Humanizm dəyərlərinə sadiqliyin daha bir nümunəsi
Azərbaycan Prezidentinin humanist
addımı yüksək qiymətləndirilir
Azərbaycan müstəqillik əldə etdikdən indiyə qədər
ötən müddət ərzində ölkəmizdə 66 əfv sərəncamı imzalanıb, 11 amnistiya aktı qəbul
edilib. Dövlət başçılarının imzaladığı sərəncamlara əsasən, bu günə qədər 4871
şəxs əfv edilib. Ulu öndər Heydər Əliyev siyasi kursunun, o cümlədən humanist ənənələrinin
davamçısı olan Prezident İlham Əliyevin və Birinci vitse-prezident Mehriban Əliyevanın
təşəbbüsü ilə qəbul edilmiş amnistiya aktları 40412 şəxsi əhatə edib, onlardan
8580 nəfər azadlıqdan məhrum etmə cəzasından azad olunub. Dövlət başçısı İlham Əliyev
aprelin 6-da "Məhkum edilmiş bir sıra şəxslərin əfv olunması haqqında” daha bir
sərəncam imzalayıb. Bu sərəncam dünyada koronavirus (COVID-19) infeksiyasının
yayılması ilə əlaqədar yaşına və səhhətinə görə xüsusi qayğıya ehtiyac duyan
yaşı 65-dən yuxarı olan məhkumların və onların ailə üzvlərinin Prezidentə
ünvanlanmış əfv haqqında müraciətlərinə baxılaraq, məhkumların sağlamlıq vəziyyəti,
cəza çəkdikləri müddətdə davranışları nəzərə alınaraq və humanizm prinsiplərinə
əsaslanaraq imzalanıb. Sərəncama əsasən, azadlıqdan məhrumetmə cəzasına məhkum
olunmuş, yaşı 65-dən yuxarı 176 nəfər cəzanın çəkilməmiş hissəsindən azad
edilib. Onlardan 165-i kişi, 11-i qadındır. Azadlığa çıxan şəxslər göstərdiyi
humanistliyə, mərhəmətlik siyasətinə və imzalanan əfv sərəncamına görə dövlətimizin
başçısı İlham Əliyevə və Birinci vitse-prezident Mehriban Əliyevaya minnətdarlıqlarını
bildiriblər.
Baş verənlərə qara
yaxma cəhdi
Ölkə ictimaiyyəti tərəfindən də əfv sərəncamı rəğbətlə
qarşılanıb. Ayrı-ayrı peşə sahibləri, siyasətçilər, deputatlar, alimlər növbəti
əfv aktını Azərbaycan Prezidentinin insanpərvər siyasətinin göstəricisi, ailələrə
sevinc bəxş etmək ənənəsinə sadiq qalmsının təzahürü kimi dəyərləndiriblər.
Qeyd olunub ki, indiki həssas dönəmdə imzalanan əfv sərəncamı azadlığa çıxan şəxsləri
və onların ailə üzvlərini, həmçinin yaxın ətraflarını əhatə etməklə yüzlərlə,
minlərlə insanın könlünü şad edib, qayğısını azaldıb. Lakin əfsuslar olsun ki,
ağa qara deməyi özlərinə həyat tərzi seçən radikal müxalifət təmsilçiləri bu dəfə
də çoxsaylı insanların sevincini, Azərbaycan Prezidentinin humanist addımını
görməzdən gəlməyə, ümumilikdə baş verənlərə qara yaxmağa cəhdlər ediblər. Belə
ki, AXCP sədri Əli Kərimli, Müsavat Partiyasının sədri Arif Hacılı, Milli Şura
sədri Cəmil Həsənli, jurnalist Xədicə İsmayıl və digərləri əfv olunanlardan
arasında ləğv edilmiş Milli Təhlükəsizlik Nazirliyinin (MTN) Energetika və Nəqliyyat
Sahələrində Təhlükəsizlik Baş İdarəsinin sabiq rəisi, general-mayorAkif
Çovdarov,həmin nazirliyinTransmilli İqtisadi Cinayətkarlığa Qarşı
Mübarizə Baş İdarəsinin sabiq rəisi, general-mayorSübahir Qurbanovun
olmasını əsassız tənqid edərək, ümumən atılan humanist addımın əhəmiyyətini
kiçiltməyə çalışıblar.
