Oktyabrın 19-da Bakının mərkəzində Milli Şura adlı qurum
razılaşdırılmamış aksiyaya cəhd göstərdi. Əvvəlcədən xəbərdarlıq edilməsinə
baxmayaraq, aksiya keçirməyə cəhd edənlər polisin qanuni çağırışlarına məhəl
qoymadılar. Bu səbəbdən də hüquq-mühafizə orqanları əməkdaşları
qanunvericiliyin tələbləri çərçivəsində təhlükəsizliyi təmin etmək məqsədilə
icazəsiz aksiyaya cəhd edənləri ərazidən uzaqlaşdırdı. Maraqlıdır ki, aksiya
bitər-bitməz ABŞ və Avropa təsisatları polisin qanunauyğun hərəkətlərini
"zorakılıq aktı” kimi qələmə veriblər. Halbuki yaxın tarixdə Fransada,
İspaniyada, Böyük Britaniyada, Almaniyada və hətta ABŞ-da polisin vətəndaşlara
qarşı törətdiyi zorakılıqlar daha qabarıq və amansız idi. Məgər Avropa
ölkələrində olduğu kimi Azərbaycanda aksiya iştirakçılarına qarşı dəyənəklərdən,
rezin güllərdən, su şırnaqlarından istifadə edildimi? Bəs niyə görə Qərb öz
gözlərində tiri görməyib, özgədə tük axtarır?
Mövzu ilə bağlı "Kaspi” qəzetinə açıqlamasında Milli Məclisin deputatı Elşən Musayev bildirdi ki, radikal
müxalifətin son aksiyası, daha dəqiqi bu aksiyaya cəhd açıq təxribatdır və
hansısa mətbəxlərdə hazırlanmış "menyu”dur: "Plan da bu idi ki, həmin qanunsuz,
razılaşdırılmamış aksiya vasitəsilə ölkədə sabitlik pozulsun, "qarşıdurma, xaos
menyusu” sosial şəbəkələr vasitəsilə xalqa yedirdilsin. Amma alınmadı! Növbəti
dəfə alınmadı. Biabır və rüsvay oldular. Eynən gözlənildiyi, proqnoz edildiyi
kimi. Bilirsinizmi niyə? Çünki xalq, millət ayıqdır, siyasi cəhətdən tam
maariflənibdir. Xalqın yetkin, formalaşmış fikrini hansısa 3-4 dələduzun,
siyasi qolçomağın feysbuk statusu ilə dəyişmək olmaz. Mümkün deyil! Çünki
xalqla Prezident arasında möhkəm bağ, birlik, etimad var. Azərbaycan xalqı,
vətəndaşı kimin kim olduğunu gözəl bilir və yaxşını pisdən ayırd eləməyi
bacarır”.
E.Musayev vurğuladı ki, bir neçə gündür ağlaşma qurublar ki, imkan
verilmədi, polis müdaxilə etdi: "Axı polis nə etməli idi? Xaos
təşviqedicilərinə gül-çiçək paylamalı idi? Yoxsa onları bəh-bəhlə, ürəklə,
şövqlə yuxarı başa keçirməliydi? Axı öncədən elan olunmuşdu ki, dövlət,
dövlətçilik, ictimai qayda, ictimai əxlaq əleyhinə olan bütün addımların
qarşısı birmənalı şəkildə alınacaq. Müxalifət bütün bunları bilə-bilə şüurlu
formada niyə gedirdi cinayətə? Niyə "Lökbatan təminatı” varkən, "28 May
qarşıdurması” - variantı seçildi? Bəlkə radikallara verilən göstəriş, təlimat,
trayektoriya belə olub? Bu sual ciddi
düşünmək üçün əsas deyilmi?
Hələ bizi qınayan bəzi beynəlxalq təşkilatlar, təsisatlar, diplomatik
korpus nümayəndələri var. Onlar
Avropadakı təlatümlərdən, polis-vətəndaş qarşıdurmalarından xəbərdardırlarmı?
