Xalqın iradəsini ifadə edən Komandan
Rəşadətli Azərbaycan Ordusu
tarixi həqiqəti bərpa edir
Xalqın iradəsini ifadə edən hər bir lider, dövlət və hökumət başçısı
şəffaf fəaliyyət göstərir, öz vətəndaşları qarşısında hesabat verməkdən
çəkinmir. Prezident İlham Əliyevin nümunəsində Azərbaycanda da bu, belədir.
Milli-dövlətçilik maraqlarını, vətəndaşlarının mənafeyini hər zaman üstün tutan
dövlət başçısı? Nazirlər Kabinetinin rüblük yığıncaqlarında, əlamətdar günlərlə
bağlı xalqa müraciətlərində, demək olar ki, əksər tədbirlərdə çıxış edərək
ölkədə görülən işlərdən, qarşıda duran vəzifələrdən, başlıca hədəflərdən, həlli
vacib problemlərdən geniş söhbət açır. Xarici ölkələrə səfərlərdə, beynəlxalq
təşkilatlarda ən yüksək tribunadan Azərbaycan həqiqətlərini qətiyyətlə bütün
dünyaya çatdıran Prezident İlham Əliyev xalqı qarşısında hesabat verərkən də
gerçəkliyə söykənir, reallıqlar barədə ölkə vətəndaşlarını məlumatlandırır.
Ermənistan-Azərbaycan, Dağlıq Qarabağ münaqişəsinin həlli istiqamətində indiyə
qədər atılan addımlar, əldə edilən uğurlar və sair barədə də Ali Baş Komandan,
Prezident İlham Əliyev daim xalqa hesabat verib.
"Azərbaycan xalqı hər şeyi
bilməlidir”
Cari il sentyabrın 27-dən indiyə qədər ötən vaxt ərzində - döyüşlərin
getdiyi bir zamanda dövlət başçısı onlarla xarici media qurumuna müsahibələr,
açıqlamalar verib. Bu zaman da o,
həqiqətləri dilə gətirməklə həm beynəlxalq auditoriyanı, həm də ölkə
vətəndaşlarını məlumatlandırıb. Prezident İlham Əliyev oktyabrın 26-da
Azərbaycan xalqına növbəti müraciətində bu məqama xüsusi diqqət çəkərək bir
daha bəyan edib ki, ölkə rəhbəri olaraq ötən 17 il ərzində daim xalqa
həqiqətləri çatdırıb, bundan sonra da bu, belə olacaq: "Azərbaycan xalqı hər
şeyi bilməlidir. Mən Prezident kimi 17 il ərzində hər zaman Azərbaycan xalqına
həqiqətləri demişəm, hər zaman. Müntəzəm olaraq xalqa hesabat vermişəm, bütün
məsələlərlə bağlı. Bu gün də məlumat verirəm, bəlkə də tam məlumat deyil. Çünki
müəyyən diplomatik qaydalar var. Amma nəyi demək mümkündürsə, onu deyirəm, həm
Azərbaycan xalqına, həm də bütün dünyaya. Ermənistanı xilas etmək
istəyirsinizsə, deyin ki, çıxsın torpağımızdan, dərhal rədd olsun! Şuşada,
Cıdır düzündə sərxoş vəziyyətdə oynayan o təlxək bəyan etsin ki, çıxıram. Yoxsa
gündə beş-altı dəfə dünya liderlərinə zəng etməklə məsələ düzəlməz. Bizim
mövqeyimiz dəyişməz olaraq qalır və biz haqqı, ədaləti müdafiə edirik”.