İnsanlara
dərin mənəvi keyfiyyətlər aşılamaq
Milli Məclisin
Beynəlxalq münasibətlər və parlamentlərarası əlaqələr komitəsinin sədr müavini,
Yeni Azərbaycan Partiyasının (YAP) Beynəlxalq əlaqələr şöbəsinin müdiri Sevinc
Fətəliyevamövzu ilə bağlı açıqlamasında bildirib ki, Prezident İlham Əliyevin imzaladığı
növbəti əfv sərəncamı dövlətimizin humanizm dəyərlərinə sadiqliyinin daha bir
nümunəsidir. Onun sözlərinə görə, ulu öndər Heydər Əliyev tərəfindən əsası
qoyulan bu ənənə dövlətimizin başçısı tərəfindən ardıcıl olaraq həyata
keçirilir. Millət vəkili deyib ki, ardıcıl olaraq dövlət başçısı tərəfindən əfv
sərəncamlarının imzalanması istər humanizm və əxlaqi, istərsə də cəmiyyətdaxili
harmoniyanın qorunması baxımından böyük önəm daşıyır: "Budəfəki əfv sərəncamı ilə
176 məhkum azadlığa qovuşdu. Sərəncam koronavirus infeksiyasının yayılması ilə əlaqədar
yaşına və səhhətinə görə xüsusi qayğıya ehtiyacı olan, yaşı 65-dən yuxarı bir
sıra məhkumlara şamil olunub. Əfv məsələsinə baxılarkən, məhkumların və onların
ailə üzvlərinin müraciətləri, məhkumların səhhəti, törətdikləri cinayətlər, cəza
çəkdikləri müddətdə davranışları və digər məsələlər nəzərə alınıb. Ümumiyyətlə,
humanist addımlar mahiyyət etibarilə insanlarda yeni hiss və vərdişlərin
formalaşmasına, insani dəyərlərin möhkəmlənməsinə təsir göstərir. Yəni, cinayət
törədən şəxslərin qanunla müəyyənləşdirilmiş qaydada layiq olduqları cəzanı
almaqdan azad edilməsi insana dərin mənəvi keyfiyyətlər aşılamaq gücündədir”.
Cəmiyyət
radikal müxalifəti qəbul etmir
S.Fətəliyeva qeyd edib ki, ölkəmizdə
siyasi mövqeyindən, əqidəsindən asılı olmayaraq, hər kəs atılan müsbət
addımları dəyərləndirməyi bacardığı halda, radikal müxalifət yenə öz ampluasında
qalmaqda davam edir, dövlətimizin humanizm prinsiplərindən, demokratik dəyərlərə
sadiqliyindən siyasi məqsədlər üçün yararlanmağa çalışırlar: "Dövlətin belə məhkumları
əfv etməsi həmin insanların özlərinə olan inamını artırır, gələcəkdə öz həyatlarını
qanunlara hörmət çərçivəsində davam etdirərək, ölkənin layiqli vətəndaşı olmağa
sövq edir. Dövlətin humanist siyasətini xalqımız, cəmiyyətimiz yüksək qiymətləndirir.
Nəticədə, cəmiyyətdə qarşılıqlı hörmət və rəğbət, habelə qanunçuluq prinsiplərinə
söykənən vətəndaş-dövlət münasibətləri güclənir. Beləliklə, bu sərəncam da Azərbaycan
dövlətinin humanizm prinsiplərinə, demokratik dəyərlərə sadiqliyini bir daha təsdiqləyir.
Lakin təəssüflə qeyd etmək lazımdır ki, radikal müxalifət bu humanist addımı
siyasiləşdirməyə çalışır. Siyasi mövqeyindən, əqidəsindən asılı olmayaraq, hər
kəs atılan müsbət addımları dəyərləndirməyi bacarmalıdır. Bunu radikal müxalifət
düşərgəsi haqqında demək mümkün deyil. Onlar bilməlidirlər ki, tutduqları bu
cür mövqeyə görə cəmiyyətimiz tərəfindən qəbul olunmurlar. Bizim üçün əsas olan
xalqımızın mövqeyidir ki, Azərbaycan xalqı dövlətimizin başçısının həyata
keçirdiyi siyasəti, o cümlədən onun atdığı humanist addımları birmənalı şəkildə
dəstəkləyir”.
İnsanpərvərlik,
humanizm prinsipləri
Milli Məclisin
deputatı, YAP Beynəlxalq əlaqələr komissiyasının katibi, siyasi elmlər doktoru,
professor Elman Nəsirov Azərbaycan dövlətinin və onun rəhbərinin idarəetmədə şəfqət,
humanizm və insanpərvərlik kimi ali dəyərlərə hər zaman sadiq qaldığını dilə gətirib.
O deyib ki, Prezident İlham Əliyev ulu öndər Heydər Əliyevin müəyyən etdiyi
siyasi kursa sadiqdir və onu yeni dünya reallıqlarına adekvat olaraq davam
etdirir. Deputatın fikrincə, ölkə başçısı bu prosesdə varislik və müasirliyin
unikal harmoniyasına nail olmağı bacarır: "Məsələyə bu xüsusda yanaşdıqda qeyd
etməliyik ki, Azərbaycanda siyasətə humanizmi baza prinsipi olaraq gətirməklə əfv
və amnistiya təsisatlarının yaradılması da ulu öndər Heydər Əliyevin adı ilə bağlıdır.
