Bakı 22°C
Marketinq sammiti keçiriləcək
Son illərdə ölkəmizdə marketinq, biznes, həmçinin marketinq kommunikasiyaları sahəsində
ciddi inkişafın, tendensiyaların sürətli dəyişdiyinin şahid oluruq. Əlbəttə ki,
bütün bu proseslər gözlənilən və eyni zamanda müasir bazar iqtisadiyyatının tələbi
kimi də diqqətimizi çəkir. Hər il ölkədə ixrac potensialından düzgün istifadə
etmək, dövlətin yaratmış olduğu şəraitdən səmərəli yararlanmaq və xarici
bazarlarda sağlam mövqe tutmaq üçün müxtəlif təlim, seminar və digər tədbirlər
keçirilir. Bu zaman nələrə diqqət etmək, hansı standartları tətbiq etmək
lazımdır? Bundan başqa? ixrac siyasətinin düzgün strateji planlamasının
aparılması, marka siyasətinin daha doğru və sağlam qurulması kimi aktual
mövzular da meydana gəlir. Təbii ki, iqtisadiyyatın inkişafında enerji,
logistika, turizm, istehsalat kimi platformalar önəmli rol oynayır.
Məhz bu ilin dekabr ayında təşkil olunacaq
"Marketinq Sammiti 2018- Gün var əsrə bərabər” tədbiri yerli iş adamlarının
maarifləndirilməsi üçün gözəl bir platforma olacaq. Dövlətin strateji yol xəritəsinin əsas cizgilərinə
uyğun olaraq logistika, enerji, turizm sahəsində müasir trendlərə uyğun olaraq
mövzuların və eyni zamanda «Made in Azerbaijan» brendinin formalaşdırılması
imkanlarının müzakirəsi aparılacaq. Tədbirdə spiker qismində Azərbaycandan,
Türkiyədən, Gürcüstandan dəvət olunan mütəxəssislər regionun 3 dost ölkəsi
arasında həyata keçirilən ticari əməkdaşlıqlardan, ölkələrdə tətbiq olunan
dijital platformalardan söhbət açacaqlar. Azpromo, Azərbaycan Dəmir Yolları,
RayCrea, EasyMark şirkətlərinin birlikdə dəstəyi ilə təşkil olunacaq tədbirdə əsas
hədəf beynəlxalq təcrübənin yerli biznes mühitinə adaptasiyasını təmin etmək və
inkişafa birlikdə nail olmaqdır. "Marketing Summit 2018” layihəsinin təşkilatçısı
olan COMUNİCAL şirkətinin rəhbəri, marketinq kommunikasiyaları üzrə mütəxəssis
Tural Abbaslı bildirib ki? "Marketinq Sammiti-2018” müasir marketinq trendlərinin
ölkəmizdə adaptasiyası üçün nəzərdə tutulub: "Artıq bir çox işlər tamamlanıb.
Spikerlər və tədbirin keçiriləcəyi yer haqqında müzakirələr yekunlaşıb. Təşkilatçılar
öz qonaqlarını Bakı Biznes Mərkəzində qarşılamağa hazırlaşır. Təşkilat Komitəsinin
sədri "Easymark” şirkətinin rəhbəri Eyyub Qarabağlı, digər üzvlər isə Seymur
Quliyev, Qələndər Məmmədli və Gülnarə Zeynalova olaraq qəbul edilib.”
