Terror, sui-qəsd, iğtişaş, silahlı təxribatlar pislənməlidir
Yunis Səfərov ad-soyadlı bir şəxsin 2018-ci il iyulun 3-də Gəncə
Şəhər İcra Hakimiyyətinin başçısı Elmar Vəliyevə silahlı hücum etməsi, onu ağır
yaralaması, ardınca Gəncə şəhərində ictimai yerdə iki nəfər yüksək rütbəli
polis zabitinin radikal şəxslər tərəfindən xəncərlə qətlə yetirilməsi, dövlətin
vəzifəli şəxslərinə, qanun keşikçilərinə, ümumən Azərbaycan dövlətinə və
dövlətçiliyinə qarşı törədilən terror aktlarıdır. Bununla bağlı indiyə qədər
hüquq-mühafizə orqanları tərəfindən ictimaiyyətə yetərincə məlumat verilib,
istintaq zamanı üzə çıxarılan çoxsaylı təkzibedilməz sübutlar təqdim olunub,
təqsirkar şəxslər saxlanılıb, silahlı müqavimət göstərənlər məhv edilib.
"REAL
Televiziyası”nın REAL Təhlil və İnformasiya Mərkəzində jurnalist Mir Şahin Ağayevintəqdimatı ilə bu günlərdə yayımlanan süjetdə Gəncə hadisələrində fəallıq
göstərən, təqsirkar şəxslər kimi məsuliyyətə cəlb edilən, hazırda məhkəməsi
gedən şəxslərin hərəkətləri konkret video görüntülərlə nümayiş etdirilib.
Bununla da onların heç də səbəbsiz yerə saxlanılmadığı, heç də təqsirsiz
olmadıqları bir daha əyan olub. Məhz bu kimi faktlar əsas götürülərək
cəmiyyətimiz tərəfindən bu hadisələrin terror aktı olduğu birmənalı olaraq
qəbul edib, terroru planlaşdıranlar, onu icra edənlər lənətlənib.
Bu hadisə ilə bağlı Azərbaycan Prezidentinin ictimai-siyasi məsələlər
üzrə köməkçisi Əli Həsənov da mediaya açıqlama verərək bildirib ki, 2018-ci il
iyulun 3-də törədilən olay Azərbaycan dövlətçiliyinə qarşı qəsddir. Onun
sözlərinə görə, ötən müddətdə aparılmış istintaq tədbirləri nəticəsində ortaya
çıxan faktlar bir daha təsdiqləyib ki, Gəncə hadisələri bəzi dövlətlərin
radikal klerikal dairələrinin, separatçıların və ölkə daxilində siyasi
fəaliyyət pərdəsi altında şəxsi ambisiyalarını həyat keçirmək istəyən qrupların
dövlətə və milli maraqlarımıza qarşı birgə məkrli təxribatıdır. Prezidentin
köməkçisi vurğulayıb ki, dövlətin təhlükəsizliyi və milli mənafelər heç bir
zaman, heç bir vəchlə və ya şərtlə müzakirə mövzularına çevrilməməlidir. Lakin
əfsus ki, özlərini "demokrat”, "siyasi mühacir”, "vicdan
məhbusu”, "müxalifətçi” adlandıran, ağa qara deməyi həyat tərzi seçən bəzi
şəxslər sosial şəbəkələrdə etdikləri paylaşımlar, yazdıqları statuslarla
terrorçulardan "qəhrəman obrazı” yaratmağa çalışır, dolayısı ilə onların
əməlinə haqq qazandırırlar.
Milli Məclisin Müdafiə,
təhlükəsizlik və korrupsiya ilə mübarizə komitəsinin üzvü, politoloq Hikmət
Babaoğlu mövzu ilə bağlı "Kaspi” qəzetinə açıqlamasında bildirib ki,
cinayətkarın cəzasız qaldığı cəmiyyətlərdə xaos və deqradasiya baş verir. O,
təəssüflə vurğulayıb ki, Gəncə hadisələri zamanı dövlət məmurunun timsalında
dövlətə əl qaldıran şəxslər hazırda sosial şəbəkələrdə bəziləri tərəfindən
"günahsız insan” kimi ictimai rəyə təqdim edilir. Millət vəkilinin sözlərinə
görə, bu, qətiyyən yol verilməzdir. Politoloq deyib ki, cəzasızlıq mühiti hər
bir cinayətin başlanğıcı üçün əsas yaradır: "Mən düşünürəm ki, terror törədən,
dövlətə əl qaldıran şəxsin "günahsız insan” kimi təqdim olunması səbəbsiz deyil
və düşünülmüş kampaniyadır. Bu işi görənlər Azərbaycanda cəzasızlıq mühiti
formalaşdırmaqla, dövləti gözdən salmaqla ölkəmizdə xaos yaratmaq niyyəti
güdürlər. Fikrimcə, bununla bağlı ciddi maarifləndirmə işləri aparılmalıdır. Həqiqət
hər kəsin diqqətinə çatdırılmalı, Azərbaycanın hüquq sisteminin gözdən
salınmasının qarşısı alınmalıdır. Hüquq-mühafizə orqanlarımızın fəaliyyətinə
kimlərinsə kölgə salmasına yol verilməməlidir. Mediamız bu kimi hallarla bağlı
ciddi "informasiya müharibəsi” aparmalı, sipər çəkməlidirlər. əks təqdirdə bu,
təsəvvür belə etmədiyimiz ciddi fəsadlara yol aça bilər. Cinayətkarı günahsız
kimi göstərmək, cinayətə haqq qazandırmaq ədalətə, haqqa qarşı çıxmaqdır”.
