Bakı 10°C
Hamımızı üzən QƏZA
Helikopter qəzasından siyasi məqsədlər naminə
yararlanmağa çalışan qaragüruh ictimai rəyi çaşdırmaq üçün dezinformasiya
yaymağa çalışdı. Qəza ilə bağlı fikirlərini bildirən peşəkar mütəxəssisləri isə
linç etməyə cəhd göstərdilər.
Azərbaycanda noyabrın 30-da xalqımızı üzən hadisə
baş verib. Həmin gün saat 10:40 radələrində
Dövlət Sərhəd Xidmətinin (DSX) hərbi helikopteri Xızı rayonu ərazisində yerləşən
"Qaraheybət” aviasiya poliqonunda təlim uçuşları yerinə yetirərkən qəzaya uğrayıb.
Hadisə nəticəsində 14 nəfər həlak olub, 2 nəfər yaralanıb. Prezident İlham
Əliyev və Birinci vitse-prezident Mehriban Əliyeva həlak olanların ailələrinə
başsağlığı veriblər. Bu ağır itkinin acısını həlak olanların ailə üzvləri ilə
birlikdə yaşadıqlarını, dərdlərini bölüşdüklərini bildiriblər.
Cinayət işi başlanıb
Qəza baş verən andan dərhal sonra DSX-nin və Baş
Prokurorluğun rəhbər heyəti hadisə yerinə gəlib, məhkəmə-ballistik, məhkəmə-texniki-yanğın
və məhkəmə-tibb ekspertlərinin iştirakı ilə əraziyə baxış olub, birgə araşdırma
tədbirləri həyata keçirilib. Müdafiə Nazirliyindən cəlb olunmuş mütəxəssis tərəfindən
helikopterin qara qutusu tapılıb və onun tədqiqi aparılıb. DSX rəisi,
general-polkovnik Elçin Quliyev helikopter qəzası ilə bağlı keçirdiyi brifinqdə
bəyan edib ki, təlim zamanı həlak olan hərbçilərə qanunvericiliyə uyğun olaraq,
şəhid statusu veriləcək. O, qısa müddət əvvəl təmir işləri aparılan və saz vəziyyətdə
olan helikopterin "Qaraheybət” təlim mərkəzinə eniş edərkən qəzaya uğradığını, hadisəyə
səbəb kimi hər hansı kənar təsirin istisna olunduğunu diqqətə çatdırıb. Baş
prokurorun birinci müavini Elçin Məmmədov qəza yerinə baxış keçirildiyini,
şahidlərin dindirildiyini vurğulayıb. Söyləyib ki, hərbi helikopterin qəzaya
uğraması nəticəsində 2 nəfərin yaralanması, 14 nəfərin həlak olması faktı ilə
bağlı Baş Prokurorluğun İstintaq İdarəsində Cinayət Məcəlləsinin müvafiq maddələri
ilə cinayət işi başlanmaqla istintaq olunur.
Acınacaqlı hal odur ki…
Dekabrın 1-də DSX-nin Sərhədçi İdman Kompleksində şəhid
hərbçilərlə vida mərasimi keçirilib. Sadəcə şəhidlərin ailə üzvləri deyil, ümumən
Azərbaycan xalqı baş vermiş faciəvi hadisədən kədərlənib, həlak olanların ruhuna
rəhmət diləyib, yaxınlarının dərdinə şərik olub. Vida mərasimindən sonra şəhidlər
II Fəxri Xiyabanda dəfn olunub. Təbii ki, bu, Azərbaycanın ərazi bütövlüyü, Vətənin
müdafiəsi yolunda xidmət edənlərə xalqımızın böyük hörmət və ehtiramı olmaqla
yanaşı, ümummilli məsələlərdə həmrəy olduğumuzun bir daha sübutudur. Acınacaqlı hal odur ki, bu hadisədən öz şəxsi
maraqları naminə yararlanmağa çalışanlar, o cümlədən hadisəyə siyasi çalar
qatanlar, absurd iddialarla çıxış edib yanlış ictimai rəy yaradanlar da
tapıldı. Belələri, "niyə bir helikopterə 16 nəfər mindirilib, nə üçün yüksək
rütbəli zabit heyəti hərbi nəqliyyat vasitəsində olub” və sair bu kimi
suallarla, populist çıxışlarla gündəmin "qəhrəmanına” çevrilmək istədilər. Hətta
bu faciəni məsuliyyətsizcəsinə dövlətin, həmçinin II Qarabağ savaşında xidmətləri
olan yüksək vəzifə sahiblərinin ayağına yazanlar sosial şəbəkələrdə meydan
suladı. Qaragüruh isə kifayət qədər tutarlı sübut və dəlillər sadalanmasına rəğmən,
kor tutduğunu buraxmadığı kimi iddialarından geri çəkilmədi.
