. Buna
baxmayaraq, 2 il universitetin Həmkarlar Komitəsinin sədri olmuşam. Bu işin
gələcəyi var idi, çünki komitədə məşhurlaşanların çoxunun gələcəkdə yaxşı
həyatı oldu. Bu yolla irəliləyə bilərdim, amma etmədim. Bir-iki dəfə açıqcasına
Azərbaycanın ən yaxşı tələbəsi olduğumu demişdilər. 1971-ci ildə Moskvada
tələbələr qurultayı keçirilmişdi. Məni də həmin vaxt komitədən çağırıb dedilər
ki, ora 50 nəfər tələbə göndərəcəyik, amma səni indidən yollamalıyıq, çünki
Kremldə çıxış edəcəksən. "Mən hara, çıxış hara” dedim, amma sonra razı saldılar
ki, özümüz çıxış mətnini təqdim edəcəyik, sən, sadəcə oxuyacaqsan. Uzun sözün
qısası, bilet-filan təşkil olundu, ixtiyarıma maşın da verildi. Bütün bunlar
baş verəndə cəmi 20 yaşım var idi. Moskvada çıxışımı istədilər, təqdim etdim,
"bunu siz yazıbsınız” soruşdular, həqiqəti söylədim. Vərəqi bir kənara
qoymağımı və tələbəlik illərim barədə maraqlı nələrsə yazmağımı istədilər. Bir
neçə gün ərzində, təxmini, 50 səhifə yazdım. Sonda mənə yeni bir çıxış
verdilər. Yeni çıxışda öz yazdıqlarımdan yalnız bir hissəsini saxlamışdılar. O
da yaxın dostumun Vyetnamdan olan dostları barədə idi. Səhəri gün bütün
qəzetlər qurultaydan, Brejnevin çıxışından yazdılar, mənim də çıxışımdan məhz
bu hissəyə yer vermişdilər. Mən də qorxurdum ki, birdən yalanımın üstü açılar.
Çünki çıxışda, guya dostumun vyetnamlılara kömək etdiyini yazmışdım, əslində
isə tənbəlin biri olan dostuma vyetnamlılar öz kömək əlini uzatmışdılar.
Məsələnin əslini bilən yoldaşlarım bu hissəyə yaman gülürdülər. Hətta dostum o
qədər tənbəl idi ki, vyetnamlıları evə dəvət edib qonaqlıq verirdi ki, ona
kömək etsinlər. Nə yaxşı, yalanımın üstü açılmadı. Deməyim odur ki, bu sahəyə
yönəlmədim və qərar verdim ki, yeni yolla addımlamaq istəyirəm. Çünki
bəzilərində belə adət var idi ki, çox sadə elmi iş yazırdılar. Rəhmətlik
akademiklərdən biri ilə görüşəndə mövzumu bəyənməmişdi demişdi ki, sənə rahat
bir iş verərik, 2 ilə yazıb olarsan elmlər namizədi. Nəhayət, Moskvaya gedib
çox məşhur bir alimlə görüşdüm və onunla elmi işə başladıq. Açığı, elmi
rəhbərimin mənə dediyi bəzi şeylərin əksinə gedir, "düz danışmırsınız”
deyirdim. Çünki onun müddəaları Azərbaycan üçün uyğun gəlmirdi. 1975-1976-cı
illərdə Moskvada elmi işi müdafiə etmək sisteminə son qoymağın lazım olması
barədə bir məqalə çap olunmuşdu. Müəllif iddia edirdi ki, müdafiə lazımsızdır,
çünki opponentlər ürəyi istəyəni yazır, hamı müdafiədən sonrakı "məclis”i
gözləyir. Bu fikrə qoşulanların sayı çox oldu və hökumət qərar verdi ki, bütün
müdafiələri saxlamaq və elmi şuraları bağlamaq lazımdır. Belə bir hadisə də
mənim taleyimə düşdü. 1977-ci ildə dissertasiyamı başa çatdırsam da, müdafiə
edəcəyim yer yox idi. 1978-ci ildən etibarən tək-tək, ancaq bir ixtisasdan, bir
yer üçün elmi şuralar təşkil olunmağa başlanıldı. Mənim ixtisasımdan cəmi bir
dəfə şura təşkil olundu və üzvlər də SSRİ-nin ən qabaqcıl ziyalılarından
seçilmişdi. Müdafiədən sonra Bakıya gəldim, institutda elmi katib kimi
çalışdım. Daha sonra 1988-də doktorluq işimi müdafiə etdim. Yenidənqurma
dövründə qərar verildi ki, rəhbərlər seçki yolu ilə seçilməlidir. Həqiqətən də,
şəffaf bir seçki idi, saxtalaşdırma mümkün olmasın deyə hər cür vasitəyə əl
atılmışdı. Bu yolla elmi işlər üzrə direktor müavini seçildim və 1988-1995-ci
illərdə eyni vəzifəni icra etdim.