Görmürlərmi ki, həmin dövlətlərin hüquq-mühafizə orqanları, asayişə cavabdeh
qurumları qanunsuz aksiyalarda, razılaşdırılmamış mitinqlərdə insanlara qarşı
necə davranırlar? Yoxsa gözləri ancaq bizi görür? Həm də ədalətsizcə və
özlərinə sərf edən şəkildə görür? Azərbaycan polisi dünyanın ən sivil, ən
loyal, ən ədalətli polislərindəndir. Vəzifələri də asayişi qorumaqdır və üzərilərinə
düşəni edirlər.
26 ildir eyni qaragüruh fəaliyyət, 26 ildir eyni şablonlar, eyni
fəndlər... Usanmadılarmı bunlar? Yorulmadımı bunlar? Budurmu müxalifətçilik?
Budurmu millətçilik? Budurmu dövlətçilik?
Onsuz da bitmişdilər, tarixin arxivinə çoxdan gömülmüşdülər. Son
aksiya isə yerlərini bir az da dərin elədi, həmin gömüldükləri yerdə bu dəfə
tam yerin dibinə batdılar”.
Bütöv Azərbaycan Xalq
Cəbhəsi Partiyasının (BAXCP) sədr müavini Elçin Mirzəbəyli bildirdi ki,
bəzi beynəlxalq təşkilatların aksiyadan sonra pozitiv göstəriciləri nəzərə
almadan münasibət bildirməsi sübuta yetirdi ki, bəyanatların çoxu öncədən
hazırlanıb: "Bu bəyanatları bəlkə də əvvəlcədən imzalayıblar və aksiyadan
dərhal sonra yayıblar. Bakının mərkəzində keçirilən icazəsiz aksiya ilə bağlı
bir neçə məqamı nəzərə almaq lazımdır. Birincisi, Azərbaycanda sərbəst
toplaşmaq hüququ qorunur və bu məqsədlə müraciət edən şəxslərin müraciətinə
uyğun olaraq dövlət tərəfindən onlara yer ayrılmışdı. Digər tərəfdən, öncədən
dəfələrlə xəbərdarlıq edilmişdi ki, Azərbaycan dövləti vətəndaşların
təhlükəsizliyini təmin etmək üçün konkret olaraq icazəsiz aksiyanın keçirildiyi
ərazidə hər hansı bir kütləvi iğtişaşın baş verməsinə imkan verməyəcək və
qarşısını alacaq. Dövlətin alternativ yer təklif etməsinə və sərbəst toplaşmaq
hüququnu həyata keçirmək üçün bütün imkanların yaradılmasına baxmayaraq, yenə
də qanunsuz aksiyaya, qarşıdurmaya cəhd olundu. Təbii ki, müvafiq qaydada
Azərbaycan polisi də qanunvericiliyin tələblərinə uyğun olaraq hərəkət etdi və
qanundan kənar hər hansı bir davranış ortada yoxdur. Bu gün radikal düşərgənin
təmsilçilərinin ayrı-ayrı sosial şəbəkələrdə Brüsseldə, İspaniyada və Avropa
ölkələrində olan görüntüləri yayaraq bunun Azərbaycanda baş verdiyini deməsi də
ona əsas verir ki, bu təxribat öncədən hazırlanmış bir prosesdir”.
E.Mirzəbəyli qeyd etdi ki, Fransada polisin tək aksiya iştirakçıları
deyil, kənardan izləyən vətəndaşlara qarşı edilən zorakılığı ilə bağlı
beynəlxalq təşkilatların bir bəyanatını görə bilmədik: "Bu aksiyalar zamanı
jurnalistlərin həbs edilməsinə, onlara qarşı təzyiqlərin göstərilməsinə
beynəlxalq təşkilatların münasibətini görmədik. Eyni ilə Böyük Britaniyada,
Almaniyada, Belçikada keçirilən aksiyalarda da bu vəziyyət təkrarlandı. Hətta
Almaniyada prosesdən öncə ayrı-ayrı kütləvi informasiya vasitələrinin
ofislərinə gedərək onlara xəbərdarlıq da etmişdilər. Bütün bunlar göstərir ki,
bu, sadəcə, Azərbaycana qarşı öncədən planlaşdırılmış bir kampaniyadır. Həmin o
radikal, dağıdıcı müxalifətin nümayəndələri də bu kampaniyanın tərkib hissəsi
kimi sifariş yerinə yetiriblər”.
Bakı 21°C
