Bakı 21°C
“Səni sevirəm” deməkdən heç zaman çəkinməmişəm
Türk musiqisinin canlı əfsanəsi
Zerrin Özer son illər üzləşdiyi narahatlıqlara görə musiqidən bir qədər uzaq düşmüşdü.
Ancaq ötən ay "Harbiden git” adlı albomunu tamaşaçılara təqdim etməsi ilə musiqi
dünyasına geri dönüşünü elan etdi. İfaçının bu addımı tamaşaçıları tərəfindən
müsbət qarşılandı.Türkiyə mətbuatına müsahibə
verən Z.Özer səhnə üçün darıxdığını deyir. Türk dünyasının tanınmış sənətçisinin
yerli mətbuata verdiyi müsahibəni sizə təqdim edirik.
- Zerrin xanım, uzun müddətdir ki, şou aləmində yoxsunuz. Yeni albomunuzun işıq üzü görməsi ilə bu sənətdə hələ də var olduğunuzu sübut etmiş oldunuz. Necə oldu ki, belə bir albom çıxarmağa qərar verdiniz?
- Uzun müddətdir ki, səhhətimlə
bağlı problemlər yaşayırdım. Məhz bu səbəbdən sənətdən bir qədər kənar
düşmüşdüm. Müalicəm xeyli çəkdi. Bilirsiniz
ki, əvvəllər öz üzərimdə daha çox çalışırdım, yaradırdım. Mütəmadi olaraq televiziyada
verilişlərə çıxırdım. Özüm də dövlət televiziyamızda - TRT-də veriliş aparıcısı
idim. Bunun üçün albom çıxarmağa vaxtım yox idi. İndi isə özümü çox gümrah hiss
edirəm. Yeriyə, qaça, hətta rəqs edə bilirəm. Bu pozitiv enerjimi böyük bir albom
ilə mükafatlandırdım. Prodüserim Kamal Aslanla birlikdə çox uğurlu bir layihəyə
imza atdıq. Nə yaxşı ki, belə bir albom çıxardım. Bu albomum işıq üzü gördükdən
sonra fanlarımın, sevənlərimin mənim üçün darıxdığının bir daha şahidi oldum.
- Mən heç zaman musiqidən uzaqlaşmamışam. Musiqi mənim nəfəsim, yaşam qaynağımdır. Bəzən içimə qapanıb özümü, daxilimi dinlədiyim zamanlar olur. Şou biznesdən uzaq dursam da, musiqi dinləyərkən içimdə onu doya-doya yaşayıram. Biz sənətçilər duyğusal insanlarıq. Ona görə də zaman-zaman özümüzə qapanma hallarımız ola bilər.
- Bir dəfə Azər Bülbül ilə münasibətinizin olmadığını qeyd etmişdiniz. Ancaq yeni albomunuzda onun "Duyğularım” mahnısını ifa etmisiniz. Bu necə ola bilər?
- Bəli, albomda yer alan ikinci mahnımız Azər
Bülbülə məxsus olan möhtəşəm bir əsər oldu. Onunla gec tanış olduğum üçün
təəssüf hissi keçirirəm. Həqiqətən də bu mövzuya gələndə "Kaş ki” deməkdən
özümü saxlaya bilmirəm. Kaş ki, Azər Bülbülü ölmədən əvvəl tanıya bilsəydim.
Onun pərəstişkarlarından biri gözəl bir
ifadə səsləndirmişdi. O söz mənə çox təsir etmişdi. Bu ifadəni eşidəndə çox
ağladım: "Beşulduzlu sənətçi üçulduzlu hoteldə ölü tapılıb”. Çox gözəl sənətçi
idi, heyf ondan. Onun unudulmağını istəmirəm. İstərdim ki, onunla tanış olum, birgə
işlərimiz olsun, ancaq alınmadı. Qeyd edim ki, "Duygularım” mahnısına 2 aydan sonra klip
çəkdirəcəyik. Bu mahnı çox fərqli oldu. Mənim ifamda yenidən həyat tapdı.
- Biz sizi Şərq və Qərb musiqilərinin ən gözəl sintez ifaçısı kimi tanıyırıq. Maraqlıdır, özünüzün musiqi karyeranıza baxış bucağınız necədir?
- Şərq və Qərb musiqisinin sintezinin hər nə qədər doğru ifaçısı olduğumu deyə bilmərəm. Türkiyə və türk xalqı məni olduğum kimi qəbul edib, xoşbəxtliklərini, kədərlərini mahnılarımda tapıblar. Özüm də bəzən ifa etdiyim arabesk mahnıların içərisində itib-batıram. İfamda arabesk musiqini dinləyənlər Şərq və Qərb sintezini yaşamış olurlar.
- Karyeranızla bağlı həyata keçməyən ən böyük xəyalınız nə idi?
- Karyeramla bağlı ən böyük xəyalım Tina Törner
ilə duet oxumaq idi.
- Cenis Coplinin ən böyük pərəstişkarlarından olduğunuzu bilirik. Zerrin Özer və Cenis Coplinin ortaq tərəfləri nələrdir? Onun yaradıcılığının sizin ifa tərzinizə hər hansı təsiri olubmu?