– Elmi yenilikləriniz nədən ibarət idi?
– O dövrdə
geologiya əsasən emprik sahə idi, mən də çalışırdım ki, hər şeyi mexaniki,
kimyəvi və ya riyazi modelə salım. Deyə bilmərəm ki, məşhurlaşmışam, amma
yeniliklərim bununla bağlı idi. Daha sonra ingilis dili öyrəndim və xaricə
getmək şansım yarandı...
– SSRİ vaxtında xarici dilləri öyrənməyinizdən söhbət
açaq...
– Düzü, o
vaxtlar məktəblərdə xarici dil yaxşı tədris olunmurdu, ona görə də o vaxtın gəncləri
ingilis dilində yaxşı danışa bilmirdi. Müdafiəmdən sonra qarşıma məqsəd qoydum
ki, xaricə getməliyəm. Əsas istəyim isə Amerikaya yola düşmək idi.
Müraciətimdən sonra akademiyadan xəbər gəldi ki, bu, mümkün deyil, çünki
Amerika ilə diplomatik münasibətlər bir o qədər də ürəkaçan deyildi. Başqa seçim
kimi İtaliyanı təklif etdilər, razılaşdım. Səfərdən qabaq ingilis dili müəllimi
ilə hazırlaşmağa başladım. İtaliyada ingilis dili vasitəsi ilə ünsiyyət rahat
idi, çünki elə özləri də sadə səviyyədə ünsiyyət saxlayırdılar. Oradan
qayıdanda artıq italyan dilini də mənimsəmişdim. Orda bəxtim çox gətirdi, düz
neft şirkətinin, belə desək, ürəyinə düşdüm. AGİP-də özümü hər cəhətdən təkmilləşdirdim.
1984-cü ildə Moskvadan zəng gəldi ki, Amerikaya getməklə bağlı müraciətlərinizə
baxılıb, imkan yaratsaq getmək istəyərsinizmi? İki dövlət arasında münasibətlər
o qədər gərgin idi ki, hətta Moskva ilə Vaşinqton arasında təyyarə reysləri də
bağlanmışdı. Belə bir şəraitdə Amerikaya gedə biləcəyimi təsəvvürümə
gətirmirdim. Bu minvalla, Moskvaya qayıtdım, yenidən forma doldurub gözləməyə
başladım. Nəhayət, noyabrın sonunda zəng gəldi ki, hazırlaşın, Amerikaya
gedirsiniz. Evdə, hava limanında bütün sevdiklərim çox narahat idilər, anam
isə ağlayırdı; onlar belə bir şəraitdə
Amerikaya səfərimdən narazıydılar. Bütün bunlara baxmayaraq, getdim. Vizama
əlavə olaraq bir məktub vurmuşdular və onu açmağım qadağan idi, yalnız aidiyyəti
quruma təhvil verməli idim. Amerika səfərim barədə ayrıca bir kitab yazmaq
olar. Çünki çox maraqlı, gülməli, qeyri-adi hadisələrlə yadda qaldı. Onu deyə
bilərəm ki, təyyarədən düşəndə cibimdə cəmi 7 dollarım var idi. Verdikləri 100
dolların 93 dollarını bilet üçün sərf etmişdim. Hava limanında məni
qarşıladılar, sonra otelə yerləşdim. Səhəri gün akademiyaya çağırıb bir aylıq
xərcimi və biletimi verdilər ki, bəs filan yerə getməlisən. Düzü, heç
tanımırdım ki, ora haradır, necə gedəcəyəm. Razı olmadım ki, yox, gedə
bilmərəm, mən mütləq gedib səfirlikdə qeydiyyatdan keçməliyəm. Razı olmadılar.
