Azərbaycanın mövqeləri daha da güclənir - Fotolar
Ötən ilin sosial-iqtisadi
yekunları əldə edilən uğurların real mənzərəsidir
Yola saldığımız 2019-cu il
ölkəmiz üçün uğurlu il olub. Prezident İlham Əliyevin Dünya Azərbaycanlılarının
Həmrəylik Günü və Yeni il münasibətilə Azərbaycan xalqını təbrik edərkən
vurğuladığı kimi, ötən ilin əvvəlində qarşıya qoyulan bütün vəzifələr uğurla
icra edilib, ölkəmiz öz inkişaf yolu ilə uğurla gedib. İlk növbədə qeyd
edilməlidir ki, dünyada cərəyan edən gərgin proseslər fonunda 2019-cu ildə
Azərbaycan sabitlik, əmin-amanlıq şəraitində yaşayıb. Ötən il Azərbaycanın
beynəlxalq mövqeləri daha da möhkəmlənib, il ərzində 40-dan çox dövlət və
hökumət başçısı Azərbaycana səfər edib, ikitərəfli əlaqələr əhəmiyyətli
dərəcədə genişlənib. Bütün aparıcı beynəlxalq təşkilatlar, o cümlədən Qoşulmama
Hərəkatı, İslam Əməkdaşlıq Təşkilatı, ATƏT, Avropa Parlamenti, Avropa Şurası
Parlament Assambleyası və digər qurumlar Ermənistan-Azərbaycan, Dağlıq Qarabağ
münaqişəsi ilə bağlı ölkəmizin prinsipial mövqeyini dəstəkləyib. Eyni zamanda, 2019-cu
il Azərbaycan tarixinə dərin islahatlar ili kimi düşüb. İl ərzində Prezident
İlham Əliyevin rəhbərliyi ilə həyata keçirilən siyasi, iqtisadi, sosial, kadr,
struktur islahatları Azərbaycanın gücünü artırıb.
Bütün bu uğurları nəzərə
alsaq, 2020-ci il ölkəmiz üçün hansı əlamətdar hadisələr, nailiyyətlərlə yadda
qala bilər. Belə bir sualla deputatlara müraciət etdik. Yeni Azərbaycan Partiyasının (YAP) Beynəlxalq əlaqələr komissiyasının
katibi, siyasi elmlər doktoru, professor Elman Nəsirov bildirdi ki, 2020-ci
ilin nə ilə yadda qalacağı ilə bağlı yalnız proqnozlar vermək olar. Millət
vəkilinin sözlərinə görə bu proqnozların da elmi əsası olmalıdır: "Ötən il
Azərbaycanda bütün sferaları əhatə edən ardıcıl, sistemli, məqsədyönlü
islahatlar həyata keçirilib. Ona görə də 2019-cu il ölkəmizin tarixinə
islahatlar ili kimi daxil olub. Fikrimcə, 2019-cu ildə geniş vüsət alan
islahatlar 2020-ci ildə yeni müstəviyə qədəm qoyacaq, yeni mərhələyə keçərək
davam etdiriləcəkdir. Bu, cari ildə dinamik prosesə çevrilməklə,
sosial-iqtisadi, siyasi sahəni, məhkəmə-hüquq sistemini, məhkəmə, qanunverici
və icra hakimiyyətini əhatə edəcəkdir. Bu istiqamətdə daha böyük uğurlara imza
ata biləcəyik. Məndə belə bir inam var. Bununla yanaşı, 2020-ci ildə
iqtisadiyyatın şaxələndirilməsi, qeyri-neft sektorunun inkişafı məsələsi
prioritet olaraq qalacaq. Bu kontekstdə kənd təsərrüfatı, turizm və sair
sektorların inkişafı da diqqət mərkəzində olacaq. Cari il üçün dövlət
büdcəmizin gəlirləri 24,1, xərcləri isə 26,9 milyard manatdır. Bu büdcənin 39
faizə yaxını məhz sosial layihələr üçün nəzərdə tutulub. Yəni, 2020-ci ildə
sosial istiqamətdə çox ciddi addımların atılması gözlənilir. Bir qədər də açıq
desək, Prezident İlham Əliyevin siyasətinin mərkəzində Azərbaycan vətəndaşı,
onun sosial rifahı, qayğı və problemlərinin həlli dayanır. Şübhəsiz ki, 2020-ci
ildə bu siyasət davam etdiriləcək”.
