Müxalifətin növbəti dezinformasiyası - Fotolar
Radikallar əlilliyi olan
şəxsin durumundan öz siyasi maraqları üçün yararlanmağa çalışırlar
Radikal müxalifət xalq
tərəfindən dəstəklənmədiyi üçün zaman keçdikcə elektoratını, sosial bazasını
itirir, tamamilə zəifləyir. Onların çağırışlarına, "liderlər”in verdiyi vədlərə
barmaqla sayılacaq qədər şəxs inanır. Həmin adamlar da radikalların
qohum-əqrəbası, dost-tanışlar ancaq olar. Bunu radikal müxalifətin indiyə qədər
keçirdiyi müxtəlif aksiyalara toplaşanların sayından da müşahidə etmək
mümkündür. Özlərini əsa müxalifət hesab edənlərin təşkil etdiyi mitinqlərə 10
milyonluq Azərbaycan xalqının çox cüzi bir hissəsi qatılır. Məhz buna görə də
radikallar ən müxtəlif vasitələrlə gündəmdə qalmağa, siyasi səhnədən
silinməməyə can atırlar. Bu zaman dezinformasiya ilə silahlanıb ictimai rəydə
yanlış təsəvvür yaratmaq, "problemlər” uydurmaqla insanları hakimiyyətdən narazı salmağa cəhdlər etmək onların ən çox
istifadə etdiyi üsuldur. AXCP sədri Əli Kərimli və dəstəkçilərinin timsalında,
həmçinin onların ruporuna çevrilmiş "Azadlıq” qəzetinin onlayn versiyasının və
sosial şəbəkədəki səhifələrinin nümunəsində bunu aydın müşahidə etmək
mümkündür.
Bu günlərdə həmin
resurslarda daha bir belə addım atılıb. 9-10 noyabr tarixlərində Göyçayda
keçirilən "Nar Bayramı”nda iştirak edən əlilliyi olan şəxsin fotosu paylaşılıb.
Əynində hərbi mundir, çiynində baş çavuş rütbəsi, əlil arabasında olan həmin
şəxs "Qarabağ qazisi” kimi təqdim edilib. Ardınca da qeyd edilib ki, guya
"Qarabağ qazisi” acınacaqlı vəziyyətdədir, uşaqlarını məktəbə göndərməyə, dərmanlarını almağa pul
tapmır, ona görə də günəbaxan tumu satmağa məhkum olub. Bu cür təqdimatla
insanların həssaslığından, əlilliyi olan şəxsin durumundan mənsub olduğu siyasi
düşərgənin xeyrinə yararlanmağa çalışıb. Fotodakı şəxsin "Qarabağ qazisi”
olduğuna inanan sosial şəbəkə istifadəçiləri də onun halına acıyıb, "qaziyə”
qarşı belə münasibəti sərt tənqid ediblər.
Bu hadisə diqqətimizi
çəkdiyi üçün dəqiqləşdirmə aparmaq qərarına gəldik. İcra hakimiyyəti başçısının
Göyçay şəhər inzibati ərazidairəsi
üzrə nümayəndəsi Rəşad Şükürovla telefon əlaqəsi (020 274-33-19) saxladıq.
Söhbət əsnasında öyrəndik ki, sosial şəbəkədə fotosu yayılan və "Qarabağ
qazisi” kimi təqdim edilən Göyçay sakini 1976-cı il təvəllüdlü Aydın Qədirovdur.
İcra nümayəndəsinin sözlərinə görə, A.Qədirov anadangəlmə əlilliyi olan
şəxsdir: "Aydın hərəkət məhdudiyyətli, fikrini ifadə etməkdə çətinlik çəkən
rayon sakini, buna rəğmən olduqca vətənpərvər vətəndaşımızdır. O, Vətəninə
sevgisindən, hərbçilərimizə hörmətindən dolayı hərbi mundir geyinir. Təbii
olaraq, hərəkət məhdudiyyətli olduğu üçün nəinki Qarabağ müharibəsində,
ümumiyyətlə hərbi xidmətdə olmayıb. Oturduğu və onun vasitəsilə hərəkət etdiyi
əlil arabasında daim üçrəngli Azərbaycan bayrağını gəzdirir. Bu səmimiyyətinə,
Vətənə olan məhəbbətinə, insanlara olan mehribançılığına görə Göyçayda hər kəs
ona hörmətlə yanaşır. Əlilliyi olan şəxs kimi dövlət tərəfindən ona sosial
müavinət təyin olunub, vaxtlı-vaxtında alır. İcra hakimiyyəti də Aydın Qədirova
biganə qalmır. Qanun və səlahiyyətimiz çərçivəsində Aydına nə kömək və ya
yardım etmək mümkündürsə onu vaxtında edirik. Edilənləri dilə gətirmək doğru
olmasa da yalnız bir faktı qeyd edim ki, onun müraciəti anındaca nəzərə
alınaraq iki dəfə əlil arabası verilib. Ona qarşı heç zaman ayrı-seçkilik
nümayiş etdirilməyib. Rayon sakinlərindən də imkan daxilində ona maddi-mənəvi dəstək
olanlar var”.