Uzun sözün qısası, göndərdikləri yerə – bir professorun yanına getdim. Amma
Milad və Yeni il vaxtına təsadüf etdiyi üçün universitetdə bir nəfər də yox
idi. Professor dedi ki, səni qəsdən bu vaxtı göndəriblər, iki həftən batdı,
belə bir vaxtda heç nə edə bilməzsən. Heç olmaya kitabxanadan istifadə edə
biləcəyimlə bağlı soruşanda cibindən bir topa açar çıxarıb verdi ki, hansı
kitabxanaya istəyirsən, daxil ol, hansı kitabı istəyirsənsə, oxu. Kitabxananın bütün
açarlarını mənə verib getdi. Bu 2 həftədə kitabxanada çox səmərəli vaxt
keçirdim. Daha sonra Stanford universitetinə yollandım. Pulum da o qədər az idi
ki, heç oteldə normal bir otaq da tuta bilmədim. Bütün bu məhrumiyyətlərə
baxmayaraq, bu səfər elmi həyatımda yeni qapılar açdı.
– BP şirkətinə yolunuz necə açıldı?
– Bunun çox
maraqlı tarixçəsi var. 1985-ci ildə Stanford Universitetində elmi işim barədə
məruzə edərkən bir nəfər yaxınlaşdı, elmi əsərlərimdən xəbərdar idi və məni öz
təşkilatına dəvət etdi. Sovet vətəndaşı olduğum üçün bir az tərəddüd içində
idim, amma "bunlar hamısı boş şeydir” deyib ürək-dirək verdi mənə. Elmi mövzum
onun üçün maraqlı idi. Həmin insan dünya şöhrətli hidroloq-alim Con Britxoft idi. Hər gün velosipedlə
onun yanına gedib-gəlirdim. Sona yaxın birlikdə bir məqalə yazdıq, dünya
şöhrətli bir jurnala göndərdik və 1988-ci ildə həmin məqalə nəşr olundu. Bu
məqalə dünya elmində klassik iş kimi tanındı və xarici neft şirkətləri Bakıya
gəlməmişdən qabaq Xəzərin neft geologiyasını bu məqalədən öyrənirdilər. Daha sonra çıxış üçün Stenforddan Los-Ancelesə yollandım və
orada da məşhur bir çinli alimlə tanış oldum. Teh Fu Yen məni "Energy Sources”
jurnalının redaksiya heyətinə dəvət etdi və regional redaktor təyin olundum.
Sovet dövründə bu, adi bir hadisə deyildi. Orda ünvanımı soruşanda SSRİ yox,
Bakı yazdım. Azərbaycan alimlərinin məqalələrinin də bu jurnalda çap olunmasına
yardım etdim, həmin məqalələrə rəy də yazırdım. 1988-ci ildə Hollandiya
nəşriyyatlarından biri məni "Journal Petroleum Science and Engineering”
jurnalının redaksiya heyətinə dəvət etdi. Bir neçə ildən sonra xəbər
göndərdilər ki, ayrıca bir buraxılışın redaktoru kimi məqalələr toplayın və
sizin adınızla nəşr edək. Demək istəyirəm ki, elmdə işlərim yaxşı gedirdi.
Azərbaycan müstəqillik əldə edəndən sonra xarici şirkətlər Azərbaycana daxil
olmağa başladılar. Fəaliyyətim və dil biliyim sayəsində xarici nümayəndələrlə
görüşməkdən çəkinmir və elmi əməkdaşlıq təklifləri irəli sürürdüm. Və belə də
oldu. Mən Azərbaycanda beynəlxalq şirkətlərlə elm sahəsində ilk dəfə danışıqlar
aparıb müqavilələr imzalayan şəxs olmuşam. İlk belə müqavilə Kanada şirkətləri
ilə oldu. Kanadaya gedib çox maraqlı əməliyyatlara şahidlik etmişəm. Biz ora
Azərbaycandan bir ton neft qumu göndərmişdik. Belə şey sovet dövründə mümkünsüz
idi. Bu, sanki palçıq idi, həm də sizə deyim ki, çox ucuz idi. Nə isə, gəldik gömrüyə,
hamı şokda idi. Hamı soruşurdu ki, bu nədir Kanadaya göndərirsiniz. Daha sonra
Amerika neft şirkətləri də yavaş-yavaş Azərbaycana ayaq açmağa başladı. Onlar
bizdən 3-4 nəfər istədilər ki, gəlib Amerika təcrübəsi ilə tanış olsun. Amma
artıq Amerika təcrübəsi olan biri kimi bilirdim ki, oradakı qiymətlər, həyat
şəraiti necədir. Ona görə də, bu əməliyyata nə qədər büdcə ayırdıqlarını
soruşdum. Büdcəni mənə göndərdilər, çox lüks şərtlər var idi. Mən də təklif
etdim ki, belə bir şey lazım deyil, gəlin
hərəsində 4 azərbaycanlı alim olan 4 qrup təşkil edək, 2 ay müddətində
Amerikaya gəlsinlər və ortada real bir iş olsun. Razılaşdılar və 1992-ci ilin
yazında birinci qrup yola düşdü. Bu, həmin dövr üçün böyük xoşbəxtlik idi. İlk
dəfə gedəndə işçilər naşı idilər, bilmirdilər ki, nəyi necə etmək lazımdır.