Məhz onun təşəbbüsü və iradəsi sayəsində 1995-2003-cü illərdə 77 mindən çox məhkuma
şamil edilən 7 amnistiya aktı və 32 əfv fərmanı verilib. Bu məhkumlardan 21 min
325 nəfəri cəzasının çəkilməmiş hissəsindən azad olunub. Möhtərəm Prezidentimiz
İlham Əliyevin imzaladığı əfv sərəncamlarına əsasən isə 4871 nəfər məhkum azad
olunub. Azərbaycanda və onun hüdudlarından kənarda belə şəfqət, mərhəmət nə nəciblik
mücəssiməsinə çevrilmiş ölkəmizin Birinci vitse-prezidenti, UNESCO və
İSESCO-nun xoşməramlı səfiri Mehriban xanım Əliyeva hələ Milli Məclisin
deputatı olarkən 4 dəfə - 2007, 2009, 2013 və 2016-cı illərdə amnistiya aktlarının
qəbulu ilə bağlı qanunvericilik təşəbbüsləri ilə çıxış edib və nəticədə 40 mindən
artıq məhkumun cəzası tam və qismən ləğv olunub. Bütün bu sadalan faktlar və
arqumentlər bir daha təsdiqləyir ki, insanpərvərlik, humanizm prinsipləri son
27 il ərzində Azərbaycanın dövlət siyasətinin təməl prinsipləri olaraq tətbiq və
təşviq olunmaqdadır. Cənab Prezidentin 6 aprel tarixli əfv sərəncamı da eyni məntiqin
yeni şəraitdə ifadəsi kimi qiymətləndirilməlidir”.
"Koronavirus
demokratları”
Bütün bunların fonunda Azərbaycanın
radikal müxalifət kəsiminin yenə öz naqis xislətini büruzə verməsini millət vəkili
təəssüf doğuran hal kimi qiymətləndirib. Bildirib ki, Azərbaycan hakimiyyətinin
koronavirus infeksiyasına qarşı mübarizədə həmrəylik, birlik və məsuliyyətimizi
daha da möhkəmləndirməklə bağlı çağırışları, eyni zamanda xalqımızı və dövlətimizi
bu qorxunc xəstəliyin acı nəticələrindən hifz etmək üçün tətbiq etdiyi sərt
karantin tədbirləri "5-ci kolon” nümayəndələri tərəfindən süngü ilə qarşılanıb.
Deputatın sözlərinə görə, radikal müxalifət növbəti qarayaxma, yalan və iftira
kampaniyasını həyata keçirmək üçün növbəyə dayanıb: "Onların paralel olaraq ianələrini
aldıqları müəyyən xarici dövlətlərin eyni infeksiyaya qarşı eyni qəbildən olan
addımlarının şərəfinə mədhiyyələr qoşmaq növbəsinə dayanıqları da diqqətdən
yayınmır. Bu ikiüzlülük və milli xəyanətin klassik nümunəsi kimi göz qabağındadır.
Hətta iş o yerə çatıb ki, bu antimilli ünsürlər işğalçı Ermənistanın
koronovirusa qarşı atdığı müəyyən addımları təqdir etməkdən belə çəkinmirlər.
Guya ki, rəsmi İrəvanın məcburi məhdudiyyətlərə rəvac verən addımları ölkədə
"demokratiyanın baza prinsiplərini zədələmir”. Onlar bu kimi gülünc və sərsəm
ifadələr işətməkdən belə, vaz keçmirlər. Halbuki "sapı özümüzdən olan baltalar”
çox gözəl bilirlər ki. işğalçı Ermənistanda martın 16-da fövqəladə vəziyyət
elan edilib. Mətbuata senzura tətbiq olunub. Kütləvi informasiya vasitələri və
sosial şəbəkələrin koronavirus pandemiyası ilə bağlı yalnız rəsmi dövlət məlumatlarına
istinad etmələri tələbi qoyulub. Bunun əksi olduqda, müvafiq addımı atmış tərəf
2 saat ərzində təkzib verməlidir. Bu baş verməyəcəyi təqdirdə qaydaları pozmuş
tərəfə qarşı sərt cəza tədbirləri görülür. Yeri gəlmişkən, ölkəmizdə radikal dəstə
və qruplaşmalar öz naqis xislətlərinə və xəbis dünyagörüşlərinə adekvat olaraq
"koronavirus demokratiyası” deyilən həqarətli bir termin də icad ediblər. Amma
xalqımız onları "şanlı” keçmişlərinə görə "azadlıq aşiqləri” kimi xatırlayır və
rədd edir. Bundan sonra isə onları "koronavirus demokratları” kimi permanent
"siyasi izolyasiya”da saxlayacaqları artıq teorem yox, aksiomdur”.
Rufik
İSMAYILOV