Ənənəvi alət - FOTOLAR
Azərbaycanın
regionda yaratdığı yeni reallıqlar Almaniyanı niyə narahat edir?
XX əsrin sonlarında
müstəqilliyini yenidən bərpa edən Azərbaycan Ermənistan işğalı ilə yanaşı, daim
beynəlxalq güc mərkəzlərinin, ayrı-ayrı dövlətlərin, ermənipərəst dairələrin
təzyiqləri ilə üz-üzə qalıb. İşğalçıya "dur” deməyən qüvvələr Azərbaycanı milli
maraqlara söykənən, inkişaf və tərəqqiyə, ərazi bütövlüyünün təmininə xidmət
edən müstəqil siyasətindən çəkindirmək üçün bütün vasitələrə əl atıblar.
Paytaxt şəhərimiz mühüm beynəlxalq tədbirlərə ev sahibliyi edəndə, rəsmi Bakı
qlobal layihələrə imza atanda, regional və dünya əhəmiyyətli təşəbbüslərlə
çıxış edəndə, daim ölkəmiz əleyhinə kampaniyaya start verilir, Azərbaycan və
azərbaycanlılar barədə mənfi rəy formalaşdırılmağa başlanılır. Bütün bunlara
baxmayaraq, Azərbaycan öz yolundan dönməyib, Prezident İlham Əliyevin uğurlu
xarici və daxili siyasəti nəticəsində uğurla inkişaf edib, bir çox maneələrə
sinə gərib. Ötən il sentyabrın 27-də başlayan və 44 gün davam edən Vətən müharibəsində
Azərbaycan Silahlı Qüvvələri düşmənin belini qırandan, torpaqlarımızı
işğalçılardan təmizləyəndən, BMT Təhlükəsizlik Şurasının 4 qətnaməsini öz
gücünə təmin edəndən sonra ölkəmizə qarşı yenidən qaralama kampaniyasına start
verilib.
Ermənipərəst dairələrin absurd ittihamları
Fransa rəsmilərinin ədalətsiz, məsuliyyətsiz açıqlamalarının, erməni
lobbisinin təsiri altında olan fransız mediasının qərəzli təbliğatının ardınca,
Almaniyanın bəzi dairələrində, o cümlədən mətbuatında qeyri-obyektiv yanaşma
sərgilənib. Azərbaycanın beynəlxalq nüfuzuna xələl gətirmək, haqlı davamızda
əldə etdiyimiz Qələbəyə fərqli don geyindirmək, ölkəmizin reallıqlarını təhrif
etmək üçün cəhdlər edilib. Növbəti dəfə guya bir qrup, xüsusilə də
Baden-Vürtemberq torpaqlarından olan alman deputatın ya bir qaşıq qara kürü, ya
da neft dollarları və bahalı hədiyyələr üçün gecə-gündüz uzaq Azərbaycanın
maraqları naminə işlədiyi haqqında tezis səsləndirilib. Ermənipərəst dairələrin
diktəsi ilə lobbiçi şəxslər tərəfindən dilə gətirilən belə absurd ittihamlar
təsdiqini tapmasa belə, təəssüf doğurub. Beynəlxalq aləm, o cümlədən dünya
dövlətləri ilə qarşılıqlı maraqlara, bərabərhüquqlu tərəfdaşlığa hər zaman
maraqlı olan multikultural, tolerant, dünyəvi Azərbaycana qarşı belə münasibət
heç bir halda qəbuledilən deyil.
Dezinformasiya maşını yenidən işə salınıb
Siyasi
elmlər doktoru, millət vəkili Elman Nəsirov mövzu ilə bağlı bildirib
ki, Almaniya Azərbaycana qarşı dezinformasiya maşınını yenidən işə salıb. Qeyd
edib ki, dövlət iki halda çox ciddi müəyyən beynəlxalq siyasi dairələrin
təzyiqi altına düşür: "90-cı illərin əvvəllərində Azərbaycan zəif olduğundan
çox ciddi təzyiqlərlə rastlaşdırdıqsa, indi bu təzyiqlər güclü olduğumuz üçün
bizə yönəlib. Xüsusilə, Vətən müharibəsində qələbəyə imza atdıqdan sonra
müəyyən beynəlxalq siyasi dairələr, o cümlədən Fransadakı siyasi hakimiyyət
üzvləri Azərbaycanla diktə dili ilə danışmaq istəyirlər. Bu halda müxtəlif
yalan, iftira, dezinformasiya maşınını işə salmağa başlayırlar və Azərbaycana
qarşı təzyiq elementlərindən istifadə edirlər. Buna səbəb Azərbaycan dövlətinin
və onun ali siyasi rəhbərliyinin müstəqil siyasət həyata keçirməsidir. Çünki
Azərbaycan müəyyən beynəlxalq siyasi dairələrin diktəsi ilə deyil, öz xalqının
milli maraqlarından irəli gələn siyasət həyata keçirir. Vətən müharibəsi
dövründə biz Almaniya xarici işlər nazirinin də müəyyən davranışlarının şahidi
olduq. Onlar heç bir vəchlə Azərbaycanın birtərəfli qaydada öz ərazi
bütövlüyünü təmin etməklə bağlı siyasətini qəbul etmək istəmirlər. Məhz onların
diktəsi altında addımların atılmalı olduğu ilə bağlı xətt yeridirdilər”.