İcra nümayəndəsi R.Şükürov əlilliyi
olan şəxs A.Qədirovun günəbaxan tumu satmasına, guya imkansızlıqdan uşaqlarını
məktəbə göndərə bilməməsinə də münasibət bildirib: "Rayonda keçirilən bayram
tədbirlərində, mərasimlərdə, eləcə də ayrı-ayrı şəxslər qurban kəsəndə birinci
Aydının payını ayırırlar. Bunu hər kəs səmimi şəkildə, içdən gələrək edir.
Kimsə ona hansısa formada bir yaxşılıq edəndə, yardım edəndə bundan zövq alır,
mənən rahat olur. Aydının özündən başqa 3 qardaşı da var. Onlardan biri də
anadangəlmə əlilliyi olan şəxsdir. Aydın özü ailəlidir, övladı var. Onun guya
imkansızlıqdan övladını məktəbə göndərə bilməməsi barədə deyilənlər yalandır. O
ki, qaldı günəbaxan tumu satmasına, hələ sovetlər birliyi dövründən onun anası
tum qovurub satıb, indiki yanaşma ilə yanaşsaq, xırda sahibkarlıqla, ticarətlə
məşğul olub, maddi qazanc əldə edib. İndi Aydın da bu işlə məşğul olur, əlavə
qazanc əldə edir. Burada pis olan nədir ki? Onun əlilliyini, sosial durumunu
nəzərə alıb kimsə ona bu işinə görə maneə yaratmır, azad, müstəqil şəkildə işi
ilə məşğul olur. Aydın dilənçilik etmir, əksinə, ticarətini edir, halal ruzisini
qazanır”.
89
saylı Göyçay-Ağdaş seçkidairəsindən Milli Məclisə deputat seçilən millət
vəkili Elman Nəsirov da bildirdi ki, radikal müxalifətin, eləcə də onların
nəzarəti altında olan media qurumlarının, sosial şəbəkələrdəki səhifələrin
ortaya qoyduğu "mövqe” həqiqətdən uzaq olmaqla yanaşı, mənəviyyata da sığmır:
"Göyçayda keçirilən "Nar Bayramı”nda iştirak edərkən rayon sakinləri, digər
vətəndaşlar, seçicilərimlə görüşmək, onlarla söhbətləşmək imkanım oldu. Orada
keçirilən tədbirlərdə iştirak etdim. Deyə bilərəm ki, hər şey yaxşı təşkil
olunmuşdu. "Nar Bayramı”nda öz bağının məhsulunu nümayiş etdirən sakinlər
bundan qazanc əldə edir, öz maddi vəziyyətini yaxşılaşdırırdı. Bunun üçün
onlara hər cür şərait yaradılmışdı. Lakin təəssüflər olsun ki, radikal
müxalifət bütün bunlara da qara yaxmaqdan geri qalmayıb. Sosial şəbəkədən
izlədim ki, bu tədbirdə iştirak edən, əlil arabasında gəzən, hərbi mundir
geyinən bir nəfər "Qarabağ qazisi” kimi təqdim edilir, onun ətrafında
dəqiqləşdirmə aparmadan müzakirələr təşkil olunur. Bununla əlaqədar
dəqiqləşdirmə aparanda isə məlum oldu ki, həmin adam Qarabağ qazisi deyil,
sadəcə əlilliyi olan şəxsdir. Adam xırda ticarətlə məşğul olur, maddi qazanc
əldə edir. Bu adamı məqsədli şəkildə "Qarabağ qazisi” kimi qələmə vermək, guya
qazilərin sosial durumunun ümumən pis olması barədə yanlış rəy formalaşdırmaq
siyasi şou elementindən başqa bir şey deyil. Təəssüf ki, radikal müxalifət
əlilliyi olan şəxslərin durumundan da öz məqsədləri naminə yararlanmağa can
atır, hakimiyyəti nələrdə isə ittiham etmək üçün saxta məlumatlar yayırlar”.
Rufik
İSMAYILOV