Proqnozlara qarşı çıxan qiymət
Neftin qiymətləri ilin əvvəldəki ehtiyatlı
proqnozları darmadağın etməkdə davam edir
Pandemiya həyatın bütün sahələrində olduğu kimi
neft sənayesini də dalğalandırdı. Neftin artan və azalan qiymətləri bizi hər
gün təəccübləndirməyə davam edirdi. Virusun səngiməsi, vaksinasiya prosesləri
neft qiymətlərində yenidən gözlənilməz nəticələrə gətirib çıxardı. Neftin
qiymətləri proqnozların əksinə gedərək 74 dollara qədər qalxdı.
Proqnozlara görə, neftin qiyməti 2021-2022-ci
illərdə 50 dollar civarında olmalı idi. Belə ki, Dünya Bankının 2021-ci ilin
ilk "Qlobal İqtisadi Perspektivləri” hesabatında 2022-ci ildə dünya bazarında
neft qiymətlərinin 13,6 faiz artması, 2021-ci ildə isə neftin orta qiymətinin
44 dollar olması gözlənilirdi. Eləcə də, 2022-ci il proqnozuna görə, neftin bir
barel üçün orta qiyməti 50 dollara yaxın olacağı hesab edilir.
Bəs "qara
qızıl”ın qiymətlərinin proqnozların əksinə getməsinin, axına qarşı üzməsinin
səbəbi nədir?
Neft
Araşdırmaları Mərkəzinin rəhbəri İlham Şaban bildirir ki, dünyada gedən proseslər pozitiv
əhval-ruhiyyə üçün yaxşı şərait yaradıb. Neftin qiymətlərinin proqnozları doğrultmamağı
məsələsinə gəldikdə isə, ekspert deyir ki, neftin qiymətinin proqnozlaşdırılması
mürəkkəb prosesdir: "Neftin qiymətlərinin artmasına səbəb bir neçə faktorun
üst-üstə düşməsi idi. Birinci faktor ötən həftə açıqlanan OPEC-in hesabatı idi.
OPEC-in qlobal bazarda gündəlik 2 milyon barellik artım tələbinin olacağı ilə
bağlı proqnozu neftin qiymətinin bahalaşmasına səbəb olub. Bu rəqəm növbəti
ildəki hasilat həcmlərini qarşılamağa yetərli deyil. Bu, bazar iştirakçıları
üçün "göydəndüşmə” informasiya oldu. Sonradan Beynəlxalq Enerji Agentliyi də
pozitiv proqnozu təsdiqlədi ki, həqiqətən cari il üçün neftə olan tələbat 96,4
milyon barrelə artacaq”.
"Bazarda
təlatüm yaranmayacaq”
Ekspert bildirir ki, vaksinasiya, ölkələr arasında
gediş-gəlişin açılması, post-pandemiya dövrünün iqtisadiyyatının yüksəlişi kimi
tələblər neftə olan tələbatı artırır: "ABŞ-da avtomobil yanacağına olan tələbat
pandemiyadan əvvəlki göstəricilərə çatıb. İnsanlar peyvəndləmədən sonra daha
inamla səyahət etməyə və kütləvi tədbirlərə qatılmağa başlayırlar. Bundan
əlavə, ABŞ-da yay mövsümü ilə əlaqədar təyyarə ilə gündəlik səyahət edənlərin
sayı 2 milyon nəfəri keçib - aviakerosin sifarişi hər həftə artır. Narahatedici
proses İranla bağlı idi. Belə ki, qeyd olunurdu ki, İran bazara əlavə 1 milyon barel
neft çıxara bilər. OPEC də dedi ki, bu, heç də problemli məsələ deyil, çünki
tələbat daha güclü olacaq. İranın bazara neft çıxarması hansısa təlatüm
yaratmayacaq. Bütün bu məsələlərin fonunda əlbəttə ki, neftin qiymətinin əvvəlcə
70 dolları keçməsini, sonra 72 dolları aşmasını və bazar ertəsi artıq 73
dolları keçməsini müşahidə etdik. Bundan sonra nə qədər artım olacaq təbii ki,
bilmirik. Neft qiymətlərinin digər xammallardan fərqi odur ki, o daim nə düşür,
nə qalxır, nə də stabil qalır. Qiymət dəyişimi bazardakı əhval-ruhiyyədən
asılıdır. Biz bu gün artımı müşahidə edirik. Ancaq bunun nə qədər davam etməsi
dünyada baş verən hadisələrdən asılıdır. Heç kim dəqiq proqnoz verə bilməz.
Bazar çox dəyişkəndir və hərəkətlidir. Neft də çox mütəhərrik bir əmtəədir”.
Neftin qiymətinə təsir edən 2 fundamental
faktor...
Enerji
məsələləri üzrə ekspert Zəfər Vəliyev deyir ki, 2020-ci il qlobal neft bazarları üçün ağır
il kimi yadda qalsa da, 2021-ci ilin əvvəlindən bazarda kifayət qədər müsbət
dinamika müşahidə edildi: "Sərt karantin tədbirləri səbəbindən neftə olan
tələbat azalmışdı. Pandemiyadan əvvəl - 2019-cu ildə dünyada gündəlik neftə
olan tələbat 100 milyon barrel civarında idi. Aprel ayından başlayaraq bu
tələbat azalmağa başladı və keçən il ortalama tələbat 90 milyon barel civarında
idi. Yəni keçən il neftə tələbatda 9 milyon bareldən çox azalma müşahidə
olundu. 2021-ci ilin birinci rübündə dünyanın sutkalıq neft tələbatı artıq 94
milyon barelə qalxdı. Birinci rübdə 4 milyon barel gündəlik artım müşahidə edildi.