- Bizim aramızda münasibətlər ancaq kədərlə bağlıdır. Onun çox kədərli bir gəncliyi olub. O, 27 yaşında dünyasını dəyişib. Onunla ortaq nöqtəmiz kədər oldu. O, narkotik istifadəçisi idi. Məhz bu səbəbdən də dünyasını dəyişdi. Ancaq mən pis vərdişlərdən uzağam. Cenis də mənim kimi insanları çox sevirdi. Bütün duyğularını səhnədə yaşayırdı. Onunla sevgi mövzunda birə-bir eyniyik.
- Türkiyədə və dünyada hansı musiqiçiləri dinləyirsiniz?
- Rəhmətlik Emi Uaynhaus və
Adeli dinləyirəm. Bir də Adam Lamberd, "Queen”in yeni solistinin səsini çox bəyənirəm.
Mən pop musiqiləri sevmirəm. Musiqinin tərkibində gurultu varsa, onu dinləmirəm.
Mahnılara tərzlərinə görə qulaq asıram. Son dönəmlər "Səssiz gəmi”ni ifa edən
Aylanı dinləyirəm. Türkiyədə uzun müddətdir ki, eşidilməyən bir səs tembrinə
malikdir. Bu, Türkiyə üçün həqiqətən də dəyərlidir. Belə səslərə türk musiqi dünyasının
ehtiyacı var. Bu ifaçının mahnılarını hər kəsin də dinləməyini tövsiyə edirəm.
- Sizcə, özəl yaşantılarınızdakı Zerrini ən yaxşı izah edən hansı mahnınızdır?
- "Şimdi hayallerdesin” mahnısı Zerrin Özerin duyğularından bəhs edir. Daxilimdəki hayqırtı və üsyanlarım isə "Harbiden git” mahnısında öz əksini tapıb.
- Keçmişə nəzər salsaq, görəcəyik ki, sizin bəzi çıxışlarınız cəmiyyətimiz tərəfindən qəbul olunmur. Zaman-zaman alqışlandınız və tənqid olundunuz.
- İnsanların məni alqışlaması və ya müzakirə edib, tənqid etməsi heç zaman məni maraqlandırmayıb. Həyatım boyu yüksək səslə yaşamışam. Sevdiyimi və sevmədiyimi açıq şəkildə bildirmişəm.
- Sizcə, bir sənətçi siyasətlə bağlı fikir bildirməlidirmi?
- Həyatımda heç zaman siyasətlə
bağlı hər hansı məsələyə münasibət bildirməmişəm. Daima sevdiyim insanlardan
bəhs etmişəm. Bu mənim insanlara olan sevgimdən irəli gəlir. Hesab edirəm ki, sənətçilər
siyasətdən anlamazlar. Mənim rəyimi hər kəs bilir. Sənət insanlarının qəlbləri
kövrək olur və bu baxımdan siyasətdən bəhs etmələrini düzgün hesab etmirəm. Biz
sevgi ilə yaşayan insanlarıq. Həyatımı sevgiyə
görə yönləndirdiyim üçün həqiqətən sevdiyim insanlara "səni sevirəm” deməkdən heç
zaman çəkinməmişəm. Sevdiyim insanların nə işlə məşğul olması məni maraqlandırmır.
- Türkiyədə özünüzü sərbəst hiss edirsinizmi? Sizcə, fərqli yaşam tərzləri ölkəmizdə dəstəklənirmi?
- Türkiyə öz adət-ənənələri, tərbiyəsi, dünyagörüşü ilə inkişaf etmiş ölkələr arasında yer alıb.
- Həddindən artıq LGBT (cinsi azlıq) tamaşaçı kütləniz var. Cinsi azlıqdan əziyyət çəkənlər sizi özlərinə ikona hesab edirlər. Bunu nə ilə əlaqələndirirsiniz?
- Çünki onları çox sevirəm. Onlar da məni sevirlər. Biz bunu qarşılıqlı şəkildə hiss edirik. Sevgi izah ediləsi mümkün olmayan bir duyğudur.
- Sizin bu tip dostlarınız kifayət qədərdir. Sizcə, ölkəmizdə LGB və xüsusi ilə trans olaraq yaşamanın çətinlikləri nələrdir?
- Təbiidir ki, onlar çox şiddət görürlər. Mən də bu hadisələri görürəm və
onlara görə çox məyus oluram. Onlar üçün əlimdən gələn hər şeyi edə bilərəm.
Təki onlar xoşbəxt olsunlar.
- Bir vaxtlar "Türkiyədəki kişilərin 50 faizi biseksualdır”-deyə bir açıqlamanız olmuşdu. Nə üçün belə düşünürdünüz?
- Həyatda yaşamaq özü bir təcrübədir. Hələ də bu sözümün arxasındayam. Bu müsahibəni oxuyan kişilər qoy bu suala cavabı öz daxillərində axtarsınlar.
- Sizcə, Türkiyədə kifayət qədər tanınan sənətçi olaraq sizi dəstəkləyən LGBT pərəstişkarlarınıza ehtiyacları olan dəstəyi verə bilirsinimzi?
- Mən kimsənin nə isə etdiyinə inanmıram. Hər kəs bilir ki, insan haqlarını müdafiə edən bir insanam. Onlar üçün
doğru olan hər şeydə yanlarında olmağı çox istəyirəm.
- Övladınız olsaydı və o da cinsini dəyişmək istəsəydi, sizin ona münasibətiniz necə olardı?
- Övladdır, onu anlamağa və xoşbəxt etməyə çalışardım. Kədərini unutdurmaq üçün hər şey edərdim.
Tərcümə etdi: Xəyalə Rəis