"Müharibənin dayandırılması
üçün sadə bir formula var”
Milli Məclisin Beynəlxalq
münasibətlər və parlamentlərarası əlaqələr komitəsinin sədr müavini, YAP-ın
Beynəlxalq əlaqələr şöbəsinin müdiri Sevinc Fətəliyeva mövzu ilə
bağlı bildirib ki, dövlətimizin başçısı həm xarici kütləvi informasiya
vasitələrinə müsahibələrində, həm də oktyabrın 26-da Azərbaycan xalqına
müraciətində Azərbaycan dövlətinin və xalqının prinsipial mövqeyini qətiyyətlə
ifadə edib: "Azərbaycanın mövqeyi bundan ibarətdir ki, Ermənistan hərbi
birləşmələri işğal etdiyi torpaqlarımızdan çıxmalıdır və ölkəmizin ərazi
bütövlüyü təmin olunmalıdır. Ölkəmizin mövqeyi beynəlxalq hüquqa əsaslanır və
biz BMT Təhlükəsizlik Şurasının müvafiq qətnamələrinə istinad edirik. Cənab
Prezidentin qeyd etdiyi kimi, biz ədalətin bərpa olunmasını, işğal olunmuş
torpaqlarımızın geri qaytarılmasını istəyirik. Artıq 30 ilə yaxındır ki,
Ermənistanın işğalçılıq siyasəti nəticəsində yaranan Dağlıq Qarabağ
münaqişəsinin həlli ilə bağlı ATƏT-in Minsk qrupu formatında danışıqlar
aparılır. Azərbaycanın bu dövrdə danışıqlar prosesində iştirak etməsi və daim
konstruktiv mövqe ortaya qoyması ölkəmizin və xalqımızın sülhə sadiqliyinin
ifadəsidir. Azərbaycan həmişə birmənalı şəkildə bəyan edib ki, aparılan
danışıqlar substantiv nəticələrə hesablanmalıdır. Ancaq danışıqlar prosesinin
əhatə etdiyi 30 ildə ümidlər boşa çıxıb. Sülhsevər Azərbaycan xalqı danışıqlara
inanıb, beynəlxalq birliyə etibar edib. Təəssüf ki, xalqımızın etibarından
sui-istifadə olunub. BMT Təhlükəsizlik Şurasının işğalçı qüvvələrin zəbt
olunmuş əraziləri qeyd-şərtsiz azad etməsini özündə ehtiva edən 4 qətnaməsi 27
ildir ki, kağız üzərində qalıb. Ermənistan müxtəlif təxribatlar vasitəsilə
danışıqlar prosesini, faktiki olaraq pozub. Bu yaxınlarda isə Ermənistanın baş
naziri Paşinyanın "münaqişənin diplomatik yolla həlli yoxdur” deməsi bir daha
qarşı tərəfin təcavüzkar xislətinin göstəricidir”.
İşğalçı qoşunlar torpaqlarımızda olmayacaq
Millət vəkilinin deyib ki, dövlətimiz ərazi bütövlüyümüzün təmin
olunmasında, vaxtilə işğala məruz qalan torpaqların geri qaytarılmasında
prinsipial yanaşmadan çıxış edir və buna tam haqqı var. Ermənistanın işğalçı
dövlət olduğunu və müharibəni də məhz onun başladığını bildirən S.Fətəliyeva
vurğulayıb ki, bu faktı beynəlxalq birlik də yaxşı bilir: "Ermənilər işğal
etdikləri Azərbaycan ərazilərində qanunsuz məskunlaşdırma aparıblar. Eyni
zamanda, hər vəchlə torpaqlarımızdan azərbaycanlı izini silməyə çalışıblar.
İşğalın davam etdiyi illərdə Azərbaycan təbiətinə ciddi ziyan vurulub, işlək
müəssisələrin avadanlıqları sökülərək Ermənistana daşınıb. Erməni vandallarının
maddi və mədəniyyət abidələrimizə sahib çıxmaq cəhdləri də heç bir çərçivəyə
sığmır. Onlar öz xislətlərinə uyğun olaraq abidələrimizi özününküləşdirməyə
çalışıblar, bu, mümkün olmadıqda isə onları dağıdıblar. İndiyədək beynəlxalq
birlik, ATƏT-in Minsk qrupunun həmsədrləri Ermənistanın azğınlığına biganə
yanaşıblar və Azərbaycanın haqlı tələblərinə məhəl qoymayıblar. Bu günə kimi
Azərbaycanın haqlı tələbləri qarşı susqunluq nümayiş etdirənlər, indi sadəcə
atəşkəs təklif edir. Əslində isə müharibənin dayandırılması üçün sadə bir
formula var. Bu da ondan ibarətdir ki, erməni silahlı qüvvələri işğal etdiyi
torpaqlarımızdan çıxmalıdır. Belə olarsa, daha atəşkəsin pozulmasına da ehtiyac
olmayacaq. Çünki işğalçı qoşunlar torpaqlarımızda olmayacaq və problem sülh
yolu ilə həll olunacaq”.
"Düşmən, onların
havadarları anlamışdılar ki...”
