Təhlükəsiz Bakı
Əziz
və mehriban diyarımız, sinəsində boy atıb, bəxtiyar olduğumuz, ilk eşqimizin
yadigarı, şərəfimiz, şöhrətimiz, tükənməz dövlətimiz, baxdıqca gözəlliyindən
doymadığımız - ecazkar Bakı. Yəqin ki, Rəşid Behbudovun səsi ilə möhür vurduğu,
Bakını ən gözəl şəkildə vəsf edən həmin mahnını bilməyən yoxdur. O mahnıya
qulaq asdıqca, Bakının həqiqətən də necə gözəl şəhər olduğunu duymamaq qeyri-mümkündür.
Bakı tarixin çətin sınaqlarından çıxan, bu günə qədər varlığını qoruyub saxlaya
bilən şəhərimizdir. Əbəs yerə deyil ki, bu gün müstəqil Azərbaycan
Respublikasının paytaxtı məhz Bakıdır.
Bakı
bizim üçün alınmaz qala, tükənməz sərvət, doğma ocaqdır. Texnika və texnologiyanın
inkişaf etdiyi bir dövrdə Bakı elmi-mədəni kəşflər mərkəzi hesab olunur.
Paytaxtın fiziki-coğrafi, iqlim şəraiti olduqca əlverişlidir. Belə ki,
şimaldan-cənuba, qərbdən-şərqə gedən miqrasiya və ticarət yollarının kəsişmə
mərkəzində yerləşməsi onun hərtərəfli inkişafına şərait yaratmışdır.
Qədimliyinə, ərazisinin böyüklüyünə və əhalisinin sayına görə Şərqin qocaman və
ən böyük şəhərlərindən biridir.
Məlumat üçün qeyd edək ki, Bakı haqqında ilk dəfə eramızdan 3500 il
əvvəl birinci Misir fironu Menesanın dövründə, "Ölülər Kitabında” qeyd
edilmişdir. Eləcə də Bakının qədim şəhər olmasını Abşeronda və Qobustanda 12
min il tarixi olan daş üzərindəki əlyazmalar, arxeoloji tapıntılar sübut edir.
Bakı hazırda kifayət qədər inkişaf etmiş şəhərlər arasına öz adını yazdırmağı
və dünyanın diqqətini cəlb etməyi bacarıb. Belə ki, bir sıra dünyaca məşhur
təşkilatlar, ekspertlər araşdırmalarına Bakını da daxil ediblər. Müxtəlif
istiqamətlərdə olan araşdırmalarda Bakı seçilən şəhərlər sırasında olur. Həmin
araşdırmalardan biri də kriminal vəziyyətlə bağlıdır. Dünyada kriminal
vəziyyətə dair statistikanı araşdıran Numbeo xidməti 2018-ci ilin ən təhlükəsiz
şəhərlərinin reytinqini dərc edib. Araşdırma 327 şəhər arasında aparılıb.
Dünyanın ən məşhur şəhərlərindən olan Sinqapur, Münhen, Doha, Tokio, Bernin yer
aldığı siyahıda 26,75 faizlik kriminal düsturu ilə Bakı 42-ci pillədə
qərarlaşıb.
Təbii ki, bu göstərici bizim üçün
olduqca müsbət haldır. Bu, şəhərimizin müxtəlif sahələrdə inkişafına effektiv
təsir göstərir.
Azərbaycan
Turizm Asossiasiyasının nümayəndəsi Müzəffər Ağakərimov deyir ki, bir ölkədə turizmin inkişafı bir
çox amillərdən asılıdır: "Həmin amillərdən ən önəmlisi ölkədə təhlükəsizliyin
yüksək səviyyədə olmasıdır. Bu, həmin ölkəyə, şəhərə daha çox turist cəlb
olunmasına səbəb olur. Müasir dövrdə şəhərlərin ən böyük problemlərindən biri
də stabilliyin olmamağıdır. Bu da həmin yerlərin turizm sahəsində inkişafına
mane olur. Bildiyimiz kimi, Yaxın Şərqdə, Suriyada, Liviyada və digər ərəb ölkələrində
kütləvi terrorizm baş alıb gedir. Şükürlər olsun ki, Azərbaycanda bu baxımdan
heç bir narahatlıq yoxdur. Bu, ölkəmizdə turizmin genişlənib inkişaf etməsinə
müsbət təsir edir. Təkcə Bakıda yox, regionlarda da hökm sürən sabitlik turizm
üçün yaşıl işıq yandırıb. Azərbaycanda turizmin inkişafı yüksələn xətlə gedir.