İlin sonuna isə neftə gündəlik tələbat ortalama 96.5 milyon, bəzi hesablamalara
görə isə 97 milyon barelə çatacaq. 3-cü rübdə neftə olan tələbatın hətta 99 milyon
barelə yaxınlaşması da ehtimal edilir. Hazırda isə neftin bugünkü qiyməti
fundamental faktorlar önündə deyil. Burda həm tələbat məsələsi var, çünki ilin
əvvəlində Asiya və Sakit okean bazarlarında dinamika müşahidə olunurdusa, indi
Amerika Birləşmiş Ştatları və Avropada da neftə tələbat səviyyəsi günü-gündən
artmaqdadır. Hazırda həm Avropada, həm ABŞ-da, həm Asiya və Sakit okean
regionunda nəqliyyat vasitələrin intensivliyi müşahidə olunur, yəni magistral
avtomobil yollarının yüklənməsi hər gün artmaqdadır. Bu isə o deməkdir ki,
avtomobil benzininə olan tələbat artacaq”.
Ekspert vurğulayır ki, Portuqaliya, İspaniya,
Fransa, Yunanıstan kimi Avropa ölkələrinin nəqliyyat sektorunda yüksək aktivlik
müşahidə edilir: "İkinci tərəfdən, neftin qiymətinə təsir edən faktorların biri
də iqtisadi perspektivlərin günü-gündən yaxşılaşmasıdır. İlin əvvəlindən
başlayaraq dünya iqtisadiyyatında bərpa prosesləri sürətlə davam edir. Ümumiyyətlə,
neftin qiymətinə əsasən 2 fundamental faktor təsir edir. Biri tələb-təşviq
balansı, ikincisi isə maliyyə bazarlarıdır. OPEC ilə müttəfiq dövlətlərin Vyana
sazişi çərçivəsində qarşıya qoyulan məqsədlər bazarda qiymət dalğalanmasını
aradan qaldırmaq və neft qiymətlərini təyinetmə qabiliyyətini artırmaq idi. Bu faktorların
hər ikisi bu gün özünü doğruldur. Buna görə də hazırda neftə olan tələbatın
yüksək dinamika ilə artması səbəbindən neft qiymətində artımlar da fundamental
faktorlar səbəbindən deyil. Təbii ki, süni qiymət artımı kövrək fiziki
bazarları təhdid altına ala bilər və eyni zamanda iqtisadi inkişaf tempini
ləngidə bilər. Buna görə də hesab edirəm ki, qiymət diapazonu 68-75 dollar
arasında saxlanılmalıdır. Əgər qiymətlər 68 dollardan aşağı düşərsə, onda
hasilatda azalmalara gedilməlidir. Əgər qiymət 75 dolları keçərsə, onda neft
hasilatında müəyyən artımlara yol vermək olar ki, bazarı tənzimləmək imkanı
yaransın”.
"Neftə olan
tələbat 2022-ci ildə həllini tapacaq”
Həmsöhbətimiz hesab edir ki, indiki bazar tənzimlənməsi
nöqteyi-nəzərindən OPEC və müttəfiq dövlətlərin 2016-cı ildə imzaladıqları Vyana
sazişi neft bazarlarının qorunması baxımdan ən uğurlu formatdır: "Digər
tərəfdən, ilin sonuna kimi neft bazarlarının təhdid altına alacaq heç bir
faktor qalmayıb. Çünki bazara çıxan istənilən əlavə fiziki həcm sürətli şəkildə
həzm ediləcək. Hazırda stasionar neft anbarlarında bazarı təhdid altına alacaq
neft həcmləri mövcud deyil. Çünki OPEC və müttəfiq dövlətlərin əsas bazarın
tənzimlənməsi ilə bağlı fəaliyyətlərindən biri də ehtiyatlarda, yəni stasionar
və üzən neft anbarlarında normadan artıq olan neft həcmlərini yığışdırmaq idi və
buna da nail olublar. Hesab edirəm ki, ilin sonuna kimi neftə olan tələbatda
artım müşahidə olunacaq. Artıq dizel yanacağına tələbat 2019-cu ilin səviyyəsindədir.
Neft-kimya məhsullarına, neftdən alınan sürtgü yağlarına tələbat həddən artıq
yüksəkdir. Bəzi ticarət meydanlarında hətta qıtlıq da müşahidə olunur. Bu
minvalla ilin sonuna kimi benzinə olan tələbat da 2019-cu ilin səviyyəsinə
çatacaq. 2019-cu ildə pandemiyadan öncə dünyanın sutkalıq avtomobil benzininə
tələbat 47.5 milyon barel təşkil edirdi. Artıq ikinci yarımillikdə tələbat 45
milyon bareli keçib. Və ilin sonunda da bu rəqəm 47.5
milyon barel olmaqla pandemiyadan əvvəlki dövrdəki göstəriciyə qayıdacaq”.
Aygün ƏZİZ