Azərbaycan dünyada pandemiyaya qarşı aparılan tədbirlərə öz töhfəsini verir
Bu, ölkəmizin nə qədər qüdrətli və sülhsevər
olduğunu sübut edir
Koronavirus pandemiyasının dünyanı cənginə aldığı
bir vaxtda Azərbaycan nəinki öz vətəndaşlarının sağlamlığını qorumaq üçün
qabaqlayıcı tədbirlər həyata keçirir, eyni zamanda beynəlxalq təşkilatlarla səmərəli
əməkdaşlıq edir, virusa qarşı mübarizədə həmin qurumlara, həmçinin bir sıra
dövlətlərə ciddi dəstək verir. Misal olaraq qeyd edə bilərik ki, bütün dünya
üçün önəmli vaxtda liderlik göstərmək və çox mühüm əməkdaşlıq formatını
yaratmaq öhdəliyini Azərbaycan öz üzərinə götürüb. Prezident İlham Əliyevin
iştirakı ilə Türkdilli Dövlətlərin Əməkdaşlıq Şurası və Qoşulmama Hərəkatı ilə
uğurlu zirvə görüşləri keçirilib. Zirvə görüşündən sonra üzv ölkələrin müvafiq
nazirlərinin iştirakı ilə koronavirusla mübarizə sahəsində birgə səylərlə bağlı
çox mühüm məsələlərə həsr olunan bir sıra konfranslar baş tutub. Azərbaycan
Ümumdünya Səhiyyə Təşkilatına (ÜST) ianə ayıran birinci ölkələrdən olub və rəsmi
Bakı tərəfindən verilmiş humanitar dəstək 14 ölkəni əhatə edib. Bunun ardınca
Azərbaycanın ÜST vasitəsilə yardıma ən çox ehtiyacı olan daha 15 ölkəyə dəstək
göstərib. Beləliklə, bu çətin zamanda ölkələrin və insanların bir-birini dəstəkləməsinin
zəruriliyi nəzərə alınaraq, Azərbaycan tərəfindən ümumilikdə 30 ölkəyə
humanitar dəstək verilib.
Sevindirici haldır ki, ölkəmizin bəşəriyyətə,
insanlığa xidmət edən humanist addımları beynəlxalq təşkilatların, həmçinin
humanitar dəstək alan və almayan dövlətlərin rəsmi şəxsləri tərəfindən dilə gətirilir,
başqalarına nümunə göstərilir. İyunun 1-də Asiya inkişaf bankının (AİB) təşəbbüsü
ilə Azərbaycan Prezidenti İlham Əliyevlə bankın prezidenti Masatsuqu Asakava,
vitse-prezidenti Şiksin Çen və bankın rəhbərliyinin digər nümayəndələri
arasında keçirilən videokonfransda da bütün bu faktlar minnətdarlıqla
xatırlanıb. Bankın prezidenti M.Asakava qeyd edib ki, AİB COVID-19
pandemiyasının yayıldığı və neftin qiymətinin kəskin aşağı düşdüyü bir vaxtda
Azərbaycanın atdığı addımları tam şəkildə dəstəkləyir. O bildirib ki, Azərbaycan
Prezidentinin rəhbərliyi ilə beynəlxalq platformalarda - Türkdilli Dövlətlərin Əməkdaşlıq
Şurası və Qoşulmama Hərəkatı çərçivəsində pandemiyaya qarşı səylərin əlaqələndirilməsi
dərin təəssürat yaradır. Azərbaycanın Ümumdünya Səhiyyə Təşkilatına (UST)
COVID-19-la mübarizə fonduna toplam 10 milyon ABŞ dolları, o cümlədən bu sahədə
ehtiyacı olan Qoşulmama Hərəkatına üzv dövlətlərə 5 milyon ABŞ dolları həcmində
ianə ayırmasını təqdirəlayiq hal kimi dəyərləndirən M.Asakava pandemiyadan əziyyət
çəkən ölkələrə, o cümlədən Çin Xalq Respublikası, Pakistan, Qırğızıstan,
Tacikistan və Özbəkistana da Azərbaycan tərəfindən yardım göstərildiyini məmnunluqla
dilə gətirib. AİB prezidentinin sözlərinə görə, Azərbaycan hökuməti tərəfindən
pandemiya əleyhinə atılan qabaqlayıcı tədbirlər, ölüm hallarının aşağı səviyyədə
olması və aparılan test sayının artması onu nümayiş etdirir ki, ölkədə səhiyyə
sahəsində risklər çox yaxşı idarə edilir.