Təzyiqlər əks effekt yaradır
Deputatın sözlərinə görə,
bu və ya digər dövləti tənqid edərkən özünə güzgüdə baxmaq lazımdır ki, buna
mənəvi haqqın olsun: "Almaniya Birinci Dünya müharibəsi zamanı milyonlarla
insanın fəlakətinə səbəb olub. İkinci Dünya müharibəsinin başlanmasının
səbəbkarı da Almaniya olub və yenə də milyonlarla insanın fəlakətinin səbəbkarı
olub. İndi isə Almaniyada neofaşizm cərəyanı yenidən baş qaldırıb. PEGİDA adlı
neofaşist gənclər təşkilatı peyda olub. Bu irqçi cərəyan Almaniyanın Saksoniya
əyalətinin Drezden şəhəri mərkəz olmaqla, bütün Avropada müsəlman miqrantlar
əleyhinə kütləvi etirazlar keçirir. Onlar antiislam, islamafob, türkafob
şüarlar səsləndirirlər. Belə bir ölkənin siyasi rəhbərliyi, müəyyən siyasi
dairələri özlərinin dünya üçün təhlükəli proseslərinin, tendensiyalarının
qarşısını alsınlar, onlarla mübarizə aparsınlar. Onlar isə mübarizə aparmaq
üçün Azərbaycanı seçiblər. O ölkə ki, müsəlman dünyasında sabitlik adasıdır,
mültikulturalizmin mühüm mərkəzlərindən biridir, beynəlxalq sülhə və
təhlükəsizliyə töhfə verir və Azərbaycandan dünyaya, sadəcə sülh və
əmin-amanlıq gəlir. Xalqımız bütün bunları görür. Buna görə də, bu təzyiqlər
əks effekt yaradır. Xalqın birliyi, hakimiyyət-xalq birliyi daha da
möhkəmlənir. Hesab edirəm ki, bütün bunlar da Azərbaycan əleyhinə olan
Almaniyadakı siyasi dairələrin yuxusuna haram qatır və onlar dezinformasiya
maşınını işə salırlar”.
Dini və etnik müstəvidə dözümsüzlük halları
Milli
Məclisin deputatı, politoloq Hikmət Babaoğlu söyləyib ki, Azərbaycanın
əldə etdiyi böyük zəfər hələ də bəzi islamafob, türkafob dairələrdə
qısqanclıqla qarşılanır. Onun fikrincə, islamafoblar heç cür həzm edə bilmirlər
ki, dünya siyasətində hegemon mövqeyə sahib olan Qərb dövlətləri Azərbaycana
mane ola bilməyiblər və ölkəmiz öz ərazi bütövlüyünü bərpa edərək işğalçı
Ermənistana tarixi dərs verib: "Bu mənada Almaniya da istisna təşkil etmir. Biz
zaman-zaman Almaniyada yaşayan türklər və müsəlmanlara qarşı bəzi radikal
dairələrin təşkil edilmiş təzyiqlərinin, hətta cinayətlərinin şahidi oluruq.
Bütün bunların səbəbi Avropada kök salmış, islamafobiya, ksenefobiya, yəni dini
və etnik müstəvidə dözümsüzlük hallarının hələ də mövcud olmasıdır. Konkret
Almaniyada bu mənfi tendensiya siyasətçilərdən daha çox mövcud ictimai və
mədəni dəyərlər sistemi, həmçinin orada olan neqativ ictimai iqlimlə, yaxud
mühitlə bağlıdır. Siyasətçilər isə bundan bəzi hallarda öz karyeraları üçün
istifadə edirlər. Ona görə də, hakimiyyətdə yaxud müxalifətdə kimin olmasına
baxmayaraq, istənilən siyasətçi bu faktordan öz lehinə istifadə edə bilər.