Belə-belə, miqyası artırdıq, başqa ölkələrə də səfərlər təşkil etdik. Daha
sonra Fransaya elmi konfransa getdim, ondan sonra "Amoco” mənə iş təklifi etdi.
Fikirləşdiyimi dedim, çünki burda da öz işim, aspirantlarım var idi, onları
yarı yolda qoya bilməzdim. Onlar da bir neçə il akademiya ilə əlaqəmi kəsmədən
davam edə biləcəyimi söylədilər. Çox çətin seçim idi. Çünki belə işlərə imza
atmaq üçün insanda bir çox faktor birləşməli idi: dil bilgisi, ixtisas
uyğunluğu, iqtisadi sistemi anlamaq. Bütün bunları özlərində birləşdirən
şəxslərin sayı çox az idi. Bir sözlə, bu qədər şəraiti geridə qoyub xaricdə
yeni səhifə açmaq çox riskli məsələ idi. Amma bu addımı atdım, çünki üç əsas
səbəbim var idi. Birincisi, Azərbaycan müstəqillik qazandıqdan sonra SSRİ
Elmlər Akademiyası dağıldı və aydın oldu ki, fundamental elm istədiyim qədər
inkişaf etməyəcək. Çünki bunun üçün imkanlar məhdud idi. İkincisi, mənə tam
aydın oldu ki, xarici şirkətlərin Azərbaycana gəlməyi, investisiya yatırmağı vacibdir.
Bax, gələcək bunu tələb edir. Üçüncüsü isə o zaman "Əsrin müqaviləsi” imzalanandan
sonra Azərbaycan Beynəlxalq Əməliyyat
şirkəti təşkil olunanda azərbaycanlıları işə götürməyə başladılar. İş də nə
iş... Qızlar katibə, oğlanlar isə təhlükəsizlik sahəsinə. Çünki hələ hazır
kadrlar yox idi, xaricdən işçilər gəlirdi. Mən isə istəyirdim ki, həmvətənlərim
başqa sahələrdə də çalışsınlar. Getmək fikrimi akademiyaya dedikdə Midhət
Abbasov çox narahat oldu, mənim kimi adamı itirmək istəmirdi. Amma çox yaxşı insan
olduğu üçün getməyimə razılıq verdi. Azad Mirzəcanzadəyə fikrimi bildirəndə isə
reaksiya bir az fərqli oldu. Çox əsəbiləşdi və dedi ki, mən ölənə qədər sən Ali
Attestasiya Komissiyasından çıxmayacaqsan. Düzdür, bir neçə il sonra çətinliklə
də olsa, razılıq verdi. Həm məni itirmək istəmirdi, həm də "bu nədir, gedib
düşmən tərəfdə işləyəcəksən?!” deyirdi. Dedim, düşmənçilik odur ki, Azərbaycanda
rüşvətlə işləyəsən. Mən heç vaxt icazə vermərəm ki, hər hansı hərəkətim
Vətənimə qarşı olsun. Xaricdə işlədiyim 20 il müddətində bu ideyanı əlimdə
bayraq tutdum. Uzun sözün qısası, 1995-ci ilin dekabrında "Amoco” şirkətinə
daxil oldum. Bir həftə keçməmiş Hyustona bir həftəlik ezamiyyətə göndərildim,
orada texniki məruzələrim oldu. Bir il keçməmiş məni Hyustona bir illik
ezamiyyətə göndərdilər, orda tamamilə əlaqəm olmayan bir sahədə çalışdım. Daha
sonra xəbər gəldi və 1998-ci ilin fevral ayında Bakıya qayıtdım. Bakıda
"Amoco”nun Xəzərdə kəşfiyyat üzrə direktoru vəzifəsini icra edirdim. 1998-ci
ilin iyul ayında azərbaycanlı R.Cavanşir amerikalılar tərəfindən "İnam”
əməliyyat şirkətinə prezident təyin olunur. Nəzərə almaq olar ki, "Əsrin
