Səkkiz il sonra təkrarlanan uğur 

“Qarabağ” Çempionlar Liqasının Liqa mərhələsində iştirak etmək hüququ qazandı. Mövsümün sonunda heyətdə baş verən dəyişikliklərə, xüsusən hücum xəttindəki çatışmazlıqlara görə komandanın bu uğuru əldə edəcəyi o qədər də inandırıcı görünmürdü. Amma çempionumuz boyundan yuxarı tullanmağı bacardı. 

“Qarabağ” növbəti dəfə adını Azərbaycan futbolu tarixinə qızıl hərflərlə yazdırmağı bacardı. Avrokuboklardakı ən uğurlu təmsilçimiz ikinci dəfə Çempionlar Liqasının əsas mərhələsində iştirak edəcək. İlk dəfə 2017/18 mövsümündə qrupa yüksələn Qurban Qurbanovun komandası bu dəfə Liqa mərhələsinin ləzzətini “dadacaq”.

Əsas mərhələyə aparan yol

“Qarabağ” qitənin bir nömrəli klub turnirində mübarizəyə II təsnifat mərhələsindən başladı. Burada rəqib İrlandiya təmsilçisi “Şelburn” idi. Rəqiblə hər iki qarşılaşma “atlılar”ın qələbəsi ilə yekunlaşdı. Səfərdə üç cavabsız qolla üstün olan çempionumuz Bakıdakı cavab oyununda çox güc sərf etmədən minimal hesablı qələbə ilə kifayətləndi. III təsnifat mərhələsindəki rəqib daha güclü olsa da, ümumilikdə, “Qarabağ”ın pley-off yolu rahat görünürdü. Burada Şimali Makedoniyanın “Şkendiya” kollektivi ilə üz-üzə gələn ağdamlılar yenə hər iki oyunda qalib gəlməyi bacardılar. Səfərdəki minimal hesablı qələbənin ardınca komandamız ev oyununda rəqibinə heç bir şans vermədi - 5:1. 

Dramatik oyunlar, qələbəyə bərabər məğlubiyyət

“Qarabağ” Liqa mərhələsinə vəsiqə uğrunda köhnə tanışı, Macarıstanın “Ferentsvaroş” klubu ilə üz-üzə gəldi. Komandalar ÇL-in 2022/23 mövsümünün III təsnifat mərhələsində üz-üzə gəlmiş, Bakıdakı 1:1 hesablı heç-heçədən sonra “Qarabağ” səfərdə rəqibini 3:1 məğlub edərək pley-offa adlamışdı. Həm “Şelburn”, həm “Şkendiya”dan güclü olan Macarıstan klubu ilə oyunlar gözlənildiyi kimi gərgin keçdi. Budapeştdə dramatik məcrada davam edən oyunun ilk hissəsini meydan sahibləri minimal üstünlüklə başa vurdular. Lakin fasilədən sonra komandamız meydanda fırtına kimi əsdi. Marko Yankoviç, Kevin Medina və Musa Qurbanlının qolları ilə möhtəşəm geridönüşə imza atan təmsilçimiz tapşırığın böyük hissəsini həll etmişdi. Bununla belə, Bakıdakı cavab qarşılaşmasının heç də asan keçməyəcəyi bəlli idi. Gözlənilən kimi də oldu. Tofiq Bəhramov adına Respublika Stadionunda keçirilən görüşdə də ilk qolu macarlar vurdular. Lakin elə hissənin sonuna qədər “atlılar” nəinki bərabərliyi təmin etdilər, hətta üstünlük qazandılar. Leandro Andrade və Abdullah Zubirin qolları komandamızın işinə yaradı. Bitmək bilməyən ikinci yarı “Ferentsvaroş”un yekunda 3:2 hesablı qələbəsini rəsmiləşdirdi. Xüsusən son dəqiqələrdə rəqib aramsız hücumlarla təzyiq yaratsa da, “Qarabağ”ın müdafiə xətti və qapıçı Mateuş Koxalski sınaqdan üzüağ çıxmağı bacardılar. Komanda məğlub olsa da, bu, qələbəyə bərabər məğlubiyyət idi. “Qarabağ” iki oyunun cəmində 5:4 üstün olaraq Liqa mərhələsinə vəsiqə qazandı. 

Uğura verilən ən böyük dəyər

“Qarabağ”ın növbəti tarixi nəticəsi Prezident İlham Əliyev tərəfindən yüksək qiymətləndirildi. Dövlət başçısı komandanın qələbəsi ilə bağlı sosial şəbəkə hesablarında paylaşım etdi:

“Azərbaycanın “Qarabağ” klubu UEFA Çempionlar Liqasının əsas mərhələsinə vəsiqə qazanaraq futbol tariximizdə yeni bir səhifə yazdı!

“Qarabağ” klubunun bütün komanda heyətini və azarkeşləri təbrik edirəm!”.

“Hədəf Liqa mərhələsinə düşmək idi”

Oyundan sonra göz yaşlarını saxlaya bilməyən “Qarabağ”ın baş məşqçisi Qurban Qurbanov əsas hədəfə çatdıqlarını söyləyib. Prezident İlham Əliyevin təbrikinə görə qürurlandığını bildirən qələbənin memarı diqqətə görə təşəkkürünü ifadə edib:

“Hədəf Liqa mərhələsinə düşmək idi. Bu cür oyunlar ölkə futboluna inamı daha da çoxaldır. Futbolçular daha da böyüyür. Çox böyük təcrübədir. Hər bir futbolçunun arzusudur ki, ən böyük turnirdə iştirak etsin. Ən azından 3-4 böyük klub olacaq, onların 1-2-ni Bakıda görəcəklər. Bu da futbolun sevilməsi üçün böyük addımdır.

Prezident İlham Əliyev “Qarabağ”ı təbrik edib. Bunu qürur hissi ilə qarşılayıram. Bir daha gördük ki, ölkə başçısı oyunlarımızı izləyir və bizə dəstək olur. Mən də öz növbəmdə bu qələbə münasibəti ilə Prezident İlham Əliyevi və ailəsini təbrik edirəm”.

Qarşıda nə var?

Qurban Qurbanovun dediyi kimi, başlıca məqsəd əsas mərhələyə vəsiqə qazanmaq idi. Bu, həm idman nailiyyəti kimi böyük nəticədir, həm də maliyyə cəhətdən kluba ciddi fayda verəcək. “Qarabağ” bununla boyundan yuxarı tullanmağı bacardı. Mövsümün sonunda heyətdə baş verən dəyişikliklərə, xüsusən hücum xəttindəki çatışmazlıqlara görə komandanın bu uğuru əldə edəcəyinə şübhələr çox idi. Lakin bir daha sübut olundu ki, futbolçular gedə bilər, əsas sistemin qalması və davamlılığıdır. “Qarabağ”ın uğurlarının arxasında da məhz bu dayanır. Qarşıda təmsilçimizi çətin oyunlar gözləyir. Real yanaşsaq, Liqa mərhələsində şanslar elə də böyük deyil. Lakin əminliklə demək olar ki, “Qarabağ” ad-sanından asılı olmayaraq, heç bir rəqibə asanlıqla təslim olmayacaq. Fanatları bir-birindən zövqlü səkkiz Çempionlar Liqası oyunu gözləyir. Püşkə əsasən, komandamız Liga mərhələsində "Çelsi" (Bakıda), "Liverpul" (səfərdə), "Benfika"' (səfərdə), "Aynttraxt" (Bakıda), "Ayaks" (Bakıda), "Napoli" (səfərdə), "Atletik" (səfərdə) və "Kopenhagen"lə (Bakıda) qarşılaşacaq.