Hüquq müdafiəçisi Sahib
Məmmədov qəzetimizə açıqlamasında Gəncə hadisələri zamanı təqsirləndirilən
şəxslərin məhkəmə prosesinin hazırda davam etdiyini və barələrində məhkəmənin
qüvvəyə minmiş hökmünün olmadığını əsas gətirərək onlar haqqında hər hansı
fikir bildirməyib. Amma o, Gəncədə hakimiyyət nümayəndəsinə qarşı törədilən
sui-qəsdin, ardınca kütləvi iğtişaşa cəhdin, qulluq vəzifələrini yerinə yetirən
iki polis zabitinin qətlə yetirilməsinin, bir zabitin isə yaralanmasının fakt
olduğunu, bu cinayətlərin baş verdiyini xatırladıb. Deyib ki, məhkəmə prosesi
başa çatdıqdan sonra bu cinayətlərdə kimin hansı dərəcədə günah sahibi olduğu
daha dəqiq bilinəcək: "Ortada konkret cinayət hadisəsi, terror, iğtişaş var.
Buna haqq qazandırmaq nə liberal dəyərlərə, nə də demokratik prinsiplərə uyğun
deyil. Adətən terror təşkilatları belə hadisələri törədəndən sonra məsuliyyəti
öz üzərinə götürür, terrora hansısa formada haqq qazandırmağa çalışır, onlara
simpatiyası olanlar da buna dəstək verirlər. Belə hadisələrə dəstək verən
ayrı-ayrı fərdlərə sual ünvanlamaq istərdim ki, terror, sui-qəsd nə zamandan
ədalətin bərpası yolu olub? Sui-qəsdin, terrorun qurbanı olan şəxslərin şəxsi
keyfiyyətlərinin məsələyə nə dəxli var? Onların yaxşı və ya pis olmasının nə
əhəmiyyəti var? Əsas olan baş vermiş hadisədir”.
S.Məmmədov qeyd edib ki, terror, sui-qəsd, iğtişaş, silahlı
təxribatlar pislənməlidir. Onun sözlərinə görə, bütün demokratik cəmiyyətlərdə,
təsisatlarda buna yanaşma belədir: "Təəssüf doğuran haldır ki, Azərbaycanda
ayrı-ayrı fərdlərlə yanaşı, bəzi siyasi təşkilatlar, bu qurumların üzvləri,
həmin təşkilatların seçkili orqanlarında olan şəxslər Gəncə hadisələrinə, bu
hadisələri törədənlərə açıq simpatiya bəsləyirlər. Bu, təqsirləndirilən
şəxslərin müdafiəsi kontekstindən çıxır. Şübhəsiz ki, təqsirləndirilən
şəxslərin özünümüdafiə hüququ var. Bu, anlaşılandır. Onlara münasibətdə qeyri-prosessual
hərəkətlər, hər hansı pis rəftar halı baş veribsə, ilk növbədə bunu prosessual
yollarla sübut etmək lazımdır. Bunu etmədən özündən qərarlar qəbul etmək,
hökmlər çıxarmaq yolverilməzdir. Bu, təqsirləndirilən şəxslərin müdafiəsi
deyil, baş verən əmələ haqq qazandırmaqdır. Loru dillə desək, onlar sevinirlər
ki, nə yaxşı bu sui-qəsd, terror hadisəsi, dövlətə və ya hakimiyyətə qarşı belə
cinayət əməli baş verib və sair. Belə çıxışlar dəhşətlidir”.
Hüquq müdafiəçisi diqqətə çatdırıb ki, Gəncədə törədilən cinayət
əməllərinə ayrı-ayrı fərdlərin arzuolunmaz yanaşması çox böyük təhlükəli
tendensiyadan xəbər verir: "Bu o deməkdir ki, Azərbaycanda formalaşan bəzi
siyasi qüvvələr istənilən variantla ölkə daxilində qarışıqlıq yaratmaq
istəyirlər. "Facebook” sosial şəbəkəsində aktiv olan ayrı-ayrı şəxslər təmsil
olunduqları siyasi təşkilatın liderinin şəklini profil şəkli ediblər və Gəncə
hadisələrinə, həmçinin digər məsələlərə münasibətdə qeyd edirlər ki, hakimiyyət
dəyişikliyi olan kimi filan məmur asılacaq, filan məmur filan vaxtı bu sözü
dediyinə görə güllələnəcək və sair. Yəni bu şəxslər, eləcə də onların
"liderləri”, partiya sədrləri bilmirmi ki, Azərbaycanda ölüm hökmü yoxdur?
Bilmirlərmi ki, Azərbaycan mülki və siyasi hüquqlara dair beynəlxalq pakta, onun,
ölüm hökmünün ləğvinə dair fakültativ protokoluna qoşulmuşuq? Onlar bilmirlərmi
ki, Azərbaycan Avropa Şurasının üzvüdür, Avropa konvensiyasının iştirakçısıyıq?
Lap tutaq ki, şərh yazanlar bunları başa düşmürlər, bəs onların "liderləri”
niyə bu yazılanları, radikal çağırışları təkzib etmir, əksinə "like” edir?
Azərbaycandakı bəzi siyasi qüvvələrin spektrinə baxanda insanları dəhşət
bürüyür”.
Rufik İSMAYILOV