Hadisənin əsl səbəbləri üzə çıxacaq
Məlum hadisə ilə bağlı fikirlərini bölüşən hərbi
ekspert Ədalət Verdiyev bildirib ki,qəzaya uğrayan Mİ-17 helikopterləri
kifayət qədər etibarlı vasitələrdir. Onun sözlərinə görə, bu helikopterlər Vətən
Müharibəsində özlərini sübut ediblər: "Mİ-17 helikopteri 24 nəfəri, həmçinin 4
ton yükü daşıya bilir. Qəzaya uğrayan helikopterdə isə cəmi 16 nəfər olub və hərbi
nəqliyyat vasitəsində normativlərin aşılmasına yol verilməyib. Görüntülərə
fikir versək, helikopterin vurulma ehtimalı da mümkün deyil. Çünki helikopter
yanıb yerə düşməyib. Əgər səmada vurulmuş olsaydı, parçalar daha geniş əraziyə
dağılacaqdı. Qonşu ölkələr olan Rusiya və İranda da bu tipli qəzalar baş verib.
Azərbaycanda isə ilk dəfədir ki, təlimlərdə belə bir qəza olub. Belə qəzalardan
heç kim sığortalanmayıb. Burda müxtəlif təsiredici amillər ola bilər. Qəzaya səbəb
texnikanın nasazlığı, insan faktoru ola bilər. İstənilən halda, rəsmi
açıqlamanı gözləmək vacibdir. Sosial şəbəkələrdə faktlar olmadan doğru olmayan
məlumatların yazılması, paylaşılması düzgün deyil. Helikopterin qara qutusu
tapılıb. Yaxşı olar ki, araşdırmaların nəticəsini gözləyək. Sağ qalan
pilotların ifadəsi alınıb, qara qutu oxunduqdan sonra hadisənin əsl səbəbləri
üzə çıxacaq. Təbi ki, günahı olan varsa, cəzalanacaq”.
Sağ qalanların ifadələri istintaqa kömək edəcək
Hərbi jurnalist Heydər Mirzə bəzi iddialara sosial şəbəkə hesabı üzərindən münasibət
bildirib. O, əvvəlcə "yüksək rütbəli zabitlər” ifadəsinə aydınlıq gətirib.
Vurğulayıb ki, Silahlı Qüvvələrdə yalnız kiçik, baş, ali zabit heyəti olur və
helikopter qəzasında şəhid olan iki polkovnik baş zabit heyətinə daxildir: "Orduda
rütbə və vəzifə var. Rütbə ola bilər polkovnik, vəzifə isə briqada komandiri,
korpus komandirinin müavini, yaxud nazirlikdə idarə rəisi və sair ola bilər.
Aviasiyada polkovnik, eyni zamanda şturval arxasında təyyarə və ya helikopter idarə
edə bilər. Normalda 10 il uçuş təcrübəsi olan pilotun rütbəsi ən azı kapitan,
yaxud mayor olur. Yəni "bir helikopterdə o qədər yüksək rütbəli şəxs nə edirdi”
sualı hərbidən anlayışı olan adamı mat qoyur, xüsusən də eyni sualı ard-arda
hamı yazanda. Özü də, helikopter bir yox, son fotolardan göründüyü kimi, azı
iki olub. Qəzadan bir neçə dəqiqə əvvəl düşən helikopterin göyərtəsindən havada
olan digərinin fotosu çəkilib. Təlim uçuşlarına gəldikdə, bu ad, əslində çox
geniş anlamı əhatə edir. Bu səbəbdən təlim uçuşunda bir helikopterə 16 nəfər
zabitin minməsi normaldır, burada gözlənilməz, qeyri-adi bir şey yoxdur. Unutmayaq
ki, o model helikopterlər təxminən bu sayda qrupları daşımağı da nəzərdə tutur.
Bunu bilməyən bəzilərinin şərhləri bir liftə 12 nəfərin mindirilməsi təəssüratı
yaradır. Əlbəttə ki, səhvdir, yanlış rəydir. Şəhidlərə Allahdan rəhmət,
yaralılara şəfa diləyirik. Qalanını istintaq göstərəcək. İnanıram ki, sağ
qalanların ifadələri istintaqa kömək edəcək”.
Rufik İSMAYILOV