müqaviləsi” 1994-cü ildə imzalanıb və 3-4 il keçməmiş Azərbaycan mütəxəssisi o
cür nəhəng bir vəzifəyə təsdiq olundu. Mənə elə gəlirdi ki, bu qədər böyük
vəzifələri tutduğuma görə, məni Bakıda xarici vətəndaş hesab edirdilər,
ağıllarına belə gəlmirdi ki, azərbaycanlıyam. Bir ay keçməmiş işdə olduğum vaxt
elektron məktub gəldi ki, "Amoco” və BP birləşir. Daha sonra belə qərar verildi
ki, operatorluğu bir şirkətə versinlər və o vaxtdan BP bütün layihələrin
operatoru oldu. Düzdür, bunun mənə təsiri olmadı, amma xaricilər əl-ayağa
düşdü, çünki iki şirkət birləşdiyi üçün böyük miqyaslı ixtisarlar baş
verəcəkdi. Hətta prezidentlərdən belə işdən uzaqlaşdırılanlar oldu. Naməlum
vəziyyət idi, hamı oturub nə olacağını gözləyirdi. Bu vəziyyətdə mənə "İnam”, "Şahdəniz”,
"Araz-Alov-Şərq” şirkətlərinin prezidenti vəzifəsini təklif etdilər. 1999-cu
ilin yanvarın 1-dən vəzifənin icrasına başladım. Ən uğurlu fəaliyyətim isə "Şahdəniz”lə
bağlı oldu – o nəhəng qaz yatağı mənim rəhbər olduğum dönəmdə aşkar olundu. Bu
layihənin uğurlu olması o zaman Heydər Əliyevi də çox sevindirmişdi. Biz
quyunun kondensatını da H.Əliyevə xatirə kimi bağışladıq. "Şahdəniz”lə bağlı
ilk məruzəni isə Vaşinqtonda etmişəm. Azərbaycanın ilk dəfə dünya bazarına
çıxması məhz "Şahdəniz”lə mümkün oldu. Mütləq qeyd etməliyəm ki, bu işlərdə
Valeh Ələsgərovun da böyük rolu olub.
– Rəşid müəllim, neftin gələcəyini necə görürsünüz?
Dünyada hibrid maşınlar çoxalır, elektrik stansiyaları azalır... Belə bir
vəziyyətdə Azərbaycan neft sahəsində hansı strategiya ilə irəliləməlidir?
– Çox yaxşı
sualdır. Artıq Qərbdə böyük neft şirkətlərinə "neftdən əl çəkin, əvvəl qaza,
daha sonra təmiz sistemə keçin” kimi təzyiqlər var. Amma bu o demək deyil ki,
neftə ehtiyac birdən-birə azalacaq. Düşünürəm ki, neftə tələbat nəinki
azalacaq, əskinə, çoxalacaq. Qərb şirkətlərinin neft istehsalını azaltmağı
milli neft şirkətlərinin qazanması deməkdir. Neftin gələcəyi ilə bağlı bir o
qədər narahatlığım yoxdur. Düşünürəm ki, Azərbaycanın gəlir mənbəyinin neftdən
qaza keçməsinə hələ çox uzun müddət lazımdır. Amma ikisinin paralel olması çox
yaxşı haldır. Bilirsiniz, "mütəxəssislər” neftin gələcəyi barədə çox proqnoz
verirlər, amma Qarabağ qələbəsindən sonra mənim fikirlərim bir nöqtədə
cəmləşdi: Azərbaycanın neft strategiyası tamamilə düzgün idi! Bu strategiya ilə
biz hələ çox qələbələr qazanacağıq. Düzdür, neftin istehsalı tədricən azala
bilər, amma qaz perspektivimiz çox böyükdür. Müqaviləsini iki azərbaycanlının –
Rövnəq Abdullayev və mənim imzaladığım "Şəfəq-Asiman” layihəsinin gələcək
perspektivinə hədsiz güvənirəm. Xəzərin digər yanından qaz gətirilməsi ilə
bağlı da imkanlarımız var.
