“Tüpürüm sizin partiyanıza”
Demokratiya libasına
bürünən AXCP sədri Əli Kərimlinin təşkilatdaxili idarəetmədə özünü tiran kimi
aparması, proseslərə yanşamada diktatorluq nümayiş etdirməsi, əks fikrə, fərqli
düşüncəyə qənim kəsilməsi partiya üzvlərini məyus edib, cəbhəçilərin ümidlərini
boğub. Belə vəziyyətlə barışmayan partiya üzvlərinin bəzisi çarəni AXCP ilə
yollarını ayırmaqda görür, bir qismi də bəyanatlar səsləndirərək Ə.Kərimlinin
ifşası ilə məşğul olurlar. 1988-ci ildən xalq hərəkatının fəal üzvü, AXCP
Nəzarət Təftiş Komissiyasının (NTK) sədri Aydın Əliyevin bir neçə gündür sosial
şəbəkə üzərindən yaydığı video-müraciətlər, AXCP sədrinin əsl simasını açan
fikirlər buna misaldır. Barəsində səsləndirilən faktlar qarşısında çıxılmaz
duruma düşən Ə.Kərimli şəxsi nəzarətində olan söyüş ordusu vasitəsilə A.Əliyevi
mənəvi terrora məruz qoyub susdurmaq istəsə də, qarşı tərəfi haqlı əməlindən
çəkindirə bilməyib.
Bu yaxınlarda daha bir
cəbhəçi AXCP daxilində baş verənləri ictimailəşdirərək Ə.Kərimlinin əsl
kimliyini ortaya qoyub. Cəbhəçi Dilarə Miriyeva partiyadakı ədalətsizliyə üsyan
edib, tüpürərək AXCP-dən getdiyini vurğulayıb. Belə ki, AXCP üzvü Dilarə
Miriyevanın sosial şəbəkələrdə səs yazısı yayılıb. Səs yazısından aydın olur
ki, D.Miriyeva partiya daxilində edilən haqsızlıqlardan, üzvlərə dəyər
verilməməsindən şikayətlənir, ağlayaraq Ə.Kərimliyə kəskin narazılığını
bildirir: "Nə oldu? Nərmin Xəlil orda, Şəbnəm orda, Türkan orda, Fatimə orda,
hamı orda, hamıya yer oldu Dilarə xanıma yer olmadı? Mən özümü sındırmadım,
amma mənə bilirsiniz necə təsir edib bu? Əməyimin bəhrəsi bu idi? Siz hələ
hakimiyyətə gəlməmisiniz beləsiniz. Hakimiyyətə gəlsəniz məni kimisini, məni
şəxsən ortada "tryapka” kimi istifadə edib atacaqsınız. Özünüz istədiklərinizi
gətirəcəksiniz vəzifəyə, Dilarə xanımın da harda canı çıxır çıxsın. İndiyə
qədər nətər idisə, elə də sürünsün. Demək məndən istifadə edin yalandan
hakimiyyətə gəlmək üçün sonra da məni atın, belə çıxır da. Çox təsir edib mənə,
inanırsınız? Bu gün bütün günü ağlamışam, şəkərim, təzyiqim hara çıxıb
bilmirəm. Hamının gətirib üst başa keçirdir, Emil Səlimovdur bunun hamısını
edən”.
D.Miriyeva AXCp uğuruna hər
şeyini qurban etdiyini, lakin qarşılıq görmədiyini dilə gətirib: "Hər şeyimi
qurban etmişəm bu yolda. Məni il yarım nəvələrimin üzünə həsrət qoyub qızım bu
partiyaya görə. Oğlumu mənim üstümə qaldırıb, gündə onunla davadayıq buna görə.
Bir şey olan kimi Emil bir yandan üstümə düşür, Ruslan Əmirli bir yandan,
Hüseynağa bir yandan hərəsi bir təlimat verir Dilarə xanım belə elə, elə elə.
Həmən Dilarədir də, siz Dilarəni dəyərləndirmirsiniz? Mən onda tüpürüm sizə də,
sizin partiyanıza da, hər şeyə də. Mən ümumiyyətlə partiyadan çıxıram, mənə
lazım deyil bu partiya”.
Yayılmış səs yazısı AXCP
daxilində iyrənc idarəçilik üsulunu, Ə.Kərimlinin tiranlığını, cəbhəçiləri
istismar etdiyini, onlara qarşı mənəvi terror həyata keçirdiyini növbəti dəfə
ortaya qoyub.
Alpər
TURAN