Çünki həm nəticə etibarilə həmin ölkənin siyasətçisi məhz o ictimai-siyasi
mühitin yetirməsidir, həm də praaqmatik nöqteyi-nəzərdən siyasətçi kimi bundan
istifadə etməyə hazırdır. Təbii ki, bütün hallarda Azərbaycana qarşı olan hər
hansı məsələdə erməni izi də tapmaq mümkündür. Ona görə yox ki, erməni diasporu,
yaxud lobbi təşkilatları həddindən artıq güclüdür. Ona görə ki, ermənilər
xristian təəssübkeşliyi kartını islamafoblarla asanlıqla bölüşə bilir və bunu
Azərbaycana qarşı yönəltməyə çalışırlar. Bu mənada, mümkündür ki, Almaniyada da
onlar bənzər fəaliyyətlə məşğul olsunlar”.
Heç bir beynəlxalq təşkilat Ermənistana təzyiq
göstərmir
Millət
vəkili Könül Nurullayeva isə Ermənistan post-müharibə dövründə də
cinayətlərini davam etdirməsinə diqqət çəkib. Bildirib ki, hərbi əməliyyatların
dörd aydan çoxdur başa çatmasına baxmayaraq, minalı ərazilərin xəritəsinin
təqdim olunmaması müharibə cinayətlərinin tərkib hissəsidir. Təəssüflə qeyd
edib ki, 4 ay ərzində 40-a yaxın mülki şəxs minaya düşərək həlak olub, xeyli
sayda ağır yaralananlar var. Deputat deyib ki, bu kimi cinayətlərə susqun qalan
Almaniyanın işğala məruz qalan, beynəlxalq hüquqa əsaslanaraq yalnız öz gücünə
ərazi bütövlüyünü təmin edən Azərbaycana qarşı qərəzli münasibəti təəssüf
doğurur: "Erməni tərəfi mülki-humanitar hüququn prinsiplərini kobud şəkildə
pozmaqda davam edir. Bu da 1949-cu ildə qəbul edilmiş Cenevrə Konvensiyası və
1977-ci ildə əlavə edilmiş protokollarla ziddiyyət təşkil edir. Təəssüf ki,
məsələ ilə bağlı heç bir beynəlxalq təşkilat Ermənistana təzyiq göstərmir.
Əksinə, bölgədə sülhün bərqərar olmasından narahat olan qüvvələr gözə çarpır.
Almaniya mətbuatında Azərbaycana qarşı son vaxtlar intensivləşən hücumlar da,
əslində dolayısı ilə Ermənistana arxa durmaq anlamına gəlir. Bu gün
Azərbaycanın regionda yaratdığı yeni reallıqlar Ermənistan da daxil olmaqla,
bütün dövlətlərin və bu bölgədə maraqlı olan tərəflərin maraq prinsiplərinə
uyğundur. Lakin Almaniya bu vəziyyətdən razı deyil. Halbuki Almaniya ATƏT-in
Minsk Qrupunun üzvü kimi bu prosesdə, ATƏT məkanında təhlükəsizliyin təmin
olunması baxımından daha çox maraqlı olmalıdır. Lakin əksinə olaraq, 2012-ci
ildən etibarən Almaniyada anti-Azərbaycan mövqeyinin şahid oluruq. 2012-ci ildə
Avroviziya mahnı müsabiqəsi, eyni zamanda ilk Avropa Oyunları zamanı ölkəmizə
qarşı əsassız qarayaxma kampaniyaları təşkil olunurdu”.
Arqumentsiz və məntiqsiz materiallar
Millət vəkili təəssüf hissi
ilə vurğulayıb ki, Almaniya Azərbaycana qarşı kampaniyaların ənənəvi aləti
qismində çıxış edir: "Ən ziddiyyətli məqamlardan biri isə budur ki, Almaniya
islamafobiya, türkfobiya, etnik zəmində qətllər, neofaşizmin intibahı,
miqrantlara qarşı qeyri-humanist münasibətilə seçilən ölkədir. Polis zorakılığı
ilə bağlı aqressiv kadrlar internetdə geniş yayılıb. Təsadüfi deyil ki, 2019-cu
ildə Avropa İnsan hüquqları komissarı Almaniyanı miqrantların deportasiyası
məsələsində daha ədalətli davranmağa, həmçinin qaçqınlara kömək edən QHT-lərə
qarşı təqibləri dayandırmağa çağırmışdı. Yəni bu cür neqativlərin qeydə
alındığı bir ölkənin başqa bir ölkəni əsassız şəkildə ittiham etməsi, sadəcə
təəccüb doğurur. Digər tərəfdən, alman mediasının səsləndirdiyi arqumentsiz ittihamlar
həm də alman KİV-lərinin imicini zədələyir, onların obyektivliyini şübhə altına
alır. Onu da xatırlatmaq yerinə düşər ki, Azərbaycanın haqlı davasında – Vətən
Müharibəsində də Berlin rəsmiləri əsassız bəyanatlar verir, alman mediasında
arqumentsiz və məntiqsiz materiallar dərc olunurdu”.
Rufik İSMAYILOV