Milli Məclisin deputatı
Naqif Həmzəyev də qəzetimizə açıqlamasında bildirib ki,
Azərbaycan Prezidenti, Ali Baş Komandan İlham Əliyevin rəhbərliyi ilə şanlı
Ordumuzun Qələbə yürüşü davam edir, döyüş meydanında tarixi ədalət bərpa
edilir. Onun sözlərinə görə, 1988-1993-cü illərdə erməni vandalları tərəfindən
işğal edilmiş yaşayış məntəqələrimiz düşmən tapdağından azad olunur və dövlət
başçısı hər dəfə xalqa müraciətində yeni yaşayış məntəqələrinin erməni silahlı
birləşmələrindən təmizlənməsi barədə xoş xəbərləri çatdırır: "Beş ilə işğal
olunmuş əzəli, əbədi torpaqlarımızın, yurd yerlərimizin, erməni vandalları
tərəfindən təxminən 27 il ərzində güclü müdafiə-istehkam sistemi yaratdığı
ərazilərin mühüm hissəsinin qısa müddətdə azad olunması Azərbaycan Ordusunun
qüdrətinin göstəricisidir. Bu gün xalqımızın böyük ruh yüksəkliyi, orduya
inamı, qələbəyə əminlik hissi rəşadətli Azərbaycan Ordusunu yeni-yeni
qələbələrə ruhlandırır. Artıq hər kəs, əmindir ki, Ali Baş Komandanın
rəhbərliyi ilə sarsılmaz Azərbaycan Ordusunun vətənpərvər, cəsur və mərd
əsgərləri tez bir zamanda yağı düşməni doğma torpaqlarımızdan birdəfəlik
qovacaq, xalqımıza illərdən bəri gözlədiyi Böyük Qayıdışın sevincini yaşadacaq.
Hazırda Azərbaycanda – öz torpağımızda, dədə-baba yurdumuzda Vətən müharibəsi
gedir. Müzəffər Ordumuz beynəlxalq hüquqa əsaslanıb Ermənistan tərəfindən işğal
olunan ərazilərimizi azad edir. Kürəkçay, Gülüstan, Türkmənçay sülh
müqavilələrindən sonra dədə-baba torpaqlarımıza gətirilən,
qonaqpərvərliyimizdən, böyük ürəyə sahib olmağımızdan istifadə edərək torpaqlarımıza
sahib çıxmaq istəyən erməni tör-töküntülərindən, vandallarından doğma
ocağımızı, yurd yerimizi qurtarırıq”.
Haqq işi uğrunda mübarizəyə qalxan Azərbaycan
Deputat qeyd edib ki, Azərbaycan Prezidenti İlham Əliyev çıxışlarında
tarixi faktlara istinad edərək Qarabağ həqiqətlərini bütün dünyaya çatdırır:
"Cənab Prezident bütün dünyaya bəyan edir ki, ermənilər torpaqlarımıza
məqsədyönlü şəkildə gətirilib və ölkəmizin ən dilbər guşələrindən olan
Qarabağda yerləşdirilib. "Onlara şərait yaradıldı. Məqsəd də aydın idi:
imperiyanın yeni torpaqlarında dini tərkibi dəyişdirmək, müsəlmanları öz
dədə-baba torpaqlarından qovmaq, didərgin salmaq və yeni reallıq yaratmaq idi.
Bu idi məqsəd və bu məqsədə, əfsus ki, çatdılar”. Xatırladım ki, hələ ötən ilin
oktyabrında "Valday” Beynəlxalq Diskussiya Klubunun XVI illik iclasının plenar
sessiyasında Prezident İlham Əliyev Ermənistanın baş nazirinin "Qarabağ
Ermənistanın hissəsidir və nöqtə” bəyanatının yalan olduğunu vurğulayaraq
"Qarabağ tarixi, əzəli Azərbaycan torpağıdır. Beləliklə, Qarabağ Azərbaycandır
və nida işarəsi” deyərək, qəti fikrini bildirmişdi. Ölkə Prezidentimizin
"Qarabağ Azərbaycandır” kəlməsi ilə yağı düşmən, onların havadarları
anlamışdılar ki, Azərbaycanın səbir kasası artıq daşıb, illərdir torpaqlarını
əsirlikdə saxladıqları ölkə Ermənistanın fitnəkar bəyanatlarına sözlə deyil,
işlə cavab verməyə qərarlıdır. Bəli, bu gün Azərbaycan Ordusunun qarşısında tab
gətirə bilməyən erməni işğalçıları hərbi maşınlarını, silah-sursatlarını, hətta
bayraqlarını döyüş meydanında qoyub qaçırlar. Haqq işi uğrunda mübarizəyə
qalxan Azərbaycan isə tutduğu yoldan dönmək fikrində deyil. Qarabağ Azərbaycandır!”
Rufik İSMAYILOV