Özbəkistanın Urgənc şəhərində Azərbaycan milli rəqslərinin təqdimatı keçirilib

Tədbir Özbəkistanın Xorezm vilayətində keçirilən "Azərbaycan mədəniyyəti və ədəbiyyatı günləri” çərçivəsində reallaşdırılmışdır.

İlk öncə Xorezm Vilayət Mədəniyyət İdarəsinin rəhbəri Şavkat Yaxşıbayev Azərbaycanla münasibətlər, Azərbaycan mədəniyyətinin vizit kartı olan milli rəqslərimiz barədə çıxış edərək, xarəzm vilayətinin də zəngin rəqs ənənələrinin olduğunu qeyd edib. Natiq bu yaxınlarda Vilayətdə təşkil olunan "Rəqsin sehri” adlı Beynəlxalq rəqs festivalında da Fikrət Əmirov adına Azərbaycan Dövlət Rəqs və mahnı Ansamblının qran-pri mükafatına layiq görülməsi ölkəmizin rəqs sənətinin zəngin və unikal olduğunu sübut etdiyini qeyd edib. Azərbaycan xalqının yaratdığı rəqslərin uzun əsrlər boyu öz rəngarəngliyi və coşğunluğu ilə insanı valeh etdiyini söyləyən Şavkat Yaxşıbayev Özbəkistanda milli rəqslərimizə böyük maraq və sevgi olduğunu vurğulayıb.

Özbəkistandakı Heydər Əliyev adına Azərbaycan Mədəniyyət Mərkəzinin direktor müavini Polad Zeynalov ikitərəfli dostluq və əməkdaşlıq əlaqələrindən danışıb, xalqımızın zəngin mənəvi sərvəti olan rəqslərimizin sadədən mürəkkəbə doğru inkişaf edərək saflaşdığını, onun incəsənətinin təkrarsızlığını nümayiş etdiridyini bildirib. Özbəkistandakı Heydər Əliyev adına Azərbaycan Mədəniyyət Mərkəzinin nəzdində rəqs dərnəyinin yaradıldığını və bu dərnəkdə yüzlərlə uşaq, yeniyetmələrin milli rəqslərimizin sirlərini öyrədildiyini qeyd edib. O, Azərbaycanmillirəqslərininxariciölkələrdə təbliği, bu istiqamətdə Heydər ƏliyevFondunun layihələri barədə məlumat verib.

Azərbaycan Mədəniyyət Mərkəzinin nəzdindəki rəqs dərnəyi və Azərbaycan qızları rəqs ansamblının rəhbəri Kaykep Aliyeva həmahəngliyi, zərifliyi və dəqiqliyi, şuxluğu ilə insanlara böyük mənəvi zövq yaşadan milli rəqslərimiz haqqında danışıb. Azərbaycan və Özbəkistanın Əməkdar Artisti Kaykep Aliyeva "Uzundərə”, "Nəlbəki”, "Köçəri”, "Yallı” və başqa rəqslərimizin özünəməxsusluğu, onların xalqımızın məişət həyatı, adət-ənənələri, mədəni zənginliyini özündə əks etdirdiyini söyləyib.

Daha sonra praktiki olaraq Azərbaycan Mədəniyyət Mərkəzinin nəzdindəki "Azərbaycan qızları” rəqs ansamblı Azərbaycan milli rəqslərini təqdim edib. Ansamblın ifasında " Azərbaycan süitası”, "Uzundərə”, ” Nəlbəki”, "Aman Tello”, "Mirzeyi” kimi milli rəqslərimiz ifa olunub. Azərbaycan rəqsləri iştirakçıların böyük marağına və alqışlarına səbəb olub.

Qeyd edək ki, bununla əlaqədar Mərkəzin zalında "Milli rəqslərimiz xalqımızın mədəni sərvətidir” adlı fotosərgi də nümayiş olunub.