Hazırda ölkəmizdə bu cür sabitliyin olması şəxsi təhlükəsizliyə önəm verən
xarici vətəndaşların Azərbaycanı seçməsi üçün ən böyük səbəbdir”.
İqtisadçı ekspert Pərviz Heydərov deyir ki, bu gün Bakı haqqında rəylərin
müsbət olması gələcəkdə investisiya axınına səbəb olacaq: "İnvestisiya
qoyuluşunun tələb etdiyi ən əsas şərtlərdən biri siyasi sabitlikdir. Çünki
sahibkarlar investisiya qoyacaqları yerdə təhlükəsizliyin tam təmin olunmasına
xüsusi önəm verirlər. İnvestorlar işə başlayacaqları məkanı əvvəlcədən
araşdırır, bütün risklər haqqında məlumat əldə edirlər. Onların investisiya
qoyacaqları şəhərdə siyasi sabitliyin hökm sürməsi, kriminal vəziyyətin qənaətbəxş
olması böyük əhəmiyyətə malikdir. Çünki heç bir investor istəməz ki, kriminal
şəraitdə iş qursun. Hər bir sahibkar iş quracağı şəhərdə özünü tam təhlükəsiz
hiss etmək istəyir. Bu həm xarici, həm də yerli investor üçün ən önəmli
şərtlərdən biridir. Azərbaycan MDB ölkələri sırasında, o cümlədən Şərqi Avropa
ölkələri içərisində siyasi sabitliyinə və kriminal baxımdan təhlükəsiz olmasına
görə birincilərdəndir. Bu da əlverişli investisiya mühitini şərtləndirən əsas
amildir. Məhz 90-cı illərin əvvəllərində siyasi sabitlik təmin edildikdən sonra
neft sektoruna investisiyalar artmağa başladı və bu da ölkəni inkişaf etdirən
əsas faktora çevrildi. 2000-ci ildən sonra həmin sabitliyin daha da
möhkəmlənməsi, kriminal vəziyyətin qənaətbəxş olması ilə səbəbi ilə digər
sahələrdə də xarici investisiya qoyuluşu genişləndi. Hazırda aparılan
araşdırmalar nəticəsində dünya ekspertlərinin şəhərimiz haqqında müsbət rəy
verməsi gələcəkdə də ölkəmizə xarici valyuta axınını təmin edəcəkdir”.
"Bakının dünyanın ən təhlükəsiz şəhərləri sırasında olması heç
şübhəsiz ki, Azərbaycan dövlətinin uzun illərdən bəri apardığı çoxşaxəli
siyasətin məntiqi nəticəsidir” deyən İslahatçı
Gənclər İctimai Birliyinin sədri Fərid Şahbazlı bildirir ki, bu, gənclərin
də təhlükəsiz şəraitdə təhsil almalarına və sağlam şəkildə inkişafına şərait
yaradır: "Bakının təhlükəsiz şəhər olması ölkəmiz üçün sözün bütün mənalarında
böyük əhəmiyyət kəsb edir. Təhlükəsizliyin yüksək səviyyədə təşkili cəmiyyətin
bütün qurumlarının normal şəkildə fəaliyyətini davam etdirməsi üçün olduqca
vacibdir. Ölkədə kriminal elementlərin yox səviyyədə olması və cinayətkarlığa
qarşı mübarizənin geniş şəkildə aparılması şəhərimizin bütün sakinlərinin,
xüsusilə də gənclərin həyatında böyük rol oynayır. Gənclərin bir sıra zərərli
vərdişlərdən uzaq durmağında təhlükəsizliyin yüksək səviyyədə təşkil olunması
vacib şərtlərdəndir. Digər tərəfdən Bakı gənclərin öz fəaliyyətini təmin
etməsi, sağlam şəkildə böyüməsi üçün ideal şəhərlərdən biridir. Biz tez-tez
Avropanın müxtəlif şəhərlərində oluruq və həmin şəhərlərin gənclər üçün heç də
təhlükəsiz olmadığını görürük. Şükürlər olsun ki, Bakıda kifayət qədər
təhlükəsiz mühit var. Həmçinin təhsil müəssisələrində də təhlükəsizliyin təmin
edilməsi ilə gənclər tam rahat şəkildə təhsil alırlar. Ölkənin inkişafı üçün
prioritet məsələlərdən olan təhlükəsizlik Bakıda və regionlarda yüksək
səviyyədə təşkil edilmişdir”.
Günel Azadə