– Cənab Prezident İlham Əliyev tərəfindən "Şöhrət”
ordeni ilə mükafatlandırılıbsınız. Bu görüşü necə xatırlayırsınız?
– Bu, mənim
üçün gözlənilməz idi. Adətən, xarici şirkət rəhbərləri "Dostluq” ordeni ilə
təltif olunur. Yəqin ki, azərbaycanlı olmağımı nəzərə alıb bu ordeni təqdim
etdilər. O görüşdə mənə elə fəxarət dolu sözlər deyildi ki, heç vaxt yadımdan
çıxmaz. Mən görüşə gedəndə heç nədən xəbərim yox idi, içəri girdim ki, hər
tərəfdə jurnalistlər var. Utandığımdan nə edəcəyimi bilmirdim. Həmin görüşün
bizim işlərimizin gələcəyində müsbət təsiri oldu. Bu ordeni almağıma görə fəxr
edir və prezident İlham Əliyevə bir daha öz təşəkkürümü bildirirəm.
– Rəşid müəllim, 70 yaşınız tamam olur. Bu yaşın
pəncərəsindən baxanda, sizcə, Rəşid Cavanşir kim ola bilərdi, kim oldu? 70 ili
ürəyinizcə yaşaya bildinizmi?
– Düzü,
qazandığım uğurlar Sovet dövründə heç birimizin ağlına belə gəlməzdi. Müxtəlif
sahələrdəki bilgi və təcrübəm mənə kömək etdi, amma həmçinin şəxsi
keyfiyyətlərim də bu yolda yardımçım oldu. Mənim əsas sınağım Şimal dənizinin
cənub hissəsindəki 3 illik fəaliyyətim olub. Maraqlıdır ki, bütün məşhur BP
prezidentlərinin yolu burdan keçib. Bu, sanki əsas sınaq, tramplin idi. Dənizə
gedib fəhlələrlə birgə işləmək çox məşəqqətli idi. Təcrübə və bilikdən əlavə bu
yoldakı prinsiplərim də mənə kömək oldu. Birinci prinsip ondan ibarət idi ki,
mən insani saflığa, təmizliyə həmişə əhəmiyyət vermişəm. Əsasən də, rəhbər işdə
çalışanlara. Ən yaxşı mütəxəssisin daxili keyfiyyətlərində belə nə isə əskiklik
görsə idim, o adamla yola davam etməzdim. İkincisi, ətrafımda məndən
ağıllıların olmasından qorxmurdum. Ətrafıma elə insanlar toplamışam ki, məndən
də bilgili olsunlar. Mənim yetirmələrim indi dünyanın hər yerindədirlər. Çünki
daim gənclərə bütün bilgimi, təcrübəmi ötürməyə çalışmışam. Yetirmələrim
hazırda BP-nin Qərbi Afrika, İraq
hissəsinin prezidentidirlər. Mənə sual verirlər ki, bu qədər sahədə necə
çalışa bilibsən? Cavabım bu prinsiplərimdir: ətrafına yaltaqlıqdan, rüşvətdən
uzaq, təmiz, bilgili insanlar yığmaqla. Ən vacibi isə 24 saat işləsən belə, evə
gələndə sənə müsbət enerji verən ailənin olmasıdır. Bu mənada, mən ən birinci
öz ailəmə borcluyam. Həyat yoldaşımla 49 ildir ki, birlikdəyik və həyata
baxışımız tamamilə üst-üstə düşür. Bu, mənə güc verən amillərdəndir. Həmçinin
övladlarıma o qədər minnətdaram ki, öz ayaqları üstə özləri dayanıb, mənim
vəzifə səlahiyyətlərimdən sui-istifadə etməyiblər. Bir sözlə, ən ağır
günlərimdə belə arxalana biləcəyim ailəm olduğu üçün çox xoşbəxtəm.
Söhbətləşdi: Fərid Hüseyn