Türkiyədən iqtisadi “asılılıq”
Ekspertlərin fikrincə, Ermənistanın Türkiyənin iqtisadi təsiri altına
düşməsi bu ölkə üçün əlavə dividendlər qazandıracaq
Ermənistanla Türkiyə arasında sərhədlərin açılması yeni reallıqlar
kontekstində mümkün görünür. Hətta bu istiqamətdə ayrı-ayrı ölkələrin
ekspertləri fikirlər səsləndirir və qeyd edirlər ki, Ermənistan Türkiyədən
iqtisadi cəhətdən asılı vəziyyətə düşəcək. Hətta Ermənistandakı bəzi dairələr
bunu qorxulu tendensiya adlandırır. Rusiyalı ekspertlər də bunu istisna
etmirlər. Maraqlıdır ki, Ermənistanın Türkiyədən iqtisadi cəhətdən
"asılılığı" ermənilərə nə verəcək? Ümumilikdə, bölgədə hansı
dəyişikliklərin şahidi olacağıq?
Mövzu ilə bağlı "Kaspi” qəzetinə açıqlamasında "Atlas” Araşdırmalar Mərkəzinin rəhbəri, politoloq Elxan Şahinoğlu bildirdi
ki, ilk olaraq sərhədlərin açılıb-açılmayacağını gözləmək lazımdır: "Çünki
Ermənistan Azərbaycan və Türkiyənin ərazi bütövlüyünü tanımağa tələsmir. Bu
olmadan nə Türkiyə sərhədi açacaq, nə də Azərbaycan münasibətləri formalaşdıracaq.
Yəni Paşinyan bu istiqamətdə addımlar atmalıdır, iki qonşusunun ərazi bütövlüyünü
tanımalıdır. Bundan sonra sərhədlərin açılması aktuallaşa bilər. Digər yandan,
rusiyalı və hətta erməni ekspertlərin fikirləri ilə razıyam ki, əgər sərhədlər
açılsa, iqtisadi əlaqələr bərpa olunsa, Ermənistanın həm Azərbaycandan, həm
Türkiyədən asılılığı artacaq. Çünki Azərbaycan vasitəsilə müəyyən regional
layihələrə qoşulacaq. Bundan sonra Azərbaycana və Türkiyəyə qarşı ərazi iddiası
qaldırarsa, sərhədlər qapanacaq və regional layihələrdə iştirakı
məhdudlaşdırılacaq, iqtisadiyyatına böyük zərər dəyəcək”.
İqtisadçı Eldəniz Əmirov bildirdi ki,
perspektivdə Türkiyə ilə Ermənistan arasında sərhədlərin açılması məsələsi
qaçılmaz zərurət olacaq: "Çünki "Zəngəzur dəhlizi” açıldıqdan və böyük sülh
sazişi imzalandıqdan sonra, yəqin ki, bir çox siyasi məsələlər orada öz həllini
tapacaq. İstər siyasi, istər hərbi, istər iqtisadi münasibətlərin yeni
platforması, eskizləri cızılacaq. Bu zaman Türkiyə ilə Ermənistan arasında
sərhədlərin açılma məsələsi də mütləq şəkildə baş verəcək. Sərhədlərin açılmasının
nə verəcəyi ilə bağlı suala gəldikdə isə, Türkiyə-Ermənistan sərhədinin açılmasının
həm iki ölkəyə, həm də üçüncü, dördüncü tərəflərə üç formada təsiri olacaq. Yəni
biz Ermənistan, Azərbaycan, Türkiyə, Rusiya, İran Gürcüstan və digərlərini də
məhz bu üç kontekstdə qiymətləndirə bilərik. Hansı ölkəyə bunun zərəri olacaq,
hansı ölkəyə xeyri olacaq.