Mövzu ilə bağlı Milli Məclisin İqtisadi siyasət, sənaye və sahibkarlıq komitəsinin üzvü
Elnur Allahverdiyev deyib ki, Azərbaycan özünün dayanıqlı iqtisadiyyatı və
faydalı tərəfdaşlığı ilə hətta dünya iqtisadiyyatının resessiyası izlənən
pandemiya dövründə belə, beynəlxalq maliyyə institutları üçün maraqlıdır. Onun
sözlərinə görə, bu, Azərbaycanın həm sabit və rəqabətə dözümlü tərəfdaş
olduğunun, həm də qlobal maliyyə mərkəzləri arasında ciddi nüfuza sahiblənməsinin
göstəricisidir. Deputat bildirib ki, dünya iqtisadiyyatının dərin böhran
keçirdiyi, iqtisadi əlaqələrin minimum səviyyəyə endiyi dövrdə beynəlxalq
maliyyə institutları ilə belə təmaslar həm əlamətdardır, həm də Azərbaycan
iqtisadiyyatına olan etimaddan irəli gəlir: "Xatırlayırsınızsa, aprelin sonunda
Prezident İlham Əliyevlə Avropa Yenidənqurma və İnkişaf Bankının prezidenti
arasında işgüzar videokonfrans keçirilmişdi. Bu görüşün ardınca iki dünya nəhəngi
- CISCO və "Signify” şirkətlərinin rəhbərləri ilə Azərbaycan Prezidenti
arasında da videokonfrans baş tutmuşdu. Son iki görüş həmin şirkətlərin rəhbərlərinin
təşəbbüsü ilə reallaşmışdı. Başqa sözlə, onlar əməkdaşlıqda maraqlıdırlar və bu
fakt bir daha onu göstərir ki, dünyanın aparıcı texnoloji şirkətləri və maliyyə
mərkəzləri bizim rəqabətə dözümlülüyümüzü və yüksək ödəmə qabiliyyətimizi qiymətləndirirlər.
Hazırda qlobal iqtisadi böhran şəraitində dövlətlər və transmilli
korporasiyalar əməkdaşlıq layihələrinə, yeni bazarların kəşfinə və kapital
yatırımına böyük həvəs göstərmirlər. İndiki qeyri-sabitlik erasında dəyərləndirilən
ən vacib kateqoriya reputasiyadır. Müasir iqtisadi proseslərdə tərəfdaşların
reputasiyası və imici həlledici faktora çevrilib. İmic etibarın təminatçısıdır.
Bu gün dünyanın 150-dən çox ölkəsinin beynəlxalq maliyyə institutlarından kredit
istədiyi dövrdə Azərbaycanın özünün özünü təmin etməsindən gözəl reputasiya
göstəricisi ola bilərmi? Büdcələri ayrı-ayrı dövlətlərin büdcəsindən çox olan
şirkətlər, maliyyə mərkəzləri bu amilə ciddi önəm verirlər. İri maliyyə mərkəzlərinin
ölkəmizə marağı Azərbaycanın işgüzar reputasiyasının göstəricisidir”.
E.Allahverdiyev söyləyib ki, Azərbaycanın pandemiya
dövründəki dayanıqlı iqtisadi göstəriciləri, yerli özəl biznesi pandemiyanın zərbələrindən
sığortalamaq tədbirləri, üstəlik, yeni növ koronavirusun fəsadlarından əziyyət
çəkən bir neçə dövlətə, ÜST-ə COVID-19-la mübarizə üçün böyük miqdarda
yardımlar etməsi mühüm əhəmiyyət kəsb edir: "Azərbaycanda qeyri-neft sektorunun
inkişaf etdirilməsi kursu reallığında kənd təsərrüfatı da daxil olmaqla
perspektivli sahələr çoxdur. Xarici kapitalın bu sahələrə axını Azərbaycanın
iqtisadi inkişafına əlavə və yeni təkan verə bilər. Bu, ölkə iqtisadiyyatına
postpandemiya mərhələsində çox vacib olmaqla yanaşı, həm də böhranın fəsadlarını
tezliklə aradan qaldıracağımıza dair proqnozların xeyrinə olan güclü
arqumentdir”.
Milli Məclisin
deputatı Cavid Osmanov da
bildirib ki, Azərbaycan koronavirus pandemiyası dövründə mübarizə tədbirlərini
təkcə ölkə daxilində deyil, eyni zamanda regional və qlobal çərçivədə həyata
keçirilib: "Ölkəmizdə pandemiya ilə mübarizə istiqamətində həyata keçirilən
geniş miqyaslı və sistemli tədbirlər bir daha göstərdi ki, Azərbaycan
Prezidentinin apardığı siyasətin mərkəzində ilk növbədə ölkə vətəndaşı və onun
sağlamlığı dayanır. Eyni zamanda, ölkə iqtisadiyyatının davamlı və dayanıqlı şəkildə
fəaliyyət göstərməsi üçün dövlət tərəfindən özəl sektora çox böyük dəstək
verilib. Bununla yanaşı, Azərbaycan Ümumdünya Səhiyyə Təşkilatına maliyyə dəstəyi
göstərib ki, pandemiyadan əziyyət çəkən ölkələrə yardım edilsin. Ümumilikdə Azərbaycan
belə yardımları 30-a qədər ölkəyə edib. Bu onu göstərir ki, Prezident İlham Əliyev
tərəfindən aparılan uğurlu siyasət nəticəsində koronavirus pandemiyası dövründə
Azərbaycan vətəndaşlarını qorumaqla yanaşı, dünyada pandemiyaya qarşı aparılan
tədbirlərə öz töhfəsini verib. Bu, Azərbaycanın nə qədər qüdrətli, sülhsevər
bir ölkə olduğunu sübut edir”.
Rufik İSMAYILOV