Bakı 23°C
Səyyar qeydiyyat aksiyası bu həftə paytaxtdakı 4 bina üzrə 203 mənzili əhatə edəcək
Mənzillərin səyyar qeydiyyatı kampaniyası bu həftə paytaxtın Nəsimi, Yasamal, Səbail və Xətai rayonlarında keçiriləcək.
Əmlak Məsələləri Dövlət Komitəsindən bildirilib ki, Prezident İlham Əliyevin 2019-cu il fevralın 19-da imzaladığı "Bəzi çoxmənzilli binaların istismarına icazə verilməsinin sadələşdirilməsi haqqında” Fərmanına uyğun olaraq komitə tərəfindən hər həftə səyyar qeydiyyat kampaniyaları təşkil edilir. Vətəndaşlara mənzillərini ünvanlarındaca qeydiyyata almaq imkanı verən "Əmlakını qeydiyyata al və mülkiyyətinə sahib ol” kampaniyası bu həftə Bakı şəhərinin Nəsimi, Yasamal, Səbail və Xətai rayonlarında davam edəcək. Səyyar qeydiyyat aksiyası oktyabrın 28-31-də paytaxtdakı istismarına icazə verilmiş 4 bina üzrə 203 mənzili əhatə edəcək. Həftənin ilk günü qeydiyyat xidmətindən Nəsimi rayonu, Süleyman Rüstəm 27 və 29 ünvanındakı 19 mərtəbəli, 79 mənzilli binanın sakinləri istifadə edəcək. Oktyabrın 29-u səyyar kampaniya Yasamal rayonu, Şərifzadə küçəsi, 3159-cu məhəllədəki 11 mərtəbəli, 44 mənzilli binada, ayın 30-u isə Səbail rayonu, B.Sərdarov küçəsi, 128-ci məhəllə, ev 16 ünvanındakı 12 mərtəbəli, 20 mənzilli binada keçiriləcək. Oktyabrın 30-u Xətai rayonu, "Ağ Şəhər”, Mərkəzi bulvar küçəsi, 8 ünvanında yerləşən 6 mərtəbəli, 60 mənzilli bina sakinləri qeydiyyat xidmətindən yararlanacaq.
Mənzillərin səyyar qeydiyyatı xidmətindən istifadə etmək istəyən vətəndaşlar saat 09:00-dan 17:00-dək şəxsiyyət vəsiqəsi, maliyyə arayışı, protokoldan çıxarış kimi ilkin sənədlər ilə birgə səyyar ofisə yaxınlaşa bilərlər.
