Süjetin redaktəsi
Qərb
təcrübəsində redaktə sənəti ayrıca öyrənilir və müstəqil sənət növüdür. Bizdə
isə bu işlə yazarlar və jurnalistlər əlavə gəlir mənbəyi kimi məşğul olurlar.
Belə olduğu halda hansı peşəkar yanaşmadan söhbət gedə bilər? Əgər ona ikinci
növ iş kimi baxılırsa təbii ki, bu da işin keyfiyyətinə öz təsirini göstərəcək.
Bu gün yerli nəşriyyatlarda redaktor kimi çalışan şəxslər var. Məncə, onlara
maddi baxımdan başqa bir iş təklif olunsa imtina etməzlər.
Səxavət Sahil
İndi
keçək redaktə işinin vəziyyətinə və keyfiyyətinə. Sovet dövründə peşəkar
redaktor məktəbinin olduğu deyilir. Hərçənd ki, keçmiş kitabların və mətnin
səviyyəsinə baxanda bu işin elə də yüksək olmadığı nəzərə çarpır. Lakin indi
heç o da yox vəziyyətindədir. Çünki, indi redaktə dedikdə daha çox, bir
istiqamətli olaraq cümlə quruluşu, söz və ifadələrin redaktəsindən söhbət
gedir. İndi əksərən redaktorlar mətndə elementar problemlərin aradan
qaldırılmasına çalışırlar ki, mətn oxunanda problem yaranmasın. Əslində isə,
redaktə təkcə o problemlərdən ibarət
deyil. Məncə, bu cür xırda məsələlər redaktənin son mərhələsində həyata
keçirilməlidir.
Ədəbi
redaktəyə necə başlamaq lazımdır? Bunun üçün redaktəyə gələn mətnin
xüsusiyyətləri nəzərə alınır. Şeir, hekayə, roman, esse və ya reportajdan asılı
olaraq, mətnə müstəqil yanaşma tələb olunur. Məsələn, hansısa yazar mətndə
xüsusi bir sahəndən olan termindən istifasə edibsə, öncə o termin
dəqiqləşdirilməli, mətndəki yerinə və məna ifadəsinə görə müəyyən edilməlidir.
Təcrübə
göstərir ki, bu kimi mətnlərdə ya sahəvi
redaktorlar olmalıdır, ya da həmin sahənin mütəxəssisləri ilə məsləhətləşmələr
aparılmalıdır. Mətn mərhələli şəkildə elmi, ədəbi, texniki və bədii cəhətdən
işlənib nəşrə hazırlanmalıdır.
Redaktə
prosesində ən vacib mərhələdən biri mətndəki süjetin və ya hadisənin
redaktəsidir. Bu proseslə mətnin cümlə quruluşu və ya ifadələrin redaktəsinin
aparan şəxs məşğul olmalı deyil. Yenə də Qərb təcrübəsinə arxalansaq deyə
bilərik ki, mətnin redaktəsi ilə bir neçə şəxs məşğul olmalıdır. Mətnin və
süjetin redaktəsi ayrı-ayrı ixtisaslaşan redaktorlara həvalə edilməlidir. Süjet
redaktə olunarkən, redaktor hadisələrin inkişafına, ardıcıllığına, bir birinə
bağlılığına, finalına və s. diqqət edir, məntiq səhvləri aradan qaldırır. Bu
proses zamanı redaktor müəlliflə birgə çalışır. Ona süjetlər, obrazlar və
hadisələrlə bağlı təkliflərini, ixtisar və əlavələrini bildirir.
Redaktə
işi ilə maraqlanan və ya araşdırma aparanlar bilir ki, dünyaca məşhur əsərlərin
eləsi var ki, bu cür mərhələli redaktədən sonra çap olunub və uğur qazanıb.
Lakin o əsərlər ilkin vəziyyətində çap olunsaydı, indiki
qədər oxucu sevgisi qazana bilməzdi. Buna misal kimi Ernest Heminqueyin "Qoca
və dəniz” əsərini göstərmək olar. Həmin əsər Heminqueyin böyük bir romanının
bir hissəsidir. Redaktor "qılıncından” kənarda qalan mətnlərdə isə biz
uzunçuluq, yorucu bölmələr, əsərin mahiyyətinə yad olan hisslərə rast gəlirik.
Bəzən hansısa romanı və ya hekayəni oxuyanda düşünürük bu, ideya yaxşıdır, amma
qarışıq və yorucu abzaslar mətni ağırlaşdırır, nəticədə əsər qeyr-ciddi təsir
bağışlayır.Mətnin
bir redaktoru olduqda isə o daha çox elementar məsələlərlə məşğul olur, süjet,
hadisə və dramaturgiyadan uzaqda durmağa üstünlük verir.
Səxavət Sahil