• cümə axşamı, 13 iyun, 04:08
  • Baku Bakı 24°C

Dollara tələbin artması manat üçün risklər yaradırmı? - RƏY

28.03.23 19:54 819
Dollara tələbin artması manat üçün risklər yaradırmı? - RƏY

Mərkəzi Bankın bu gün təşkil etdiyi hərracda xarici valyuta tələbi 96,3 milyon dollar olub. Əvvəlki hərracda sifarişin 47,9 milyon dollar olduğunu nəzərə alsaq, dollara tələbin 2 dəfədən çox artdığını görürük. Dollara tələbin artması manat üçün risklər yaradırmı? Tələbin artması səbəbləri nədir?

Tələbin artmasının əsas səbəbi qeyri-iş günlərinə görə təxminən son iki həftədə valyuta hərracların keçirilməməsidir. Biznesin dollara bəlli tələbi var və bayram günləri banklar çalışmadığı üçün bugünkü hərracda artan sifarişlərə əsasən məbləğ formalaşdı. Nəticədə, dollara tələbin hiss edilən səviyyədə yüksəlməsi qeydə alındı.

Kaspi.az xəbər verir ki, bu barədə iqtisadçı-ekspert Vüqar Bayramov deyib.

Ekspert bildirib ki, oxşar tendensiya 2022-ci ilin Novruz bayramından sonra da müşahidə olunmuşdu. Belə ki, 2022-ci il martın 29-u hərracında dollara tələb 105 milyon dollar olsa da, sonrakı hərracda sifariş həcmi 72,2 milyon dollara, daha sonra 68 milyon dollaradək azaldı. Bu baxımdan, növbəti hərraclarda mərhələli şəkildə sifariş həcminin azalacağı gözlənilir. Amma təbii ki, bu, birbaşa hərracların hansı dövrdə keçirilməsindən asılı olacaq. Dollara hərracda tələbin optimallaşdırılması üçün Mərkəzi Bank tərəfindən yaxın günlərdə yenidən hərracın təşkil edilməsi vacibdir.

“2022-ci ildə Azərbaycanın idxalı 14 milyard 539 milyon dollar olub. 2021-ci ildə idxal 11 milyard 705 milyon dollar, 2020-ci ildə isə 10 milyard 732 milyon dollar idi. Göründüyü kimi, illər üzrə idxalda hiss edilən artım var. Bunun bir hissəsi dövlət sifarişləri olsa da, biznesin də payı az deyil. Təbii ki, idxal inflyasiyasi da digər indikatordur. İdxal artdıqca dollara tələb də artır. Doğrudur, ixracatda da artım yüksəkdir. Bununla yanaşı, nəzərə almaq lazımdır ki, ixrac qazancımızın əhəmiyyətli hissəsi enerji gəlirləri olaraq valyuta ehtiyatlarımızı artır. Bütövlükdə, idxal həcmi və xarici səfərlərin intensivliyini nəzərə aldıqda yaz aylarında dollara tələbin kəskin azalacağı gözlənilmir”, - deyə V.Bayramov qeyd edib.

banner

Oxşar Xəbərlər