Sahibkarların şikayətləri azalıb
Sahibkarların fəaliyyətinin inkişaf etdirilməsi istiqamətində
şəffaflığın təmin olunması məqsədilə Prezident İlham Əliyevin fərmanı ilə 3
fevral 2016-cı il tarixində mərkəzi və yerli icra hakimiyyəti orqanlarında Apellyasiya
şuraları yaradıldı. Yaradılan bu şuralar vasitəsilə edilən şikayətlər əsasında
sahibkarların fəaliyyətindəki süni maneələrin aradan qaldırılması istiqamətində
işlər görüldü. Qısa zaman kəsiyində mərkəzi və yerli Apellyasiya şuralarına
sahibkarları narahat edən məqamlarla bağlı edilən müraciətlərə aydınlıq
gətirildi. Bu gün ardıcıl olaraq, sahibkarlıq subyektlərinin inkişaf
etdirilməsi istiqamətində müxtəlif proqram və layihələr həyata keçirilir. Elə
bunun nəticəsidir ki, Apellyasiya şuralarına edilən şikayətlərin sayı azalıb.
Belə ki, Prezident yanında Apellyasiya Şurası 2017-ci il üçün hesabatını
açıqlayıb. Həmin hesabatda qeyd edilir ki, 2016-cı illə müqayisədə 2017-ci ildə
Prezident yanında Apellyasiya Şurasına daxil olmuş ümumi müraciətlərin sayı 2,9
dəfə, bilavasitə sahibkarlar tərəfindən verilən şikayətlərin sayı 2,2 dəfə
azalıb. Həmçinin mərkəzi və yerli icra hakimiyyəti orqanlarının Apellyasiya
şuralarına verilən şikayətlərin sayında da xeyli azalma müşahidə edilib.
2017-ci ildə bu orqanların Apellyasiya şuralarına cəmi 304 şikayət daxil olub.
Həmin göstərici 2016-cı illə müqayisədə təqribən 1,7 dəfə azdır.
Mövzu ilə bağlı "Kaspi” qəzetinə açıqlamasında Milli Məclisin deputatı Azər Badamov bildirdi ki, sahibkarlıq
subyektləri tərəfindən edilən şikayətlərin sayının 2,2 dəfə azalmasının səbəbi
var: "Bu da əsasən son illər Azərbaycan iqtisadiyyatında şəffaflığın təmin
edilməsi, eləcə də korrupsiyanın aradan qaldırılması istiqamətində islahatların
həyata keçirilməsidir. Məhz bu islahatların göstəricisidir ki, sahibkarlıq
subyektlərinin şikayəti azalıb. Aparılan islahatlara "ASAN Xidmət”
mərkəzlərinin istifadəyə verilməsini, bütövlükdə yoxlamaların azaldılmasını və
korrupsiyaya qarşı mübarizənin gücləndirilməsini qeyd etmək olar. Bütün bunlar
isə sahibkarların öz fəaliyyətləri ilə bağlı şikayətlərinin azalmasına gətirib
çıxarıb. Onu da əlavə edim ki, "Qaynar xətt”lərin formalaşması, sahibkarların
dövlət qurumları ilə birbaşa əlaqə yaratmaq imkanının əldə edilməsi də bu
məsələyə öz təsirini göstərib. Bu gün dövlət tərəfindən sahibkarlığın
inkişafına böyük diqqət və qayğı var, sahibkarlara hər cür şərait yaradılıb.
Məhz bu səbəbdən şikayətlərin sayı ötən dövrlə müqayisədə minimuma enib. Əvvəllər
sahibkarlıq subyektləri üçün hər hansı maneələr mövcud idisə, son dövrlər həmin
süni maneələr tamamilə aradan qaldırılıb. Dövlətimizin apardığı struktur və
iqtisadi islahatlar sahibkarların daha yaxşı fəaliyyət göstərməsinə gətirib
çıxarıb”.
A.Badamov əlavə etdi ki, Apellyasiya şuralarının yaradılması,
yerlərdə problemlərin həll olunması, sahibkarların dinlənilməsi şikayətlərin
yerindəcə həll olunmasına imkan yaradıb: "Dövlət qurumlarında yaradılan Apellyasiya
şuraları ümumilikdə həmin orqanda olan problemləri üzə çıxarır və bununla da şikayətlərin
yaranmasının qarşısı alınır”.
İqtisadçı ekspert Rəşad
Həsənov bildirdi ki, sahibkarların Apellyasiya şuralarına edilən şikayətlərinin
azalmasının bir neçə səbəbi var: "Bunlardan birincisi ondan ibarətdir ki,
dövlət başçısı tərəfindən imzalanmış sahibkarlıq subyektlərində yoxlamaların
dayandırılması iki il müddətində qüvvədə oldu. Daha sonra isə, yəni 2017-ci
ildə ölkə rəhbərinin digər fərmanı ilə bu müddət daha dörd il artırıldı.
Bildiyimiz kimi, bu fərman aidiyyatı dövlət qurumlarının sahibkarlıq sektoruna
birbaşa müdaxiləsini məhdudlaşdırır. Belə olduğu təqdirdə də sahibkarların
qeyri-qanuni sıxışdırılması, onların fəaliyyətinə müdaxilə, maneələrin
yaradılması kimi halları azalır. Bu isə öz növbəsində şikayətlərin sayının
azalmasına da müəyyən qədər təsir göstərir”.
R.Həsənovun sözlərinə görə, şikayətlərin sayının azalmasında digər
bir məqam ümumi mühitlə bağlıdır: "Bildiyimiz kimi, 2015-ci ildən sonra
situasiya dəyişib və real sektora tələbat güclənib. Real sektorun inkişafı
istiqamətində müəyyən addımlar atılır. Dəfələrlə ölkə prezidenti səviyyədə bu
istiqamətdə daha liberal siyasətin həyata keçirilməsi ilə bağlı fikirlər
səsləndirilib. Bu da bir sıra qurumların sahibkarların, real sektor
subyektlərinin fəaliyyətinə müəyyən qədər müdaxiləsinin məhdudlaşması ilə
nəticələndi. Yəni bütövlükdə götürdükdə, bu iki əsas səbəb son nəticədə il
ərzində subyektlər tərəfindən edilən şikayətlərin sayının azalmasına gətirib
çıxarıb”.
İqtisadçı ekspert qeyd etdi ki, Apellyasiya şuralarının işi əslində
bu kimi şikayətlərin qruplaşdırılması və problemlərin aradan qaldırılması istiqamətində
tövsiyə xarakterli təkliflərin hazırlanıb hökumətə təqdim olunmasıdır:
"Əlbəttə, bu qurumların fəaliyyəti əlində cəmlənən şikayətlərdən çıxarılan
nəticələrə uyğun islahat xarakterli təkliflərin ortaya çıxmasına gətirib çıxara
bilər”.
Bəxtiyar MƏMMƏDLİ