Deməli, Ermənistanla Türkiyə arasında sərhədlərin açılmasında fayda
görən ölkələr Azərbaycan, Türkiyə və Ermənistan olacaq. Amma sərhədlərin
açılmasını arzu etməyən və bunu ifadə etmək istəməyən ölkələr də var. Yəni İran,
Rusiya, eləcə də Gürcüstanın özü sərhədlərin açılmasını istəmir. Bir də uzaq
ölkələr var ki, nə Ermənistan, nə Azərbaycan, nə də Türkiyə ilə müttəfiq deyil.
Onlar da bu məsələdə neytral mövqe nümayiş etdirirlər.
Azərbaycan üçün Türkiyə-Ermənistan sərhədlərinin açılmasının iqtisadi
əhəmiyyəti yox dərəcəsindədir. Amma daha çox əhəmiyyəti siyasi və hərbi
stabilliyin bərqərar olması, sülh sazişinin imzalanması və uzunmüddətli icrası
ilə bağlıdır. Ermənistanın iqtisadi cəhətdən Türkiyənin asılılığına düşməsi,
belə deyək, diktəedici bir funksiyanı yerinə yetirməsi, stabilliyin təmin
olunması Azərbaycan üçün çox vacibdir. Yəni Azərbaycana daha çox
siyasi-iqtisadi tərəfdən faydalıdır”.
E.Əmirov qeyd etdi ki, Türkiyə "Zəngəzur dəhlizi”ndən istifadə edərək
Orta Asiya əlaqələrini daha da şaxələndirməyi planlayır: "Çünki Türkiyənin
xarici ticarət dövriyyəsində Orta Asiya ölkələrinin xüsusi çəkisi çox aşağıdır.
Bu da birbaşa çıxışın olmamağı ilə bağlı idi. İndi Türkiyə "Zəngəzur dəhlizi”ndən
istifadə edərək Orta Asiyaya çıxacaq. Bu da qismən Ermənistan ərazisindən
istifadəyə gətirib çıxarır. Sonradan isə sərhədlərin tam açılması ilə Türkiyə
yeni bazar qazanmış olacaq. İlk növbədə ixrac yönlü məhsullar üçün bir bazar
əldə edilmiş olacaq və bu da, sözsüz ki, Türkiyəyə iqtisadi cəhətdən fayda
verəcək. Türkiyənin iqtisadi cəhətdən güclənməsi siyasi təsir imkanlarını da
formalaşdıracaq.
Ermənistanın sərhədlərin açılması məsələsində götürdüyü dividendə gəldikdə
isə deyə bilərəm ki, region ölkələri arasında ən böyük fayda götürən Ermənistan
olacaq. Təsəvvür edin ki, hazırda Ermənistan vitrinləri dağıdılmış, pəncərəsi sınıq,
qapısına isə icarəyə verilir” yazılmış boş bir obyekt şəklindədir. Yəni Ermənistan
onsuz da batır və mütləq şəkildə hansısa ölkənin tabeliyində olmalıdır. Əgər
bir ölkə hansısa ölkənin təsiri altına düşməklə bağlı seçim edirsə, o zaman
iqtisadi cəhətdən daha müasir, inkişaf etmiş ölkəni seçməlidir, təbii ki,
ağılları olarsa. İndiki halda Ermənistanın ağıllı gedişi məhz Türkiyəni seçməsi
olacaq. Yəni Türkiyənin iqtisadi təsiri altına düşməsi, bu ölkə üçün əlavə dividendlər
qazandıracaq.
Əlavə edim ki, Türkiyə-Ermənistan sərhədlərinin açılması Ermənistanı Rusiya
və İranın təsirindən qismən qurtarmış olacaq. Fikrimcə, erməni tərəfi
Türkiyə-Ermənistan sərhədlərinin açılmasına sevinməlidir.
Əlbəttə ki, Gürcüstan, İran və Rusiya üçün sərhədlərin açılması
arzuolunan hal deyil. Amma hansı ölkənin arzu etməsindən və ya etməməsindən asılı
olmayaraq, sülh sazişindən sonra sərhədlərin açılması bir zərurət olacaq. Bu,
ümumilikdə regionda iqtisadi inkişafa, stabilliyə töhfə verəcək vacib addımdır”.
BƏXTİYAR