Millət vəkili qeyd etdi ki,
29 illik müstəqillik tariximizə, xüsusən də 1993-cü ildən indiyə qədər ötən vaxta
qiymət verilərsə, 3 mühüm nailiyyətimiz dərhal diqqət çəkər: "Prezident İlham
Əliyevin vurğuladığı kimi, bunlar ictimai-siyasi sabitlik, təhlükəsizlik
mühitinin formalaşması, davamlı inkişafın təmin edilməsidir. Düşünürəm ki, cari
ildə də sabitlik, təhlükəsizlik və inkişaf tendensiyası qorunub saxlanılacaq,
daha da möhkəmləndiriləcəkdir. Ən nəhayət, ümid edirik ki, 2020-ci ildə Dağlıq
Qarabağ münaqişəsinin ədalətli həllinə münbit şərait yaranacaq, bu istiqamətdə mövqelərimiz
bir qədər də güclənəcəkdir. Münaqişənin həllində Azərbaycanın siyasi,
diplomatik və hərbi üstünlüyü göz önündədir. Hər üç istiqamət üzrə üstünlüyümüz
zamanla bu problemin Azərbaycanın ərazi bütövlüyü çərçivəsində həllinə səbəb
olacaqdır. 2020-ci ildə Azərbaycanın beynəlxalq aləmdə yeri və rolu daha da
möhkəmlənəcək. Dövlət başçısının söylədiyi kimi, Azərbaycan dünya miqyasında
böyük dövlət olmasa da, sözümüzün mənası və çəkisi böyükdür. Hesab edirəm ki,
2020-ci ildə Azərbaycanın sözünün mənası və çəkisi daha da artacaqdır”.
İqtisadçı
millət vəkili Azər Badamov 2020-ci il üçün gözləntilərini dilə gətirərkən
2019-cu ilin Azərbaycanın həyatında dərin islahatlar ili olmasına diqqət çəkdi.
Bildirdi ki, Prezident İlham Əliyevin rəhbərliyi altında ötən il ölkəmizdə
həyata keçirilən siyasətin uğurlu nəticəsi cari ilin də böyük nailiyyətlərlə
yadda qalacağına əsas verir: "Cari il ilə bağlı proqnozlar verərkən ötən ilin
sosial-iqtisadi yekunlarına nəzər salmaq lazımdır. Ötən il iqtisadiyyat artıb, qeyri-neft
sektorunda 3,5 faiz artım müşahidə edilib. Xarici dövlət borcumuz ümumi daxili
məhsulun cəmi 17 faizini təşkil edib. Prezident İlham Əliyev Dünya
Azərbaycanlılarının Həmrəylik Günü və Yeni il münasibətilə Azərbaycan xalqını
təbrik edərkən bildirdi ki, bu göstərici dünya miqyasında 9-cudur və bundan
sonrakı illərdə xarici borcumuz daha da aşağı düşəcək. Azərbaycanın valyuta
ehtiyatları ötən il 4,5 milyard dollar artaraq rekord həddə - 50 milyard
dollara çatıb. Azərbaycanın valyuta ehtiyatları xarici dövlət borcundan 5
dəfədən çox artıqdır. Ötən il sənaye istehsalı artıb. Xüsusən də qeyri-neft
sektorunda sənaye artımı 14 faiz təşkil edib. Kənd təsərrüfatında isə artım 7
faiz təşkil edib. Azərbaycan Beynəlxalq İnkişaf Assosiasiyasının hesabatında
donor ölkədir. İndi Azərbaycan borc alan deyil, borc verən ölkəyə çevrilib. Bütün
bunlar düşünülmüş, praqmatik siyasətin nəticəsində mümkün olub”.
Millət vəkili dedi ki,
əldə edilən uğurlar, Prezident İlham Əliyevin rəhbərliyi ilə həyata keçirilən
və geniş vüsət alan islahatların davam etdirilməsi 2020-ci ildə də Azərbaycana
yeni nailiyyətlər qazandıracaq: "Ötən ilin yekunu uğurludur, cari ilin
başlanğıcı uğurla müşayiət olunur. 2020-ci ilə qədəmlərimizi inamla və ötən il
əldə etdiyimiz uğurlarla qoymuşuq. İslahatların davam etdirilməsi,
iqtisadiyyatın şaxələndirilməsi, şəffaflığın daha da artırılması, korrupsiya
hallarının aradan qaldırılması istiqamətində görülən işlər öz müsbət nəticəsini
verəcəkdir. Düşünürəm ki, cari ilin sonunda da biz əldə etdiyimiz uğurlardan
fəxrlə danışa biləcəyik”.
Rufik
İSMAYILOV